प्रधानमंत्री नरेंद्र मोदी काली वीडियो कांफ्रेंसिंग के माध्यम ले प्रधानमंत्री जनजातीय आदिवासी न्याय महाअभियान ‘‘पीएम-जनमन‘‘ के चलत प्रधानमंत्री ग्रामीण आवास योजना के एक लाख लाभार्थी मन बर पहला किस्त जारी करही। ए मउका म ओमन एक कारीकरम ले लाभ मिलईया मन संग गोठबात घलो करही। पाछू बछर नवंबर म पीएम-जनमन के सुरूआत समाज के सबले कमजोरहा जनजातीय समूह मनके सामाजिक आर्थिक कल्याण बर करे गे रिहीस।
पीएम-जनमन के उद्देस्य सबले कमजोर जनजातीय समूह मन ल बुनियादी सहूलियत देवाना हे। एमा सुरक्षित आवास, साफ पिये के लइक पानी सुघ्घर पढ़ई लिखई स्वास्थ्य अउ पोषण, बिजली, सड़क संचार असन सहूलियत अउ टिकाऊ आजीविका के मउका उपलब्ध कराना सामिल हे।
पंचायती राज मंत्री-छत्तीसगढ़
प्रधानमंत्री नरेंद्र मोदी के आव्हान ले मंदिर तीर्थ स्वच्छता श्रमदान कारीकरम के चलत केंद्रीय ग्रामीण विकास अउ पंचायती राज मंत्री गिरिराज सिंह ह आज कोरबा जिला के बालको स्थित श्रीराम मंदिर परिसर म स्वच्छता अभियान म सामिल होके ए जघा के साफ-सफाई काम म अपन सहभागिता दीन। संगे राम मंदिर म पूजा-पाठ करके देस अउ प्रदेसवासी मन बर सुखसांति समृध्दि अउ खुसहाली खातिर मंगल कामना करीन।
एखर पहिली काली कोरबा म केंद्रीय राज्य मंत्री ह पंचायत अउ ग्रामीण विकास ले जुड़े अधिकारी मनके समीक्षा बइठका लीन। ओमन जिला म मनरेगा एन.आर.एल.एम., प्रधानमंत्री ग्राम सड़क योजना, भू-अभिलेख आधुनिकीकरण, वाटरसेड, अमृत सरोवर समेत आने योजना मनके समीक्षा करीन। केंद्रीय मंत्री ह जिला म चार, चिरौंजी, केला अउ पपीता के उत्पादन बर प्रोत्साहित करे संगे पंचायत मन ल मजबूत बनाय सोच परयास करे के निरदेस दीन। श्री सिंह ह सरकारी आवास समेत इच्छुक किसान मनके आवासीय परिसर म चार, चिरौंजी के पौधा लगाय के निरदेस दीन। ओमन आजीविका मिसन के चलत नारी प्राणी मनके भागीदारी तय करत मवेसी पालन, फलदार पौधा लगई समेत कई ठिन लाभदायक गतिविधि ले जोड़े बर किहीन। ओमन गौठान मन म नवा आर्थिक गतिविधि संचालित करे के दिसा म परयास बारे म घलो सुझाव दीन। उहें, एनटीपीसी अउ बालको के सहयोग ले आजीविका वाले गतिविधि ल बढ़ाय बर जोर दीन।
परीक्षा पे चर्चा-पंजीकरण
अवईया ओनतीस जनवरी के प्रधानमंत्री नरेंद्र मोदी के सातवां परीक्षा के चर्चा कारीकरम बर अब तक ले दू करोड़ छब्बीस लाख ले जादा पढ़ईया लइका मन रजिस्ट्रेसन करा डरे हे, जउन एक ठिन रिकार्ड हे। शिक्षा मंत्रालय ह पाछू महिना बारा दिसंबर ले ए बछर बारा जनवरी तक छटवीं ले बारहवी कक्षा तक म पढ़ईया लइका मन के संगे शिक्षक अउ अभिभावक मन ले घलो ए कारीकरम म भाग ले बर माय जीओवी पोर्टल म ऑनलाइन आवेदन मंगाय गे रिहीस। मंत्रालय ह बतइस कि ए पोर्टल म मिले प्रश्न के आधार ले दू हजार पचास झिन प्रतिभागी चुने जाही। ए प्रतिभागी मन ल एक ठिन विसेस कीट दे जाही। ए कीट म प्रधानमंत्री के किताब एक्जाम वारियर्स ले हिंदी अउ अंग्रेजी एडिसन के संगे प्रमाण पत्र दे जाही। ए बछर प्रधानमंत्री के संग चार हजार ले जादा पढ़ईया लइका मन गोठबात करही। ए कारीकरम दिल्ली के भारत मंडपम म होही।
विकसित भारत संकल्प यात्रा
केंद्र सरकार योजना मन के फायदा लोगन मन तक पठोय के उद्देस्य ले प्रदेस भर म विकसित भारत संकल्प यात्रा के आयोजन करे जात हे। इही सिलसिला म संकल्प यात्रा वैन राजनांदगांव के शंकरपुर पहुंचिस। सिविर के सुभारंभ सांसद संतोष पांडेय ह करीन।
उहें, मुंगेली जिला के लोरमी नगर पंचायत म आयोजित सिविर म उप मुख्यमंत्री अरूण साव सामिल होइन। ए दउरान ओमन केंद्र सरकार के योजना मनले संबंधित आने-आने स्टाल के अवलोकन करीन अउ हितग्राही मन ल चेक अउ सामग्री बांटिन।
ऐति, बिलासपुर जिला के पताईडीह, जैतपुरी, सोंठ अउ बिटकुला गांव म घलो संकल्प यात्रा के चलत सिविर लगाय गीस। जिहां लाभ पाय हितग्राही मन मेरी कहानी-मेरी जुबानी के जरिया योजना मन ले उंखर जीवन म आय बदलाव के जानकारी बतइन अउ प्रधानमंत्री ल धन्यवाद किहीन।
बिलासपुर भूकंप
बिलासपुर म आज भूकंप के हल्का झटका महसूस करे गीस। मंझनिया बेरा आय ए भूकंप के तीव्रता रिक्टर स्केल म तीन दसमलव एक आंके गेहे। भूकंप ले कोनो जघा नुकसान होय के खबर नई हे।
मौसम विभाग के मुताबिक मंझनिया गौरेला-पेण्ड्रा-मरवाही समेत मध्यप्रदेस के अमरकंटक अउ अनूपपुर जिला ले लगे गांव म भूकंप के झटका महसूस करे गीस। भूकंप के केन्द्र बिलासपुर के करीबन पचास किलोमीटर उत्तर म सिलपहरी-डांडजमड़ी के बीच रिहीस।
महासमुंद-सोना बरामद
महासमुंद पुलिस ह ओड़िसा सीमा म लगे सिंघोड़ा थाना जघा म एक ठिन गाड़ी ले करीबन आठ किलो सोना बरामद करे हे, जेखर कीमत करीबन पांच करोड़ बताय गेहे। ए मामला म पुलिस ह पांच झिन आरोपी ल गिरफ्तार करे हे। जिला के पुलिस अधीक्षक राजेश कुकरेजा ह बतइन कि सीमावर्ती थाना क्षेत्र म पुलिस अउ साइबर सेल के टीम डहार ले सरलग चेकिंग करे जात हे। इही दउरान रेहटी खोल चेकपोस्ट म एक ठिन गाड़ी ले सोना के बिस्किट अउ पत्ती बरामद करे गीस।
मानस मंडली-राशि आबंटन
बाईस जनवरी के अयोध्या म ‘‘श्री रामलला प्राण प्रतिष्ठा-रामोत्सव‘‘ के मद्देनजर छत्तीसगढ़ म जिला अउ विकासखंड स्तर म भक्तिमय सांस्कृतिक कारीकरम राखे जाही। राज्य शासन ह एखर बर सबो विकासखंड म करीबन एक करोड़ चौदह लाख रूपिया जारी कर देहे। ए रासि ल कलेक्टर के माध्यम ले संस्कृति विभाग के चिन्हारी पोर्टल म पंजीकृत मानस मंडली मन ल दे जाही।
तातापानी महोत्सव
बलरामपुर-रामानुजगंज जिला म आज ले तातापानी महोत्सव सुरू होइस। मुख्यमंत्री विष्णुदेव साय ह ए महोत्सव के सुभारंभ करीन। महोत्सव के पहिली दिन मुख्यमंत्री कन्या सामूहिक विवाह योजना के चलत चार सौ जोड़ा बिहाव सूत्र म बंधिन।
ए दउरान मुख्यमंत्री ह तातापानी के तपेश्वर महादेव मंदिर पहुंचिन अउ पूजा-पाठ करके प्रदेसवासी मनके समृध्दि अउ खुसहाली के कामना करीन।
फल/फूल/सब्जी-प्रदर्शनी
रईपुर के नेहरू उद्यान म काली ले तीन दिवसीय फल-फूल अउ सब्जी प्रदर्सनी सुरू होइस। कृषि मंत्री रामविचार नेताम ह ए प्रदर्सनी के उदघाटन करत किहीन कि फूल मन के खेती समेत आने नवा तकनीक ले फसल उत्पादन म उत्कृष्ट काम करईया किसान मन ल सम्मानित करे जाही। संगे लाभकारी अउ मुख्य फसल मन ल के चिन्हारी करे बाद एला बढ़ावा दे जाही। कारीकरम म श्री नेताम ह फल-फूल अउ सब्जी प्रदर्सनी के बिजेता प्रतिभागी मन ल सम्मानित करीन।
पतंग उत्सव
तील सकरायत याने मकर संक्रांति के उपलक्ष्य म संस्कृति विभाग डहार ले आज रईपुर के पुरखौती मुक्तांगन म पतंग उत्सव राखे गे रिहीस। मुख्यमंत्री विष्णुदेव साय ह पतंग उड़ाके ए उत्सव के सुभारंभ करीन। ए उत्सव म बारा ठिन राज्य के प्रतिभागी मन हिस्सा लेइन।
कारीकरम म बोलत मुख्यमंत्री ह किहीन कि प्रधानमंत्री नरेंद्र मोदी ह देसवासी मन ल मकर संक्रांति के सुभअवसर ले प्राण प्रतिष्ठा तक सबो धरमस्थल मन म साफ-सफाई करे के आव्हान करे हे। ए कड़ी म आज रईपुर के वीआईपी रोड स्थित श्रीराम मंदिर परिसर ले सफाई अभियान सुरू करे गीस। मुख्यमंत्री ह प्रदेसवासी मन ले आग्रह करीन कि सबो झिन मन अपन तीर-तखार के धरम स्थ्ल, मंदिर, गुरूद्वारा म साफ-सफाई करय। ओमन किहीन कि अयोध्या म राम मंदिर प्राण प्रतिष्ठा के दिन बाईस जनवरी के रतिहा घरोघर दिया जलावय अउ अइसन उपाय करय, जेखर ले पूरा वातावरण राममय हो जाय।
कारीकरम म संस्कृति मंत्री बृजमोहन अग्रवाल ह घलो संबोधित करीन।
सड़क सुरक्षा माह
लोगन मन ल सड़क सुरक्षा बर जागरूक राखे खातिर काली ले प्रदेसभर म सड़क सुरक्षा माह के आयोजन होही। ए दउरान लोगन मन ल ट्रेफिक नियम के जानकारी देबर सबो जिला मन म प्रसिक्षण सिविर, कार्यसाला, सेमिनार अउ नेत्र जांच सिविर समेत कई ठिन कारीकरम राखे जाही।