प्रधानमंत्री नरेंद्र मोदी ह किहीन कि प्रतिस्पर्धा अउ चुनौती जिनगी म प्रेरणा के काम करथे। फेर प्रतिस्पर्धा स्वस्थ होना चाही। ओमन ह छात्र ल दूसर ले प्रतिस्पर्धा करे के बजाय खुद ले प्रतिस्पर्धा करे बर किहीन। नई दिल्ली के भारत मंडपम म आज परीक्षा म चर्चा कारीकरम के माध्यम ले स्कूल के विद्यार्थी शिक्षक अउ अभिभावक के गोठबात के दौरान श्री मोदी ह किहीन कि कहू जिनगी म कोनो चुनौती नइ रइही त जिनगी प्रेरणा हीन अउ हतोउत्साहित करने वाल बन जही। ओमन किहीन कि कुछेक अभिभावक अपन विजीटिंग कारड के रूप म अपन लइका के संग रिपोर्ट कारड जइसन व्यवहार करथे। ए अच्छा बात नोहय।
प्रधानमंत्री ह किहीन कि लइका ल कोनो भी प्रकार के दबाव सहे के लायक बनाना चाही। ओमन किहीन कि तनाव जिनगी के भाग हरय। हर कोनो ल एखर ले निपटे बर तइयार रहना चाही। श्री मोदी ह किहीन कि विद्यार्थी मन के तनाव ल कम करे म शिक्षक के महत्वपूर्ण भूमिका हे। ओमन किहीन कि विद्यार्थी अउ शिक्षक के बीच के संबंध पाठ्यक्रम अउ पाठ्य चर्चा ले परे होना चाही। प्रधानमंत्री ह किहीन कि विद्यार्थी मन के चुनौती ह अभिभावक अउ शिक्षक डहार ले समुचित रूप ले निपट जाना चाही। प्रधानमंत्री ह किहीन कि फिटनेस बर संतुलित खान-पान अउ व्यायाम बहुत जरूरी हे। ओमन किहिन कि स्वस्थ मस्तिष्क बर स्वस्थ शरीर के होना बहुत जरूरी हे। श्री मोदी ह किहीन कि पूरा निंद घलो एखर बर जरूरी हे।
प्रधानमंत्री ह किहीन कि विद्यार्थी मन ल निर्णय लेके आदत विकसित करना चाही। ओमन किहीन कि भ्रम के स्थिति म एला लेके चर्चा करना चाही अउ एखर समाधान खोज के आगू बाढ़े के आवश्यकता हे। श्री मोदी ह किहीन कि लइका अउ अभिभावक के बीच विस्वास के कमी नइ होना चाही। श्री मोदी ह किहीन कि छात्र मन ल जादा ले जादा प्रश्न के उत्तर लिख के अभ्यास करे के जरूरत हे। ओमन किहीन कि लइका मन अभ्यास करहीं त परीक्षा केंद्र के तनाव ह कम हो जही।
परीक्षा पे चर्चा-02
परीक्षा पे चर्चा कारीकरम के आयोजन छत्तीसगढ़ के स्कूल अउ आने-आने जघा म घलो करे गीस। रईपुर के पंडित दीन दयाल उपाध्याय ऑडिटोरियम म आयोजित कारीकरम म मुख्यमंत्री विष्णुदेव साय अउ स्कूल शिक्षा मंत्री बृजमोहन अग्रवाल घलो सामिल होइन। दिल्ली म आयोजित कारीकरम म प्रधानमंत्री ह सुकमा के छात्रा उमेश्वरी ल अपन तीर बिठाय रिहीन। कांकेर जवाहर नवोदय विद्यालय के छात्र सेख तैफुर रहमान ह प्रधानमंत्री ले परीक्षा के दौरान जादातर छात्र मन म घबराहट अउ प्रश्न ल सही ढंग ले नइ पढ़ पाय अइसन गलती ले बांचे बर मार्गदर्सन मांगिस। एमा प्रधानमंत्री किहीन कि धीरज धर के अति उत्साह म नइ आना अउ परीक्षा ल एक उत्सव के रूप म देखना जरूरी हे।
ए मउका म मुख्यमंत्री ह किहीन कि पाठ्यक्रम के तइयारी तभे ठीक तरह ले हो पाथे जब खुद शारीरिक अउ मानसिक स्वास्थ ल बनाय राखे बर तैयारी करथे। पढ़ई अउ सेहत के बीच जतका अच्छा संतुलन बने रइही, सफलता के गारंटी ओतका जादा होही। श्री साय ह किहीन कि प्रधानमंत्री ह परीक्षा म सफलता के नियम बताय हे। ओमा विद्यार्थी मन ह धियान देवय। ओमन किहीन कि स्कूली परीक्षा म सफलता के तुरते पाछू जीवन के पाठसाला के परीक्षा सुरू हो जथे। ओ परीक्षा मन म घलो सफलता बर इही नियम काम आथे। मुख्यमंत्री ह किहीन कि प्रधानमंत्री, देस म शिक्षा व्यवस्था अउ नीति म बदलाव के तइयारी करत हे। ओमन ह पढ़ईया लइका मन ले किहीन कि परीक्षा, अध्ययन-अध्यापन के एक ठिन प्रक्रिया हरय। सफलता-असफलता ले परे एमा सहभागी बनय अउ अपन अच्छा देके प्रयास करय। ओमन शिक्षक अउ अभिभावके ले अपन इच्छा अउ आकांक्षा के बोझ लइका मन उपर नइ डाले के सलाह दीन।
परीक्षा पे चर्चा-03
उंहे जगदलपुर के धरमपुरा के ज्ञानगुड़ी ऑडिटोरियम म घलो परीक्षा पे चर्चा कार्यक्रम के आयोजन करे गीस। ए मौका म धरमपुरा, तीतरगांव, संग आने स्कूल के विद्यार्थी, शिक्षक अउ अभिभावक उपस्थित रहिन। परीक्षा पे चर्चा कार्यक्रम के बाद रंगोली संग कतकोन आने रोचक कार्यक्रम घलो करे गीस।
खबर के मुताबिक परीक्षा पे चर्चा कार्यक्रम म भाग लेबर ए बछर छत्तीसगढ़ ले एक लाख छप्पन हजार चार सौ उनसठ विद्यार्थी, इक्कीस हजार छै सौ सात शिक्षक अउ पांच हजार नौ सौ तिरसठ अभिभावक मन ह पंजीयन कराय रीहिन। राज्य ले एक शिक्षक अउ दू विद्यार्थी मन ह चर्चा म भाग लीन। एमा ले तोंगपाल के स्वामी आत्मानंद स्कूल के शिक्षिका अनिता पहारे अउ स्वामी आत्मानंद स्कूल कोटा के छात्र शिवम बंसल घलो शामिल होइस।
राज्यसभा चुनाव
केंद्रीय निर्वाचन आयोग ह छत्तीसगढ़ संग पंद्रह राज्य के छप्पन राज्यसभा सीट बर चुनाव के आज घोषणा कर दीस। चुनाव के अधिसूचना आठ फरवरी के जारी होही। नामांकन पत्र भरे के आखरी तारीख पंद्रह फरवरी रीही अउ मतदान सत्ताईस फरवरी के होही। केंद्रीय मंत्री अश्वनी वैष्णव, भूपेंद्र यादव, पुरूषोत्तम रूपाला, मनसुख मांडविया, धर्मेन्द्र प्रधान, नारायण राणे, राजीव चंद्रशेखर, एल. मुरूगन, वी. मुरलीधरन अउ भाजपा अध्यक्ष जगतप्रकाश नड्डा, सरोज पांडेय अउ आने सांसद मनके ए बछर अप्रैल म कार्यकाल पूरा होवत हे।
राष्ट्रपति-कलाकार मुलाकात
राष्ट्रपति द्रौपदी मुर्मू ले काली नई दिल्ली के राष्ट्रपति भवन म छत्तीसगढ़ के झांकी बस्तर के आदिम जनसंसद मुरिया दरबार म सामिल लोककलाकार मन ह भेंट करीन।
देश के आने आने राज्य मनके झांकी म विकसित अउ सशक्त भारत के झलक दिखिस। छत्तीसगढ़ के झांकी म लोकतंत्र के जननी विषय म जनजाति के आदिम संसद के प्रदर्शन करे गे रीहिस। एखर ले देश के आने राज्य मन ल घलो जनजाति समाज के परंपरा अउ लोकतांत्रिक मूल्य के जानकारी मिले होही। श्रीमती मुर्मू ह कहिन कि लोकतंत्र के आदिम व्यवस्था म माइलोगिन के भूमिका ल घलो ए झांकी म प्रमुखता ले दिखाये गे रीहिस। राष्ट्रपति ह कहिन कि छत्तीसगढ़ के अपन अलगे पहचान अउ विशेष परंपरा हे। जेखर बारे म देश के आने आने हिस्सा मन म रहइया लोगन ल घलो जानकारी मिले होही।
डीएमएफ/कस्टम मिलिंग-एफआईआर
एंटी करप्शन ब्यूरो-एसीबी अउ आर्थिक अपराध शाखा-ईओडब्लू ह ईडी के प्रतिवेदन के आधार म कथित डीएमएफ अउ कस्टम मिलिंग घोटाला म एफआईआर दर्ज करे हे। एमा अधिकारी , नेता अउ कारोबारी मन ल आरोपी बनाय गेहे।
समाचार सेवा प्रभाग आवेदन
आकाशवाणी के समाचार सेवा प्रभाग रायपुर समेत अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्त होय खातिर अनुभवी उम्मीदवार ले आवेदन आमंत्रित करथे। एखर विवरण न्यूज ऑन एआईआर डॉट जीओवी डॉट इन/वैकेंसीज म उपलब्ध हवय। आवेदन जमा करे के आखिरी तारीख आठ फरवरी हवय।
अनुबंध दू बछर खातिर होही। आवेदन के आयु आवेदन जमा करे के आखिरी तिथि तक 58 बछर ले जादा नहीं होना चाही। आवेदन के तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के कार्य करे के अनुभव होना जरूरी हवय।
शालेय क्रीडा प्रतियोगिता
सड़सठवां राष्ट्रीय शालेय क्रीडा प्रतियोगिता काली ले कोरबा म सुरू होगे हे। प्रतियोगिता के सुभारंभ उद्योग अउ श्रममंत्री लखनलाल देवांगन ह करीन। ए मउका म श्री देवांगन ह किहीन कि खेल जीवन के हिस्सा हरय। जेखर ले शारीरिक अउ मानसिक विकास के संग सफलता के रद्दा म आगू बाढ़त एक ठिन मुकाम पा सकत हे। पांच दिन तक चलइया ए प्रतियोगिता म छत्तीसगढ़ संग बारह राज्य अउ दू इकाई के बेसबाल खिलाड़ी भाग लेवत हे।