बिहार के पूर्व मुख्यमंत्री कर्पूरी ठाकुर ल मरणोपरान्त ‘‘भारत रत्न‘‘ ले सम्मानित करे जाही। राष्ट्रपति भवन कोति ले विज्ञप्ति म बताय गेहे कि कर्पूरी ठाकुर के सौंवा जयंती के पहिली काली एखर घोसना करे गीस। कर्पूरी ठाकुर ह जाने-माने समाजवादी नेता रिहीन। प्रधानमंत्री ह किहीन कि सामाजिक न्याय के जन-नायक कर्पूरी ठाकुर ल भारत रत्न ले सम्मानित करे के फैसला सुन के देस के लोगन मन म खुसी देखे जात हे।
त ऐति प्रदेस के मुख्यमंत्री विष्णुदेव साय ह किहीन कि केंद्र सरकार डहार ले कर्पुरी ठाकुर ल भारत रत्न दे जाना ऐतिहासिक फैसला हरय।
हमारा संविधान-हमारा सम्मान
उप राष्ट्रपति जगदीप धनखड़ ह भारत के गणतंत्र के रूप म पचहत्तर साल पूरा होय के मउका म आज नई दिल्ली म हमारा संविधान हमारा सम्मान अभियान सुरू करीन। ए मउका म ओमन किहीन कि राष्ट्र ह अइसन नायक मन ल सुरता करत हे जउन मन ल बिसरा दे गेहे। ए मउका म कानूनी सेवा के दायरा पंक्ति म खड़े आखिरी मनखे तक पहुंचाय के उद्देस्य ले जरूरी पहल न्याय सेतु सुरू करे गीस।
सड़क सुरक्षा-लघु फिल्म महोत्सव
मुख्यमंत्री ह आज रईपुर के मेडिकल कॉलेज स्थित अटल बिहारी वाजपेयी ऑडिटोरियम म चलत राष्ट्रीय सड़क सुरक्षा लघु फिल्म महोत्सव के सुभारंभ। ए मउका म ओमन लोगन मन ले दू पहिया गाड़ी चलावत बेरा हेलमेट लगाय अउ मोबाइल के उपयोग नइ करे के अपील करीन। ए मउका म ओमन यातायात संदर्सिका अउ पोस्टर के विमोचन घलो करीन।
परीक्षा पे चर्चा-पंजीकरण
प्रधानमंत्री नरेंद्र मोदी ह उनतीस जनवरी के ‘‘परीक्षा पे चर्चा‘‘ कारीकरम म पढ़इया छात्र मन ले सोज्जे गोठबात करहीं। प्रदेस के स्कूल शिक्षा सचिव ह ए कारीकरम म सहभागिता बर जम्मों कलेक्टर मन ल चिट्ठी लिखके जरूरी बेवस्था करे के निरदेस दे हवय। ओमन चिट्ठी म केहे हे कि परीक्षा पे चर्चा कारीकरम के सीधा प्रसारण दूरदर्सन के राष्ट्रीय चैनल, दूरदर्सन न्यूज, दूरदर्सन भारत, यू-ट्यूब अउ माईजीओवी डॉट इन के माध्यम ले होही। स्कूल शिक्षा सचिव ह एखर बर जिला पंचायत के मुख्य कार्यपालन अधिकारी, नगर-निगम के आयुक्त के संगेसंग जिला शिक्षा अधिकारी के बीच तालमेल मिलाके ए कारीकरम के प्रचार-प्रसार करे बर केहे हे।
जानबा के मुताबिक परीक्षा पे चर्चा कारीकरम म प्रधानमंत्री ह ऐसो चार हजार ले जादा छात्र मन ले गोठबात करहीं। ए कारीकरम दिल्ली के भारत मंडपम प्रगति मैदान म होही।
एक भारत श्रेष्ठ भारत
केंद्र सरकार के एक भारत-श्रेष्ठ भारत कारीकरम म आज रईपुर स्थित राजभवन म उत्तरप्रदेस, मेघालय, मणिपुर, त्रिपुरा अउ केंद्रसासित प्रदेस-दादर अउ नगर हवेली के संगेसंग दमन दीव के स्थापना दिवस मनाय गीस। ए मउका म राज्यपाल ह किहीन कि आने-आने राज्य के भाषा-संस्कृति, परंपरा अउ प्रथा मन ल आपस म बांटे ले आपसी समझ अउ लगाव बढ़थे। एखर ले भारत के एकता मजबूत होथे। ए मउका म आने-आने विश्वविद्यालय मनके छात्र-छात्रा मन ह उत्तरप्रदेस के कत्थक नृत्य के संगेसंग चारों राज्य अउ दूनों केंद्र शासित प्रदेस मनके लोकनृत्य मनके रंगारंग प्रस्तुति दीन।
राष्ट्रीय मतदाता दिवस
काली राष्ट्रीय मतदाता दिवस हरय। ए मउका म रईपुर के इंदिरा गांधी कृषि विश्वविद्यालय म राज्य स्तरीय समारोह होही। समारोह म चुनई काम म बढ़िया योगदान देवइया अधिकारी-कर्मचारी अउ मतदाता मन ल बिसेस पहल करके वोट डारे बर आगू लवईया जिला मन ल सम्मानित करे जाही। कारीकरम म प्रमुख लोकआयुक्त न्यायमूर्ति टी.पी.शर्मा मुख्य अतिथि होही। कारीकरम के अध्यक्षता विश्वविद्यालय के कुलपति डॉक्टर गिरीश चंदेल ह करही।
राज्यपाल विश्वभूषण हरिचंदन अउ मुख्यमंत्री विष्णुदेव साय ह राष्ट्रीय मतदाता दिवस के मउका म प्रदेस लोगन मन ल बधई दे हवय। संगेसंग राज्यपाल ह अपन संदेस म किहीन कि मतदाता मन ल अपन मत के सही ढंग ले परयोग करना चाही।
स्वच्छता दीदी-गणतंत्र परेड
उप मुख्यमंत्री अरूण साव ह आज रईपुर के स्वामी विवेकानंद हवाई अड्डा ले गणतंत्र दिवस परेड देखे बर नई दिल्ली जवइया स्वच्छता दीदी मन ल हरा झंडी दिखाके रवाना करीन। ओमन यात्रा बर स्वच्छता दीदी अउ उंखर परिवार मन ल सुभकामना दीन। बिसेस अतिथि के रूप म जवईया स्वच्छता दीदी मन म गंडई नगर पंचायत के दू, कुम्हारी नगर पालिका के दू, खैरागढ़ नगर पालिका के एक, बिलासपुर नगर-निगम के तीन के संगेसंग राजनांदगांव, दुर्ग, अंबिकापुर अउ कोरबा नगर-निगम के दो-दो स्वच्छता दीदी मन ल बुलाय गेहे। ए दीदी मन के संग एखर परिवार मनके एक-एक झिन सदस्य घलो संग म जाही। जानबा के मुताबिक केंद्रीय अवासन अउ सहरी कार्य मंत्रालय ह छत्तीसगढ़ के सोला झिन स्वच्छता दीदी अउ ओखर परिवार मन ल नई दिल्ली म गणतंत्र दिवस समारोह देखे बर बिसेस अतिथि के रूप म बुलाय गेहे। ए स्वच्छता दीदी मन काली केंद्रीय अवासन अउ सहरी कार्य मंत्री हरदीप सिंह पुरी ले मिलही।
उहें, केंद्रीय आयुष मंत्रालय के योजना के तहत प्रदेस म चलाय जात आयुष्मान आरोग्य मंदिर के पंद्रह झिन योग प्रशिक्षक मन ल घलो नई दिल्ली म होवइया गणतंत्र दिवस समारोह म बुलाय गेहे।
गणतंत्र दिवस-राष्ट्रपति/राज्यपाल संदेस
गणतंत्र दिवस के पूर्व संध्या म काली ए राष्ट्रपति द्रौपदी मुर्मू ह देस के जनता के नांव अपन संदेस दिही। एखर सोज्जे प्रसारण काली संझा सात बजे ले आकाशवाणी के नई दिल्ली केंद्र ले करे जाही। जेखर सेति आकाशवाणी रईपुर ले प्रसारित होवइया हिंदी के प्रादेसिक समाचार बुलेटिन काली संझा सात बजके पांच मिनट के जघा म रतिहा नौ बजके पंद्रह मिनट ले प्रसारित करे जाही। छत्तीसगढ़ के राज्यपाल विश्वभूषण हरिचंदन ह घलो प्रदेस के जनता के नांव अपन संदेस दिही जेखर प्रसारण आकाशवाणी केंद्र रईपुर डहार ले काली रतिहा आठ बजे ले करे जाही।
मुख्यमंत्री अयोध्या
मुख्यमंत्री ह आज रईपुर के श्रीराम मंदिर परिसर ले अयोध्या म भंडारा चलाय बर कार्यकर्ता मन के टीम ल झंडा दिखाके अयोध्या भेजिन। ओमन बतइन कि ए टीम म छै ठिन समिति के लोगन मन ह दू महिना तक अयोध्या म भंडारा चलाके राम भक्त मन ल भोजन कराही।
सेना भर्ती
भारतीय सेना म भर्ती बर आठ फरवरी के अधिसूचना जारी करे जाही। एखरे संग ऑनलाइन अर्जी के काम सुरू हो जही, जउन ह इकतीस मार्च तक चलही। अर्जी अग्निवीर पुरूष जनरल, तकनीकी, कलर्क, स्टोर कीपर, ट्रेड्समैन, अग्निवीर महिला, नर्सिंग असिस्टेंट, नर्सिंग असिस्टेंट वेट, सिपाही फार्मा, हवलदार एसएसी अउ धर्मगुरू के पद बर करे जा सकथे। ऑनलाइन परीक्षा अप्रैल अउ मई महिना म हो सकथे।
सेना भर्ती कार्यालय रईपुर ले मिले जानबा के मुताबिक ऑनलाइन परीक्षा बर उम्मीदवार मन ल परीक्षा सुल्क के रूप म दू सौ पचास रूपिया देबर पड़ही। उम्मीदवार मनके भर्ती दू चरण म करे जाही। पहिली चरण म ऑनलाइन कम्प्यूटर आधारित लिखित परीक्षा अउ दूसर चरण म भर्ती रैली होही। जउन उम्मीदवार मन दसवीं अउ बारहवीं के परीक्षा देहे अउ रिजल्ट नइ आय हे, वहू मन अर्जी कर सकथे।
भाजपा सदस्यता
आम आदमी पार्टी के प्रदेस उपाध्यक्ष आनंद प्रकाश मिरी अउ वरिष्ठ पदाधिकारी मन ह काली रईपुर म होय एक ठिन समारोह म भारतीय जनता पार्टी के सदस्यता लीन। त उहें, अखंड लोक तांत्रिक पार्टी के प्रमुख विनोद कुमार पटेल ह अपन पार्टी ल भाजपा म सामिल कर लीन। एखर अलावा सैनिक पार्टी के महेन्द्र प्रताप सिंह राणा ह घलो बड़का कार्यकर्ता मन के संग भाजपा के सदस्यता लीन। ए मउका म मुख्यमंत्री के संगेसंग प्रदेस भाजपा प्रभारी अउ बड़का पदाधिकारी मन आय रिहीन।
भारत जोड़ो न्याय यात्रा-पर्यवेक्षक
कांग्रेस के पूर्व राष्ट्रीय अध्यक्ष राहुल गांधी के भारत जोड़ो न्याय यात्रा के छत्तीसगढ़ प्रवास ल लेके प्रदेस कांग्रेस ह प्रदेस संयोजक अउ जिलावार पर्यवेक्षक मनके नियुक्त करे हे। पूर्व मंत्री डॉक्टर शिवकुमार डहरिया, जयसिंह अग्रवाल, अमरजीत भगत अउ उमेश पटेल ल प्रदेस संयोजक बनाय गेहे।