छत्तीसगढ़ ल कोयला के अलावा दूसर प्रमुख खनिज-खदान के नीलामी बर देसभर म दूसर पुरस्कार मिले हे। भोपाल म राखे गे राज्य स्तरीय खनन मंत्री मनके सम्मेलन म केन्द्रीय मंत्री प्रहलाद जोशी के हाथ ले छत्तीसगढ़ के खनिज अधिकारी मन ह ए पुरस्कार लीन। ए बीस खनिज के आवंटन ले राज्य ल करीबन तिरालीस हजार सात सौ करोड़ रूपिया के आमदनी होही।
हाईकोर्ट-न्यायाधीश
हाईकोर्ट के रजिस्ट्रार जनरल अरविंद वर्मा ल छत्तीसगढ़ उच्च न्यायालय के न्यायाधीश बनाय गे हवय। सुप्रीम कोर्ट कॉलेजियम के प्रस्ताव उपर केन्द्र सरकार ह ए संबंध म अधिसूचना जारी कर देहे। ए नियुक्ति के संगेच छत्तीसगढ़ हाईकोर्ट म अब कुल सोलह झन जज होगे हे।
गणतंत्र दिवस-ध्वजारोहण
गणतंत्र दिवस म राजधानी रईपुर के पुलिस परेड मैदान म होवइया मुख्य समारोह म राज्यपाल विश्वभूषण हरिचंदन ह झंडा फहरा के परेड के सलामी लीहीं। उहें, मुख्यमंत्री विष्णुदेव साय ह जगलदपुर म अउ विधानसभा अध्यक्ष डॉक्टर रमन सिंह ह राजनांदगांव के समारोह म ध्वजारोहण करही। अइसने, उप मुख्यमंत्री अरूण साव बिलासपुर म अउ उप मुख्यमंत्री विजय शर्मा ह दुरूग म राखे गे समारोह म झंडा फहराही। पर्यटन मंत्री बृजमोहन अग्रवाल ह महासमुंद, कृषि मंत्री रामविचार नेताम बलरामपुर, खाद्य मंत्री दयालदास बघेल बेमेतरा अउ वन मंत्री केदार कश्यप ह नारायणपुर के कार्यक्रम म मुख्य अतिथि होही। उहें, उद्योग मंत्री लखनलाल देवांगन ह कोरबा, स्वास्थ्य मंत्री श्यामबिहारी जायसवाल ह चिरमिरी, वित्त मंत्री ओ.पी. चौधरी ह रायगढ़, महिला अउ बाल विकास मंत्री लक्ष्मी राजवाड़े ह अंबिकापुर अउ राजस्व मंत्री टंकराम वर्मा ह बलौदाबाजार म झंडा फहराही। अइसने, प्रदेस के दूसर जिला मन म घलो क्षेत्रीय सांसद अउ विधायक मन ह गणतंत्र दिवस के मउका म मुख्य अतिथि होही।
अरूण साव-बैठक
उपमुख्यमंत्री अउ नगरीय प्रशासन तथा विकास मंत्री अरूण साव ह किहीन कि नगरीय क्षेत्र म चलत निर्माण काम म गुणवत्ता के बिसेस ध्यान राखे जाय। संगेसंग यदि कोनों काम ल पूरा करे म देरी होही त संबंधित ठेकेदार उपर जुर्माना लगा के ओला रोके जाय। अपन विभाग के समीक्षा बइठका म ओमन ह नगरीय निकाय के अधिकारी मन ले आवासीय क्षेत्र म हर दिन होवइया सफाई के नियमित रूप ले निरीक्षण करे बर किहीन। श्री साव ह किहीन कि भवन निर्माण अउ सीसी रोड के निर्माण म गुणवत्ता घलो निश्चित करे जाय।
बालिका दिवस-सीएम
मुख्यमंत्री विष्णुदेव साय ह बालिका दिवस के मउका म प्रदेस के सबो बेटी मन ल बधाई देवत उंखर उज्जवल भविष्य के कामना करीन हे अउ किहीन कि छत्तीसगढ़ ह स्त्री-पुरूष के लिंग अनुपात म देस के कतकोन राज्य म अव्वल हे। ओमन किहीन कि राज्य सरकार ह नोनी मनके विकास बर हर प्रकार ले संकल्पित हे।
प्रदेस के महिला अउ बाल विकास मंत्री लक्ष्मी राजवाड़े ह घलो ए मउका म सुभकामना देवत किहीन कि बालिका मनके सिक्षा, स्वास्थ्य अउ पोषण बर कतकोन काम करे जावत हे।
राम पर्यटन
अपन वनवास के बेरा भगवान राम छत्तीसगढ़ के जउन-जउन जघा ले गुजरे रिहीन, ओ सबो जघा ल पर्यटन स्थल के रूप म विकसित करे जाही। ए घोसना मुख्यमंत्री विष्णुदेव साय ह काली राजधानी के श्रीराम मंदिर म राखे गे ‘‘हमर भांचा राम‘‘ कारीकरम म करीन।
कारीकरम म धार्मिक न्यास अउ धर्मस्व मंत्री बृजमोहन अग्रवाल ह किहीन कि छत्तीसगढ़ वासी मन बर एक गौरव के बिसय हे किहीन माता कौशल्या के एक मात्र मंदिर प्रदेस के चंदखुरी म हवय।
रामोत्सव-कार्यक्रम
अयोध्या म भगवान श्रीराम लला के प्राण-प्रतिष्ठा म राजधानी रईपुर संघरा पूरा प्रदेस म रामोत्सव के आयोजन होइस। ए मउका म कतकोन मंदिर म भजन, भंडारा अउ प्रसाद वितरण के कारीकरम घलो होइस। रईपुर के सिविल लाइन के काली मंदिर म होय रामोत्सव म मुख्यमंत्री विष्णुदेव साय घलो बिसेस रूप म सामिल होइन। ए मउका ओमन किहीन कि पाछु कुछेक दिन ले श्रद्धा अउ भक्ति के जउन वातावरण राम ननिहाल म बने हे, ओ ह भूलेक के लइक नइ हे। मुख्यमंत्री ह नेशनल एसोसिएशन फॉर ब्लाइंड डहार ले चलत स्कूल के दृष्टिबाधित नोनी मन ल अपन हाथ ले प्रसाद बांटीन।
एखर पहिली, काली मुख्यमंत्री ह राजभवन म राखे गे भजन संध्या म घलो सामिल होइन। राज्यपाल विश्वभूषण हरिचंदन अउ मुख्यमंत्री श्री साय ह भगवान श्रीराम के चित्र म माल्यार्पण करके भजन संध्या के सुरूवात करीन।
कालेच मुख्यमंत्री ह राजधानी के वीआईपी रोड के श्रीराम मंदिर म ‘‘हमर भांचा राम‘‘ कारीकरम म पूजा अर्चना करके प्रदेसवासी मन बर सुख समृद्धि के कामना करीन।
एखर पहिली, काली रईपुर के तेलीबांधा तालाब परिसर म ‘‘एक दिया राम के नाम‘‘ कारीकरम के आयोजन करे गीस। एमा मुख्यमंत्री ह भगवान श्रीराम के पूजा करके प्रदेस के खुसहाली के कामना करीन अउ श्रद्धालु मन म हजारों के संख्या म दीया जलईन। एखरे संग स्थानीय कलाकार मन डहार ले रामभजन घलो प्रस्तुत करे गीस।
इही कड़ी म सक्ती जिला के जैजेपुर अउ कोरदी म रामनामी मेला के आयोजन करे गीस, जिहां रामनामी समुदाय ले जुड़े लोगन बड़ संख्या म इकट्ठा होइन। ए मउका म रामनामी आस्था के प्रतीक जैतखाम के दर्सन करके बिसेस पूजापाठ घलो करे गीस।
पुरखौती मुक्तांगन-राम मंदिर
प्रदेस के पर्यटन अउ संस्कृति मंत्री बृजमोहन अग्रवाल ह काली चंदखुरी के कौशल्या धाम म राखे गे रामोत्सव म घोसना करीन कि नवा रईपुर के पुरखौती मुक्तांगन परिसर म घलो अध्योध्या म बनाय गे राममंदिर के प्रतिरूप स्थापित करे जाही। संगेसंग अयोध्या धाम जइसन कौशल्या धाम के घलोक विकास करे जाही। ए मउका म पर्यटन मंत्री अउ सांसद सुनील सोनी ह माता कौशल्या उपर बने बिसेस डाक टिकिट के विमोचन घलो करीन।
अउ अब पेस हे मौसम के हाल..
अवइया चौबीस घंटा के दउरान प्रदेस के कुछेक जघा म हल्का ले मध्यम बरसा हो सकत हे। मौसम विभाग के अनुसार ए समय महाराष्ट्र ले तेलंगाना तक उपरी हवा म एक ठन चक्रवाती घेरा बने हे। एखर संग प्रदेस म उत्तर ले ठंडा हवा आवत हे अउ दक्षिण के अवइया हवा घलोक ठंडा हे, जेखर असर ले प्रदेस के कतकोन जिला म हल्का बरसा होय के संभावना हे। ए दउरान न्यूनतम तापमान म घलो कमी आय के आसार हे।