आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री नरेंद्र मोदी ह किहीन कि ए महिना के बाईस तारिख के        अयोध्या म रामलला के प्राण-प्रतिष्ठा ह देस के करोड़ो लोगन मन ल एक सूत्र म बांधे हे। आज आकाशवाणी ले ‘‘मन की बात‘‘ कारीकरम म राष्ट्र ल संबोधित करत हुए श्री मोदी ह किहीन कि देस ह ए अवसर म सामूहिकता अउ एक अलग सक्ति देखिस जेन ह विकसित भारत संकल्प के परमुख आधार हे।
प्रधानमंत्री ह किहीन कि जम्मों देस बाईस जनवरी के संझा राम ज्योति प्रज्वलित करीन अउ रामभजन गाईन। भगवान राम के शासन ल भारतीय संविधान निर्माता मन बर प्रेरणा स्त्रोत बतात श्री मोदी ह देव ले देस अउ राम ले राष्ट्र के अपन कथन के उल्लेख करीन।
प्रधानमंत्री ह आयुष चिकित्सा पध्दति म चर्चा करत हुए नारायणपुर के वैद्यराज हेमचंद मांझी अउ अरूणाचल प्रदेस के हरबल औषधि विशेषज्ञ यानुंग जामोह लैगो के जिकर करीन, ए मन ल पद्म सम्मान देय के घोसना करे गेहे। प्रधानमंत्री ह किहीन कि हेमचंद मांझी ल नारायणपुर म गरीब मरीज मन के सेवा करत हुए पांच दसक ले जादा के समय होवत हे। हमर देस म आयुर्वेद अउ हर्बल दवई के जउन खजाना छिपे हे ओकर संरक्षण बर सुश्री यानुंग अउ हेमचंद मांझी जइसन लोगन मनके बड़का भूमिका आय।

मन की बात-02

उहें, प्रधानमंत्री ह ‘मन की बात‘ के माध्यम ले ‘हमर हाथी-हमर गोठ‘ कारीकरम के घलो उल्लेख करीन। ए कारीकरम छत्तीसगढ़ म आकाशवाणी के चार केंद्र अंबिकापुर, रईपुर, बिलासपुर अउ रायगढ़ ले रोज संझा प्रसारित होथे। प्रधानमंत्री ह किहीन कि सोसल मीडिया अउ इंटरनेट के ए दौर म घलो रेडियो पूरा देस ल जोड़े बर एक ससक्त माध्यम हे। रेडियो के ताकत कतेक बदलाव ल सकत हे, एखर अनोखा मिसाल छत्तीसगढ़ म देखे बर मिलत हे। पाछू सात बछर ले इंहा रेडियो म एक लोकप्रिय कारीकरम प्रसारण होवत हे जेखर नांव हे ‘हमर हाथी-हमर गोठ‘ जेला छत्तीसगढ़ के जंगल अउ उंखर आजू-बाजू रहवइया बड़ धियान ले ए कारीकरम ल सुनथे। ‘हमर हाथी-हमर गोठ‘ कारीकरम म बताय जाथे कि हाथी मनके झुंड जंगल के कतेक डहार ले गुजरत हे। एखर ले लोगन सावधान हो जथे।

मुख्यमंत्री-प्रधानमंत्री पत्र  

मुख्यमंत्री विष्णुदेव साय ह प्रधानमंत्री नरेंद्र मोदी ल चिट्ठी लिखके     अयोध्या धाम म श्री रामलला के प्राण-प्रतिष्ठा कारीकरम के बने ढंग ले संपन्न होय बर छत्तीसगढ़ के मनखे मनके भावना ल बांटिन। मुख्यमंत्री ह अपन पाती म लिखे हे कि अयोध्या धाम ले देय गे संबोधन म प्रधानमंत्री ह माता सबरी के  भक्ति अउ भगवान राम के आय के अगोरा ल जेन ढंग ले अपन बात म रखिस ओहा हमर प्रदेसवासी मन ल उत्साहित करे हे।
मुख्यमंत्री ह अपन चिट्ठी म लिखे हे कि जम्मों देस अउ छत्तीसगढवासी अयोध्या म श्री रामलला के प्राण-प्रतिष्ठा कारीकरम के सफलता पूर्वक संपन्न होय ले खुश हवय। मुख्यमंत्री ह लिखे हे कि छत्तीसगढ़ भगवान राम के ममा घर आय पूरा छत्तीसगढ़ म ए दिन ल रामोत्सव के रूप म मनाय हे।
मुख्यमंत्री ह शिवरीनारायण अउ पूरा प्रदेस के भावना ल साझा करत लिखे हे कि प्रधानमंत्री कि ए सुघ्घर सब्द ले सबरीधाम म रहवइया शिवरीनारायण के हजारों लोगन अउ करोडों छत्तीसगढ़ वासी के संगेसंग देसभर म रहवइया बनवासी मन ल गौरान्वित करे हे। प्रधानमंत्री के मार्ग दर्सन म अउ प्रेरणा ले श्री राम के ननिहाल म घलो रामराज्य के संकल्पना ल मूर्तरूप देबर केंद्र सरकार के जनजाति समूह बर सुरू करे गे योजना के लाभ सरकार जोरदरहा ढंग ले ए समूह तक पहुंचात हे।

मुख्यमंत्री-पद्मश्री सम्मानित

मुख्यमंत्री विष्णुदेव साय ह आज रईपुर म ए बछर पद्मश्री सम्मान ले चुने गे छत्तीसगढ़ के तीन हस्ती नारायणपुर के वैद्यराज हेमचंद मांझी, रायगढ़ के कत्थक नर्तक रामलाल बरेठ अउ जशपुर के समाजसेवी जागेश्वर यादव के सम्मान करीन। मुख्यमंत्री ओमन ल पद्मश्री ले सम्मानित करे जाय के केंद्र सरकार के ए निर्णय म सुभकामना दीन। मुख्यमंत्री ह किहीन कि ओमन छत्तीसगढ़ के गौरव ल बढ़ाय हे।

परीक्षा पे चर्चा

प्रधानमंत्री नरेंद्र मोदी काली उनतीस जनवरी के ‘‘परीक्षा पे चर्चा‘‘ कारीकरम म पढ़इया लइका मन ले गोठबात करहीं। केंद्रीय शिक्षा मंत्रालय डहार ले केहे गे हे कि ए बछर ‘‘परीक्षा पे चर्चा‘‘ कारीकरम बर दू करोड़ छब्बीस लाख ले जादा विद्यार्थी, अध्यापक अउ अभिभावक मन पंजीयन कराय हे। बछर दू हजार बाइस के ए कारीकरम बर बाइस हजार प्रतिभागी मन पंजीयन कराय रिहीन। मंत्रालय डहार ले केहे गेहे कि ए प्रधानमंत्री के संग गोठबात करे अउ ए कारीकरम म भागीदारी ह विद्यार्थी मन के राष्ट्रव्यापी उत्साह ल दरसावत हे। ए कारीकरम के सातवां संस्करण नई दिल्ली के भारत मंडपम म आयोजित करे जाही। जेखर बर विद्यार्थी मन भारी उत्साहित हे। एमा लगभग तीन हजार प्रतिभागी प्रधानमंत्री ले सीधा गोठबात करहीं।
‘‘परीक्षा पे चर्चा‘‘ कारीकरम के सीधा प्रसारण दूरदर्सन के राष्ट्रीय चैनल, दूरदर्सन न्यूज, दूरदर्सन भारत, यू-ट्यूब अउ माय जीओवी डॉटइन के जरिया  होही। एखर बर जिला पंचायत के मुख्य कार्यपालन अधिकारी, नगर-निगम आयुक्त अउ जिला शिक्षा अधिकारी के बीच समन्वय स्थापित कर कारीकरम के प्रचार-प्रसार करे बर केहे गे हवय।

आयुर्वेद विश्वविद्यालय

प्रदेस के पहिली आयुर्वेद विश्वविद्यालय राजधानी रईपुर म खुलही। शिक्षा मंत्री बृजमोहन अग्रवाल ह रईपुर के शासकीय आयुर्वेद महाविद्यालय म दू दिवसीय आयुर्वेद एलुमनी मीट ‘‘स्वर्ण कुंभ‘‘ के सुभारंभ करत ए घोसना करीन। ए मउका म ओमन कॉलेज ले पढ़ के निकले अउ देस-विदेस म सेवा देवत चिकित्सक मन ल सम्मानित करीन।
शिक्षा मंत्री ह किहीन कि आयुर्वेद हमर जीवन पध्दति के एक अंग हे।       प्रधानमंत्री नरेंद्र मोदी ह एक बार फेर आयुर्वेद अउ आयुष ल बढ़ावा देहे, जेखर बाद पूरा दुनिया म आयुर्वेद ल अलग पहिचान मिलही। कोरोना काल म आयुर्वेदिक काढ़ा अउ दवई ह लाखो लोगन के जान बचाय हे। लोगन मन म आयुर्वेद के प्रति जागरूकता लाय के सुझाव घलो श्री अग्रवाल ह देहे।

मुख्यमंत्री-बिलासपुर फ्लाइओवर

उसलापुर अउ बिलासपुर के बीच रेल फ्लाईओवर के काम पूरा होगे हे अउ एला सुरू कर दे गेहे। ए ट्रेक म रेल गाड़ी के परिचालन जल्दी सुरू करे जाही। एखर संबंध म रेलमंत्री अश्विनी वैष्णव ह अपन एक्स हैंडल म वीडियो सेयर करे हे। एखर माध्यम ले ओमन लिखे हे कि छत्तीसगढ़ म रेलवे नेटवर्क म ए महत्वपूर्ण क्षमता जोड़ही। उहें, ए उपलब्धि बर छत्तीसगढ़ के मुख्यमंत्री विष्णुदेव साय ह रेलमंत्री बर आभार जतइन।
ए फ्लाईओवर के सुरू होय ले बिलासपुर यार्ड म रेल गाड़ी के क्रास होय के परसानी खतम हो जाही। ए फ्लाईओवर ले रेलगाड़ी के  अवई-जवई सुरू होय के बाद बिलासपुर ले कटनी डहार जवइया जम्मों रेलगाड़ी ए रद्दा ले बिना देरी करत उसलापुर होत कटनी डहार जाही।

समाचार सेवा प्रभाग-आवेदन

आकाशवाणी के समाचार सेवा प्रभाग रायपुर समेत अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्त होय बर अनुभवी उम्मीदवार ले आवेदन आमंत्रित करथे। एखर विवरण न्यूज ऑन एआईआर डॉट जीओवी डॉट इन/वैकेंसीज पर उपलब्ध हवय। आवेदन जमा करे के आखिरी तारीख आठ फरवरी हवय।
अनुबंध दू बछर खातिर होही। आवेदन के आयु आवेदन जमा करे के आखिरी तिथि तक 58 बछर ले जादा नहीं होना चाहिए। आवेदन के तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के कार्य करे के अनुभव होना जरूरी हवय।

अउ अब थोरकुन समाचार सार म –

– राजनांदगांव म काली ले महंत राजा सर्वेश्वरदास हॉकी टूर्नामेंट के रोमांच सुरू हो जही। ए बखत देसभर ले जाने-माने चौबीस टीम ए टूर्नामेंट म भाग लिहीं  विजेता टीम ल ईनाम म पांच किलो के रजत कप अउ पांच लाख रूपिया दे जाही।

अउ

– मुख्यमंत्री विष्णुदेव साय ह राज्य के उद्योगपति अउ व्यापारी मन ले। उद्योगधंधा अउ व्यापार ले बढ़े रोजगार म स्थानीय निवासी मन ल प्राथमिकता देके आव्हान करीन। ए कारीकरम म उप मुख्यमंत्री अरूण साव अउ विजय शर्मा घलो उपस्थित रिहीन।