उहें, राज्य के वित्त मंत्री ओपी चौधरी नौ फरवरी सुकरार के अवइया वित्तीय बछर बर बजट पेस करहीं। ए बजट ह मंझनिया साढ़े बारा बजे पेस करे जाहीं वित्त मंत्री के बजट भाषण सोज्झे प्रसारण घलो आकाशवाणी अउ दूरदर्सन ले करे जाही। बजट उपर बारह अउ तेरह फरवरी के सामान्य चर्चा होही। उहें, चौदह ले छब्बीस फरवरी तक विभाग वार अनुदान मांग उपर चर्चा करे जाही।
एखर पहिली पांच फरवरी के चालू वित्तीय बछर बर तृतीय अनुपूरक अनुमान पेस करे जाही। जेखर उपर छै फरवरी के चर्चा होही।
विधानसभा अध्यक्ष डॉक्टर रमन सिंह ह आज पत्रकार मनले गोठबात करत किहीन कि ए बात के परयास हे कि छत्तीसगढ़ विधानसभा के काम काज ल पूरा तरह ले डिजीटलीकरण करके एला पेपर लेस बनाय जाय। ओमन यहू किहीन कि मोबाइल ऐप समेत सोसल मीडिया प्लेटफार्म के जरिया बजट के संगे सदन ले जुड़े कार्रवाई अउ आने जानकारी ल आसानी ले पा सकय। ए कोसिस करे जात हे। ओमन किहीन कि छत्तीसगढ़ के स्थापना ल बछर दू हजार पच्चीस म पचीस बछर पूरा हो जही। ए मउका म राज्य के विधानसभा ल नवा विधानसभा भवन म स्थानांतरित करे के परयास करे जात हे।
महतारी वंदन योजना-01
प्रदेस म महतारी वंदन योजना के तहत काली पांच फरवरी ले एखर बर आवेदन के पंजीयन ऑनलाइन अउ ऑफलाइन सुरू होही। आवेदन जमा करे के आखिरी तारीख बीस फरवरी हरय। एखर बाद अंतिम सूची ले पहिली एक ठिन सूची इक्कीस फरवरी के जारी करे जाही। सूची उपर दावा आपत्ति एक्कीस ले पच्चीस फरवरी तक करे जा सकही। ओखर बाद आपत्ति के निराकरण छब्बीस ले उनतीस फरवरी तक करे जाही अंतिम सूची के प्रकासन एक मार्च के होही अउ स्वीकृति पत्र पांच मार्च के जारी होही। तहां आठ मार्च के पात्र माईलोगिन हितग्राही मनके खाता म रासि जमा करे जाही।
इहां ए बतादन कि राज्य सरकार ह महिला सशक्तिकरण ल बढ़ावा देके उद्देस्य ले प्रदेस म महतारी वंदन योजना अवइया एक मार्च ले लागू करइया हे। ए योजना के चलत राज्य के स्थानीय निवासी अउ विवाहित माईलोगिन ह एखर बर पात्र होही। आवेदन बर हितग्राही माईलोगिन के उमर ह इक्कीस बछर ले कम नही होना चाही। बेवा, तालाक सुदा, परितयक्ता, माईलोगिन घलो योजना बर पात्र रइही। ए योजना म पात्र माईलोगिन ल हर महिना एक हजार रूपिया के भुगतान डीबीटी के माध्यम ले करे जाही। सामाजिक सहायता कारीकरम कई ठिन योजना मन ले पेंसन झोकइया माईलोगिन मन ल कहू एक हजार रूपिया ले कम पेंसन मिलथे त बांचे अंतर के रासि ल भुगतान करे जाही।
महतारी वंदन योजना-02
महतारी वंदन योजना के लाभ लेबर स्वयं द्वारा सत्यापित खुद के पास पोर्ट साइज फोटो, स्थानीय निवासी बारे म निवास प्रमाण पत्र, रासन कार्ड या वोटर आईडी, खुद के या फेर अपन गोसइया के आधार कार्ड यदि हवय तो खुद के या गोसइया के पेन कार्ड, बिहाव प्रमाण पत्र, ग्राम पंचायत अउ स्थानीय निकाय डहार ले जारी होय प्रमाण पत्र के जरूअत होही। बेवा होय के स्थिति म गोसइया के मृत्यु प्रमाण पत्र, परित्यक्ता याने छोड़ दे वाले स्थिति म समाज डहार ले या ग्राम पंचायत डहार ले जारी प्रमाण पत्र प्रस्तुत करना होही। जन्म प्रमाण पत्र के संबंध म कक्षा दसवीं या बारहवीं के मार्गसीट या टीसी, पेन कार्ड, वोटर आईडी, ड्राइविंग लाइसेंस ए सब म ले कोई एक ठिन प्रस्तुत करना होही। पात्र हितगा्रही के बैंक खाता के विवरण अउ बैंक पास बुक के फोटो कॉपी के संगे अपन खुद के घोसना पत्र सपथ पत्र प्रस्तत करना होही। महतारी वंदन योजना के लाभ ले बर पात्र माईलोगिन मन ऑनलाइन पोर्टल म अउ मोबाइल ऐप के माध्यम ले आवेदन कर सकत हे। आवेदन पत्र भरे के पूरा प्रक्रिया निसुल्क रइही। आवेदन प्रपत्र ग्राम पंचायत वार्ड कार्यालय, आंगन बाड़ी केंद्र, प्रोजेक्ट ऑफिस अउ जिला डहार ले राखे गे विसेस कैंप म मिलही। उहें, माईलेागिन मन के सोहलियत बर आंगन बाड़ी अउ ग्राम पंचायत स्तर म बिसेस सिविर राखे जाही।
अयोध्या स्पेशल ट्रेन
अयोध्या म रामलला के दर्सन बर छत्तीसगढ़ ले पहिली आस्था स्पेसल टेªन आज बिहनिया दुरूग ले रवाना होइस। ए ट्रेन के बीस ठिन बोगी म छत्तीसगढ़ ले करीबन एक हजार तीन सौ अठ्यासी झिन श्रध्दालू मन ल पहिली घांव दर्सन बर अजोध्या ले जाय जावत हे। रेलवे डहार ले एखर बर जम्मों इंतजाम करे गेहे। जेमा दर्सनार्थी मनके जवई-अवई के संगे भोजन पानी के पूरा व्यवस्था करे गेहे।
इंहा ए बतादन कि दक्षिण पूर्व मध्य रेलवे ले पांच ठिन आस्था स्पेसल टेªन चलाय जाही। एमा ले पहिली टेªन आज रवाना होइस।
माओवादी मुठभेड़
सुकमा जिला म सुरक्षा बल मन ह एक झिन माओवादी ल मार गिराय म सफलता हासिल करे हे। पुलिस ले मिले जानकारी मुताबिक केंद्रीय रिजर्व पुलिस बल सीआरपीएफ अउ डिस्ट्रीक्ट रिजर्व गार्ड डीआरजी के दल ह सर्चिंग म निकले रिहीस तभे भेज्जी इलाका तीर माओवादी मन हुरहा गोली बारी सुरू कर दीस। फेर सुरक्षा बल डहार ले होय जवाबी कार्रवाई म एक झिन माओवादी मारे गीस जेखर लाश मुठभेड़ जघा ले बरामद करे गीस।
गृहमंत्री-सिलगेर
प्रदेस के गृह मंत्री विजय शर्मा ह किहीन हे कि बस्तर के जनता मन ल माओवाद समस्या ले मुक्ति देवाय के संगे ए जघा म सांति सुरक्षा अउ विकास बर राज्य सरकार ह संकल्पित हे। अपन एक दिन के दौरा म काली सुकमा जिला के माओवाद प्रभावित सिलगेर गांव म गंवई के मनखे मन संग गोठयावत ओमन किहीन कि हमर जवान मनके हौसला बुलंद हे। ओमन दोगुना जोस ले सुरक्षा अउ सांति स्थाापित करे बर अपन काम लगे हवय। श्री शर्मा ह किहीन कि सुरक्षा बल के माध्यम ले सरकार ह क्षेत्र के सबो ग्रामीण मन तीर सरकारी योजना के लाभ पहुंचाही। ए मउका म गृह मंत्री ह सुरक्षा बल मनके सिविर के अवलोकन करत जवान मन ले भेंट करीन। संगे स्कूली लइका अउ ग्रामीणी मन ले गोठबात घलो करही।
राजिम कुंभ
राजिम के त्रिवेणी संगम म चौबीस फरवरी ले आठ मार्च तक राजिम कुंभ कल्प राखे जाही। परयटन अउ संस्कृति मंत्री बृजमोहन अग्रवाल ह राजिम कुंभ के आयोजन ल लेके राजिम म गरियाबंद, रईपुर अउ धमतरी जिला के अधिकारी मनके बइठका लीन। ओमन राजिम कुंभ कल्प के आयोजन ल पूरा भव्यता के संग करे बर सबो विभाग मन ल सात दिन भीतर एक्सन प्लान तइयार करे के निरदेस दीन।
श्री अग्रवाल ह किहीन कि राजिम कुंभ कल्प के आयोजन बेरा तीन ठिन पुन्य स्नान होही। देस भर ले अब्बड़ झिन नांगा, साधू, संत घलो ए कुंभ म आही। परयटन अउ संस्कृति मंत्री ह आम नागरिक मन ले राजिम कुंभ कल्प ल घलो रामोत्सव के रूप म मनाय के आव्हान करीन।
गांव चलो अभियान