छत्तीसगढ़ विधानसभा के बजट सत्र के दूसर दिन आज सदन म चावल घोटाला अउ धान खरीदी के मामला गूंजीस। एमा खाद्य मंत्री ह घोसना करीन कि कांग्रेस सासनकाल म होय चावल घोटाला के जांच विधायक मनके समिति ले कराय जाही। प्रश्नकाल म भाजपा सदस्य धरमलाल कौशिक ह चावल घोटाला के मामला उठईन। ओमन किहीन कि कतका राशन दुकान उपर एफ.आई.आर. दर्ज करे गेहे अउ के झन अधिकारी मन ल सस्पेंड करे गेहे, ए बात के जानकारी दे जाय। मंत्री दयालदास बघेल ह किहीन कि ए मामला के परीक्षण कराके कार्रवाई करे गेहे। सदस्य धरमलाल कौशिक ह किहीन कि पूर्व खाद्य मंत्री अमरजीत भगत ह कांग्रेस सरकार के समय म मार्च दू हजार तेईस तक रासन घोटाला के जांच कराय के बात सदन म केहे रिहीन। फेर एमा कोई कार्रवाई नइ करे गीस। उहें, खाद्य मंत्री ह किहीन कि करीबन दू सौ बाईस दुकान निलंबित करे गेहे, एक सौ इक्यासी निरस्त अउ चौबीस झन दुकानदार मन उपर एफआईआर दर्ज करे गेहे। एखर उपर भाजपा सदस्य मन ह किहीन कि जांच प्रतिवेदन उपर उचित कार्रवाई नइ होय हे। खाद्य मंत्री ह स्पष्ट करीन कि ए मुद्दा मोर कार्यकाल के नइ हवय, तभो ले एखर जांच समिति ले कराय जाही।
उहें, आज सदन म धान खरीदी के मुद्दा उपर विपक्षी सदस्य मन ह सदन के कार्यवाही ले बहिर्गमन करीन। सून्यकाल म विपक्षी सदस्य उमेश पटेल ह जानना चाहीन कि प्रदेस म बेचे गे धान के रकबा कतका हे। एखर जवाब म खाद्य मंत्री दयालदास बघेल ह बतईन कि धान के रकबा सत्ताईस लाख बयानवे हजार हेक्टेयर क्षेत्र हे। सदस्य उमेश पटेल ह किहीन कि पाछु बछर जतका रकबा के धान बेचे गे रिहीस, ओ ए बछर के तुलना म जादा रिहीस।
विस-राशन गड़बड़ी-धान खरीदी-02
मंत्री ह किहीन कि धान के रकबा कमती होय हे। मंत्री के जवाब के बाद विपक्षी सदस्य मन ह किहीन कि ए बछर धान खरीदी कम होय हे। सत्तापक्ष के सदस्य मन ह विपक्ष के सवाल उपर आपत्ति करीन अउ विधानसभा अध्यक्ष डॉक्टर रमन सिंह ह ए मामला म व्यवस्था दे बर किहीन। सदस्य उमेश पटेल ह किहीन कि मंत्री डहार ले बने जवाब नइ आय हे, तेखर सेती अध्यक्ष महोदय ओमन ल स्पष्ट जवाब दे बर निरदेसित करय।
इही बीच, पूर्व मुख्यमंत्री भूपेश बघेल ह किहीन कि राज्य के कतकोन जघा म किसान मन ह अभी घलो धान नइ बेच पाय हे। उहें, सदस्य उमेश पटेल ह समिति के प्रबंधक मन उपर किसान मन ल धमकाय के आरोप लगईन। विपक्षी सदस्य मन ह धान खरीदी के समय-सीमा बढ़ाय जाय के मांग करीन, जेला खारिज कर दे गीस। एखर विरोध म विपक्षी सदस्य मन ह सदन के कार्यवाही ले बहिर्गमन कर दीन।
हेलीकॉप्टर/विमान-किराया
पूर्ववर्ती कांग्रेस सरकार ह चार बछर के दउरान विमान के किराया अउ हेलीकॉप्टर उपर करीबन पौने दू सौ करोड़ खर्च करीन हे। ए जानकारी मुख्यमंत्री विष्णुदेव साय ह अपन लिखित उत्तर म दीन। भाजपा सदस्य राजेश मूणत ह जानना चाहिन कि एक जनवरी दू हजार उन्नीस ले नवंबर दू हजार तेईस तक हेलीकॉप्टर अउ विमान बर कांग्रेस सरकार ह कतका भुगतान करे रिहीस। एखर जवाब म मुख्यमंत्री ह बतईन कि सरकारी यात्रा अउ दउरा बर निजी हेलीकॉप्टर अउ विमान कंपनी ल किराया म ले गे रिहीस। हेलीकॉप्टर बर निजी कंपनी ल एक सौ नब्बे करोड़ इकसठ लाख तिरानवे हजार रूपिया के भुगतान करे गे रिहीस। उहें, निजी विमान बर किराया के रूप म तिहत्तर करोड़ पैंसठ लाख चौव्वन हजार रूपिया ले जादा के रासि के भुगतान करे गे रिहीस। कांग्रेस सरकार ह कुल मिलाके दू सौ चौसठ करोड़ सत्ताईस लाख अड़तालीस हजार रूपिया ले जादा के भुगतान करीन। मुख्यमंत्री ह बतईन कि पूर्ववर्ती सरकार ह निविदा बुलाके हेलीकॉप्टर अउ विमान सेवा लीस अउ सरकारी मद ले भुगतान करीस।
प्रधानमंत्री ग्राम सड़क योजना
प्रधानमंत्री ग्राम सड़क योजना-पीएम.जी.एस.वाई. के सुरूवात ले लेके अभी तक छत्तीसगढ़ ल बारह हजार दू सौ उन्नीस करोड़ रूपिया ले जादा के रासि केन्द्रीय अंश के रूप म जारी करे गेहे। ए जानकारी लोकसभा म आज केन्द्रीय ग्रामीण विकास राज्यमंत्री साध्वी निरंजन ज्योति ह रईपुर सांसद सुनील सोनी के सवाल के लिखित जवाब म दीन।
महतारी वंदन योजना
प्रदेस म महतारी वंदन योजना म आवेदन भरे के प्रक्रिया सुरू होगे हवय। पहिली दिन काली एक लाख इक्यासी हजार ले जादा माईलोगिन मन ह आवेदन करीन। रईपुर जिला म तेरह हजार ले जादा आवेदन मिलीस। उहें, सुकमा जिला म पहिलीच दिन करीबन सोलह सौ माईलोगिन मन ह आवेदन भरीन। आवेदन पत्र भरे म माईलोगिन मन ल कोनों परेसानी झन होवय, तेखर बर जिला प्रसासन डहार ले खास तैयारी करे गेहे। ए योजना म ऑनलाइन आवेदन घलो दे जा सकत हे।
इही बीच, महिला अउ बाल विकास विभाग ह महतारी वंदन योजना म आवेदन बर सोशल मीडियो प्लेटफॉर्म म वायरल होवत फर्जी लिंक ले सावधान रेहे के अपील माईलोगिन मन ले करे हे। विभाग के अधिकारी मन ह किहीन कि महतारी वंदन योजना के फायदा ले बर विभाग डहार ले वेबसाइट अउ मोबाइल ऐप जारी करे गेहे। एमा माईलोगिन मन ह ऑनलाइन निःशुल्क आवेदन कर सकत हे। एखर अलावा, आंगनबाड़ी केन्द्र, ग्राम पंचायत सचिव, बाल विकास परियोजना अधिकारी अउ वार्ड प्रभारी ले संपर्क करके उंखर लॉगिन यूजर आईडी ले घलो आवेदन करे जा सकत हे।
रामलाल दर्शन-स्पेशल ट्रेन
अयोध्या म रामलला दर्शन बर छत्तीसगढ़ ले दूसर आस्था स्पेशल ट्रेन काली दुरूग ले रवाना होही। ए ट्रेन म दुरूग संभाग के सबो आठ जिला ले एक हजार तीन सौ चवालीस श्रद्धालु मन ल दर्सन बर अयोध्या ले जाय जाही। ए ट्रेन म सुरक्षा प्रहरी अउ आई.आर.सी.टी.सी. के कर्मचारी मन घलो संग म रइही। पंजीकृत यात्री मनके अलावा दूसर कोनों भी यात्री ट्रेन म यात्रा नइ कर सकही। ट्रेन म यात्रा के दउरान श्रद्धालु मन ल भोजन बर कोनों उपरहा रासि नइ देना होही। अयोध्या पहुंचे के बाद उंखर रूके के, खाय के अउ स्थानीय मंदिर म दर्सन बर परिवहन के व्यवस्था निःशुल्क रइही।
प्रदेश अध्यक्ष-बयान
भारतीय जनता पार्टी के प्रदेस अध्यक्ष किरण सिंह देव ह किहीन हे कि केन्द्र सरकार ह ‘‘भारत चावल योजना‘‘ लांच करके लोगन के हित म बने काम करे हे। ओमन किहीन कि छत्तीसगढ़ सरकार ह अनपूरक बजट म किसान मन बर धान खरीदी के अंतर के राशि बारह सौ करोड़ रूपिया के प्रावधान करीन हे। श्री देव ह किहीन कि राज्य सरकार ह गरीब परिवार ल प्रधानमंत्री गरीब कल्याण योजना म बछर दू हजार अट्ठाईस तक मुफ्त चावल देके मोदी के गारंटी ल पूरा करे के फइसला ले हवय। ए घोसना ले छत्तीसगढ़ म करीब अड़सठ लाख अंत्योदय, प्राथमिकता, एकल निराश्रित अउ निःशक्तजन राशनकार्डधारी मन ल मासिक पात्रता के अनुसार चावल दे जाही।
स्वास्थ्य मंत्री-अस्पताल निरीक्षण
स्वास्थ्य मंत्री श्याम बिहारी जायसवाल ह काली रईपुर के डॉक्टर भीमराव अंबेडकर स्मृति चिकित्सालय के निरीक्षण करीन। ए दउरान ओमन ह मेडिसीन वार्ड अउ गहन चिकित्सा इकाई जाके वार्ड म भर्ती मरीज मनके परिवारा मन ले गोठबात करीन। ओमन ह डॉक्टर मन ले किहीन कि वार्ड म भर्ती मरीज मनके संगेच दुर्घटना म घायल मरीज मनके बने इलाज करय। स्वास्थ्य मंत्री ह डायलिसिस यूनिट के अवलोकन करत किहीन कि जरूरत पड़े म डायलिसिस मसीन के संख्या बढ़ाय जाही।
समाचार सेवा प्रभाग आवेदन
आकाशवाणी के समाचार सेवा प्रभाग रायपुर ह अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्ति बर अनुभवी उम्मीदवार ले अर्जी मंगावत हे। एखर पूरा जानकारी न्यूज ऑन एआईआर डॉट जीओवी डॉट इन/वैकेंसीज म हवय। अर्जी जमा करे के आखिरी तारीख आठ फरवरी राखे गेहे।
ए अनुबंध ह दू बछर बर राखे गेहे। आवेदक के उमर अंठावन बछर ले जादा नइ होना चाही। उंखर मन तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के काम-काज के अनुभव होना जरूरी हे।