विस राज्यपाल अभिभाषण
छत्तीसगढ़ विधानसभा के बजट सत्र आजले शुरू होगे हे। सत्र के शुरूआत राज्यपाल विश्वभूषण हरिचंदन के अभिभाषण ले होइस। राज्यपाल ह अपन अभिभाषण म कीहिन कि प्रदेश के वर्तमान सरकार ह समृद्ध किसान संपन्न प्रदेश के अवधारणा म अमल करत किसान मन ल धान खरीदी के बकाया बोनस राशि बांटे हे। उंहे पात्र माइलोगिन हितग्राही ल हर महीना एक हजार रूपिया के सहायता राशि देबर महतारी वंदन योजना ल घलो मंजूरी देहे। संगेसंग तेंदूपत्ता संग्राहक परिवार मनल मानदेय घलो डेढ़ हजार रूपिया बढ़ाय अउ प्रधानमंत्री आवास योजना म छूटे हितग्राही मन ल अठारा लाख पक्का मकान देवाय के प्रक्रिया घलो शुरू करे गेहे।
उंहे ए बखत राज्य सरकार ह अपन घोषणा के अनुरूप प्रति एकड़ इक्कीस कुंटल धान खरीदी के वादा घलो निभाय हे। राज्यपाल ह कहिन कि प्रधानमंत्री जनजाति आदिवासी न्याय महाअभियान पीएम जनमन डहार ले बैगा, कमार, पहाड़ी कोरवा, बिरहोर अउ अबूझमाड़िया जइसन विशेष रूप ले पिछड़े जनजाति समूह ल पक्का मकान अउ शुद्ध पेयजल संग आने सुविधा देवाय के दिशा म जरूरी कदम उठाय गेहे ।
राज्यपाल ह कहिन कि राज्य सरकार ह छत्तीसगढ़ के लोगन ल अयोध्या म श्री रामलला के दर्शन बर विशेष योजना शुरू करे हे। इही कड़ी म राज्य सरकार ह प्रदेश के करीबन पांच हजार पंजीकृत रामायण अउ भजन मंडली ल प्रोत्साहन राशि देवत हे। राज्यपाल ह कहिन कि प्रदेश के स्थानीय निवासी ल शासकीय सेवा म भर्ती बर अधिकतम आयुसीमा के छूट म पांच बछर बढ़ाय के फैसला ले प्रदेश के युवा प्रतियोगी परीक्षा बर नवा तरीका ले तैयार होही।
राज्यपाल ह शिक्षा, स्वास्थ्य, रोजगार के संग माइलोगिन अउ नोनी मनके सुरक्षा ले जुड़े केंद्र अउ राज्य के आने आने योजना के चर्चा करत कीहिन कि ए योजना ले लक्षित समूह ल लाभ पहुंचाय बर राज्य सरकार ह हरसंभव प्रयास करत हे।
धान खरीदी
प्रदेस म समर्थन मूल्य म धान खरीदी के काम काली देर संझा तक पूरा होगे हे। ए बखत करीबन एक सौ पैंतालिस लाख मीटरिक टन धान के खरीदी करे गेहे। जउन ह छत्तीसगढ़ राज्य निर्माण के बाद ले सर्वाधिक मात्रा म धान के खरीदी के नवा कीर्तिमान रचे हे। ए ह पाछू बछर होय धान के खरीदी के करीबन अड़तालिस लाख मीटरिक टन जादा हे।
खाद्य अउ नागरिक आपूर्ति विभाग के अधिकारी मन ह बताइन कि धान खरीदी के प्रक्रिया काली रात तक चले के सेती प्रदेशभर ले आखरी आंकड़ा मिलना अभी बाकी हे। ए बछर धान बेचे बर राज्य के करीबन सत्ताईस लाख किसान मन ह अपन पंजीयन कराय रीहिन। एमा ले चौबीस लाख बहत्तर हजार ले जादा किसान मन ह राज्य सरकार के आने आने सहकारी समिति मन म अपन धान के बिक्री करे हे। ए किसान मन ल अब तक करीबन तीस हजार उनहत्तर करोड़ रूपिया भुगतान करे जा चुके हे।
अग्निवीर भर्ती कार्यशाला
थल सेना म आने आने पद म अग्निवीर सैनिक के भर्ती बर ऑनलाईन आवेदन आठ फरवरी ले करे जा सकथे। रायपुर स्थित सेना भर्ती कार्यालय के प्रभारी अधिकारी ह बताइन कि ऑनलाईन आवेदन जमा करे ले संबंधित पोर्टल इक्कीस मार्च तक खुले रीही। अभ्यर्थी मनके सुविधा अउ जानकारी बर रायपुर के शहीद स्मारक भवन म बीते अठारा जनवरी के एक ठिन कार्यशाला के आयोजन घलो करे गे रीहिस। एमा रायपुर के संग बलौदाबजार, गरियाबंद, महासमुंद अउ धमतरी के रोजगार अधिकारी, जिला शिक्षा अधिकारी, औद्योगिक प्रशिक्षण संस्था के प्राचार्य अउ आने आने स्कूल के प्राचार्य संग करीबन चार सौ अभ्यर्थी मन शामिल होइन।
सेना भर्ती कार्यालय के अधिकारी ह बताइन कि ऑनलाईन परीक्षा अप्रैल अउ मई महीना म होय के संभावना हे। उंहे जांजगीर-चांपा जिला के कलेक्टर आकाश छिकारा ह अग्निवीर सैनिक मनके भर्ती के संबंध म अधिकारी मनके बैठक लीन। एमा आईटीआई, पॉलिटेक्निक अउ आने आने स्कूल के प्राचार्य शामिल होइन। कलेक्टर ह कहिन कि सबो शिक्षण संस्थान म पात्र अभ्यर्थी ल जादा ले जादा संख्या म अग्निवीर भर्ती प्रक्रिया म शामिल होय बर प्रेरित करे जाय।
खबर के मुताबिक भारतीय वायु सेना म अग्निवीर सैनिक मनके भर्ती बर ऑनलाईन आवेदन के प्रक्रिया काली पूरा होवत हे ।एखर बर ऑनलाईन परीक्षा सतरा मार्च के करे जाही।
महतारी वंदन योजना
प्रदेस म महतारी वंदन योजना म ऑनलाईन अउ ऑफलाईन आवेदन के पंजीयन आज ले शुरू होगे हे। आवेदन जमा करे के आखरी तारीख बीस फरवरी हे। आठ मार्च के पात्र महिला हितग्राही मनके खाता म राशि जमा करे जाही। महिला सशक्तिकरण ल बढ़ावा देके उद्देश्य ले प्रदेश म महतारी वंदन योजना अवइया एक मार्च ले लागू करे जाही। ए योजना म आवेदन पत्र म मांगे गे जानकारी के संबंध म हितग्राही मन ल जागरूक करे बर आने आने जिला म कार्यशाला के आयोजन घलो करे जात हे। जेखर ले माइलोगिन मन ल फार्म भरे म कोनो प्रकार परेसानी झन होवय। ए योजना के हितग्राही महतारी वंदन के नाम ले बनाये गे पोर्टल अउ मोबाईल ऐप के माध्यम ले घलो आवेदन जमा कर सकथे। महिला अउ बाल विकास विभाग ह ए स्पष्ट करे हे कि कहूं कोनो महिला के तीर ओखर बिहाव ले जुड़े दस्तावेज नइ हे, त वो ह एखर बर स्वघोषणा शपथ पत्र दे सकथे।
खबर के मुताबिक महतारी वंदन योजना के लाभ लेबर पात्र विवाहित माइलोगिन ल राशनकार्ड, आधारकार्ड, मतदाता परिचय पत्र, विवाह प्रमाण पत्र, निवास प्रमाण पत्र अउ ग्राम पंचायत या वार्ड पार्षद डहार ले जारी प्रमाण पत्र जमा करे बर केहे गेहे। एमा प्रदेश के स्थायी निवासी अउ विवाहित माइलोगिन ल ही पात्र माने गेहे जउन ह ए बछर एक जनवरी के इक्कीस बछर के उमर पूरा कर चुके हे। ए योजना म विधवा, तलाकशुदा अउ परित्यक्ता माइलोगिन ल घलो पात्र माने जाही। ए योजना म पात्र माइलोगिन ल हर महीना एक हजार रूपिया सीधा उंखर बैंक खाता म जमा करे जाही। उंहे जउन माइलोगिन ल सामाजिक सहायता कार्यक्रम या कोनो पेंशन योजना के अंतर्गत एक हजार रूपिया ले कम सहायता राशि मिलत हे, ओमन ल पेंशन के राशि के संग बांचे गे राशि के भुगतान करे जाही। जेखर ले कुल रकम एक हजार रूपिया हो सकय।
माओवादी सामग्री जब्त
कांकेर जिला म परतापुर क्षेत्र के वट्टेकाल के जंगल म तलाशी अभियान म गे सुरक्षा बलके जवान मन ह माओवादी मनके ठिकाना ले एक भरमार बंदूक, एक प्रेशर बम अउ दैनिक उपयोग के आने सामान बरामद करे हे। पखांजूर के अनुविभागीय पुलिस अधिकारी रवि कुजुर ह बताइन कि माओवादी मन ह सुरक्षा बल के जवान मन ल रोके बर बारूदी विस्फोट करीन। फेर सुरक्षा बलके जवान मन ह अपन अभियान जारी रखीस। इही बीच माओवादी जंगल के फायदा उठाके भागे म सफल होगे। फेर सुरक्षा बलके जवान ह घटनास्थल ले एक बंदूक संग आने सामान बरामद करीन।
ओति राजनांदगांव पुलिस डहार ले महाराष्ट्र के पुणे म गिरप्तार करे गे माओवादी ले पूछताछ के तियारी करे जात हे। बताय गेहे कि गिरप्तार माओवादी महाराष्ट्र के गढ़चिरौली अउ राजनांदगांव ले लगे सीमावर्ती इलाका म होय घटना म शामिल रेहे हे।
समाचार सेवा प्रभाग आवेदन
आकाशवाणी के समाचार सेवा प्रभाग रायपुर ह अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्ति बर अनुभवी उम्मीदवार ले अर्जी मंगावत हे। एखर पूरा जानकारी न्यूज ऑन एआईआर डॉट जीओवी डॉट इन/वैकेंसीज म हवय। अर्जी जमा करे के आखिरी तारीख आठ फरवरी राखे गेहे।
ए अनुबंध ह दू बछर बर राखे गेहे। आवेदक के उमर अंठावन बछर ले जादा नइ होना चाही। उंखर मन तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के काम-काज के अनुभव होना जरूरी हे।