ओमन कीहिन कि अमृतकाल म एक विकसित राज्य के रूप म उभरे ले सबो क्षेत्र म समावेशी विकास खातिर एक नवंबर दू हजार चोबीस तक अमृतकाल-छत्तीसगढ़ विजन दू हजार सैंतालिस तियार करे जाही। ओमन यहू कीहिन कि अवइया पांच बछर म हमर राज्य के जीएसडीपी ल पांच लाख करोड़ ले दुगुना करके बछर दू हजार अठाईस तक दस लाख करोड़ करे के लक्ष्य हवय।
वित्त मंत्री ह कहिन कि छत्तीसगढ़ ल बछर दू हजार सैंतालिस तक विकसित राज्य बनाय बर दस आधारभूत रणनीतिक स्तंभ के प्रारूप तैयार करे गेहे, जउन मध्यावधि अउ दीर्घकालिक लक्ष्य ल पाय खातिर मदद करही। एमा गरीब युवा किसान अउ माइलोगन के विकास, तकनीक आधारित रिफार्म, जादा ले जादा पूंजीगत व्यय सुनिश्चित करे, प्राकृतिक संसाधन ल बने ढंग ले बउरे अर्थव्यवस्था के सेवाक्षेत्र के नवा संभावना कोति जोर निजी निवेश म बढ़वार, बस्तर अउ सरगुजा क्षेत्र के विकास, छत्तीसगढ़ी संस्कृति ल बढ़ावा देना एमा शामिल हे ।
बजट म छोटे अउ मध्यम किसान मन ल आर्थिक रूप ले मजबूत बनाय बर कृषक उन्नति योजना म दस हजार करोड़ रूपिया के प्रावधान करे गेहे। अइसने पांच हॉर्स पॉवर के कृषिपंप बर मुफत बिजली आपूर्ति खातिर तीन हजार पांच सौ करोड़ रूपिया राखे गेहे । बजट म प्रधानमंत्री आवास योजना ग्रामीण बर आठ हजार तीन सौ उनहत्तर करोड़ रूपिया राखे गेहे। महतारी वंदन योजना बर तीन हजार करोड़ रूपिया अउ अयोध्याधाम म श्री रामलला दर्शन कराय के योजना बर पैंतीस करोड़ रूपिया तय करे गेहे।
अइसने जलजीवन मिशन खातिर चार हजार पांच सौ करोड़, हायर सेकण्डरी स्कूल के विकास अउ रखरखाव बर तीन हजार नौ सौ बावन करोड़ रूपिया के प्रावधान हे। बजट म मुख्यमंत्री खाद्यान्न सहायता योजना बर तीन हजार चार सौ करोड़ रूपिया राखे गेहे। एखर संगेसंग प्रधानमंत्री ग्राम सड़क योजना बर आठ सौ इकतालिस करोड़ अउ अमृत मिशन योजना खातिर सात सौ करोड़ अउ प्रधानमंत्री जनमन योजना म राज्यांश बर तीन सौ करोड़ रूपिया के प्रावधान हे।
बजट पेश करत वित्त मंत्री ओ.पी. चौधरी ह बताइन कि राष्ट्रीय शिक्षा नीति ल बने बनाय बर छत्तीसगढ़ उच्च शिक्षा मिशन योजना लागू करे जाही। ओमन बताइन कि राज्य के हरएक लोकसभा क्षेत्र म छत्तीसगढ़ इंस्टीट्यूट ऑफ टेक्नॉलाजी-सीआईटी अउ जम्मों संभाग म छत्तीसगढ़ इंस्टीट्यूट ऑफ मेडिकल साइंस-सिम्स के स्थापना करे जाही। एखर संगेसंग बस्तर अउ सरगुजा क्षेत्र म इको पर्यटन अउ प्राकृतिक चिकित्सा केंद्र बनाय जाही। नवा उद्योग ल नीति म शामिल करे बर नवा उद्योग नीति तियार होही।
वित्त मंत्री ह बताइन कि बजट म आईटी सेक्टर ल मजबूत बनाय खातिर जोर दे गेहे। ओमन कीहिन कि प्रशासनिक काम ल बने बनाय अउ साफगोई लाय बर हरएक स्तर म उन्नत डिजिटल तकनीक देवाय बर दू सौ छियांसठ करोड़ रूपिया के प्रावधान हवय। भारत नेट परियोजना खातिर छियांसठ करोड़, पीएम वाणी प्रोजेक्टर बर सैंतीस करोड़ रूपिया, एकीकृत ई-प्रोक्योरमेंट परियोजना बर पंद्रह करोड़, अटल डैश बोर्ड बर पांच करोड़ रूपिया राखे गेहे। अइसने जीएसटी स्टॉम्प पंजीयन, आबकारी, खनिज जल संसाधन विभाग समेत आने जम्मों विभाग म डिजिटल तकनीक ल बढ़ावा देबर रकम के व्यवस्था करे गेहे।
बजट म राज्य सरकार ह स्वास्थ्य सुविधा बर दू हजार पचपन करोड़ रूपिया तय करे हे ।एमा प्रदेश के बीपीएल परिवार ल पांच लाख तक अउ एपीएल परिवार ल पचास हजार रूपिया तक के मुफत स्वास्थ्य सुविधा बर आयुष्मान कार्ड जारी करे गेहे । एखर बर आयुष्मान भारत प्रधानमंत्री जन आरोग्य योजना अउ शहीद वीर नारायण सिंह आयुष्मान स्वास्थ्य योजना चलाय जाही। एखर बर एक हजार छै सौ छब्बीस करोड़ रूपिया के प्रावधान हवय।
छत्तीसगढ़ आयुर्विज्ञान संस्थान बिलासपुर बर सात सौ करोड़ रूपिया के लागत ले नवा भवन बनाय जाही। उंहे शासकीय चिकित्सा महाविद्यालय रायपुर के बारा सौ बिस्तर अस्पताल म बढ़वार करे जाही। एखर बर सात सौ छिहत्तर करोड़ रूपिया के लागत ले सात सौ बिस्तर वाले अस्पताल बनही।
अंबिकापुर म सुपर स्पेशलिटी अस्पताल बनाय बर एम्स असन चिकित्सा सुविधा देवाय जाही। एखर बर पचास करोड़ रूपिया के प्रावधान करे गेहे। वित्त मंत्री ह बताइन कि राजनांदगांव मेडिकल कॉलेज म ट्रामा सेंटर, मनेन्द्रगढ़-कुनकुरी म दू सौ बीस बिस्तर वाले अस्पताल बनाय जाही। उंहे राज्य के तीन सौ प्राथमिक स्वास्थ्य केंद्र, पच्चीस जिला चिकित्सालय अउ अड़तालिस क्रियाशील फर्स्ट रिफरल यूनिट बर लैब टेक्निशियन के तीन सौ तिहत्तर पद म भर्ती ले जाही।
वित्त मंत्री ह कहिन कि धमतरी जिला के कुरूद म पचास बिस्तर वाले सिविल अस्पताल ल सौ बिस्तर अस्पताल म बढ़वार करे जाही। एखर संगेसंग पंद्रह ठिन नवा प्राथमिक स्वास्थ्य केंद्र के स्थापना होही। एखर खातिर दू सौ छिहत्तर पद बनाय जाही।
बजट पेश करत वित्त मंत्री ह कहिन कि विश्व स्तरीय आईटी क्षेत्र, शिक्षा अउ स्वास्थ्य सेवा खातिर रायपुर अउ भिलाई क्षेत्र म राज्य राजधानी क्षेत्र- एससीआर के विकास होही। नवा रायपुर म लाइवलीहुड सेंटर ऑफ एक्सीलेंस अउ भिलाई म उद्यमिता केंद्र के स्थापना होही। रायपुर, नवा रायपुर, बिलासपुर, दुर्ग, भिलाई, अंबिकापुर, जगदलपुर, कोरबा, अउ रायगढ़ जइसन शहर ल ग्रोथ इंजन के रूप म विकसित करे जाही। उंहे कोरबा, जांजगीर, रायगढ़, उरला अउ सिलतरा जइसन उद्योग क्षेत्र ल धियान म राखत उद्योग नीति बनाय जाही। ओमन बताइन कि राज्य के खेल सुविधा अउ बुनियादी ढांचा ल बढ़ावा दे जाही। वित्त मंत्री ओ.पी. चौधरी ह आज छत्तीसगढ़ के विकास म पहिली घांव पेपरलेस डिजिटल बजट पेश करीन।
मुख्यमंत्री विष्णुदेव साय ह आज पेश करे गे बजट म अपन प्रतिक्रिया देवत कीहिन कि ये बजट सिरिफ एक बछर बर नइ भलुक आगू अवइया कतकोन बछर के दौरान छत्तीसगढ़ के विकास ल धियान म राखके बनाय गेहे। एमा प्रदेश के चहुंमुखी विकास हवय। ये बजट म सबो वर्ग के हित ल धियान म राखे गेहे।
उंहे उपमुख्यमंत्री विजय शर्मा ह कीहिन कि ये बजट छत्तीसगढ़ के बढ़वार खातिर आधारशिला साबित होही। प्रदेश भाजपा अध्यक्ष किरण सिंहदेव ह कीहिन क ये बजट प्रदेश के तस्वीर अउ तकदीर बदलइया वाले बजट हे। राज्य के जनता ह पाछू विधानसभा चुनई म जउन भरोसा संग भाजपा ल चुने हे ये बजट वो भरोसा ल पूरा करही।
दूसर कोति प्रदेश कांग्रेस अध्यक्ष दीपक बैज ह कीहिन कि साय सरकार के ये पहिली बजट आम जनता के उम्मीद के खिलाफ निराशाजनक हवय। एमा न रोजगार बढ़ाय बर कोनो रोडमैप हे, अउ न ही महंगाई ले निपटे बर कोनो ठोस प्रयास।
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत राज्य वित्त मंत्री ओपी चौधरी कोति ले अवइया वित्तीय बछर बर पेश करे गे बजट म विशेष कार्यक्रम प्रसारित करे जाही। एखर प्रसारण आकाशवाणी के रायपुर केन्द्र डहार ले काली दस फरवरी के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
छत्तीसगढ़ सरकार ह राजिम माघी पुन्नी मेला के जगा म अब राजिम कुंभ कल्प मेला लगाय के फैसला लेहे। ये फैसला आज विधानसभा परिसर म होय मंत्रिपरिषद के बइठका म ले गीस। एखर बर छत्तीसगढ़ राजिम माघी पुन्नी मेला अधिनियम दू हजार छै ल संशोधित करे बर छत्तीसगढ़ राजिम माघी पुन्नी मेला संशोधन विधेयक दू हजार चौबीस के प्रारूप के अनुमोदन करे गीस।