संसद-बजट सत्र
संसद के बजट सत्र आज राष्ट्रपति द्रौपदी मुर्मू के अभिभाषण के संग सुरू होगे। राष्ट्रपति ह दूनों सदन के संयुक्त बइठका ल संबोधित करत पाछू दस साल म मोदी सरकार डहार ले करे गे काम-काज के प्रशंसा करीन। ओमन किहीन कि केंद्र सरकार के मानना हे कि विकसित भारत के बड़का संरचना बर चार मजबूत स्तंभ युवा सक्ति, नारी सक्ति, किसान, गरीब उपर आधारित होही। ओमन किहीन कि समाज के हर वर्ग अउ देस के हर हिस्सा म लोगन मनके सपना एक जइसन हे।
राष्ट्रपति ह किहीन कि भारत ह पाछू दस साल म राष्ट्र के हित म अइसन कतकोन काम करे हे, जेखर अगोरा लोगन मन ल अब्बड़ दिन ले रिहीस। अयोध्या म राम मंदिर बनाय के जिकर करत राष्ट्रपति ह किहीन कि अब लोगन मनके सपना ह पूरा होगे हे। ऐति, केंद्रीय वित्तमंत्री निर्मला सीतारमण ह बजट सत्र म काली अंतरिम बजट पेस करही।
प्रधानमंत्री संसद
प्रधानमंत्री नरेंद्र मोदी ह किहीन हे कि जउन सांसद मन ह संसद म अपन बने योगदान देहे। ओमन ल हर बखत सुरता करे जाही अउ जउन सांसद मन संसद के कार्रवाई म रोक-टोक करे हे, ओमन ल कोनो सुरता नइ राखय। आज बजट सत्र सुरू होय के पहिली संसद के बाहिर मीडिया ल संबोधित करत प्रधानमंत्री ह किहीन कि जउन सांसद मन संसद म हंगामा करे अउ संविधान ल नीचा दिखाय म लगे हे। ओमन ए बेरा लोकसभा के आखिरी सत्र म चिंतन मनन जरूर करय।
आईटी छापा
आयकर विभाग के टीम ह आज पूर्व मंत्री अमरजीत भगत के राजधानी रईपुर अउ अंबिकापुर के घर म छापा मारिन त उहें, दुरूग, भिलाई, राजनांदगांव अउ कोरबा म बिल्डर अउ कारोबारी मनके इंहा घलो छापा मारिन।
जानबा के मुताबिक प्रदेस म सरकार बदले के बाद आयकर विभाग के पहिली बड़का कार्रवाई हरय। आयकर विभाग के टीम ह पूर्व मंत्री श्री भगत के रईपुर अउ अंबिकापुर के घर म एके संघरा पहुंचिन अउ जांच सुरू करीन। श्री भगत के नांव ह कथित रूप ले कस्टम मिलिंग अउ कोयला घोटाला म आगू आय हे।
अइसने आयकर विभाग ह रईपुर के राजीव नगर स्थित चंद्रभान शेरवानी लॉ विस्टा सोसाइटी म कारोबारी अमर होरा, तेलीबांधा स्थित संदीप जैन अउ पप्पू बंसल के ठिकाना म छापामार कार्रवाई करीन त उहें, भिलाई म बिल्डर अजय चौहान के ऑफिस के संगेसंग दुरूग के हनुमंत राईस इंडस्ट्रीय के जघा म घलो जांच करे जात हे।
मुख्यमंत्री-शहीद जवान श्रध्दांजलि
मुख्यमंत्री विष्णुदेव साय ह आज बस्तर जिला के करनपुर स्थित कोबरा सीआरपीएफ कैंप म माओवादी मुठभेड़ म शहीद जवान मनके पार्थिव शरीर उपर पुष्प चक्र अर्पित करके ओमन श्रध्दांजलि दीन। शहीद मन ल श्रध्दांजलि देके बाद पार्थिव शरीर ल उंखर गृहग्राम बर रवाना करे गीस। ए मउका म मुख्यमंत्री ह शहीद मनके परिवार मन ल संवेदना प्रकट करत किहीन कि फोर्स सरलग बाढ़े अउ जघा-जघा कैंप लगाय ले माओवादी मन बौखला गेहे। ओमन किहीन कि राज्य सरकार ह हर स्थिति म जवान मनके संग हे। मुख्यमंत्री के संग उप मुख्यमंत्री अउ गृहमंत्री विजय शर्मा, वन मंत्री केदार कश्यप, विधायक विनायक गोयल अउ लखेश्वर बघेल के संगेसंग पुलिस के बड़का अधिकारी मन घलो सामिल होइन।
जानबा के मुताबिक काली सुकमा जिला के टेकलगुड़ेम गांव के तीर माओवादी मन ह सुरक्षाबल मनके जवान उपर घात लगाके हमला कर दे रिहीन। ए हमला म तीन झिन जवान शहीद होय हे।
उहें, मुख्यमंत्री ह काली रतिहा रईपुर के दू ठिन प्राइवेट अस्पताल मन म भर्ती घायल जवान मन ले मिलीन।
ऐति, मुख्यमंत्री ह आज संझा के राखेगे जम्मों कारीकरम ल स्थगित करके उच्च स्तरीय बइठका बुलाय हे। ए बइठका म माओवाद विरोधी अभियान के समीक्षा करे जाही। बइठका म पुलिस अउ प्रशासन के बड़का अधिकारी मन घलो सामिल होही।
धान खरीदी-तिथि बढ़ी
प्रदेश म समर्थन मूल्य म अब धान के खरीदी चार फरवरी तक करे जाही। ए दउरान सरकारी छुट्टी के दिन शनिच्चर अउ ईतवार के दिन घलो धान बिसाय जाही। मुख्यमंत्री विष्णुदेव साय ह राज्य म रिकार्ड धान खरीदी के बाद किसाना मनके हित ल धियान म राखत ए फइसला लेहे।
जानबा के मुताबिक राज्य म पहिली राखे गे तारिख के मुताबिक एसो के समर्थन मूल्य म धान खरीदी के आज आखिरी दिन रिहीस।
भाजपा-जिला अध्यक्ष नियुक्ति
भारतीय जनता पार्टी के प्रदेस अध्यक्ष किरण सिंह देव ह आज चार जिला म नवा जिला अध्यक्ष के नियुक्ति करे हे। जेमा रईपुर ग्रामीण म श्याम नारंग, भिलाई म महेश वर्मा, बालोद म पवन साहू अउ धमतरी म प्रकाश बैस ल जिलाध्यक्ष बनाय गेहे। आदेस म केहे गेहे कि ए नियुक्ति ह तुरते प्रभाव ले लागू होही।
बृजमोहन अग्रवाल-पर्यटन मंत्री मुलाकात
पर्यटन अउ संस्कृति मंत्री बृजमोहन अग्रवाल ह आज नई दिल्ली म केंद्रीय पर्यटन मंत्री जी. किशन रेड्डी ले मीलिन। ए दउरान ओमन केंद्रीय मंत्री ले छत्तीसगढ़ म पर्यटन ल बढ़ावा देके बारे म गोठबात करे के संगेसंग राज्य के ऐतिहासिक धरोहर मन ल बने ढंग ले राखे बर केंद्रीय बजट ले रासि मंजूर करे के विनती करीन। ओमन सक्तिपीठ परियोजना के तहत प्रदेस के पांच सक्तिपीठ मन ल जोड़े के संगेसंग राजिम कॉरिडोर बनाय अउ पुरखौती मुक्तांगन म कन्वेंशन सेंटर बनाय बर घलो केंद्र ले मदद मांगिन।
राजा मोरध्वज महोत्सव
आरंग ल अब राजा मोरध्वज नगर के नांव ले जाने जाही। ए घोषणा संस्कृति मंत्री बृजमोहन अग्रवाल ह काली आरंग म राजा मोरध्वज महोत्सव के समापन मउका म किहीन। ओमन किहीन कि आरंग अउ तीर-तखार के जघा म ऐति-ओति फइले पूरा तात्विक अवसेस ल सकेले बर पच्चीस लाख रूपिया के लागत ले आरंग म संग्रहालय बनाय जाही। ओमन राजा मोरध्वज महोत्सव ल अउ बढ़िया ढंग ले मनाय बर हर साल पांच लाख रूपिया देके घोसना करे हे। कारीकरम म विधायक गुरू खुशवंत साहेब अउ अनूज शर्मा आय रिहीन।
सीजी-पीएससी
छत्तीसगढ़ लोकसेवा आयोग ह अपन पीएससी परीक्षा ल संघ लोकसेवा आयोग यूपीएससी जइसन करे के फइसला लेहे। एखर बर सीजी पीएससी ह भर्ती परीक्षा मन बर वार्षिक कलैण्डर जारी करे के संगेसंग राज्य के हर ब्लाक म प्रतियोगी परीक्षा मनके परीक्षा केंद्र बनाय के फइसला लेहे। आयोग ह शासन के जम्मों विभाग मन ल अवइया तीन बछर म खाली पद मनके पूरा जानबा मांगे हे।
रकम बरामद
लोकसभा चुनई के पहिली दुरूग पुलिस ह दू ठिन गाड़ी ले दू करोड़ चौंसठ लाख रूपिया जब्ती करके तीन झिन लोगन मन ल गिरफ्तार करे हे। हमर संवाददाता ले मिले जानबा के मुताबिक काली रतिहा भिलाई पुलिस के टीम ह सेक्टर एक म स्टैट बैंक के तीर दू ठिन गाड़ी म संदिग्ध मनखे मन डहार ले गलत ढंग ले लेन-देन के सूचना मिले के बाद ए कार्रवाई करे गीस।
समाचार सेवा प्रभाग आवेदन
आकाशवाणी के समाचार सेवा प्रभाग रायपुर ह अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्ति बर अनुभवी उम्मीदवार ले अर्जी मंगावत हे। एखर पूरा जानबा न्यूज ऑन एआईआर डॉट जीओवी डॉट इन/वैकेंसीज म हवय। अर्जी जमा करे के आखिरी तारीख आठ फरवरी राखे गेहे।
ए अनुबंध ह दू बछर बर राखे गेहे। अर्जी करइया मन के उमर अंठावन बछर ले जादा नइ होना चाही। अर्जी करइया मनके तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन साल के काम-काज के अनुभव होना जरूरी हे।
रेलवे मार्ग
दक्षिण-पश्चिम रेलवे के बैंग्लोर रेल मंडल के पेनुकोंडा जंक्शन-मक्काजिपल्लि स्टेसन के बीच जरूरी काम-काज के सेति दक्षिण पूर्व मध्य रेलवे ले चलइया कोरबा-यशवंतपुर-कोरबा एक्सप्रेस दूसर रद्दा ले चलही।