प्रधानमंत्री नरेंद्र मोदी ह देश के जम्मों नागरिक मन ल पोषण, अउ स्वास्थ्य के गारंटी देवाय खातिर अपन सरकार के प्रतिबद्धता ल दोहराय हे। आज ओमन वीडियो कॉन्फ्रेसिंग के माध्यम ले विकसित भारत संकल्प यात्रा के लाभार्थी मनले गोठबात म श्री मोदी ह कहिन कि पाछू नौ बछर के दौरान पच्चीस करोड़ ले जादा लोगन मन गरीबी रेखा ले बाहर आय हे। ओमन कीहिन कि सरकार ह पारदर्शी अउ कुशल प्रशासन के माध्यम ले गरीबी हटाय बर प्रण ठाने हे। ओमन कीहिन कि पाछू दस बछर म चार करोड़ ले जादा लोगन मन ल पक्का घर देवाय गेहे।
श्री मोदी ह कहिन कि विकसित भारत संकल्प यात्रा ह दू महीना पूरा कर लेहे अउ यात्रा ल आगू घलो जारी रखे जाही। ओमन कीहिन कि देश के करीबन अस्सी प्रतिशत पंचायत मनके माध्यम ले करीबन पंद्रह करोड़ लोगन मन ह अब तक एमा शामिल होय हे।
प्रधानमंत्री-डाक टिकट
प्रधानमंत्री नरेन्द्र मोदी ह आज श्रीराम जन्मभूमि मंदिर म छह ठिन स्मारक डाक टिकिट जारी करे हे। ओमन दुनियाभर के आने-आने देस म भगवान राम उपर पहिली ले जारी करे डाक टिकट मनके एलबम के विमोचन घलो करीन।
आज जारी करे गे छह ठन डाक टिकिट मनके डिजाईन म राम मंदिर के संगेसंग रामचरित मानस के सुघ्घर चौपाई – ‘मंगल भवन अउ मंगल हारी‘ अउ सूर्य भगवान ल घलो दिखाय गेहे। एखर अलावा अउ दिगर डाक टिकिट मन म सरयू नदी के संगेसंग श्रीराम मंदिर के मूर्ति मन ल दर्साय गेहे। ए मउका म श्री मोदी ह किहीन कि भगवान राम, माता सीता अउ रामायण के कथा ह धरम अउ जाति ले अलग हट के हवय, जेखर सेती हर मनखे के जिनगी म भगवान राम अउ सीता के महत्तम हवय।
ज्योति कलश-छत्तीसगढ़
ऐति, श्रीराम जन्मभूमि अयोध्याधाम ले पावन ज्योति कलस ह काली छत्तीसगढ़ पहुंचीस। ए मउका म मुख्यमंत्री विष्णुदेव साय ल राज्य अतिथि गृह पहुना म अयोध्याधाम ले रईपुर आय रामभक्त मन ह वैदिक मंत्र के उच्चारण करीन अउ पवित्र ज्योति कलश अउ अयोध्याधाम के प्रसाद ल भेंट करीन। ए मउका म मुख्यमंत्री ह किहीन कि राजधानी रईपुर के श्रीराम मंदिर म ए ज्योति कलश ल रखे जाही, जिहां ले प्रदेसभर पावन ज्योति भेजे जाही। मुख्यमंत्री ह श्रीराम लला प्राण-प्रतिष्ठा के मउका म प्रदेसवासी मन ले घर-घर दिया बारे के अपील करीन।
केंद्र सरकार-राम मंदिर
ए महीना के बाईस तारीख के दिन अयोध्या म रामलला प्राण प्रतिष्ठा के मौका म केंद्र सरकार के जम्मों ऑफिस मन म मंझनियां ढाई बजे तक अवकाश राखे जाही। कार्मिक विभाग ह अपन आदेश म कीहिन हे कि प्राण प्रतिष्ठा समारोह म कर्मचारी मनके भाग लेवई ल देखत ए फैसला ले गेहे। ये आदेश ल केंद्र सरकार के जम्मों ऑफिस के संगेसंग देशभर म चलाये जात केंद्रीय संस्थान अउ केंद्रीय औद्योगिक प्रतिष्ठान मन म लागू करे गेहे।
कैबिनेट निर्णय
राज्य म कई ठन सरकारी विभाग म भर्ती होय खातिर स्थानीय निवासी मनके आयु सीमा म देवइया छूट ल अवइया पांच बछर बर राज्य सरकार डहार ले बढ़ा दे गेहे। अब प्रदेस के स्थानीय अभ्यर्थी मन ल नौकरी बर आयु सीमा म पांच बछर छूट के लाभ इकतीस दिसंबर दू हजार अट्ठाईस तक दे जाही। ए फइसला मुख्यमंत्री विष्णुदेव साय के अगुवई म काली संझा राज्य मंत्रिमंडल के बइठका म ले गीस।
ए फइसला के अनुसार राज्य के आने-आने नौकरी मन म पैंतीस बछर के अधिकतम आयु सीमा म पांच बछर के छूट दे जाय ले राज्य के मूलनिवासी मन ह चालीस बछर के उमर तक आवेदन करे के पात्र होही।
मंत्रिमंडल म करे गे एक ठन अउ फइसला के मुताबिक विशेष वर्ग के अभ्यर्भी मन ल अधिकतम आयु सीमा म पहिली जइसन छूट मिलते रइही। ए वर्ग के उम्मीदवार मन ह नौकरी म पैंतालीस बछर के अधिकतम आयु सीमा तक आवेदन कर सकही।
एखर अलावा मंत्रिपरिषद ह राजनीतिक आंदोलन ले जुड़े प्रकरण मनके अदालत मन ले वापसी बर मंत्रि परिषद के एक ठन उप समिति गठित करे के निर्णय घलो लीन। उप मुख्यमंत्री विजय शर्मा के अगुवई म बनाय के ए उपसमिति म विधि मंत्री अरूण साव, कृषि मंत्री रामविचार नेताम अउ महिला तथा बाल विकास मंत्री लक्ष्मी राजवाड़े ल सदस्य बनाय गेहे। ए उपसमिति ह कई ठन राजनीतिक प्रकरण म उपर विचार-विमर्श करके आगे के कार्रवाई बर अनुसंसा करही।
मुख्यमंत्री कबीरधाम
मुख्यमंत्री विष्णुदेव साय ह आज कबीरधाम जिला के कुसुमघटा म मॉं रूखमणी गुड़ उद्योग इकाई के शुभारंभ करीन। ए दौरान इकाई के संचालक चंद्रशेखर वर्मा ह बताइन कि गुड़ उद्योग म आधुनिक तकनीक के इस्तेमाल करे गेहे। ए दौरान मुख्यमंत्री ह कुसुमघटा म राखे गे किसान सम्मेलन म शामिल होइन। कार्यक्रम म उप मुख्यमंत्री विजय शर्मा के संगेसंग अउ कतकोन भाजपा कार्यकर्ता मन ह शामिल होइन।
अग्निवीर भर्ती कार्यशाला
राज्य के युवा लईका मन ल अग्निवीर सैनिक के रूप म तैयार करे खातिर राज्य सरकार डहार ले रायपुर के शहीद स्मारक भवन म आज एक ठन कार्यशाला राखे गीस। ए दौरान प्रदेश के उप मुख्यमंत्री अउ गृहमंत्री विजय शर्मा ह ए कार्यशाला के उद्घाटन करीन। श्री शर्मा ह कहिन कि अग्निवीर सैनिक भर्ती योजना म छत्तीसगढ़ के युवा मनके भागीदारी ल बढ़ाय खातिर एला संभाग स्तरीय कार्यशाला राखे गे रीहिस।
ट्रेन परिचालन
पूर्व तटीय रेलवे के वाल्टेयर मंडल के अंतर्गत सिंगपुर-रायगढ़ा खंड के बीच तीसरा लाईन शुरू करे के सेती बीस ले सत्ताईस जनवरी तक दक्षिण पूर्व मध्य रेलवे के कुछएक ट्रेन मनके अवई जवई ह प्रभावित रीही। ए दौरान रायपुर विशाखापट्नम पैसेंजर अउ बिलासपुर-तिरूपति एक्सप्रेस ल रद्द करे जाही। उंहे इक्कीस जनवरी के विशाखापट्नम ले रवाना होवइया लोकमान्य तिलक टर्मिनस तक जवइया एक्सप्रेस रेलगाड़ी ल पांच घंटा देरी ले चलाये जाही। इही रेलगाड़ी ल तेइस जनवरी के लोकमान्य तिलक टर्मिनस ल दू घंटा देरी ले चलाये जाही। वइसने विशाखापटनम ले भगत के कोठी जवइया एक्सप्रेस ल पच्चीस जनवरी ले आठ घंटा देरी ले रवाना करे जाही। एखर अलावा पुरी-अहमदाबाद एक्सप्रेस अउ गांधीधाम-पुरी एक्सप्रेस रेलगाड़ी के अवई जवई ल परिवर्तित करे गेहे।
मुख्यमंत्री-जवान श्रद्धांजलि
मुख्यमंत्री विष्णुदेव साय ह पाछु महीना बीजापुर जिला के कांवड़ गांव म माओवादी मन डहार ले करे गे बारूदी विस्फोट म सहीद होय प्रधान आरक्षक ल श्रद्धांजलि दीन। अपन सोक संदेस म ओमन किहीन कि प्रधान आरक्षक अरविंद एक्का के सहादत ह अबिरथा नइ जाय अउ अब माओवादी मन ले लड़ई ल अउ तेज करे जाही।
खबर के मुताबिक सहीद अरविंद एक्का ह डीआरजी के जवान रिहीन। पाछु उनतीस दिसंबर के ओमन अपन टीम के संग माओवाद परभावित क्षेत्र म तलासी अभियान म निकले रिहीन। इही दउरान माओवादी मन डहार ले करे गे बारूदी विस्फोट म ओमन घायल होगे, जेखर इलाज ल रईपुर के एक ठन निजी अस्पताल म करे जात रिहीस, जिहां आज उंखर निधन होगे।
किरण देव-पिता निधन
प्रदेस भाजपा अध्यक्ष अउ जगदलपुर के विधायक किरण सिंह देव के ददा लक्ष्मी नारायण सिंह देव के काली निधन होगे। ओमन एक सौ चार बछर के रिहीन हे। उंखर निधन म मुख्यमंत्री विष्णुदेव साय, विधानसभा अध्यक्ष डॉक्टर रमन सिंह के संगेसंग उप मुख्यमंत्री अरूण साव अउ विजय शर्मा ह श्रद्धांजलि दीन। ओमन ह अपन सोक संदेस म सरग सिधारे आत्मा के सांति बर भगवान ले प्रार्थना करीन।
अउ अब पेस हे मौसम के हाल…
प्रदेस म एक घांव फेर जाड़ बाढ़े के संभावना हे। मौसम विभाग ले मिले खबर के मुताबिक ए समय एक ठन द्रोणिका ह कर्नाटक ले मध्य छत्तीसगढ़ तक बने हवय। एखर परभाव ले आज प्रदेस म दिनभर बादर छाय रिहीस। ओति, उत्तरी मुड़ा ले ठंडा हवा के आना सुरू होगे हे, जेखर सेती राज्य म एक घांव जाड़ ह बाढ़ सकत हे।