कोल परमिट-ऑनलाइन
मुख्यमंत्री विष्णुदेव साय ह आज विधानसभा म घोसना करीन कि कोल परिवहन अउ परमिट लेके कामकाज ल ऑनलाइन करे जाही। इखर ले पहिली कांग्रेस सरकार ह ए कामकाज ल ऑफलाइन कर दे रिहीस।
आज विधानसभा म भाजपा विधायक राजेश मूणत ह ध्यानाकर्षण सूचना ले ए मुद्दा उठईन। जवाब म मुख्यमंत्री ह बतईन कि ए पूरा प्रक्रिया ल अब ऑनलाइन करे जावत हे।
खबर के मुताबिक कांग्रेस सरकार म छत्तीसगढ़ म कोल लेवी के नाव म करोड़ों रूपिया के वसूली करे जाय के मामला ईडी ह उजागर करे रिहीस। ए मामला म कतकोन अधिकारी अउ आने मनखे मन ल गिरफ्तार करे गेहे।
कृषि उन्नति योजना
खाद्यमंत्री दयालदास बघेल ह कहिन हे कि प्रदेश म समर्थन कीमत अउ राज्य सरकार के उपार्जन मूल्य म अंतर के राशि के भुगतान जल्दी किसान मन ल करे जाही। एखर बर कृषक उन्नति योजना म बारा हजार करोड़ रूपिया के राशि के प्रावधान अनुपूरक बजट म करे गेहे।
ओमन बताइन कि मोदी के गांरटी ल पूरा करे बर राज्य सरकार ह किसान मनले इक्कीस कुंटल एकड़ पाछू धान बिसाय हे अउ धान के उपार्जन मूल्य इकतीस सौ रूपिया कुंटल तय करीन।
पोषण शक्ति निर्माण योजना
प्रधानमंत्री पोषण शक्ति निर्माण माने मध्यान्ह भोजन योजना के चालू वित्तीय बछर बर पचहत्तर करोड़ अठ्यासी लाख रूपिया ले जादा के चौथा किस्त सिंगल नोडल एजेंसी के खाता म आबंटित कर दे गेहे। ये रकम मटेरियल कास्ट, रसोइया मानदेय अउ प्रबंधन व्यवस्था म खर्च करे जाही। लोक शिक्षण संचालनालय ह चिट्ठी जारी करके केहे हे कि आबंटित रकम के खर्च पीएफएमएस पोर्टल ले करे जाना हे अउ जेखर बर जतका रकम दे गेहे ओखर ले जादा के खर्च नइ कर के निर्देश हवय।
अयोध्या ट्रेन-रवाना
श्रीराम लला दर्शन योजना म आज दुरूग रेलवे स्टेसन ले आस्था स्पेसल ट्रेन अयोध्या बर रवाना करे गीस। ए ट्रेन ल कैबिनेट मंत्री श्यामबिहारी जायसवाल अउ दयालदास बघेल, प्रदेस भाजपा अध्यक्ष किरण सिंह देव अउ विधायक धरमलाल कौशिक ह हरियर झंडी देखाके रवाना करीन। ए ट्रेन ले दुरूग संभाग के सबो आठ जिला ले एक हजार तीन सौ चवालीस श्रद्धालु मन ल रामलला के दर्सन बर अयोध्या ले जाय गीस।
मुख्यमंत्री विष्णुदेव साय ह ट्वीट करके आस्था स्पेशल ट्रेन ले अयोध्या के यात्रा म जवइया श्रद्धालु मन ल सुभकामना दीन।
अग्निवीर भर्ती रैली
थल सेना म आने-आने पद म अग्निवीर सैनिक मनके भर्ती बर काली आठ फरवरी ले ऑनलाइन अरजी के काम सुरू होही। एखर बर अधिसूचना जारी करे गेहे। अग्निवीर के भर्ती जनरल, तकनीक, क्लर्क, ट्रेडमैन, महिला सैन्य पुलिस अउ रेगुलर कैडर भर्ती, धर्मगुरू, नर्सिंग सहयोगी, हवलदार के पद पर होही। उहें, अग्निवीर क्लर्क के पद के नाव बदल के अग्निवीर ऑफिस अस्टिंट कर दे गेहे। ए पद म भर्ती बर उम्मीदवार ल ऑनलाइन परीक्षा के बेरा टायपिंग टेस्ट घलो दे बर पड़ही। सेना भर्ती कार्यालय के प्रभारी अधिकारी ह बतईन कि ऑनलाइन अरजी जमा करे ले जुड़े पोर्टल अवइया इक्कीस मार्च तक खुले रइही। ए भर्ती बर ऑनलाइन परीक्षा अप्रैल महीना म होय के संभावना हे। एसो बस्तर संभाग बर जगदलपुर म ऑनलाइन परीक्षा केन्द्र बनाय जात हे।
इही बीच, वायुसेना म अग्निवीर भर्ती खातिर ऑनलाइन पंजीयन अउ आवेदन के आखिरी तारीख बढ़ाके ग्यारह फरवरी कर दे गेहे।
मुख्य न्यायाधीश न्यायालय निरीक्षण
छत्तीसगढ़ उच्च न्यायालय के मुख्य न्यायाधीश रमेश सिन्हा ह काली दंतेवाड़ा जिला अउ सत्र न्यायालय के वचुअर्ल जांच करीन। ये दौरान मुख्य न्यायाधीश ह न्यायालय के अधोसंरचना ल देखीन अउ जरूरी सुविधा देवाय के निर्देश दीन। ओमन स्पष्ट करीन कि कोनो भी बेरा सोझे जिला न्यायालय अउ राज्य के कोनो भी न्यायालय ले वीडियो कॉन्फ्रेसिंग ले जांच कर सकत हे। ओमन कीहिन कि सबो न्यायाधीश अपन न्यायालय के लंबित प्रकरण के जानकारी रांखय।
राशनकार्ड नवीनीकरण
प्रदेश के सार्वजनिक वितरण प्रणाली म अभी चलत जम्मों सतहत्तर लाख राशनकार्ड के नवीनीकरण के काम चलत हे। अभी तक तैंतालिस लाख तिरासीं हजार ले जादा राशन कार्डधारी मन ह नवीनीकरण बर अर्जी दे देहे। उंहे लोगन मन अपन मोबाइल ले खाद्य विभाग के ऐप ले नवीनीकरण बर ऑनलाईन अर्जी करत हे। एमा बालोद जिला अव्वल स्थान म हवय। इंहा अभी तक एक लाख सत्तर हजार ले जादा हितग्राही मन ह ऑनलाईन सुविधा के फायदा लेहे। नवीनीकरण के काम पंद्रह फरवरी तक चलही। उंहे अइसन हितग्राही जिखंर तीर एनड्रॉयड मोबाइल नइ हे, या जिहां मोबाइल कनेक्टिवीटी नइ हे उंहा उचित मूल्य के दुकान म नवीनीकरण बर ऑनलाईन अर्जी जमा करे के सुविधा दे जावत हे ।
शिक्षक भर्ती काउंसिलिंग
प्रदेश म शिक्षक मनके सोझे भर्ती म शिक्षक पद बर उम्मीदवार मनके चौथइया पारी के ऑनलाइन काउंसिलिंग काली आठ फरवरी ले शुरू होही। ये काउंसिलिंग स्कूल शिक्षा विभाग के वेबसाईट ले दस फरवरी तक करे जाही। एमा तेरा सौ बंयालिस उम्मीदवार ल शामिल करे गेहे।
उंहे राज्य के शासकीय औद्योगिक प्रशिक्षण संस्था मन म छात्रावास अधीक्षक अउ छात्रावास अधीक्षिका के पद अइसन उम्मीदवार जउन दस्तावेज सत्यापन के बाद पात्र पाय गेहे, ओमन काली आठ फरवरी के बीहनिया ले रतिहा बारा बजे तक चिप्स के पोर्टल के माध्यम ले ऑनलाईन काउंसिलिंग म भाग लेके पदस्थापना खातिर संस्था के विकल्प भर सकत हे । एखर बर उम्मीदवार ल सूचना भेजे जात हे।
मुख्य सचिव निर्देश
मुख्य सचिव अमिताभ जैन ह बस्तर संभाग के पांच ठिन जिला के माओवाद प्रभावित चिन्हित ग्राम पंचायत म केंद्र अउ राज्य सरकार के जनकल्याकारी योजना ले जम्मों पात्र मनखे मन ल फायदा पहुंचाय बर ठोस कदम उठाय के निर्देश दीन हे। ये जिला म दंतेवाड़ा, सुकमा, बीजापुर, नारायणपुर अउ कांकेर शामिल हवय। वीडियो कॉन्फ्रेसिंग ले बइठका लेत मुख्य सचिव ह ग्राम पंचायत मन म पात्र लोगन ल योजना के फायदा देवाय खातिर शिविर लगाय के निर्देश दीन।
भाजपा-शक्ति वंदन अभियान
भारतीय जनता पार्टी ह सक्ति वंदन अभियान म देस भर म दस करोड़ ले जादा माईलोगन मन ल विकसित भारत के संकल्प ले जोड़े के लक्ष्य राखे हे। ए जानकारी सक्ति वंदन कारीकरम के प्रदेस संयोजक प्रबल प्रताप सिंह जुदेव ह आज रईपुर म एक पत्रकार वार्ता म दीन। ओमन किहीन कि ए कारीकरम ले समाज के ओ वरग तक पहुंच के परयास करे जात हे। जउन सामाजिक काम ले जुड़ के लोगन के मदद करत हे। ओमन किहीन कि ए अभियान म एक करोड़ स्व-सहायता समूह अउ एनजीओ ले संपर्क करके दस करोड़ ले जादा माईलोगन ल जोड़े जाही। एमा छत्तीसगढ़ ल साढ़े तीन लाख ले जादा समूह ले आठ लाख माई लोगन ल जोड़े के लक्ष्य राखे गेहे। ए योजना म कतकोन कारीकरम के आयोजन करे जाही जेमा दस अउ ग्यारा फरवरी के विधानसभा स्तर म सक्ती वंदन सम्मान समारोह होही। बारा ले बीस फरवरी तक ग्राम स्तर म संपर्क अभियान चलाय जाही। बाईस अउ तेईस फरवरी के प्रधानमंत्री ह एनजीओ अउ स्व सहायता समूह संग गोठबात करही। ए कार्यक्रम के सोझे प्रसारण मंडल स्तर म प्रोजेक्टर ले देखाय जाही।
समाचार सेवा प्रभाग आवेदन
आकाशवाणी के समाचार सेवा प्रभाग रायपुर ह अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्ति बर अनुभवी उम्मीदवार ले अर्जी मंगावत हे। एखर जम्मों जानकारी न्यूज ऑन एआईआर डॉट जीओवी डॉट इन/वैकेंसीज म हवय। अर्जी जमा करे के आखिरी तारीख आठ फरवरी राखे गेहे।
ए अनुबंध ह दू बछर बर हवय। आवेदक के उमर अंठावन बछर ले जादा नइ होना चाही। उंखर मन तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के काम-काज के अनुभव होना जरूरी हे।