प्रधानमंत्री नरेन्द्र मोदी अट्ठारह जनवरी के वीडियो कॉन्फ्रेंसिंग के माध्यम ले विकसित भारत संकल्प यात्रा के लाभार्थी मन संग गोठबात करही। ए कार्यक्रम म देसभर ले विकसित भारत संकल्प यात्रा के हजारों लाभार्थी मन सामिल होही। ए मउका म प्रधानमंत्री ह जनसमूह ल घलो संबोधित करही।
खबर के मुताबिक केन्द्र सरकार के प्रमुख योजना के जानकारी दे बर देसभर म विकसित भारत संकल्प यात्रा कराय जावत हे।
विस-प्रबोधन कार्यक्रम
विधानसभा परिसर म अवइया बीस अउ इक्कीस जनवरी के सदस्य मनके प्रबोधन कार्यक्रम के आयोजन करे जाही, जेखर सुभारंभ लोकसभा अध्यक्ष ओम बिरला करही। ए मउका म लोकसभा अध्यक्ष ह नवा चुने गे सदस्य मन ल अपन मार्गदर्शन घलो दीहीं। प्रथम दिवस के तृतीय सत्र म उप राष्ट्रपति जगदीप धनखड़ मुख्य अतिथि के रूप म मौजूद रइही। प्रबोधन कार्यक्रम के पहिली दिन उत्तरप्रदेश विधानसभा अध्यक्ष सतीश महाना अउ केन्द्रीय मंत्री डॉक्टर मनसुख मंडाविया के संबोधन घलो होही। प्रबोधन कार्यक्रम के दूसर दिन इक्कीस जनवरी के केन्द्रीय गृह मंत्री अमित शाह राज्य विधानसभा के नवा चुने गे सदस्य मन ल अपन मार्गदर्शक दीहीं।
स्वच्छता अभियान
प्रधानमंत्री नरेन्द्र मोदी के आह्वान म छत्तीसगढ़ संघरा देसभर के मंदिर अउ तीर्थ स्थान म स्वच्छता अभियान चलाय जावत हे। राज्यपाल विश्वभूषण हरिचंदन ह आज रईपुर के वीआईपी रोड के श्रीराम मंदिर अउ गायत्री नगर के जगन्नाथ मंदिर म झाडू लगाके स्वच्छता के संदेस दीन। ए मउका म राज्यपाल ह लोगन ले आग्रह करीन कि ओमन ह अपन तीर-तखार के मंदिर मन ल साफ राखय। ओमन किहीन कि ए अभियान ले हमन ल मानव सेवा के प्रेरणा मिलथे। एखर पहिली, श्री हरिचंदन ह दूनों मंदिर म भगवान श्रीराम अउ श्री जगन्नाथ के पूजा-अर्चना करके प्रदेस संघरा देसवासी मनके सुख के कामना करीन।
उहें, खाद्य मंत्री दयालदास बघेल ह काली बेमेतरा जिला के ग्राम मोहतारा के राम मंदिर के स्वच्छता अभियान म सामिल होइन। ए दउरान ओमन ह मंदिर परिसर के सफाई करीन।
सड़क सुरक्षा माह
यातायात संबंधी नियम के जानकारी दे बर प्रदेसभर म काली ले चौंतीसवां सड़क सुरक्षा माह के आयोजन करे जावत हे। मुख्यमंत्री विष्णुदेव साय ह आज जशपुर जिला के बगिया म सड़क सुरक्षा हेलमेट जागरूकता रैली अउ अंजोर रथ ल रवाना करीन। ए रथ म शॉट फिल्म के माध्यम ले सड़क सुरक्षा अउ साइबर सिक्योरिटी बर सावधानी बरते के बारे म लोगन ल जागरूक करे जाही। ए रथ अवइया महीना तक पूरा जिला के भ्रमण करही। ए मउका म श्री साय ह लोगन ल यातायात नियम के पालन करे के अपील करीन। ओमन किहीन कि दुपहिया वाहन चलावत खानी हेलमेट पहिरना चाही। मोटर गाड़ी म सीट बेल्ट लगाना चाही अउ नशा करके गाड़ी नइ चलाना चाही।
आप अध्यक्ष-इस्तीफा
छत्तीसगढ़ म आम आदमी पार्टी के प्रदेस अध्यक्ष कोमल हुपेंडी ह अपन पद ले इस्तीफा दे देहे। उंखर संग छह झिन पदाधिकारी मन घलो पार्टी छोड़ दीन हे। आज रईपुर म पत्रकार मन ले चरचा करत श्री हुपेंडी ह बतईन कि आम आदमी पार्टी के इंडिया गठबंधन म सामिल होय के सेती ओमन ह पार्टी छोड़े के फैसला करीन।
अरूण साव-समीक्षा
उप मुख्यमंत्री अउ लोक निर्माण मंत्री अरूण साव ह प्रदेस म निर्माणाधीन रोड, ओवरब्रिज अउ फ्लाईओवर के काम म तेजी लाय के अउ ओला समय-सीमा म पूरा करे के निरदेस दीन हे। श्री साव ह आज नवा रईपुर म विभागीय अधिकारी मनके बइठका लीन। बइठका म उप मुख्यमंत्री ह लोक निर्माण विभाग डहार ले करे जावत काम के जिओ टैगिंग अउ मॉनिटरिंग बर ‘पीडब्लूडी दृष्टि‘ मोबाइल ऐप ल लांच करीन।
अतिरिक्त महाधिवक्ता
राज्य सरकार ह छत्तीसगढ़ महाधिवक्ता कार्यालय म अतिरिक्त महाधिवक्ता संघरा पूरा टीम के घोसना कर देहे। ए टीम म चौसठ झिन अधिवक्ता मन ल सामिल हे। एमा अतिरिक्त महाधिवक्ता, उप महाधिवक्ता, उप शासकीय अधिवक्ता अउ पैनल लॉयर सामिल हे।
विकसित भारत संकल्प यात्रा
केन्द्र सरकार के प्रमुख योजना के जानकारी दे बर प्रदेस म विकसित भारत संकल्प यात्रा निकाले जावत हे। इही कड़ी म आज बस्तर जिला के गुरिया, तालूर, बड़े किलेपाल, मारकेल अउ भानपुरी संघरा अट्ठारह ठन ग्राम पंचायत म संकल्प सिविर के आयोजन करे गीस। ए सिविर म ग्रामीण मन ल आने-आने योजना के जानकारी दे गीस। ए दउरान पात्र हितग्राही मन ल आयुष्मान कार्ड, किसान क्रेडिट कार्ड संघरा उज्जवला योजना के प्रमाण पत्र दे गीस। सिविर म ग्रामीण मन ल विकसित भारत के निर्माण म अपन सहभागिता निभाय के सपथ देवाय गीस।
उहें, संकल्प यात्रा के मोबाइल वैन राजनांदगांव जिला के हरदी गांव पहुंचीस। इहां चलत सिविर म दू हजार ले जादा लोगन सामिल होइन अउ पंजीयन करईन। सिविर म करीबन पांच सौ लोगन मन अपन स्वास्थ्य जांच कराके निःशुल्क दवई लीन। ए दउरान लाभार्थी मन ह ‘‘मेरी कहानी-मेरी जुबानी‘‘ के माध्यम ले अपन अनुभव साझा करीन।
पीएम-जन-मन योजना
विशेष पिछड़ा जनजाति मनके कल्याण बर सुरू करे गे प्रधानमंत्री जन-मन योजना म बिलासपुर जिला के खोंगसरा गांव म मेगासिविर के आयोजन करे गीस। सिविर म तिरालीस झिन बैगा अउ बिरहोर जनजाति के आयुष्मान कार्ड बनाय गीस, जेमा ले पांच झिन लाभार्थी मन ल कलेक्टर अवनीश शरण ह प्रतीकात्मक कार्ड दीन।
खबर के मुताबिक प्रधानमंत्री जनजातीय आदिवासी न्याय महाभियान-पीएम जन-मन योजना म विशेष पिछड़ा जनजाति के कल्याण के दिसा म एक ठन नवा पहल करे गेहे। एमा सरकार के आने-आने योजन के लाभ जनजातीय समुदाय ल मिलत हे।
माओवादी हथियार कारखाना-ध्वस्त
कांकेर अउ नारायणपुर पुलिस के संयुक्त टीम ह आज माड़ इलाका म माओवादी मन डहार ले चलाय जावत हथियार बनाय के कारखाना ल ध्वस्त कर देहे। पुलिस अधीक्षक दिव्यांग पटेल ह बतईन कि टेकमेटा अउ कोंगे के जंगल म ए कार्रवाई करे गे हवय। इहां माओवादी मन डहार ले हथियार बनाय के काम करे जावत रिहीन। पुलिस ह ए कारखाना ले कतकोन देसी लांचर घलो जब्त करे हे। पुलिस अधीक्षक ह बतईन कि ए दउरान माओवादी अउ पुलिस के बीच मुठभेड़ घलो होइस, जेमा कोनों ल नुकसान नइ होय हे।
नशीली-दवाई जब्त
दुरूग पुलिस ह राजस्थान के कोटा, बुन्दी अउ जयपुर म छापामार कार्रवाई करके एक करोड़ साठ लाख रूपिया ले जादा के नसीला टेबलेट अउ सिरफ बरामद करे हे। ए मामला म पुलिस ह एक झिन माईलोगिन संघरा दू आरोपी ल गिरफ्तार करे हे। जिला के वरिष्ठ पुलिस अधीक्षक रामगोपाल गर्ग ह पत्रकार मन ले चर्चा करत बतईन कि ए आरोपी मन ह अंतर्राष्ट्रीय बाजार म सप्लाई बर डार्क वेब के माध्यम ले जुड़े रिहीन। ओमन बतईन कि विशेष टीम बनाके राजस्थान के कुछेक जघा म ए कार्रवाई करे गीस।
खेल समाचार
दमनदीप म राखे गे मलखंभ प्रतियोगिता म छत्तीसगढ़ के बालक अउ बालिका वर्ग के खिलाड़ी मन ह स्वर्ण पदक जीतीन हे। एमा जांजगीर-चांपा जिला के चार झन खिलाड़ी मन सामिल हे। ए खिलाड़ी मनके जांजगीर पहुंचे म कलेक्टर आकाश छिकारा अउ पुलिस अधीक्षक विजय अग्रवाल ह ओमन ल सम्मानित करीन।
ओति, राजस्थान के गंगानगर म होवत सीनियर राष्ट्रीय शालेय जुडो प्रतियोगिता म दुरूग जिला के भिलाई निवासी पुर्णिमा ह कांस्य पदक हासिल करे हे।