अयोध्या म आज श्री रामलला के प्राण-प्रतिष्ठा अनुष्ठान सुभमुहूर्त म वैदिक मंत्रोपचार संग होगे। प्रधानमंत्री नरेंद्र मोदी ह मंदिर के गर्भ गृह म प्राण-प्रतिष्ठा विधि-विधान म पूरा राष्ट्र के अगुवई करीन। ओमन गर्भ गृह म रामलला के प्रतिमा के अनावरण घलो करीन। मुख्य पुरोहित संग राष्ट्रीय स्वयंसेवक संघ प्रमुख मोहन भागवत उत्तर प्रदेस के राज्यपाल आनंदीबेन पटेल अउ मुख्यमंत्री योगी आदित्य नाथ ह घलो प्राण-प्रतिष्ठा के बेरा पूजा-पाठ करीन। रघुपति राघव राजाराम भजन के बीच हेलिकाप्टर ले आकास ले मंदिर परिसर म फूल के बरसा करे गीस। प्राण-प्रतिष्ठा के बाद प्रधानमंत्री ह मंदिर म साष्टांग प्रणाम करत साधु संत ले आसीस लीन। ओमन चरणामृत लेके ग्यारा दिन के अपन उपवास तोड़िन। श्री मोदी ल राम मंदिर के चांदी के प्रतिकृति भेंट करे गीस।
ए ऐतिहासिक मउका म मौजूद लोगन ल संबोधित करत प्रधानमंत्री ह किहीन कि गर्भगृह म खुद ल ईश्वरीय चेतना के रूप म महसूस करत रिहीन। ओमन किहीन कि सदियो के धैर्य के बाद धरोहर के रूप म राम मंदिर मिले हे। ए सामान्य नही भलुक अलौकिक अउ पावन क्षण हे। हजारों बरस बाद घलो ए दिन लोगन के मानस म जीवंत रइही। ओमन किहीन कि ए पल ल जीना अउ एखर साक्षी होना हमर बर रामकृपा हे।
देस के सबो प्रमुख आध्यात्मिक अउ धार्मिक पंथ के प्रतिनिधि घलो प्राण-प्रतिष्ठा कारीकरम म सामिल होइन। काशी के डोमराजा प्राण-प्रतिष्ठा अनुष्ठान बर चुने गे चौदा मुख्य एजमान म सामिल रइही। प्राण-प्रतिष्ठा ले पहिली जाने माने गायक सोनू निगम, अनुराधा पौडवाल अउ शंकर महादेवन ह राम भजन गा के लोगन ल मंत्रमुग्ध कर दीन।
श्री रामलला प्राण-प्रतिष्ठा-02
श्री रामलला प्राण-प्रतिष्ठा छत्तीसगढ़ म भगवान श्री राम के प्राण-प्रतिष्ठा के मउका म कतकोन कारीकरम होवत हे। श्री रामलला महोत्सव के मुख्य कारीकरम जांजगीर-चांपा जिला के शिवरीनारायण म राखे गीस। मुख्यमंत्री विष्णुदेव साय ह कारीकरम म सामिल होके वर्चुअल माध्यम ले अयोध्या म होय प्राण-प्रतिष्ठा के दरसन करीन। ए मउका म श्री साय ह किहीन कि अयोध्या धाम म प्रभु श्री राम के प्राण-प्रतिष्ठा के एतिहासिक क्षण के हम सब गवाह बने हन। भगवान श्री राम के अलौकिक बाल प्रतिमा के दरसन करेन। प्रदेस बर ए सौभाग्य के बात हे कि छत्तीसगढ़ भगवान राम के ननिहाल हे अउ माता कौशिल्या के जनम भूमि हे। आज देस के संगेसंग दुनिया राममय हवय। मुख्यमंत्री ह किहीन कि छत्तीसगढ़ बर ए बिसेस मउका हे जब छत्तीसगढ़ के भांचा भगवान राम पांच सौ बछर के संघर्ष के बाद अयोध्या के भव्य मंदिर म बिराजे हे। ए बेरा म छत्तीसगढ़ उछाह ले झूमत हे।
उहें, मुख्यमंत्री छत्तीसगढ़ शासन के जनसंपर्क विभाग कोति ले श्री राम के अयोध्या धाम अउ वनवास काल म छत्तीसगढ़ यात्रा ले जुड़े सुरता ल काफी टेबल बुक ‘‘हम सबके राम‘‘ अउ बिसेस कैलेंडर ‘‘रामो विग्रहवान धर्म‘‘ के विमोचन करीन। एखर पहिली मुख्यमंत्री ह शिवरीनारायण के भगवान नर-नारायण मंदिर म विधि-विधान ले पूजा-पाठ करत प्रदेसवासी मनबर सुख-समृध्दि के मानता मानिन। कारीकरम म छत्तीसगढ़ भाजपा प्रभारी ओम माथुर, गौसेवा आयोग के पूर्व अध्यक्ष महंत राम सुंदर दास अउ सांसद गुहाराज अजगले समेत जनप्रतिनिधि अउ बड़का अधिकारी मौजूद रिहीन। मुख्यमंत्री ह बिहनिया रईपुर के दुधाधारी मठ म राखे गे कारीकरम म रामदरबार के दरसन करीन अउ गौमाता के पूजा-पाठ करके भोग लगाइन।
श्री रामलला प्राण-प्रतिष्ठा-03
रईपुर के माता कौशिल्या धाम चंदखुरी म पर्यटन विभाग कोति ले रामोत्सव मनाय जात हे। ए दउरान मंदिर परिसर म इक्कीस हजार दीया जलाय गीस। कारीकरम म मानस गायन सांस्कृतिक कारीकरम के संगेसंग बिसेस डाक आवरण के विमोचन करे गीस।
अइसने नवा रईपुर म बिहनिया छै बजे ले जम्मों चौक-चौराह म राम भजन अउ रामधुन के प्रसारण करे जात हे। संगेसंग म अयोध्या म होय भव्य प्राण-प्रतिष्ठा समारोह के सोज्जे प्रसारण सात जगह म बड़े स्क्रीन लगाके दिखाय गीस। उहें, आदिमजाति अउ अनुसूचित जाति विकास विभाग के सबो आश्रम छात्रावास अउ कार्यालय मन म शंख, घंटा बजा के आरती पूजा-पाठ करे गीस। संझाकुन दीया जलाय गेहे। आश्रम अउ छात्रावास के संगेसंग कार्यालय मन म घलो अयोध्या म होय प्राण-प्रतिष्ठा समारोह के सोज्जे प्रसारण देखे बर टीवी अउ एलईडी स्क्रीन लगाय गीस।
ओति, उप मुख्यमंत्री अरूण साव ह आज बिहनिया बिलासपुर के तिलक नगर के श्री राम मंदिर म भगवान राम के पूजा-पाठ करीन अउ प्रदेसवासी मन ल बधई अउ सुभकामना दीन। उहें, वित्तमंत्री ओपी चौधरी ह रायगढ़ जिला के गांधीगंज के श्रीराम मंदिर म दरसन करके सबो बर के मंगल कामना करीन।
अइसने राजस्व मंत्री टंकराम वर्मा ह बलौदाबाजार के षष्टी मंदिर म राखेगे जिला स्तरीय कारीकरम म संघरीन। श्री वर्मा माता षष्टी अउ माता शीतला के दरसन करके पूजा-पाठ करीन। ए बेरा म ओमन कि भगवान श्री राम के आदर्स अउ आचरण ल अपन आप म समोख के जिनगी ल सफल बनावय।
अमित शाह-माओवाद समीक्षा बैठक
केंद्रीय गृह मंत्री अमित शाह ह काली राजधानी रईपुर म वामपंथी उग्रवाद के स्थिति के समीक्षा करीन। बइठका म श्री शाह ह किहीन कि वामपंथी उग्रवाद के खिलाफ लड़ई म प्रगति होय हे अउ हिंसा म कमी आए हे। ओमन किहीन कि सुरक्षा बल केंद्रीय अउ राज्य एजेंसी के परयास ले वामपंथी उग्रवाद के समस्या अब छत्तीसगढ़ के कुछेक हिस्सा तक सीमित हे। ओमन किहीन कि ए क्षेत्र ल अवईया तीन बछर के भीतरी माओवादी समस्या ले छुटकारा मिल जही। गृहमंत्री ह वामपंथी उग्रवाद ल बनाय राखे म सहायक तंत्र ल टार्गेट करे बर रोडमैप तियार करे के जरूरत बतइन।
गृहमंत्री ह राज्य पुलिस ल सुरक्षा म कमी ल दुरिहा करे जांच सुनिश्चित करे, अभियोजन के निगरानी करे, फंडिंग के रास्ता ल बंद करे अउ खुफिया नेतृत्व वाले ऑपरेसन जारी राखे के निरदेस दीन। ओमन उग्रवाद प्रभावी जिला म केंद्र अउ राज्य सरकार के योजना के जानकारी गांव-गंवई तक पहुंचाय बर किहीन।
समीक्षा बइठका म मुख्यमंत्री विष्णुदेव साय, उप मुुख्यमंत्री विजय शर्मा , केंद्रीय गृह सचिव, मुख्य सचिव, पुलिस महानिदेसक समेत आने बड़का अधिकारी मौजूद रिहीन।
राशनकार्ड-नवीनीकरण
प्रदेस म सार्वजनिक वितरण प्रणाली म वर्तमान म चलत सबो रासनकारड के नवीनीकरण के काम पचीस जनवरी ले सुरू होही, जउन उनतीस फरवरी तक चलही। एखर बर खाद्य विभाग कोति ले नवा मोबाइल ऐप तियार करे गेहे। ए ऐप ले रासन कारड धारी रासन कार्ड नवीनीकरण बर ऑनलाइन अर्जी कर सकत हे। खाद्य विभाग कोति ले जम्मों कलेक्टर मन ल जरूरी दिसा निरदेस जारी करे गेहे।
ग्राम सभा
प्रदेस के जम्मों पंचायत क्षेत्र म काली तेईस जनवरी के ग्राम सभा राखे जाही। ए संबंध म पंचायत अउ ग्रामीण विकास विभाग ह सबो जिला कलेक्टर ल ग्राम पंचायत अउ ओखर आश्रित ग्राम सभा खातिर समय-सारिणी तियार करे के निरदेस दीन हे। ए ग्राम सभा म गांव के जरूरत अउ विकास ले जुड़े सत्रह ठिन बिंदु म गोठबात करे जाही। संगेसंग पाछू छैमाही के बेरा मंजूर करे गे काम म होय खरज के ब्यौरा दे जाही।
मौसम विभाग ह प्रदेस के कुछेक जिला म अवईया चौबीस घंटा म छुटपूट बरसा के संभावना जताय हे। मौसम विभाग के मुताबिक उत्तर ले आवत ठंडी अउ दक्षिण ले आवत नमी वाले गरम हवा के सेति कर्नाटक के अंदरूनी अउ छत्तीसगढ़ के दक्षिणी क्षेत्र के उपरी हवा म एक द्रोणिका बने हे, जेखर प्रभाव ले प्रदेस के दुरूग, रईपुर, बिलासपुर जिला के कुछेक जघा म बरसा हो सकत हे।
उहें, काली ले न्यूनतम तापमान म गिरावट घलो आ सकत हे।