प्रधानमंत्री नरेंद्र मोदी ह किहीन हे दस बछर के उंखर सरकार गरीब मन बर समर्पित रिहीस। ओमन किहीन कि देस तभे विकास कर सकत हे, जब सरकार के योजना के फायदा हरेक लोगन तक पहुंचय। प्रधानमंत्री ह आज वीडियो कांफ्रेंसिंग ले प्रधानमंत्री जनजाति आदिवासी न्याय महाअभियान-पीएम जनमन म प्रधानमंत्री ग्रामीण आवास योजना के एक लाख लाभार्थी मन ल पहिली किस्त देवत ए बात किहीन। ओमन किहीन कि आज देस म अइसन सरकार हे, जउन पहिली गरीब के बारे म सोचथे। ओमन किहीन गरीब मनबर चार करोड़ पक्का मकान बनाय गेहे। पीएम जनमन महाअभियान के उद्देस्य सबले पिछड़े जनजातीय लोगन तक सरकारी योजना के फायदा पहुंचाना हवय।
प्रधानमंत्री जनमन संवाद-02
श्री मोदी ह पीएम जनमन के लाभार्थी मन संग गोठबात करीन। इही कड़ी म प्रधानमंत्री ह आने-आने योजना के लाभ लेवइया हितग्राही छत्तीसगढ़ के जशपुर जिला के बगीचा विकासखंड के गांव सलखाडांड के बिसेस पिछड़ी जनजाति पहाड़ी कोरवा मन कुवारी बाई ले सोज्जे गोठबात करीन। प्रधानमंत्री ह ओखर ले पूछिन कि सरकार के कोन-कोन योजना के फायदा मिलत हे। जुवाब म मनकुवारी ह बतइन कि प्रधानमंत्री आवास योजना ले बने पक्का मकान म हमन राहत हन पहिली बिजली के दिक्कत रिहीस अब नइ हे। ओमन यहू बतइन कि उंखर परिवार म पांच झन हे, पहिली लकड़ी इकठ्ठा करके खाना बनाय बर पड़य फेर अउ उज्जवला योजना म मिले गैस सिलेण्डर ले कमती बेरा म झटकिन खाना बन जथे। मनकुवारी ह बतइन कि पहाड़ी कोरवा समूदाय के हवय जउन पहाड़ म रइथे। पिये के सुध्द पानी एक बड़े चुनौती रिहीस, फेर अब सरकार ह घरोघर पिये के साफ पानी पहुंचा देहे। ओमन प्रधानमंत्री ल महिला स्व-सहायता समूह के संबंध म बतइन कि बारह झिन महिला सदस्य हे, जउन मन दोनापत्तल बनाय के काम करथे।
प्रधानमंत्री-जनमन संवाद-03
मनकुवारी ह बतइन कि जनमन संगी के रूप म ओमन अपन जनजाति समाज के सदस्य मन ल सरकार के योजना के जानकारी देवत हे अउ आयुष्मान कार्ड, रासन कारड, जॉब कारड, आधार कारड बनाय बर प्रेरित करथे। मनकुवारी ह प्रधानमंत्री ल ए जम्मों योजना बर धन्यवाद दीन, त प्रधानमंत्री ह किहीन कि आपके धन्यवाद बर मैं आप ल धन्यवाद देवत हव, काबर कि आप योजना के फायदा लेके दीगर हितग्राही मन ल घलो योजना के फायदा देवाय हव। प्रधानमंत्री ह किहीन कि जब योजना के फायदा जादा ले जादा लोगन ल मिलत हे, त एखर प्रभाव कई गुणा बड़ जथे। कारीकरम म मुख्यमंत्री विष्णुदेव साय, विधायक रायमुनि भगत अउ गोमती साय घलो मउजूद रिहीन। खबर के मुताबिक आखिरी छोर के आखिरी मनखे ल ससक्त बनाय के प्रधानमंत्री के अंत्योदय के मुताबिक पाछू बछर नवंबर महिना म बिसेस रूप ले कमजोर जनजातीय समूह-पीवीटीजी के सामाजिक आर्थिक उत्थान बर पीएम जनमन के सुभारंभ करे गे रिहीस। करीबन चोबीस हजार करोड़ रूपिया के बजट वाले पीएम जनमन अभियान म नौ ठिन मंत्रालय ले ग्यारा मुख्य सुविधा कोति ध्यान दे गीस। एखर उद्देस्य सुरक्षित आवास, साफ पिये के पानी, शिक्षा स्वास्थ्य, पोषण, बिजली, रद्दा अउ दूर संचार के संग आजीविका खातिर मउका समेत जरूरी सुविधा संग घर देवाके कमजोर जनजातीय समूह पीवीटीजी के सामाजिक अउ आर्थिक स्थिति म बढ़वार करना हे।
केंद्रीय मंत्री-भूमिपूजन
केंद्रीय जलसक्ति मंत्री गजेन्द्र सिंह शेखावत ह आज प्रधानमंत्री जनमन योजना के तहत बिसेस पिछड़े जनजाति कमार बसाहट ल जोड़े बर महासमुंद जिला के गांव झालखम्हरिया म बारह ठिन रद्दा के भूमिपूजन करीन। ए रद्दा के लंबाई करीबन तेरह किलोमीटर हे, जेखर लागत करीबन दस करोड़ रूपिया हे। ए मउका म जलसक्ति मंत्री ह प्रधानमंत्री जनमन योजना म हितग्राही मन ल प्रमाण पत्र बांटिन अउ दू मोबाइल मेडिकल यूनिट ल हरियर झंडी दिखाके रवाना करीन। कारीकरम म उप मुख्यमंत्री अरूण साव, सांसद चुन्नीलाल साहू समेत कतकोन जनप्रतिनिधि अउ बड़का अधिकारी मउजूद रिहीन।
धार्मिक स्थल-सफाई अभियान
प्रधानमंत्री नरेंद्र मोदी ह मंदिर तीर्थ स्वच्छता श्रमदान कारीकरम म जम्मों धार्मिक जघा म सफई काम करे के आहवान करे हे। एमा कवर्धा जिला के मंदिर अउ तीर्थ स्थान म स्वच्छता अभियान चलाय जात हे। उप मुख्यमंत्री विजय शर्मा ह खेड़ापति हनुमान मंदिर परिसर के साफ-सफई म जन-प्रतिनिधि मन संग भाग लीन उप मुख्यमंत्री ह नागरिक मन ले अपील करत किहीन कि वहू मन मंदिर तीर्थ स्थान म स्वच्छता अभियान चलावय।
विकसित भारत संकल्प यात्रा
केंद्र सरकार के प्रमुख योजना के जानकारी देबर प्रदेस भर म विकसित भारत संकल्प यात्रा निकाले जात हे। एमा संकल्प यात्रा के मोबाइल वैन राजनांदगांव जिला के नया ढ़ाबा पहुंचिस। संकल्प यात्रा म विधानसभा अध्यक्ष डॉक्टर रमन सिंह सामिल होइन। ए बेरा म राखेगे कारीकरम म बोलत डॉक्टर सिंह ह किहीन कि प्रधानमंत्री के अगुवई म देस नवा दिसा म आगू बढ़त हे। केंद्र सरकार के योजना के फायदा जादा ले जादा लोगन ल मिलय। डॉक्टर सिंह ह सबो ल देस ल विकास के रद्दा म आगू बढ़ाय बर संकल्प के संग सपथ देवाईन। ए बेरा म ओमन लइका मन के अन्नप्रासन अउ गरभवती महतारी मनके गोदभराई कारीकरम म संघरीन।
सड़क सुरक्षा माह
प्रदेस म लोगन ल सड़क सुरक्षा कोति जागरूक करे खातिर सड़क सुरक्षा माह मनाय जात हे। एमा जांजगीर-चांपा जिला म रद्दा दुर्घटना ल रोके बर पुलिस प्रशासन ह नवा मुहिम सुरू करे हे। एमा कलेक्टर आकाश छिकारा अउ पुलिस अधीक्षक विजय अग्रवाल ह ट्रैक्टर मालिक अउ चालक मन ल गुलाब फूल देके यातायात नियम के पालन करे के समझाइस दीन।
ओति, बीजापुर जिला मुख्यालय म ‘‘सड़क सुरक्षा जीवन रक्षा‘‘ के थीम संग सड़क सुरक्षा माह के सुरूआत होइस। ए दउरान यातायात नियम के जानकारी देबर बीजापुर म बाईक रैली निकाले गीस। संगेसंग जिला के सप्ताहिक हाट बाजार म पाम्प्लेट बांटके अउ नुक्कड़ नाटक करके यातायात के नियम के जानकारी दे जाही। उहें, ड्राइविंग लाईसेंस बनवाय बर सिविर घलो लगाय जाही।
माओवादी गिरफ्तार
बीजापुर जिला म सुरक्षा बल के टीम ह नौ झिन माओवादी ल गिरफ्तार करे हे। खबर के मुताबिक पाछू दिन कोबरा बटालियन अउ जिला पुलिस बल के टीम तलासी अभियान बर निकले रिहीन। इही दउरान तिम्मापुर-नेड्रा के जंगल म तीन झिन माओवादी ल गिरफ्तार करे गीस। पकड़े गे माओवादी मन ले पूछताछ के बाद छै झिन आने माओवादी मन ल गिरफ्तार करे गीस। गिरफ्तार माओवादी मनके तीर ले पांच किलो के टिफिन बम, स्वीच वायर अउ आने माओवादी जिनिस बरामद करे गेहे।
मकर संक्रांति
छत्तीसगढ़ समेत देसभर म मकर संक्रांति, सकरायत के परब आज उछाह के संग मनाय जात हे। सूर्य के उत्तरायन म प्रवेस करे म ए तिहार मनाय जाथे। संगेसंग बने फसल खुसहाली अउ सौभाग्य दे खातिर प्रकृति बर ए आभार के प्रतीक हवय। देस के आने-आने हिस्सा म ए तिहार कई नाम ले जाने जाथे। तमिलनाडू म पोंगल, गुजरात म उत्तरायन, असम म बीहू अउ पश्चिम बंगाल म पौष संक्रांति के रूप म मनाय जाथे। ऐति, राजधानी रईपुर म आज सकरायत के सेति कतकोन कारीकरम होवत हे। महादेव घाट के खारून नदिया म आज श्रध्दालू मन नदिया म स्नान करके सुरूज देव ल अर्ध दीन। प्रधानमंत्री नरेंद्र मोदी, छत्तीसगढ़ के राज्यपाल विश्वभूषण हरिचंदन अउ मुख्यमंत्री विष्णुदेव साय ह मकर संक्रांति के मउका म लोगन ल सुभकामना दीन हे।
आग मौत
कबीरधाम जिला के गांव नागाडबरा म पाछू रतिहा एक झोपड़ी म आग लगे ले एके परिवार के तीन झन के मउत होगे। खबर के मुताबिक जिला के ग्राम पंचायत माठपुर के नागाडबरा बस्ती के एक झोपड़ी म बैगा आदिवासी परिवार के घर गोसइया-गोसइन अउ ओखर बारा बछर के बेटा तीनों के बिहनिया जले अवस्था म लास मिलिस। गांव के लोगन के सूचना म कुकदूर पुलिस ह मामला दरज करके जांच सुरू कर देहे। गैस सिलेंडर म आगी लगे सेति हादसा होय के आसंका जताय जात हे।