केंद्रीय वित्त मंत्री निर्मला सीतारमन ह आज लोकसभा म अवइया वित्तीय बछर के अंतरिम बजट पेश करीन। एमा प्रत्यक्ष अउ अप्रत्यक्ष कर म कोनो भी बदलाव के प्रस्ताव नइ करे गेहे। वित्त मंत्री ह कहिन कि सरकार के प्रयास ले पाछू दस बछर म करीबन पच्चीस करोड़ लोगन गरीबी ले उबर गे हवय। उंहे प्रधानमंत्री जनधन खाता म लगभग चौंतीस लाख करोड़ रूपिया के प्रत्यक्ष लाभ के रकम जमा कराय ले सरकार के करीबन पौने तीन लाख करोड़ रूपिया के बचत होय हे। वित्त मंत्री ह कहिन कि प्रधानमंत्री स्वनिधि योजना ले देश के अठहत्तर लाख रेहड़ी-पटरी वाले छोटे कारोबारी मन ल वित्तीय सहायता दे गेहे। एमा ले दू लाख तीस हजार कारोबारी मन ल तीन घांव ए मदद मिले हे।
बजट म आयुष्मान भारत योजना के दायरा ल बढ़ाके एमा सबो आशा कार्यकर्ता, आंगनबाड़ी कार्यकर्ता अउ सहायिका मन ल घलो शामिल करे जाही। ये अंतरिम बजट म सर्वाइकल कैंसर ले बचाव बर नौ ले चौदा बछर के नोनी मन ल विशेष टीका लगाय के प्रावधान घलो करे गेहे। अइसने प्रधानमंत्री आवास येजना म अवइया पांच बछर म दू करोड़ उपराहा मकान बनाय के लक्ष्य राखे गे हवय।
अंतरिम बजट-02
कृषि क्षेत्र ल बढ़ावा देबर सरसों, मूंगफली, तिल, सोयाबीन अउ सूरजमुखी जइसन तिलहन फसल म किसान मन ल आत्मनिर्भर बनाय बर कार्यनीति तैयार करे जाही। उंहे डेयरी किसान मनके मदद बर घलो कार्यक्रम तैयार करे जाही। एखरे संग किसान मन बर पचास वर्षीय ब्याजमुक्त ऋण योजना म एक लाख करोड़ रूपिया के प्रावधान करे गेहे। वित्त मंत्री ह कहिन कि कृषि क्षेत्र के विकास बर सरकार ह ग्यारा करोड़ अस्सी लाख सीमांत अउ छोटे किसान ल प्रत्यक्ष वित्तीय सहयोग दे हवय। देश म एक हजार तीन सौ इकसठ मंडी मन ल ऑनलाईन पोर्टल ले जोड़े गे हवय, जेखर ले करीबन एक करोड़ अस्सी लाख किसान मन ल मदद मिले हे। मछुआरा मनके मदद बर मछली पालन विभाग बनाय गे हवय। जेखर माध्यम ले करीबन पचपन लाख रोजगार के नवा अवसर लाय के प्रावधान करे गे हवय।
रेल सुविधा के विस्तार बर तीन ठन प्रमुख आर्थिक रेल गलियारा बनाय जाही। जेमा उर्जा, खनिज अउ सीमेंट क्षेत्र के गलियारा शामिल हे। अइसने यात्री सुविधा ल बढ़ावत चालीस हजार सामान्य रेल डिब्बा ल वंदे भारत एक्सप्रेस के अनुसार बनाय जाही।
अंतरिम बजट-03
वित्त मंत्री ह कहिन कि सरकार ह युवा अउ माइलोगिन मन बर घलो विशेष प्रावधान करे हे। कौशल भारत अभियान म तीन हजार नवा आईटीआई खोले गे हवय। एमा करीबन डेढ़ करोड़ युवा मन ल तैयार करे जाही। पाछू दस बछर म सात आईआईटी, सोला ट्रिपल आईटी, सात आईआईएम, पंद्रह एम्स, अउ तीन सौ नब्बे नवा विश्वविद्यालय खोले गे हवय।
अइसने प्रधानमंत्री मुद्रा योजना म उद्यमी मन ल करीबन तिरालिस करोड़ रूपिया के कर्ज देगे हवय। उंहे महिला उद्यमी मन ल घलो तीस करोड़ रूपिया के कर्जा देवाय गेहे। वित्त मंत्री ह कहिन कि वैकल्पिक उर्जा ल बढ़ावा देके उद्देश्य ले एक करोड़ परिवार ल उंखर मकान के छत म सौर उर्जा ले हर महीना तीन सौ यूनिट के मुफ्त बिजली मिल सकही। जेखर ले बिजली ले चलने वाला गाड़ी मन ल चार्जिंग करे जा सकही।
बजट प्रतिक्रिया
केंद्रीय वित्त मंत्री निर्मला सीतारमन डहार ले आज पेश करे गे अंतरिम बजट बर आने आने राजनीतिक दल के मिले जुले प्रतिक्रिया सामने आय हे। प्रधानमंत्री नरेंद्र मोदी ह ये अंतरिम बजट ल समावेशी अउ नवाचारी बताय हे। ओमन कहिन कि ये बजट युवा भारत के युवा आकांक्षा के दर्पण हे। प्रधानमंत्री ह कहिन कि ये बजट बछर दू हजार सैंतालिस तक विकसित भारत बनाय के आधारशिला ल मजबूत करे के गांरटी देथे।
छत्तीसगढ़ के मुख्यमंत्री विष्णुदेव साय ह अपन प्रतिक्रिया म कहिन कि ये बजट गरीब, माइलोगिन, युवा, अउ किसान मनके सशक्तिकरण उपर केंद्रित हे। ओमन कहिन कि प्रधानमंत्री ह देश के जनता ल जउन गांरटी दीन हे। ओला पूरा करे के दिशा म ये बजट एक ठन ऐतिहासिक कदम हे ।श्री साय ह कहिन कि ये बजट देश म बुनियादी ढांचा के विकास के संगेच ग्रामीण मनके आय म बढ़ोत्तरी के लक्ष्य ल पाय म मदद करही।
उंहे प्रदेश भाजपा अध्यक्ष किरणदेव ह कहिन कि केंद्र सरकार के अंतरिम बजट विकसित भारत बर दूरदृष्टि देने वाला बजट हे।
मंत्रिमंडल निर्णय
मुख्यमंत्री विष्णुदव साय के अध्यक्षता म काली संझा होय राज्य मंत्रिपरिषद के बइठका म मंत्रिपरिषद ह विधानसभा चुनाव के बेरा मोदी के गांरटी के नाव ले जारी भाजपा के संकल्प पत्र के एक ठन दूसर वादा ल पूरा करे बर महतारी वंदन योजना लागू करे के फैसला घलो ले हवय। ए योजना म पात्र विवाहित महिला मन ल हर महिना एक हजार रूपिया के दर ले सालभर म बारा हजार रूपिया उंखर बैंक खाता म जमा कराय जाही। ए योजना के लाभ छत्तीसगढ़ निवासी वो माइलोगिन मन ल दे जाही, जेंखर उमर पाछू एक जनवरी के इक्कीस बछर या एखर ले जादा हे। एमा विवाहित महिला मनके अलावा विधवा, तलाकशुदा अउ परित्यक्ता माइलोगिन मन ल घलो शामिल करे गेहे।
प्रदेश के तेंदूपत्ता संग्राहक परिवार ल अब प्रति मानक बोरा चार हजार रूपिया के बदला साढ़े पांच हजार रूपिया के दर ले भुगतान करे जाही। ये फैसला मुख्यमंत्री विष्णुदेव साय के अध्यक्षता म काली संझा होय राज्य मंत्रिपरिषद के बइठका म ले गीस। एखरे संग तेंदूपत्ता संग्राहक परिवार के सामाजिक सुरक्षा बर एक ठन नवा योजना शुरू करे के फैसला घलो लेगे हवय। ए योजना ल चलाय बर राज्य सरकार ह कुल रकम के तीन चौथाई हिस्सा खर्चा करही। उंहे छत्तीसगढ़ राज्य लघु वनोपज संघ डहार ले एक चौथाई धनराशि वित्तीय अनुदान के रूप म दे जाही।
मुख्यमंत्री उच्चस्तरीय बैठक
मुख्यमंत्री विष्णुदेव साय ह कहिन कि प्रदेश म माओवादी समस्या के स्थायी समाधान बर जल्दीच विशेष कदम उठाय जाही। पाछू तीस जनवरी के सुकमा जिला म होय माओवादी घटना के बाद मंत्रालय म पुलिस अउ प्रशासन के बड़े अधिकारी मनके उच्च स्तरीय बइठका म श्री साय ह कहिन कि छत्तीसगढ़ म नक्सल समस्या ल जड़ ले खतम करना राज्य सरकार के प्राथमिकता म हवय। ओमन ह अधिकारी मन ल निर्देश दीन कि सुरक्षा कैम्प तीर लोगन ल बुनियादी सुविधा देवाय जाय। ओमन कहिन कि माओवादी मनके खिलाफ अभियान ल तेज करे जावत हे अउ नवा क्षेत्र म कैम्प घलो लगाये जावत हे। ओमन पुलिस ल अपन सूचना तंत्र ल अउ जादा प्रभावी बनाय के निर्देश दीन।
प्रदेश के स्कूल शिक्षा मंत्री बृजमोहन अग्रवाल ह आज नई दिल्ली म केंद्रीय शिक्षा अउ कौशल विकास मंत्री धर्मेन्द्र प्रधान ले भेंट करके छत्तीसगढ़ के सबो जिला म नवोदय विद्यालय अउ केंद्रीय विद्यालय शुरू करे के आग्रह करीन हे। ओमन ह केंद्र डहार ले चलत योजना मन म केंद्र सरकार के हिस्सेदारी बढ़ाय के अनुरोध घलो करीन। ओमन कहिन कि ए बखत प्रदेश के सोला ठन जिला म नवोदय अउ केंद्रीय विद्यालय स्वीकृत हे। ओमन ह बाकी जिला म घलो ए दूनो विद्यालय खोले के मांग करीन।
समाचार सेवा प्रभाग आवेदन
आकाशवाणी के समाचार सेवा प्रभाग रायपुर ह अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्ति बर अनुभवी उम्मीदवार ले अर्जी मंगावत हे। एखर पूरा जानकारी न्यूज ऑन एआईआर डॉट जीओवी डॉट इन/वैकेंसीज म हवय। अर्जी जमा करे के आखिरी तारीख आठ फरवरी राखे गेहे।
ए अनुबंध ह दू बछर बर राखे गेहे। आवेदक के उमर अंठावन बछर ले जादा नइ होना चाही। उंखर मन तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के काम-काज के अनुभव होना जरूरी हे।
अउ अब थोरकुन समाचार सार म –
– मुख्यमंत्री विष्णुदेव साय ह कोरिया जिला म बैकुण्ठपुर के झुमका जलाशय अउ सोनहत के घुनघुट्टा जलाशय ल पर्यटन क्षेत्र बनाय जाय के घोषणा करीन। झुमका जलाशय ह करीबन पांच सौ एकड़ क्षेत्र म फैले हवय।
– छत्तीसगढ़ लोक सेवा आयोग डहार ले राज्य सेवा प्रारंभिक परीक्षा म लिखित परीक्षा अवइया ग्यारा फरवरी के ले जाही। दू सत्र म होवइया ये परीक्षा बर अठाईस ठन जिला म परीक्षा केंद्र बनाय गे हवय।
अउ
– मुख्यमंत्री विष्णुदेव साय ह कहिन कि सुकमा जिला के टेकलगुड़ेम म परसो होय मुठभेड़ शहीद तीनो जवान के परिवार वाला मन ल दस-दस लाख रूपिया के आर्थिक मदद दे जाही।