प्रधानमंत्री नरेंद्र मोदी परन दिन उनतीस जनवरी के ‘‘परीक्षा पे चर्चा‘‘ कारीकरम म पढ़इया लइका मन ले गोठबात करहीं। केंद्रीय शिक्षा मंत्रालय ह किहीन हे कि ए बछर ‘‘परीक्षा पे चर्चा‘‘ कारीकरम के जरिया 4 हजार ले जादा प्रतिभागी मन प्रधानमंत्री संग गोठबात करही। ए कारीकरम नई दिल्ली के भारत मंडपम म आयोजित करे जाही।
इही बीच, छत्तीसगढ़ के स्कूल शिक्षा सचिव ह ए कारीकरम म सहभागिता खातिर जम्मों कलेक्टर मन ल पत्र लिखके जरूरी बेवस्था करवाय के निरदेस दीन हवय। ‘‘परीक्षा पे चर्चा‘‘ कारीकरम के सीधा प्रसारण दूरदर्सन के राष्ट्रीय चैनल, दूरदर्सन न्यूज, दूरदर्सन भारत, यू-ट्यूब अउ माय जीओवी डॉटइन के जरिया होही। एखर बर जिला पंचायत के मुख्य कार्यपालन अधिकारी, नगर-निगम आयुक्त अउ जिला शिक्षा अधिकारी के बीच समन्वय स्थापित कर कारीकरम के प्रचार-प्रसार करे बर केहे गे हवय।
यूजीसी-विवि काली सूची
विश्वविद्यालय अनुदान आयोग-यू.जी.सी. के दिसा निरदेस के पालन नइ करे सेति, छत्तीसगढ़ के 11 ठिन विश्वविद्यालय मन ल ‘कालीसूची‘ म डाल दे गे हवय। एमा, रायगढ़ के सहीद नंदकुमार पटेल विश्वविद्यालय, रईपुर के कुशाभाऊ ठाकरे पत्रकारिता विश्वविद्यालय, आयुष विश्वविद्यालय, इंदिरा गांधी कृषि विश्वविद्यालय, बिलासपुर के अटल बिहारी वाजपेयी विश्वविद्यालय, दुरूग के छत्तीसगढ़ कामधेनू विश्वविद्यालय, पाटन के महात्मा गांधी उद्यानिकी विश्वविद्यालय अउ सरगुजा विश्वविद्यालय के नाम घलो सामिल हवय। यू.जी.सी. ह ए विश्वविद्यालय मन ल अवईया 31 जनवरी तक लोकपाल के नियुक्ति करे बर केहे हे।
प्रधानमंत्री-महिला कलाकार मुलाकात
नई दिल्ली म गणतंत्र दिवस परेड होय के पहिली प्रधानमंत्री नरेंद्र मोदी ह छत्तीसगढ़ के झांकी ‘‘बस्तर के आदिम जनसंसद-मुरिया दरबार‘‘ म सामिल लोक कलाकार मनले भेंट करीन। इही दौरान प्रधानमंत्री ह छत्तीसगढ़ समेत आने-आने राज्य मन ले आय महिला कलाकार मन ल अच्छा अउ जीवंत प्रदर्सन करे खातिर अपन सुभकामना दीन। प्रधानमंत्री ह नई दिल्ली म पहुंचिन एन.सी.सी. अउ एन.एस.एस. के लइका मन संग भेंट करीन।
ए मउका म श्री मोदी ह किहीन कि ए दारी गणतंत्र दिवस के परेड देस के नारी-सक्ति ल समर्पित हवय। ओमन महिला कलाकार मन ले किहीन कि आपमन ईहा अकेला नइ आय हव बल्कि आपमन, अपन संग अपन-अपन राज्य के रीति-रिवाज अउ अपन समाज के समृद्ध सोच घलो लेके आय हवव। प्रधानमंत्री ह भरोसा जताइन कि जब आपमन इंहा ले अपन-अपन घर लहुटत आपमन के तीर गणतंत्र दिवस के अनुभव के बारे म बताय के बहुत अकन मउका रइही अउ इही ह ए देस के बिसेसता हवय।
मन की बात
प्रधानमंत्री नरेंद्र मोदी ह काली बिहनिया 11 बजे आकाशवाणी के ‘‘मन की बात‘‘ कारीकरम म देस-विदेस के लोगन मन संग अपन बिचार साझा करही। ए ह मासिक रेडियो कारीकरम के एक सौ नौंवी कड़ी होही। ए कारीकरम आकाशवाणी अउ दूरदर्सन के जम्मों नेटवर्क म प्रसारित करे जाही। ए ह आकाशवाणी समाचार के वेबसाइट अउ न्यूज ऑन ए.आई.आर. मोबाइल ऐप म घलो उपलब्ध रइही। ‘‘मन की बात‘‘ कारीकरम के सीधा प्रसारण आकाशवाणी समाचार, दूरदर्शन समाचार, प्रधानमंत्री कार्यालय अउ सूचना प्रसारण मंत्रालय के यू-ट्यूब चैनल मन म करे जाही। आकाशवाणी ह हिंदी प्रसारण के तुरते बाद ए कारीकरम के क्षेत्रीय भाषा म प्रसारण करही।
राशनकार्ड नवीनीकरण
प्रदेस म सार्वजनिक वितरण प्रणाली म अभी के बेरा म चलत जम्मों रासनकार्ड के नवीनीकरण के कार्य सुरू होगे हवय। ए अभियान 29 फरवरी तक चलही। खाद्य विभाग ह रासनकार्ड नवीनीकरण खातिर मोबाइल ऐप तियार करे हवय। जेमा रासनकार्ड रखइया मन अपन-अपन मोबाइल म डाउनलोड कर ऑनलाइन आवेदन कर सकत हे। उहें, अइसन हितग्राही जेखर तीर एन्ड्राइड मोबाइल नइ हवय या फेर जिहां मोबाइल म कोनो कनेक्टिीविटी नइ हवय, उहां उचित मूल्य दुकान स्तर म ऑनलाइन अउ ऑफलाइन प्रक्रिया के जरिया रासनकार्ड खातिर इलेक्ट्रानिक आवेदन पेस करे जा सकत हवय।
बस्तर संभाग के अइसन जिला जिहां मोबाइल कनेक्टिीविटी उपलब्ध नइ हे उहंा हितग्राही मनके सुविधा ल धियान म राखत बिसेस छूट के प्रावधान रखे गे हवय। संगेसंग अइसन सियान अउ शारिरीक रूप ले बड़ कमजोर अइसन हितग्राही मन ल घलो नवा रासनकार्ड बनाय के बिसेस सुविधा दे जाही, जेखर मन डहार ले अब तक अपन ई-के.वाई.सी. नइ कराय गे हवय।
अन्त्योदय, प्राथमिकता, निराश्रित अउ निसक्तजन श्रेणी के जारी रासनकार्ड खातिर रासनकार्ड नवीनीकरण के पूरा प्रक्रिया निसुल्क होही। उहें, सामान्य श्रेणी के रासनकार्ड रखइया खातिर ऐप के जरिया नवीनीकरण बर 10 रूपिया के रासि लगही।
भाजपा/कांग्रेस-नियुक्ति
भारतीय जनता पार्टी ह अवइया लोकसभा चुनाव खातिर 23 ठिन राज्य मन म चुनाव प्रभारी अउ सहप्रभारी के नियुक्ति कर दे हवय। छत्तीसगढ़ ले कोंडागांव विधायक लता उसेंडी ल ओड़िसा के सहप्रभारी बनाय गे हवय।
उहें, अखिल भारतीय कांग्रेस कमेटी ह छत्तीसगढ़ के पूर्व मुख्यमंत्री भूपेश बघेल ल बिहार म भारत जोड़ो न्याय यात्रा अउ आने-आने पार्टी गतिविधि के समन्वय करे खातिर वरिष्ठ पर्यवेक्षक नियुक्त करे हवय।
हल्बी/गोण्डी-समाचार बुलेटिन
काली ईतवार के ‘‘हल्बी अउ गोण्डी‘‘ बोली म समाचार बुलेटिन परसारित करे जाही। ए दूनों बुलेटिन ल आकाशवाणी केंद्र जगदलपुर ले परसारित करे जाही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े 7 बजे ले अउ गोण्डी म समाचार बुलेटिन संझा साढ़े 6 बजे ले परसारित करे जाही।
जिले की चिट्ठी
आकाशवाणी केंद्र रईपुर के प्रादेसिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा 6 बजके 5 मिनट ले 6 बजके 10 मिनट तक करे जाही। ए कारीकरम ल छत्तीसगढ़ के जम्मों आकाशवाणी केंद्र एके संघरा रिले करही। ए बखत के अंक म ‘‘जांजगीर-चांपा‘‘ जिला के गतिविधि के बारे म जानकारी दे जाही।
समाचार सेवा प्रभाग-आवेदन
आकाशवाणी के समाचार सेवा प्रभाग रायपुर समेत अपन आने-आने क्षेत्रीय समाचार इकाई मन म पूर्णकालिक अनुबंध के आधार म संपादकीय कार्यकारी अउ समाचार वाचक सह अनुवादक के रूप म नियुक्त होय खातिर अनुभवी उम्मीदवार ले आवेदन आमंत्रित करथे। एखर विवरण न्यूज ऑन एआईआर डॉट जीओवी डॉट इन/वैकेंसीज पर उपलब्ध हवय। आवेदन जमा करे के आखिरी तारीख आठ फरवरी हवय।
अनुबंध दो बछर खातिर होही। आवेदन के आयु आवेदन जमा करे के आखिरी तिथि तक 58 बछर ले जादा नहीं होना चाहिए। आवेदन के तीर पत्रकारिता म स्नातकोत्तर उपाधि या फेर स्नातकोत्तर डिप्लोमा के संगेसंग कोनों समाचार संगठन म तीन बछर के कार्य करे के अनुभव होना जरूरी हवय।
अउ अब थोरकुन समाचार सार म –
– मुख्यमंत्री विष्णुदेव साय ह काली गणतंत्र दिवस के मउका म जगदलपुर के आमागुड़ा चौक म स्थित अमर वाटिका परिसर में अमर जवान स्मारक म पुष्पगुच्छ अर्पित कर शहीद मन ल नमन करीन।
अउ
– सारंगढ़-बिलाईगढ़ जिला म बाघ के सिकार करे के मामला म वन विभाग के टीम ह पांच झिन आरोपी मन ल गिरफ्तार करीन हवय। उहें, ए मामला म वन विभाग के परिसर रक्षक ल निलंबित करत संबंधित परिक्षेत्र सहायक अउ प्रभारी परिक्षेत्राधिकारी ल नोटिस जारी करे गे हवय।