प्रधानमंत्री नरेंद्र मोदी ह काली अठारा जनवरी के वीडियो कॉन्फ्रेसिंग के माध्यम ले विकसित भारत संकल्प यात्रा के फायदा पवइया मनले गोठबात करही। ए कार्यक्रम म देशभर ले विकसित भारत संकल्प यात्रा के हजारों लाभार्थी मन शामिल हेाही। ये मौका म प्रधानमंत्री ह जनसमूह ल घलो संबोधित करही।
मुख्यमंत्री विष्णुदेव साय ह आज बालोद जिला के गुण्डरदेही म राखे गे कार्यक्रम म एक सौ तिहत्तर करोड़ रूपिया ले जादा के आने आने कामकाज के लोकार्पण अउ भूमिपूजन करीन। कार्यक्रम म मुख्यमंत्री ह हितग्राही मन ल शासन कोति ले जनकल्याणकारी योजना के तहत जीनिस बांटीन। जेमा प्रधानमंत्री आवास योजना ग्रामीण अउ शहरी क्षेत्र के पांच झिन हितग्राही मन ल पच्चीस- पच्चीस हजार रूपिया के चेक अउ प्रधानमंत्री उज्जवला योजना के ग्यारा झिन हितग्राही मन ल गैस कनेक्शन दीन। कार्यक्रम म मुख्यमंत्री अउ विधानसभा अध्यक्ष ह श्रद्धालु मन ल रामचरितमानस भेंट करीन। ए दौरान तुलसी मानस प्रतिष्ठान कोति ले तीन हजार मानस ग्रंथ भेंट करे गीस।
सौर उर्जा के क्षेत्र म छत्तीसगढ़ ल स्कॉच आर्डर ऑफ मेरिट सर्टिफिकेट मिले हे। छत्तीसगढ़ राज्य अक्षय उर्जा विकास अभिकरण-क्रेडा ल ए सम्मान सौर उर्जा संयंत्र के बढ़िया संचालन के संगेसंग संधारण प्रणाली के सेती दे गेहे। ये पुरस्कार ल क्रेडा के मुख्य कार्यपालन अधिकारी राजेश सिंह राणा ह ऑनलाईन लीन। ए सफलता उपर मुख्यमंत्री ह क्रेडा के अधिकारी मन ल बधाई अउ शुभकामना दे हवयं।
छत्तीसगढ़ राज्य ओपन स्कूल डहार ले होवइया परीक्षा के समय सारिणी जारी कर दे गेहे। राज्य ओपन स्कूल के सचिव प्रोफेसर व्ही.के. गोयल ह बताइन कि बारहवीं बोर्ड के परीक्षा नौ मार्च ले शुरू होके छै अप्रैल तक चलही। त उंहे दसवीं के परीक्षा ग्यारा मार्च ले तीन अप्रैल तक चलही। परीक्षा के बेरा मंझनियंा पौने दू बजे लेे संझा पांच बजे तक रीही। छात्र मन ह परीक्षा ले जुड़े जानबा कार्यालय के बेवसाईट के संगेसंग तीरतखार के अध्ययन केंद्र ले, ले सकथें।
उप मुख्यमंत्री विजय शर्मा ह प्रदेश के जम्मों तैंतीस ठिन जिला मन म डॉयल 112 के सुविधा ल बढ़ाय के निर्देश देहे। श्री शर्मा ह काली रायपुर के सिविल लाईन स्थित डॅायल 112 के कंट्रोल रूम म पुलिस के बड़का अधिकारी मनके संग होय बइठका म कहिन कि ए सुविधा ल पूरा प्रदेश म लागू करे जाही। ओमन ए व्यवस्था ल अउ बने ढंग ले बढ़िया बनाय के निर्देश दीन। संगेसंग जरूरतमंद लोगन मन ल तुरते सहायता मिले एखर बर विशेष ध्यान राखे जाय। जानबा के मुताबिक ए बेरा पहिली चरण म डॅायल 112 के सुविधा रायपुर के संगेसंग सोला ठिन जिला मन म चलाये जात हे। दूसर चरण म ए सुविधा ल बढ़ाके बांचे सतरा जिला म करे जाही।
दंतेवाड़ा जिला म काली संझा सुरक्षा बल मनके संग होय मुठभेड़ म पांच लाख रूपिया के एक झिन इनामी माओवादी मारे गीस। हमर संवाददाता ले मिले जानबा के मुताबिक बारसूर थाना क्षेत्र म माओवादी मनके होय के सूचना मिले के बाद डीआरजी, बस्तर फाईटर्स अउ सीआरपीएफ के संयुक्त टीम ह सर्चिंग बर निकलिन। इही दौरान मंगनार के जंगल म माओवादी मन ह सुरक्षा बल उपर गोली बारी शुरू कर दीन। जवान मन डहार ले करे गे जवाबी कार्रवाई म आमदाई एरिया कमेटी के सदस्य रतन कश्यप मारे गीस। मारे गे माओवादी उपर बछर दू हजार बीस म बस्तर जिला के मारडूम थाना क्ष्ेत्र म पुलिस पार्टी उपर हमला करे के आरोप हे । ए हमला म दू झिन पुलिसकर्मी शहीद होगे रीहिन।
त उंहे बीजापुर जिला म दू झिन माओवादी मन ह पुलिस के आगू आत्मसमर्पण करे हे । एमन गंगालूर एरिया कमेटी के प्लाटून कमंाडर अउ भूमकाल मिलिशिया के एक झिन सदस्य शामिल हे। आत्समर्पण करइया ए माओवदी मन ल राज्य सरकार कोति ले पुनर्वास नीति के तहत पच्चीस-पच्चीस हजार रूपिया के पइसा दे गीस।
प्रदेश म एक सौ ग्यारह लाख मीट्रिक टन ले जादा धान बिसाय के संग धान खरीदी के अब तक के जम्मों रिकार्ड टूट गेहे। पाछू साल समर्थन मूल्य म एक सौ सात लाख मीट्रिक टन ले जादा के धान खरीदी करे गे रीहिस। खाद्य विभाग के अधिकारी मन ह बताइन कि धान खरीदी के एवज म एसो किसान मन ल करीबन तेईस हजार चार सौ अड़तालिस करोड़ रूपिया के भुगतान करे गेहे। त उंहे कस्टम मिलिंग बर अब तक करीबन बहत्तर लाख मीट्रिक टन धान के उठाव हो चुके हे।
मोदी के गांरटी के मुताबिक प्रदेश म इकतीस सौ रूपिया प्रति कुंटल के भाव ले धान बिसाय जात हे।
बलरामपुर-रामानुजगंज जिला के तातापानी म तीन तक चले तातापानी महोत्सव के आज समापन होगे । समापन समारोह म स्वास्थ्य मंत्री श्याम बिहारी जायसवाल अउ कृषि मंत्री रामविचार नेताम शामिल होइन। ए मौका म ओमन कीहिन कि तातापानी ल पर्यटन वाले जगा के रूप म विकसित करे बर मास्टर प्लॉन तियार करे जाही। बलरामपुर प्रवास के दौरान स्वास्थ्य मंत्री ह जिला अस्पताल के निरीक्षण करके स्वास्थ्य सुविधा के जानबा लीन। ए मौका म ओमन आपातकालिन आईसीयू के उद्घाटन करीन।
सिख मनके दसवंा गुरू अउ खालसा पंथ के संस्थापक गुरू गोविंद सिंह के जयंती ल प्रकाश परब के रूप म मनाये जात हे। ए मौका म छत्तीसगढ़ म घलो कतकेान कार्यक्रम चलत हे। मुख्यमंत्री ह आज रायपुर के पंढरी स्थित गुरूद्वारा म चलत प्रकार्श पर्व कार्यक्रम म शामिल होइन। ए मौका म ओमन गुरूद्वारा म माथा टेक के गुरू ग्रंथ साहिब के परिक्रमा करके संकीर्तन म भाग लीन। ओमन सिख समाज के संगेसंग प्रदेश के लोगन मन ल प्रकाश पर्व के बधाई अउ शुभकामना दे हवय।
भारतीय सेना म अग्निवीर भर्ती के बारे म जानबा देबर काली अठारा जनवरी के रायपुर के शहीद स्मारक भवन म संभाग स्तरीय कार्यशाला राखे गेहे। ए कार्यशाला म उप मुख्यमंत्री विजय शर्मा मुख्य अतिथि के रूप म शामिल होही। कार्यशाला म भारतीय वायुसेना के विंग कमंाडर पारस अग्रवाल अउ भारतीय थलसेना कार्यालय रायपुर के मेजर पी.के. माथुर ह अग्निवीर भर्ती के बारे म पूरा जानबा दीही। कार्यशाला म प्रदेश के जम्मों जिला के जिला रोजगार अधिकारी रायपुर संभाग के जिला शिक्षा अधिकारी, औद्योगिक प्रशिक्षण संस्थान मनके प्राचार्य के संगेसंग शिक्षण संस्था ले जुड़े प्राचार्य अउ छात्र मन शामिल होही।
उप संचालक रोजगार ए.ओ. लॉरी ह बताइन कि कार्यशाला म भारतीय वायुसेना के अग्निवीर भर्ती बर आजले छै फरवरी तक अउ भारतीय थलसेना के अग्निवीर भर्ती बर आठ फरवरी ले इक्कीस मार्च तक ऑनलाईन पंजीयन करे जाही।
स्कूल शिक्षा विभाग के सचिव सिद्धार्थ कोमल सिंह परदेशी ह कहिन हे कि नवा शिक्षक मन ल अइसन प्रशिक्षण दे जाय जेखर ले पढ़ई लिखई अउ बने ढंग ले हो सकय। रायपुर स्थित राज्य शैक्षिक अनुसंधान अउ प्रशिक्षण परिषद म होय बइठका म ओमन कहिन कि शिक्षक मनले पांच ले जादा दिन तक प्रशिक्षण देना चाही। जिला अउ ब्लॉक मुख्यालय मन म घलो ऑनलाईन प्रशिक्षण के व्यवस्था करे जाना चाही। बइठका म ओमन राष्ट्रीय शिक्षा नीति के जइसन पाठ्यक्रम तियार करे उपर जोर दीन। संगेसंग राष्ट्रीय शिक्षा नीति के क्रियान्वयन बर अधिकारी मन ल दूसर राज्य म जाके उंहा के शिक्षा नीति के जानबा लेबर कीहिन।
– प्रधानमंत्री के आह्वान उपर प्रदेश के संगेसंग पूरा देश म स्वच्छता अभियान चलाये जात हे। इही कड़ी म खेल मंत्री टंकराम वर्मा ह आज रायपुर जिला के नेवरा के मंदिर म साफ सफई करके लोगन मन ल संदेश दीन।
– रामलला दर्शन योजना के तहत पहिली रेलगाड़ी सात फरवरी के दुरूग ले छूटही। मुख्यमंत्री ह रईपुर म श्रीरामोत्सव ‘‘सबके राम’’ कारीकरम म एक जानबा दीन।
– संस्कृति मंत्री बृजमोहन अग्रवाल ह काली रायपुर म सराफा एसोसिएशन डहार ले राखे गे आभूषण उत्सव के शुभारंभ करीन।
अउ
– जिला रोजगार अउ स्व रोजगार मार्गदर्शन केंद्र रायपुर डहार ले उन्नीस जनवरी के नवा रायपुर स्थित कमर्शियल कॉम्पलेक्स सेक्टर पच्चीस राखी म रोजगार मेला राखे गेहे।