प्रधानमंत्री नरेन्द्र मोदी ह किहीन हे कि स्थिर सरकार बड़े फइसला लेथे। उंखर सरकार ह दसक ले लंबित मुद्दा के समाधान करे हे। राष्ट्रीय मतदाता दिवस के मउका म भारतीय जनता युवा मोर्चा डहार ले राखे गे नमो नवमतदाता सम्मेलन ल वर्चुअल माध्यम ले संबोधित करत प्रधानमंत्री ह किहीन कि बहुमत के सरकार हे त नीति अउ फइसला म स्पष्टता दिखथे।
प्रधानमंत्री ह किहीन कि युवा मतदाता अपन मत ले देस के दिसा अउ दसा तय करही। मतदाता सूची म उंखर नाम पंजीकृत होय ले ओमन देस के लोकतांत्रिक प्रक्रिया के निर्णायक सदस्य बन गेहे। प्रधानमंत्री ह किहीन कि उंखर एक वोट एक बड़े सक्ति हवय।
राष्ट्रीय मतदाता दिवस
राष्ट्रपति द्रौपदी मुर्मू ह किहीन हे कि लोकतंत्र के विविधता म निर्वाचन आयोग के महत्वपूर्ण भूमिका हे। ओमन किहीन कि चुनाव आयोग ह मतदाता मन ल जागरूक करे म सक्रिय रेहे हे। मतदाता मन ल जागरूक करे म निर्वाचन आयोग के सक्रियता भारत के लोकतंत्र म दिखाई घलो देथे। आज नई दिल्ली म राष्ट्रीय मतदाता दिवस समारोह ल संबोधित करत राष्ट्रपति ह कहिन कि ए बछर देस म आम चुनाव होही अउ एखर बर देसभर म बारह लाख मतदान केन्द्र बनाय जाही। ओमन किहीन कि देस म छियानवे करोड़ ले जादा मतदाता हवय अउ निर्वाचन आयोग ह उंखर ले जुड़े हरसंभव कोसिस करत हे। ओमन विश्वास व्यक्त करीन कि निर्वाचन आयोग ह चुनाव के दउरान प्रौद्योगिकी के उपयोग ल बढ़ाही।
राष्ट्रपति ह ए मउका म बछर दू हजार तेईस के सबले बढ़िया चुनाव प्रबंधन पुरस्कार दीन। ए पुरस्कार राज्य अउ जिला स्तर के अधिकारी मन ल पाछु बछर चुनाव संचालन म उंखर बढ़िया काम बर दे गीस।
ऐति, छत्तीसगढ़ म घलो राष्ट्रीय मतदाता दिवस म आने-आने कारीकरम आयोजित करे जावत हे। राजभवन सचिवालय म अधिकारी अउ कर्मचारी मन ह लोकतांत्रिक पंरपरा के मर्यादा ल बनाय राखे के सपथ लीन।
मंत्रिमंडल निर्णय
प्रदेस म अब एको ठन नवा सराब दुकान नइ खोले जाही। छत्तीसगढ़ आबकारी नीति दू हजार चौबीस-पच्चीस के अनुमोदन के बाद ए फइसला ले गीस। मुख्यमंत्री विष्णुदेव साय के पगरइति म काली मंत्रालय म होय राज्य मंत्रिपरिषद के बइठका म छत्तीसगढ़ सिविल न्यायालय संशोधन विधेयक-दू हजार चौबीस के प्रारूप के अनुमोदन करे गेहे। ए संशोधन के बाद जिला न्यायाधीश ल प्रधान जिला न्यायाधीश अउ अपर जिला न्यायाधीश ल जिला न्यायाधीश करे के प्रावधान राखे गेहे। अइसने, ‘व्यवहार न्यायाधीश प्रथम वर्ग‘ ल ‘व्यवहार न्यायाधीश वरिष्ठ श्रेणी‘ अउ ‘व्यवहार न्यायाधीश द्वितीय वर्ग‘ ल ‘व्यवहार न्यायाधीश कनिष्ठ श्रेणी‘ अउ ‘जिला न्यायालय‘ ल ‘प्रधान जिला न्यायालय‘ राखे के प्रावधान राखे गेहे।
बइठका म बछर दू हजार तेईस-चौबीस बर तृतीय अनुपूरक अनुमान के विधानसभा म उपस्थापन बर छत्तीसगढ़ विनियोग विधेयक के प्रारूप के घलो अनुमोदन करे गीस।
राशनकार्ड-नवीनीकरण
प्रदेस म सार्वजनिक वितरण प्रणाली के तहत अभी चलत जम्मों ससत्तर लाख रासनकार्ड मनके नवीनीकरण बर आज ले राज्य स्तरीय अभियान सुरू होगे हे। ए अभियान उनतीस फरवरी तक चलही। खाद्य विभाग ह रासनकार्ड नवीनीकरण बर नवा मोबाइल ऐप तैयार करे हे, जेखर ले रासनकार्डधारी अपन मोबाइल म डाउनलोड करके ऑनलाइन अरजी कर सकत हे। उहें, अइसन हितग्राही जिखर तीर एंड्राईड मोबाइल नइ हे अउ जिहां मोबाइल कनेक्विविटी नइ हे, उहां रासन दुकान म ऑनलाइन अउ ऑफलाइन प्रक्रिया के माध्यम ले रासनकार्ड बर इलेक्ट्रॉनिक आवेदन प्रस्तुत करे जा सकथे।
अन्त्योदय, प्राथमिकता, निराश्रित अउ निःशक्तजन श्रेणी के जारी रासनकार्ड बर रासनकार्ड नवीनीकरण के पूरा प्रक्रिया निःशुल्क होही। उहें, सामान्य श्रेणी के रासन कार्डधारी मन बर ऐप के माध्यम ले नवीनीकरण बर दस रूपिया के रासि निर्धारित करे गेहे।
गणतंत्र दिवस-ध्वजारोहण
प्रदेस म पचहत्तरवां गणतंत्र दिवस काली देशभक्ति अउ उल्लास के संग मनाय जाही। मुख्य समारोह राजधानी रईपुर के पुलिस परेड मैदान म होही, जिहां राज्यपाल विश्वभूषण हरिचंदन ह ध्वजारोहण करके परेड के सलामी लीही। उहें, मुख्यमंत्री विष्णुदेव साय जगदलपुर म अउ विधानसभा अध्यक्ष डॉक्टर रमन सिंह राजनांदगांव के समारोह म ध्वजारोहण करही। अइसने, उपमुख्यमंत्री अरूण साव बिलासपुर म अउ उपमुख्यमंत्री विजय शर्मा ह दुरूग म आयोजित समारोह ध्वजारोहण करही।
पर्यटन मंत्री बृजमोहन अग्रवाल महासमुंद, आदिम जाति विकास मंत्री रामविचार नेताम बलरामपुर-रामानुजगंज, खाद्य मंत्री दयालदास बघेल बेमेतरा अउ वन मंत्री केदार कश्यप नारायणपुर के कार्यक्रम म माईपहुना रइही। उहें, उद्योग मंत्री लखनलाल देवांगन कोरबा, स्वास्थ्य मंत्री श्याम बिहारी जायसवाल मनेन्द्रगढ़-चिरमिरी-भरतपुर, वित्त मंत्री ओ.पी. चौधरी रायगढ़, महिला अउ बाल विकास मंत्री लक्ष्मी राजवाड़े अंबिकापुर अउ राजस्व मंत्री टंकराम वर्मा बलौदाबाजार-भाटापारा जिला म ध्वजारोहण करही। अइसने, प्रदेस के आने-आने जिला म क्षेत्रीय सांसद अउ विधायक मन ह गणतंत्र दिवस समारोह के माईपहुना होही।
राज्यपाल विश्वभूषण हरिचंदन ह गणतंत्र दिवस के मउका म देस अउ प्रदेसवासी मन ल बधाई अउ सुभाकामना देहे। ओमन सीमा म रक्षा करइया प्रहरी अउ सुरक्षा बल मनके जवान ल उंखर योगदान बर नमन करे हे।
राष्ट्रपति संदेश
गणतंत्र दिवस के पूर्व संध्या म आज संझा सात बजे राष्ट्रपति द्रौपदी मुर्मू ह देस के जनता के नाम अपन संदेस दीहीं। एखर सेती आकाशवाणी रईपुर के प्रसारित होवइया हिन्दी प्रादेशिक समाचार बुलेटिन आज संझा सात बजकर पांच मिनट के जघा म रतिहा नौ बजके पन्द्रह मिनट ले प्रसारित करे जाही।
उहें, गणतंत्र दिवस के मउका म राज्यपाल विश्वभूषण हरिचंदन के प्रदेस के जनता के नाव संदेस के प्रसारण काली बिहनिया साढ़े आठ बजे ले करे जाही। एखर प्रसारण दूरदर्शन छत्तीसगढ़ ले करे जाही।
प्रधानमंत्री-पुस्तक विमोचन
गणतंत्र दिवस के मउका म प्रधानमंत्री नरेन्द्र मोदी ह ‘‘हल्बी बालबोधिनी‘‘ पुस्तक के विमोचन करही। राष्ट्रीय सिक्षा नीति अउ राष्ट्रीय पाठ्यक्रम रूपरेखा के तहत तीन ले आठ साल तक के लइका मन ल मातृभाषा, घर के भासा अउ आंचलिक भासा म सिक्षा दान के व्यवस्था करे गेहे। एखर तहत हल्बी बालबोधिनी तैयार करे गेहे। ए पुस्तक म मातृभाषा हल्बी अउ हिन्दी के संगेसंग अंग्रेजी के सब्द के संग चित्र अउ कविता के माध्यम ले वर्णमाला, बारह खड़ी अउ गिनती के समावेश हे। ए पुस्तक हल्बा जनजाति क्षेत्र, विशेषकर छत्तीसगढ़ के संगेसंग मध्यप्रदेश, महाराष्ट्र, ओड़िसा अउ असम म नवा सिक्षा सत्र-दू हजार चौबीस-पच्चीस बर केन्द्र सरकार डहार ले राज्य सरकार ल उपलब्ध कराय जाही।
गणतंत्र दिवस-झांकी
गणतंत्र दिवस म नई दिल्ली के कर्तव्य पथ म प्रदर्सित होवइया छत्तीसगढ़ के झांकी म कोंडागांव जिला के बड़ेडोंगर के लिमऊ-राजा अउ बस्तर के आदिम जन संसद मुरिया दरबार ल केन्द्रीय बिसय बनाय गेहे। एखर संगेसंग झाकी के सजावट म बेलमेटल अउ टेराकोटा शिल्प के खूबसूरती ले घलो दुनिया ल परिचित कराय गेहे। झांकी के प्लेटफार्म म लिमऊराजा के तीरेच म बेलमेटल के बइठे हुए नंदी राखे गेहे, जउन आदिम समाज के आत्मविश्वास अउ सांस्कृतिक सौंदर्य के रूप म प्रस्तुत करे जावत हे।
मुख्यमंत्री विष्णुदेव साय ह ए झांकी म खुशी जाहिर करत किहीन कि छत्तीसगढ़ के झांकी के बिसय म न सिरिफ छत्तीसगढ़, बल्कि पूरा देस के आदिवासी समाज बर बड़ खुसी के बात हे।
पुलिस पदक
केन्द्र सरकार ह गणतंत्र दिवस के मउका म छत्तीसगढ़ पुलिस के उनचालीस झिन अधिकारी अउ कर्मचारी मन ल पुलिस वीरता पदक, विशिष्ट सेवा पदक अउ सराहनीय सेवा पदक ले विभूषित करे जाय के घोसना करे हे। एमा छब्बीस पुलिसकर्मी मन ल सराहनीय सेवा बर पुलिस वीरता पदक, दू झन ल विशिष्ट सेवा बर राष्ट्रपति पुलिस पदक अउ सराहनीय सेवा बर ग्यारह झिन कर्मचारी मन ल पुलिस पदक ले सम्मानित करे जाही। राज्य के पुलिस महानिदेशक अशोक जुनेजा ह पदक ले विभूषित जम्मों पुलिस अधिकारी-कर्मचारी अउ उंखर परिवार वाले मन ल सुभकामना दीन हे।