विस-प्रबोधन कार्यक्रम
छत्तीसगढ़ विधानसभा परिसर म नवा विधायक मन के प्रबोधन कार्यक्रम ल केंद्रीय गृहमंत्री अमित शाह संबोधित करीन। ओमन किहीन कि चाहे कतकोन अनुभव होय फेर हमेसा सिखत रहना ही सफलता के मूलमंत्र हे।
एखर ले पहिली कारीकरम ल संबोधित करत अतिथि वक्ता के रूप म विधायक अजय चंद्राकर ह प्रश्नकाल के महत्ता के बिस्तार ले जानकारी दीन। ओमन किहीन कि प्रश्न म बहुत ताकत होथे। ए लोकतंत्र के आत्मा होथे। प्रश्नकाल के सही ढंग ले प्रयोग करके सशक्त विधायक बने जा सकथे। ओमन नवा विधायक मनले आग्रह करिन कि आप अइसे प्रश्न करव जेखर ले जनता ल फायदा मिलय। विधानसभा म हमन ल सदा विद्यार्थी भाव ले प्रवेश करना
चाही ।
उहें, कारीकरम के दूसरइया सत्र म पूर्व विधानसभा अध्यक्ष डॉक्टर प्रेमप्रकाश पाण्डे ह बजट प्रक्रिया के बारे म विधायक मन ल बिस्तार ले जानकारी दीन।
प्रबोधन कार्यक्रम-उप राष्ट्रपति
उपराष्ट्रपति जगदीप धनखड़ ह किहिन कि पक्ष अउ विपक्ष के विधायक मन के बीच सरलग संपर्क अउ तालमेल होना चाही, तभे लोकतंत्र ह फरही-फूलही अउ सही परिणाम दिही। विधायक सदन म बिरोधी नहीं भलुक एकता के भावना होना चाही। काली छत्तीसगढ़ विधानसभा म नवा विधायक मन ल संबोधित करत ओमन किहीन कि जिनगी म सिखे के प्रक्रिया सरलग चलत रइथे। सदन म नवा विधायक मन ल जुन्ना विधायक मन ले बहुत कुछ सिखे बर मिलही। उपराष्ट्रपति ह संविधान सभा के गठन अउ संविधान निर्माण प्रक्रिया के जानकारी देवत किहीन कि विधायिका के सदस्य मन ल संविधान ल जानना जरूरी हे।
उहें, मुख्यमंत्री विष्णुदेव साय ह अपन संबोधन म किहीन कि ए प्रबोधन कारीकरम के दौरान हमर नवा विधायक मन ल संसदीय परंपरा अउ कार्यप्रणाली के बारे म जाने-समझे ल मिलही।
आरक्षक-भर्ती
प्रदेस म जिला पुलिसबल के 5 हजार 9 सौ ले जादा आरक्षक भर्ती बर ऑनलाइन आवेदन भरे के तिथि ल 15 फरवरी ले बढ़ाके 6 मार्च कर देय गे हे। एखर संगे आरक्षक भर्ती म पुरूष अभ्यर्थी मन बर निर्धारित अधिकतम उमर सीमा म उपराहा 5 बछर के छूट देय गे हे।
श्री रामलला प्राण-प्रतिष्ठा-01
अयोध्या म श्री रामलला के प्राण-प्रतिष्ठा काली 22 जनवरी के करे जाही। प्रधानमंत्री नरेंद्र मोदी के पहुंचे ले पहिली अयोध्या म तैयारी आखिरी चरण म हे। प्राण-प्रतिष्ठा समारोह ले पहिली धार्मिक अनुष्ठान के घलो आज आखिरी दिन हे।
इही बीच, प्रधानमंत्री ह आज भगवान श्रीराम ल समर्पित 3 ठन भजन सोसल मीडिया म साझा करीन। प्रधानमंत्री ह अनुराधा पौडवाल के गाए रामभजन ल संहरावत किहीन कि श्री रामलला के जिनगी अउ महिमा ले जुरे भावना भाव-विभोर करइया हे। श्री मोदी ह शंकर महादेवन के लिखे रामभजन ल साझा करत किहीन कि ए गीत ह भक्त मन के बीच उछाह ल दरसाथे। उहें, प्रधानमंत्री ह भार्गवी वेंकटराम के तमिल भाषा म रामभजन के प्रस्तुति ल घलो साझा करीन।
श्री रामलला प्राण-प्रतिष्ठा-02
ऐति, छत्तीसगढ़ म घलो काली आने-आने कारीकरम के अयोजन करे जाही। माता कौशिल्या धाम चंदखुरी म पर्यटन विभाग डाहर ले रामोत्सव मनाय जाही। मंदिर परिसर म 21 हजार दीया बारे जाही। ए कारीकरम के सुभारंभ पर्यटन मंत्री बृजमोहन अग्रवाल करहीं। उहें, सांसद सुनील सोनी अउ आरंग विधायक गुरू खुशवंत साहेब मौजूद रइहीं। माता कौशिल्या धाम मंदिर समिति के डाहर ले आयोजित कारीकरम म मानस गान अउ सांस्कृतिक कारीकरम के अलावा बिसेस डाक आवरण विमोचन कारीकरम घलो आयोजित करे गेहे।
उहें, लव-कुश के जन्मभूमि बलौदाबाजार जिला के तुरतुरिया म घलो काली वन विभाग डाहर ले श्री रामलला प्राण-प्रतिष्ठा समारोह ल भव्य बनाय बर 10 हजार दीया बारे जाही। वन विभाग अउ जिला प्रशासन ह एखर तइयारी पूरा कर लेहे।
राजधानी रइपुर म घलो पाछू दू दिन ले देवारी जइसन माहौल हे। रोज्जे सोभायात्रा अउ जुलूस निकाले जावत हें। राजधानी के गली-मोहल्ला मन ल सजाए गेहे। जघा-जघा भगवान श्रीराम अउ राम मंदिर के फोटू लगाय गेहे। साइंस कॉलेज मैदान म 20 हजार वर्गफीट क्षेत्र म 55 किलो धान अउ 500 किलो चाउंर ले भगवान श्रीराम के रंगोली बनाय जावत हे। एखर बर पाछू 3 दिन ले 51 झन कलाकार जुरे हें।
इही कड़ी, म काली रइपुर म श्रीराम जन्मभूमि ले जुड़े 500 बछर के इतिहास के गाथा के प्रस्तुति दे गिस। कारीकरम म राज्यपाल अउ संस्कृति मंत्री बृजमोहन अग्रवाल समेत अब्बड़ संख्या म राजधानीवासी मौजूद रिहिन। मुंबई ले आय मोहित शिवानी के हृदय बैंड ह गाथा के प्रस्तुति देइस।
श्री रामलला प्राण-प्रतिष्ठा-03
इही बीच, नवा रइपुर म काली बिहनिया 6 बजे ले रतिहा 8 बजे तक सबो चौक-चौराहा म रामभजन अउ रामधुन के प्रसारण होही। कैबिनेट मंत्री ओपी चौधरी ह एखर बर अटल नगर प्राधिकरण ल निरदेस जारी कर देय हें। संगेसंग ओमन अयोध्या म होवइया प्राण-प्रतिष्ठा समारोह के प्रसारण ल देखे बर नवा रइपुर म 7 जघा बेवस्था करे के निरदेस देय हें। जेखर ले लोगन समारोह के सीधा प्रसारण देख सकहीं। उहें, आदिम जाति-अनुसूचित जाति विकास विभाग के आश्रम, छात्रावास अउ कार्यालय मन म शंखनाद अउ आरती पूजा करे जाही। सांझकुन दीया बार के उत्सव मनाय जाही। एखर बर विभाग डाहर ले सबो जिला सहायक आयुक्त मन ल पाती पठोय गेहे। उहें, समारोह के एक दिन पहिली आज विभाग के आश्रम, छात्रावास, एकलव्य विद्यालय अउ क्रीड़ा परिसर समेत सबो कार्यालय अउ भवन परिसर म स्वच्छता अभियान चलाय गिस। अयोध्या ले सीधा प्रसारण देखे बर आश्रम अउ छात्रावास के संगे कार्यालय मन म बेवस्था करे गेहे।
उहें, अंबिकापुर म घलो कतकोन जघा धार्मिक आयोजन करे जाही। जन-मानस के सुविधा बर कलेक्टर ह नोडल अधिकारी नियुक्त करे हे।
इही बीच, राज्यपाल विश्वभूषण हरिचंदन ह ए मउका म देस अउ प्रदेसवासी मन ल बधाई अउ सुभकामना दीन हंे। राज्यपाल ह लोगन मन ले अपील करिन हें कि ए मउका म सब झन अपन घर म दीया बार के तिहार मनावव अउ दीपदान करव।
अउ अब पेस हे मौसम के हाल…
प्रदेस म आज रइपुर, दुरूग, राजनांदगांव समेत कतकोन जिला म बरसा होइस। अधरतिहा सुरू होय बरसा ह रूक-रूक के बिहनिया तक होवत रिहीस। पानी गिरे ले प्रदेस म जाड़ ह बाढ़गे हे। मौसम विभाग के जानकारी ले बंगाल के खाड़ी ले अवइया नमी के सेति आज बादर छाय रिहीस अउ मध्य छत्तीसगढ़ म गरज-चमक के संग बरसा होइस।
प्रदेस म काली दक्षिण छत्तीसगढ़ म एक-दू जघा म थोरकिन बरसा हो सकथे। बादर घलो छाय रइही। संगे मध्य छत्तीसगढ़ म बिहनिया ले कोहरा रइही।
राष्ट्रीय खेल प्रतियोगिता
नागपुर के राष्ट्रसंत तुकडोजी महाराज विश्वविद्यालय अउ विधि महाविद्यालय स्टेडियम म एकल अभियान राष्ट्रीय खेल प्रतियोगिता सुरू होइस। एखर उद्घाटन मुख्यमंत्री विष्णुदेव साय ह करिन। प्रतियोगिता म छत्तीसगढ़, पश्चिम बंगाल, ओडिशा, झारखंड अउ बिहार के संगे आने-आने प्रदेस के 12 सौ ले जादा खिलाड़ी मन भाग लेइन।
अउ अब थोरकुन समाचार सार म –
– जशपुर जिला के 44 झन मेधावी छात्र मन ल अवइया महीना अंतरिक्ष केंद्र के भ्रमण कराय जाही। लइका मन ल आंध्रप्रदेस के श्रीहरिकोटा स्थित सतीश धवन अंतरिक्ष केंद्र के निःसुल्क शैक्षणिक भ्रमण कराय जाही। लइका मन वैज्ञानिक मनले भेंट घलो करहीं।
अउ
– सुकमा जिला के बुरकालंका इलाका म गस्त के बेरा डीआरजी अउ कोबरा बटालियन के जवान मन माओवादी कैंप ल ध्वस्त कर दीन। जवान मन कैंप म राखे आने समान घलो नष्ट कर दीन।