भारतीय जनता पार्टी के वरिष्ठ नेता लालकृष्ण अडवानी ल भारत-रत्न ले सम्मानित करे जाही। प्रधानमंत्री नरेंद्र मोदी ह फोन म श्री अडवानी ल ए सम्मान दे जाय उपर बधाई दीन। सोशल मीडिया उपर एक ठन पोस्ट म श्री मोदी ह किहीन कि श्री अडवानी मौजूदा समय के सबले सम्मानित राजनेता मन म एक झन आय अउ भारत के विकास म उंखर योगदान अविस्मरणीय हे। प्रधानमंत्री ह किहीन कि अडवानी ह जमिनी स्तर ले लेके उप प्रधानमंत्री तक के रूप म देस के सेवा करे हे। ओमन किहीन कि श्री अडवानी ह गृहमंत्री अउ सूचना अउ प्रसारण मंत्री के रूप म बिसेस प्रतिष्ठा अर्जित करीन अउ उंखर संसदीय जीवन अनुकरणीय रेहे हे।
उहें, भारतीय जनता पार्टी के प्रदेस अध्यक्ष किरण सिंह देव ह किहीन कि लालकृष्ण अडवानी ल भारत रत्न देके घोसना, हमर बर बहुत खुसी के मउका आय। ओमन किहीन कि भारतीय जनसंघ अउ भाजपा के माध्यम ले मातृभूमि के सेवा म अडवानी जी के त्याग अउ योगदान अभूतपूर्व हे।
मुख्यमंत्री-नारायणपुर
मुख्यमंत्री विष्णुदेव साय ह आज नारायणपुर जिला म एक सौ आठ करोड़ रूपिया ले जादा के विकास कार्य मनके लोकार्पण अउ भूमिपूजन करीन। ए दौरान श्री साय ह कुम्हार पारा म आयोजित किसान मेला म घलो सामिल होइन। ए मउका म ओमन रामकृष्ण मिशन डहार ले संचालित नारायणपुर आश्रम म महाविद्यालय बनाय के घोसना करीन। ओमन किहीन कि ए महाविद्यालय के खुले ले बिसेस पिछड़ा जनजाति, अबूझमाड़िया अउ आदिवासी बाहूल्य नारायणपुर जिला के युवा मन ल एखर लाभ मिलही।
मंत्री-जिला प्रभार
राज्य शासन ह जिला योजना समिति के अध्यक्षता करे अउ जन समस्या मनके निराकरण करे बर मंत्री परिसद के सदस्य मन ल जिला के प्रभार सौंपे हे। उप मुख्यमंत्री अरूण साव ल बिलासपुर, कोरबा, बेमेतरा अउ उप मुख्यमंत्री विजय शर्मा ल दुर्ग, बालोद, राजनांदगांव अउ मोहला-मानपुर-अंबागढ़ चौकी जिला के प्रभार सौंपे गेेहे। उहें, बृजमोहन अग्रवाल ल बस्तर, कांकेर, कांेडागांव अउ नारायणपुर। रामविचार नेताम ल रायगढ़, कोरिया, मनेन्द्रगढ़-चिरमिरी-भरतपुर। दयाल दास बघेल ल महासुमंद, गरियाबंद अउ सूरजपुर जिला के प्रभार दे गेहे। अइसने केदार कश्यप ल रायपुर, सुकमा, बीजापुर, दंतेवाड़ा। लखनलाल देवांगन ल मुंगेली, कबीरधाम अउ खैरागढ़-छुईखदान-गंडई। श्याम बिहारी जायसवाल ल बलौदाबाजार-भाटापारा अउ गौरेला-पेण्ड्रा-मरवाही। ओ.पी. चौधरी ल सरगुजा, जांजगीर-चांपा अउ जशपुर। लक्ष्मी राजवाडे़ ल बलरामपुर-रामानुजगंज अउ सक्ती। टंकराम वर्मा ल धमतरी अउ सारंगढ़-बिलाईगढ़ जिला के प्रभार सौंपे गेहे।
भाजपा-प्रदेश पदाधिकारी
लोकसभा चुनाव ल देखत हुए प्रदेस भाजपा संगठन म महत्वपूर्ण बदलाव करे हे। प्रदेस भाजपा अध्यक्ष किरण सिंह देव ह संगठन म आठ झन प्रदेस पदाधिकारी के संग बारह झन कार्यसमिति के सदस्य मनके नियुक्ति करे हे।
प्रदेस प्रवक्ता संजय श्रीवास्तव, रामजी भारती, जगदीश रोहरा अउ भरतलाल वर्मा ल प्रदेस महामंत्री बनाय गेहे। उहें, विकास रंजन महतो ल प्रदेस मंत्री नियुक्त करे गेहे। एखर अलावा राजा पांडे ल सरगुजा संभाग के प्रभारी, अनुराग सिंह देव ल बिलासपुर संभाग अउ रजनीश कुमार सिंह ल बस्तर संभाग के प्रभारी बनाय गेहे।
सचिन पायलट-सक्ती
कांग्रेस के भारत जोड़ो यात्रा अउ लोकसभा चुनाव ल लेके प्रदेस प्रभारी सचिन पायलट ह आज सक्ती जिला के दौरा करीन। ए दौरान ओमन कांग्रेस के वरिष्ठ पदाधिकारी मनके बइठका लीन। बइठका म पूर्व मुख्यमंत्री भूपेश बघेल, नेता प्रतिपक्ष डॉक्टर चरणदास महंत, प्रदेस कांग्रेस अध्यक्ष दीपक बैज समेत कई झन विधायक अउ कार्यकर्ता मौजूद रिहीन।
माओवादी आत्मसमर्पण
बीजापुर जिला म आज एक झन माओवादी ह सुरक्षा बल मन के आगू आत्मसर्पण कर देहे। पुलिस के मुताबिक आत्मसमर्पण करइया ए माओवादी गंगालूर एरिया कमेटी के अंतर्गत पुसनार आरपीसी, भूमकाल मिलिशिया डिप्टी कमांडर हे। ए माओवादी के खिलाफ हत्या, हत्या के प्रयास समेत कइ ठन वारदात म सामिल रेहे के आरोप हे। आत्मसमर्पण करइया ए माओवादी ल राज्य सरकार के पुर्नवास नीति के तहत पच्चीस हजार रूपिया के प्रोत्साहन रासि दे गीस।
इही, बीच माओवादी मन ह एक ठन प्रेस नोट के जरिया बताय हे कि बीतें तीस जनवरी के सुकमा जिला के टेकलगुड़ा म होय मुठभेड़ म दू झन माओवादी मन मारे गेहे। माओवादी मनके दक्षिण सब जोनल ब्यूरो के प्रवक्ता ह मुठभेड़ के दौरान सुरक्षा बल के जवान मन ले कई सामग्री लुटे के दावा करे हे।
खनिज विभाग-कार्रवाई
खनिज अउ राजस्व विभाग के संयुक्त टीम ह बिलासपुर जिला के मस्तूरी करा चार ठन खदान ल सील कर देहे। टीम ह कोसमडीह, बिधानी, छापरिया अउ मोहतरा गांव के खदान मनके निरीक्षण करीन। ए दौरान खदान मालिक मन डहार ले पर्यावरण स्वीकृति अउ दूसर दस्तावेज प्रस्तुत नइ करे के सेति, ए खदान मन ल आगामी आदेस तक सील करे के कार्रवाई करे गीस।
उहें, टीम ह एक सौ पचास घन मीटर रेत के अवैध भंडारण उपर घलो कार्रवाई करीन। संगेसंग खनिज के अवैध परिवहन के मामला म छै ठन वाहन ल जब्त करे गेहे।
सीएम-मुख्य सचिव
भारतीय पुलिस सेवा के अधिकारी राहुल भगत ल मुख्यमंत्री विष्णुदेव साय के सचिव नियुक्त करे गेहे। दू हजार पांच बैंच के आईपीएस अधिकारी श्री भगत वर्तमान म दुर्ग संभाग के पुलिस महानिरीक्षक हे।
बतादन कि प्रदेस म पहिली घव कोनो आईपीएस अधिकारी ल मुख्यमंत्री के सचिव बनाय गेहे।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ ए बखत केन्द्रीय वित्त मंत्री डहार ले एक फरवरी के पेस करे गे अंतरिम बजट उपर जाने-माने अर्थशास्त्री प्रोफेसर आर.के.ब्रम्हे ले लेगे भेंटवार्ता के प्रसारण करे जाही। एखर प्रसारण आकाशवाणी के रायपुर केन्द्र डहार ले बिहनिया साढ़े दस बजे ले प्रसारित होवइया रिहीस, फेर दिल्ली के एक ठन महत्वपूर्ण कारीकरम के सेति अब एखर प्रसारण आज रतिहा साढ़े आठ बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
समाचार सेवा प्रभाग आवेदन
आकाशवाणी के समाचार सेवा प्रभाग रायपुर ह अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्ति बर अनुभवी उम्मीदवार ले अर्जी मंगावत हे। एखर पूरा जानकारी न्यूज ऑन एआईआर डॉट जीओवी डॉट इन/वैकेंसीज म हवय। अर्जी जमा करे के आखिरी तारीख आठ फरवरी राखे गेहे।
ए अनुबंध ह दू बछर बर राखे गेहे। आवेदक के उमर अंठावन बछर ले जादा नइ होना चाही। उंखर मन तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के काम-काज के अनुभव होना जरूरी हे।
हल्बी/गोण्डी-समाचार बुलेटिन
जिले की चिट्ठी
आकाशवाणी केंद्र रईपुर के प्रादेसिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के जम्मों आकाशवाणी केंद्र एके संग रिले करही। ए बखत के अंक म ‘‘महासमुंद‘‘ जिला के गतिविधि के बारे म जानकारी दे जाही।