वित्त मंत्री ओ.पी. चौधरी ह कहिन कि छत्तीसगढ़ के जी.डी.पी. ल अवइया पांच बछर म दुगुना करे जाना राज्य सरकार के मुख्य लक्ष्य हे। श्री चौधरी ह ए बात नवा रायपुर म स्टार्टअप कंपनी मन बर इलेक्ट्रॉनिक्स अउ आईटी विभाग डहार ले होवइया नीति से प्रगति परिचर्चा के दौरान कहिन। परिचर्चा ल संबोधित करत वित्त मंत्री ह कहिन कि प्रधानमंत्री नरेंद्र मोदी के नेतृत्व म विकसित भारत के तर्ज उपर, विकसित छत्तीसगढ़ के संकल्पना ल आगू बढ़ाना हे। ओमन ह कहिन कि आज के युग नवाचार अउ ज्ञान के हे। एखर बर कोनो तीर अच्छा आईडिया हे त ओला आगू बाढ़े ले कोइ रोक नइ सकय। ओमन ह बताइन कि नवा रायपुर म एक बछर म छै हजार आईटी, प्रोफेशनल्स सेटअप तैयार करे के लक्ष्य हे। ओमन ह कहिन कि अवइया पांच बछर म नवा रायपुर आईटी, बिजनेस कॉन्फ्रेंस अउ वेडिंग सेंटर के हब के रूप म उभरही।
उंहे कार्यक्रम ल संबोधित करत उद्योग मंत्री लखन लाल देवंागन ह कहिन कि एक छोटे से घलो उद्योग स्थापित होय ले कतकेान लोगन ल रोजगार मिलथे। एखर बर राज्य सरकार स्टार्टअप के संग जादा ले जादा उद्योग के लाभ बर नीति मन उपर काम करत हे।
केंद्रीय महिला अउ बाल विकास मंत्री स्मृति ईरानी ह कीहिन कि प्रत्येक आंगनबाड़ी कार्यकर्ता मन ल दू लाख रूपिया तक जीवन बीमा अउ दुर्घटना कवर के लाभ दे गेहे। लोकसभा म आज पूरक प्रश्न के उत्तर देत ओमन ह कहिन कि प्रधानमंत्री श्रम योगी मानधन योजना के अंतर्गत पेंशन योजना के विस्तार करे गेहे।
केंद्रीय मंत्री ह कहिन कि काली घोषित अंतरिम बजट के अनुसार आयुष्मान भारत के लाभ अंागनबाड़ी अउ आशा कार्यकर्ता मन तक बढ़ा दे गेहे।
मुख्यमंत्री विष्णुदेव साय ह आज रायगढ़ म स्थापित शहीद कर्नल विप्लव त्रिपाठी के प्रतिमा के अनावरण करीन। कर्नल त्रिपाठी के प्रतिमा रायगढ़ म उंखर नाव म राखे गे स्टेडियम के बाहिर स्थापित करे गेहे। ए बेरा म वित्त मंत्री ओ.पी. चौधरी, शहीद कर्नल विप्लव त्रिपाठी के माता आशा त्रिपाठी अउ पिता सुभाष त्रिपाठी, ब्रिगेडियर विवेक शर्मा, ब्रिगेडियर आशीष दास के संग भूवपूर्व सैनिक संगठन के सदस्य उपस्थित रीहिन।
जानबा के मुताबिक कर्नल विप्लव त्रिपाठी ह तेरा नवंबर दू हजार इक्कीस के म्यामंार सीमा ले लगे विहॉंग म अलगाववादी समूह डहार ले घात लगाके करे गे हमला म अपन जवान मन ल बचात हुए आखरी गोली तक मुकाबला करीन। ए दौरान सर्वोच्च बलिदान देवत हुए अपन पत्नि अनुजा अउ छै साल के बेटा अबीर के संग वीरगति पाइन।
कृषि मंत्री रामविचार नेताम ह चक्रीय फसल बर किसान मन ल प्रोत्साहित करे बर केहे हे। ए बात श्री नेताम ह काली रायपुर म विभागीय कामकाज के समीक्षा के दौरान अधिकारी मनले कीहिन । श्री नेताम ह कहिन कि प्रदेश म उद्यानिकी फसल के अच्छा संभावना हे। ओमन ह बताइन कि उद्यानिकी फसल के प्रसार बर सरगुजा संभाग म एक हजार एकड़ के पायलट प्रोजेक्ट चलाय जाही। एखर बर ओमन ह अधिकारी मन ल प्रस्ताव तैयार करे के निर्देश देहे।
बइठका म श्री नेताम ह कहिन हे कि केंद्र अउ राज्य सरकार के योजना ल लागू करत ए सुनिश्चित करय कि पात्र अउ वास्तविक किसान ल इंखर लाभ मिले। ओमन ह कहिन कि दलहन, तिलहन जइसे चक्रीय फसल ले मिट्टी के उर्वरा शक्ति बाढ़थे। श्री नेताम ह प्रधानमंत्री किसान सम्मान निधि योजना म अबुझमाड़िया, बिरहोर, बैगा, कमार अउ पहाड़ी कोरवा जइसन विशेष पिछड़ा जनजाति अउ वन अधिकार पत्र धारी किसान मन संग पात्र हितग्राही मन ल शत-प्रतिशत जोड़े बर कीहिन।
राज्य सरकार डहार ले समर्थन मूल्य म धान के खरीदी काली शनिवार अउ परसों रविवार के छुट्टी के दिन म घलो करे जाही। ए बात मुख्यमंत्री विष्णुदेव साय ह आज रायगढ़ जिला के पुसौर धान खरीदी केंद्र के निरीक्षण के दौरान किसान मनले चर्चा करत कीहिन। मुख्यमंत्री ह खरीदी केंद्र पहुंचके किसान मनले पूछीस कि ओमन ल धान बेचे म कोनो परेसानी त नइ होवत हे। एमा एक किसान ह बताइस कि अभी होय कुछ दिन म होय बरसा के सेती धान नही बेच पाय रीहिन। फेर खरीदी के तारीख बढ़ाय के फैसला ले हमर चिंता दूर होगे। ए दौरान श्री साय ह कहिन कि किसान मन ल धान खरीदी के अंतर राशि के भुगतान जल्दी कर दे जाही।
जानबा के मुताबिक राज्य सरकार डहार ले धान खरीदी के समय सीमा चार फरवरी तक बढ़ा दे गेहे । फेर तीन अउ चार फरवरी के छुट्टी होय के बाद घलो ए दूनो तारीख म धान खरीदी के निर्देश दे गेहे। समर्थन मूल्य म अब तक किसान मनले एक सौ चौंवालिस लाख मीट्रिक टन ले जादा धान के खरीदी करे जा चुके हे।
छत्तीसगढ़ राज्य न्यायिक अकादमी म बांग्लादेश के पचास न्यायिक अधिकारी मनके पांच दिवसीय प्रशिक्षण कार्यक्रम के आयोजन करे गीस। प्रशिक्षण के आखरी दिन छत्तीसगढ़ उच्च न्यायालय के मुख्य न्यायाधीश रमेश सिन्हा कार्यक्रम म शामिल होइन।
कार्यक्रम ल संबोािधत करत ओमन कीहिन कि न्याय पालिका के मुख्य काम निष्पक्ष अउ जल्दी न्याय देवाना हे। ओमन ह ए बात म जोर दीस कि न्यायाधीश मनके कार्यकुशलता बढ़ाय बर ना केवल अच्छा प्रबंधक होना जरूरी हे, बल्कि तकनीकी रूप ले निपुण होना घलो जरूरी हे। ओमन ह छत्तीसगढ़ उच्च न्यायालय के काम अउ न्यायालय के कार्यवाही के लाइव स्ट्रीमिंग प्रक्रिया ले घलो बांग्लादेश के न्यायिक अधिकारी मन ल अवगत कराइन।
दंतेवाड़ा जिला म माओवादी मन डहार ले लगाये गे आईईडी के चपेट म आय ले एक जवान घायल होगे हे। जानबा के मुताबिक मालेवाही थाना क्षेत्र म सड़क सुरक्षा बर केंद्रीय रिजर्व पुलिस बल सीआरपीएफ अउ पुलिस के संयुक्त दल रवान होय रीहिस। इही दौरान घोटिया मोड़ तीर आईईडी विस्फोट होय ले सीआरपीएफ के सहायक उप निरीक्षक घायल होगीन। घायल जवान ल अस्पताल म भर्ती करे गेहे।
ओति नारायणपुर जिला म माओवादी मन ह तीन गाड़ी म आगी लगा दीन। मिले खबर के अनुसार जिला के कुरूषनार थाना क्षेत्र के गांव जीवलापदर म पाछू रतिहा पचास हथियारबंद माओवादी पहुंचीन अउ इंहा पुल निर्माण काम म लगे टैंकर, मिक्सर मशीन अउ ट्रैक्टर म आगी लगा दीन।
आकाशवाणी के समाचार सेवा प्रभाग रायपुर ह अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्ति बर अनुभवी उम्मीदवार ले अर्जी मंगावत हे। एखर पूरा जानकारी न्यूज ऑन एआईआर डॉट जीओवी डॉट इन/वैकेंसीज म हवय। अर्जी जमा करे के आखिरी तारीख आठ फरवरी राखे गेहे।
ए अनुबंध ह दू बछर बर राखे गेहे। आवेदक के उमर अंठावन बछर ले जादा नइ होना चाही। उंखर मन तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के काम-काज के अनुभव होना जरूरी हे।
अउ अब थोरकुन समाचार सार म –
– मुख्यमंत्री विष्णुदेव साय ह कोरिया जिला म नवीन पुलिस सहायता केंद्र पोड़ी-बचरा के शुभारंभ करीन। पहिली ये पुलिस सहायता केंद्र पोड़ी थाना खड़गवंा जिला मनेन्द्रगढ़-चिरमिरी-भरतपुर म रीहिस। अब एला कोरिया जिला के बैकुंठपुर थाना म मिला ले गेहे।
–
अउ
– छत्तीसगढ़ व्यावसायिक परीक्षा मंडल-व्यापमं डहार ले ग्रामीण कृषि विस्तार अधिकारी भर्ती परीक्षा के आयोजन चार फरवरी के करे जाही। एखर बर प्रवेश पत्र जारी कर दे गेहे। अभयर्थी अपन प्रवेश पत्र व्यापमं के वेबसाइट ले डाउनलोड कर सकत हे।