राष्ट्र आज पचहत्तरवां गणतंत्र दिवस मनावत हे। राष्ट्रपति द्रौपदी मुर्मू ह आज बिहनिया नई दिल्ली म कर्तव्य पथ म आयोजित समारोह म समग्र राष्ट्र के नेतृत्व करीन। फ्रांस के राष्ट्रपति एमैनुअल मैक्रों गणतंत्र दिवस परेड म मुख्य अतिथि रिहीन।
ए बछर विकसित भारत अउ भारत लोकतंत्र के मातृका थीम ऊपर आधारित गणतंत्र दिवस परेड म लगभग तेरा हजार बिसेस अतिथि मनके भागीदारी रिहीस। ए पहल ले समाज के सबो वर्ग के लोगन मन ल गणतंत्र दिवस समारोह म भाग लेेके अवसर मिले हे, अउ ए महान राष्ट्रीय उत्सव म जनभागीदारी ल प्रोत्साहन मिले हे।
गणतंत्र दिवस-झांकी
गणतंत्र दिवस के अवसर म आज नई दिल्ली के कर्तव्य पथ म बस्तर के आदिम जनसंसद विषय उपर केंद्रित छत्तीसगढ़ के झांकी प्रस्तुत करे गीस। झांकी केंद्र सरकार के थीम ‘भारत लोकतंत्र की जननी‘ उपर आधारित रिहीस। बस्तर के आदिम जनसंसद मुरिया दरबार विषय उपर बने ए झांकी म जनजातिय समाज के सांस्कृतिक सौंदर्य अउ कलाधर्मिता ल दरसाय गे रिहीस। उहें, बड़े डोंगर के लिमऊ राजा ल घलो मुख्य रूप ले प्रदर्सित करे गे रिहीस। झांकी के संग चलत हुए छत्तीसगढ़ के लोककलाकार मन मांदर के थाप अउ बांसुरी के धुन म परब नृत्य के प्रदर्सन करीन।
गणतंत्र दिवस-ध्वजारोहण/राज्यपाल
ऐति, छत्तीसगढ़ म घलो गणतंत्र दिवस उत्साह के संग मनाय गीस। राज्यपाल विश्वभूषण हरिचंदन ह राजधानी रईपुर के पुलिस परेड ग्राउण्ड म ध्वजारोहण कर परेड के सलामी लीन।
राज्यपाल ह प्रदेसवासी मन ल गणतंत्र दिवस के सुभकामना देवत हुए किहीन कि गणतंत्र दिवस जन-जन के अधिकार अउ संवैधानिक मूल्य मनके प्रति अपन आस्था ल मजबूत करे के अवसर आय। ए काम आम जनता के बुनियादी जरूरत मन ल पूरा करत हुए सबो झन ल विकास के साधन सुविधा अउ अवसर देके ही करे जा सकत हे। राज्यपाल ह भारत ल आजादी देवइया अमर सहीद अउ असंख्य स्वतंत्रता सेनानी मन ल नमन करत हुए किहीन कि उंखर त्याग अउ बलिदान के सेति आजाद देस ल अपन संविधान बनाय के अवसर मिले हे। ओमन किहीन कि हमर संविधान समय के कसौटी उपर खरा उतरे हे अउ एक लंबा यात्रा के बाद आज हम अपन गणतंत्र के अमृत महोत्सव के मुकाम म पहुचे हन।
राज्यपाल ह किहीन कि राष्ट्रपति द्रौपदी मुर्मू अउ प्रधानमंत्री नरेंद्र मोदी ह अपन व्यक्तित्व अउ कृतित्व ले ए साबित करे हे कि हमर संविधान अउ लोकतंत्र के सक्ति ले साधारण परिवार म जनमे व्यक्ति ह घलो देस के शीर्षस्थ पद म पहंुच के मां भारती के गौरव ल ब्रम्हाण्ड के हर हिस्सा म पहुंचा सकत हे।
गणतंत्र दिवस-ध्वजारोहण-परेड
राजधानी रईपुर के पुलिस परेड ग्राउंड म आयोजित गणतंत्र दिवस के राज्य स्तरीय मुख्य समारोह म राज्यपाल विश्वभूषण हरिचंदन ह उत्कृष्ट कार्य करइया पुलिस विभाग के अधिकारी करमचारी मन ल सम्मानित करीन। ओमन पुलिस वीरता पदक, विसिष्ट सेवा बर राष्ट्रपति के पुलिस पदक, सराहनीय सेवा बर भारतीय पुलिस पदक अउ गृह रक्षक अउ नागरिक सुरक्षा सेवा पदक ले सम्माानित करीन।
गणतंत्र दिवस-मुख्यमंत्री
मुख्यमंत्री विष्णुदेव साय ह गणतंत्र दिवस के अवसर म बस्तर जिला मुख्यालय जगदलपुर म ध्वजारोहण कर परेड के सलामी लीन। कारीकरम ल संबोधित करत मुख्यमंत्री ह किहीन कि भगवान राम के प्रति अटूट श्रध्दा हमर पहिचान आय। हम ‘‘रघुकूल रीति सदा चली आई, प्राण जाई पर वचन न जाई‘‘ के अनुसरण करथन। हमर चेतना म एकात्म मानववाद के प्रणेता पंडित दीनदयाल उपाध्याय के दर्सन समाहित हे, जेन ह हमला मानव धर्म के लक्ष्य मनके प्रति जागरूक राखथे। इखर रास्ता म चलत हुए हम छत्तीसगढ़ के जन जन के सपना ल पूरा करबो।
मुख्यमंत्री ह किहीन कि प्रधानमंत्री नरेंद्र मोदी के नीति, योजना, कारीकरम अउ अभियान मनके सेति पाछू लगभग एक दसक म देस ह सब्बो क्षेत्र म बड़े-बड़े सफलता पाय हे। जेखर सेति जिहां एक डहार हर देसवासी के माथा गर्व से उंचा होय हे, उहें दूसर डहार पूरा दुनिया ह भारत के लोहा मानत हे। कई ठन क्षेत्र म अब भारत विश्व के अगुवई करत हे।
गणतंत्र दिवस-मंत्री ध्वजारोहण
गणतंत्र दिवस के अवसर म विधानसभा अध्यक्ष डॉक्टर रमन सिंह ह राजनांदगांव जिला मुख्यालय म झंडा फहराइन। उहें, उप मुख्यमंत्री अरूण साव ह बिलासपुर अउ विजय शर्मा ह दुरूग जिला मुख्यालय म ध्वजारोहण करीन। अइसने पर्यटन मंत्री बृजमोहन अग्रवाल ह महासमुंद, आदिम जाति विकास मंत्री रामविचार नेताम ह बलरामपुर-रामानुजगंज, खाद्यमंत्री दयालदास बघेल ह बेमेतरा अउ वनमंत्री केदार कश्यप ह नारायणपुर म ध्वजारोहण कर परेड के सलामी लीन। उहें, उद्योग मंत्री लखनलाल देवांगन ह कोरबा, स्वास्थ्य मंत्री श्यामबिहारी जायसवाल ह मनेन्द्रगढ़-चिरमिरी-भरतपुर, वित्त मंत्री ओपी चौधरी ह रायगढ़, महिला अउ बालविकास मंत्री लक्ष्मी राजवाड़े ह अंबिकापुर अउ राजस्व मंत्री टंकराम वर्मा ह बलौदाबाजार-भाटापारा जिला म ध्वजारोहण करीन। अइसने प्रदेस के दूसर जिला मन म क्षेत्रीय सांसद अउ विधायक मन गणतंत्र दिवस समारोह के मुख्य अतिथि के रूप म सामिल होइन।
पद्म पुरस्कार
केंद्र सरकार ह गणतंत्र दिवस के पूर्व संध्या म काली पद्म पुरस्कार मनके घोसना करीन। ए बखत छत्तीसगढ़ के तीन झन विभूति मन ल पद्मश्री अलंकरण ले सम्मानित करे जाही। एमा रायगढ़ के कत्थक नर्तक पंडित रामलाल बरेठ, नारायणपुर के वैद्यराज हेमचंद मांझी अउ जशपुर के जागेश्वर यादव सामिल हे। पंडित रामलाल बरेठ ह कला के क्षेत्र म, वैद्यराज हेमचंद मांझी ल चिकित्सा के क्षेत्र म अउ जागेश्वर यादव ल समाज सेवा के क्षेत्र म उंखर उल्लेखनीय सेवा बर पद्मश्री सम्मान प्रदान करे जाही। मुख्यमंत्री विष्णुदेव साय ह ए उपलब्धि बर तीनों झन विभूति मन ल बधाई दीन।
गौरतलब हे कि जागेश्वर यादव ह बिसेस पिछड़ा जनजाति बिरहोर अउ पहाड़ी कोरवा के भलाई बर अपन जीवन समर्पित कर दे हे। उहें, हेमचंद मांझी ह ख्याति प्राप्त वैद्य हे। ओमन पंद्रह बछर के आयु ले ही अपन पारंपरिक औषधि ज्ञान ले जरूरत मंद लोगन मनके ईलाज करत रिहीन अउ एखर बर बहुत कम पइसा लेवत रिहीन। अइसने कथक के पारंगत नर्तक रामलाल बरेठ ह कला बर अपन जीवन ल समर्पित कर देहे।
ईडी-एफआईआर
छत्तीसगढ़ म पूर्ववर्ती कांग्रेस सरकार म होय कथित कोयला अउ शराब घोटाला के मामला म प्रवर्तन निदेशालय-ईडी ह एंटी करप्शन ब्यूरो-एसीबी म दू अलग-अलग एफ.आई.आर. दर्ज कराय हे। एमा तत्कालीन कांग्रेस सरकार अउ प्रशासन ले जुड़े सौ ले जादा लोगन मनके नाम सामिल हे। एमा शराब घोटाला के मामला म पूर्व आबकारी मंत्री कवासी लखमा, पूर्व आईएएस अधिकारी अनिल टूटेजा, ओखर बेटा यश टूटेजा, कारोबारी अनवर ढेबर अउ विजय भाटिया के संग बारह ले जादा आबकारी अधिकारी मनके नाम घलो सामिल हे।
उहें, कोयला घोटाला के मामला म निलंबित आईएएस अधिकारी रानू साहू, समीर बिश्नोई, पूर्व आईएएस अधिकारी विवेक ढांढ, सौम्या चौरसिया, कारोबारी सुनील अग्रवाल, सूर्यकांत तिवारी, विनोद तिवारी, पूर्व मंत्री अमरजीत भगत, पूर्व विधायक शिशुपाल सोरी, बृहस्पत सिंह अउ भिलाई विधायक देवेन्द्र यादव समेत इकहत्तर लोगन मन ल आरोपी बनाय गेहे।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत छत्तीसगढ़ ले पùश्री सम्मान बर चुनेगे समाजसेवी, जागेश्वर यादव, पारंपरिक चिकित्सक वैद्यराज हेमचंद मांझी अउ कथक नर्तक पंडित रामलाल बरेठ ले लेगे भेंटवार्ता के प्रसारण करे जाही। एखर प्रसारण आकाशवाणी के रायपुर केन्द्र डहार ले काली सत्ताइस जनवरी के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।