केंद्रीय ग्रामीण विकास और पंचायती राज मंत्री गिरिराज ंिसंह ह किहीन हे कि गांव म बने गौठान मन ल आर्थिक समृध्दि केंद्र के रूप म विकसित करे जाही। ओमन ह आज नवा रईपुर म पंचायत अउ ग्रामीण विकास विभाग के अधिकारी मन संग समीक्षा बइठका म किहीन कि छत्तीसगढ़ के माईलोगिन मनके आर्थिक समृध्दि बर राष्ट्रीय ग्रामीण आजीविका मिसन के तहत लखपति दीदी बनाय के कार्ययोजना तियार करे जाही। ओमन अमृत सरोवर के व्यवस्थित विकास बर घलो जोर दीन।
श्री सिंह ह किहीन कि देस के आर्थिक उन्नति म माईलोगिन के भागीदारी छप्पन प्रतिसत हे। फेर, छत्तीसगढ़ म ए ह पचास प्रतिसत हे, जेला बढ़ाय के जरूरत हे। एखर बर माईलोगिन मन ल खेती-किसानी म आगू बढ़ाय के संगेसंग राष्ट्रीय ग्रामीण आजीविका मिसन ले कुटीर उद्योग स्थापित करे बर प्रोत्साहित करे जाही। श्री सिंह ह किहीन कि प्रधानमंत्री नरेंद्र मोदी ह बिहान के दीदी मन ल लखपति बनाय के संकल्प लीन हे। बिहान योजना म छप्पन लाख दीदी मन ल लखपति बनाना हमर संकल्प हवय।
बइठका म केंद्रीय मंत्री ह बतइन कि नाबार्ट कोति ले राज्य म मॉडल गौठान बनाय बर कार्ययोजना तियार करे जात हे। एमा राज्य के चार जिला म एक-एक गौठान ल मॉडल के रूप म विकसित करे जाही। एखर बर नाबार्ट डहार ले राष्ट्रीय ग्रामीण आजीविका मिसन ल पच्चीस लाख रूपिया के रासि दे जाही। ए मॉडल गौठान म कुकरी, छेरी अउ सूरा पोषे के संगेसंग बढ़िया नसल के गाय-गरू पाले जाही।
एखर ले पहिली केंद्रीय मंत्री गिरिराज सिंह आज छत्तीसगढ़ के तीन दिनी प्रवास म रईपुर पहुचिन। माना हवाई अड्डा म उप मुख्यमंत्री विजय शर्मा समेत अब्बड़ अकन जनप्रतिनिधि मन उंखर सुवागत करीन।
केंद्रीय मंत्री-छत्तीसगढ़-02
उहें, केंद्रीय मंत्री ह रईपुर के राज्य अतिथि गृह पहूना म मुख्यमंत्री विष्णुदेव साय संग भेंट करीन। ए दउरान छत्तीसगढ़ भौगोलिक, सांस्कृतिक विशेषता, विकसित भारत संकल्प यात्रा अउ शासकीय योजना मन के क्रियान्वयन के बारे म चर्चा होइस।
मुख्यमंत्री-कृषि मेला
मुख्यमंत्री विष्णुदेव साय ह किहीन हे कि राज्य सरकार ह, किसनहा मन ल आगू बढ़ाय बर सब्बो परयास करही। दुरूग जिला के खपरी गांव म चलत ‘‘राष्ट्रीय कृषि मेला और संगोष्ठी‘‘ म बोलत हुए मुख्यमंत्री किहीन कि छत्तीसगढ़ के पहिचान भारत के परमुख धान बोवईया राज्य के रूप म होथे, ओमन किहीन कि प्रधानमंत्री नरेंद्र मोदी ह किसनहा मनके आमदनी दोगुना करे बर प्रधानमंत्री कृषि सिंचाई योजना समेत अब्बड़ अकन योजना सुरू करे हे। जागरूक करे बर किसान चैनल सुरू करे गेहे। श्री साय ह किहीन कि मोदी के गारंटी म इक्कतीस सौ रूपिया प्रति कुंटल म धान के खरीदी के वादा पूरा करे बर समर्थन मूल्य के अंतर के पइसा किसनहा मन ल जल्दीच एकमुस्त दे जाही।
उहें, मुख्यमंत्री ह दुरूग जिला के मिनी गिरौदपुरी धाम गिरहोला गांव म आयोजित संत समागम म घलो सामिल होइन।
स्काउट्स-गाइड्स-मुख्यमंत्री
भारत स्काउट्स-गाइड्स छत्तीसगढ़ के अध्यक्ष अउ शिक्षा मंत्री बृजमोहन अग्रवाल के अगुवई म स्काउट्स-गाइड्स के सदस्य मन ह काली मुख्यमंत्री विष्णुदेव साय ले भेंट करीन। ए मउका म मुख्यमंत्री ल स्काउट्स-गाइड्स टीम के संरक्षक बैच पहिनाय गीस। श्री साय ह स्काउट्स-गाइड्स कोति ले करे जावत आने-आने काम के बड़ाई करत हुए किहीन कि, आपमन कोति ले विपत्ति के बेरा म जेन प्रकार ले सेवा करे जाथे, ओहा बड़ प्रेरणादायी हवय।
खेलो इंडिया-चयन
तमिलनाडु म अवईया उन्नीस ले इक्कीस जनवरी तक होने वाले छटवां खेलो इंडिया यूथ गेम्स बर बीजापुर स्पोर्ट्स एकेडमी के जानकी कोरसा, बिन्दु तेलम अउ ज्योति कुड़ियम के चयन छत्तीसगढ़ महिला फुटबॉल टीम म होय हे। जूनियर गर्ल्स चैंपियनसीप म सुघ्घर खेल ले छत्तीसगढ़ महिला फुटबॉल टीम ह खेलो इंडिया यूथ गेम्स म क्वॉलीफाई करीस हे। छत्तीसगढ़ के टीम सत्रा जनवरी के रईपुर ले तमिलनाडु बर रवाना होही।
केंद्रीय खेल अउ सूचना प्रसारण मंत्री अनुराग ठाकुर अउ मुख्यमंत्री विष्णुदेव साय ह खिलाड़ी मन ल खेलो इंडिया यूथ गेम्स म चयन के बधई अउ सुभकामना दीन हे।
उप मुख्यमंत्री-युवा दिवस
उप मुख्यमंत्री अउ विधि मंत्री अरूण साव ह नवा रायपुर के हिदायतुल्ला राष्ट्रीय विधि विश्वविद्यालय म राखे गे स्वामी विवेकानंद स्मृति व्याख्यान म किहीन कि स्वामी विवेकानंद ह समावेसी सासन ल अपनात हुए सामाजिक भेदभाव ल दूर करे उपर जोर दे रिहीन। देस अउ देसवासी मन ल संग लेके चलना ही समावेसी सासन हवय, जोहा आज भारत म होवत हे। ओमन किहीन कि ए इक्कीसवीं सदी ह भारत के सदी हवय। हमर देस दुनिया के अगुवई करे बर तियार हे। समावेसी सासन अउ समावेसी विकास ले जम्मों दुनिया म भारत के ताकत बाढ़त हे।
स्वामी विवेकानंद के जयंती म ‘‘स्वामी विवेकानंद के समावेसी सासन के दृष्टिकोण‘‘ बिसय उपर राखेगे व्याख्यान म अपन बिचार साझा करत श्री साव ह किहीन कि प्रधानमंत्री आवास, उज्जवला योजना अउ स्वच्छ भारत मिसन आज आंदोलन बन गेहे, ऐमन समावेसी शासन के मिसाल हे।
उहें, उप मुख्यमंत्री विजय शर्मा ह स्वामी विवेकानंद तकनीकी विश्वविद्यालय भिलई म होय कारीकरम म आने-आने तकनीकि काम के लोकार्पण करीन। ए मउका म श्री शर्मा ह किहीन कि हमन ल स्वामी विवेकानंद के बिचार ले सरलग प्रेरणा लेवत रहना हे। कारीकरम म उप मुख्यमंत्री ह आठ झन ल र्स्टाटप बर चौंतीस लाख रूपिया वित्त अनुदान सीड मनी के रूप म दीन। संगेसंग ओमन तकनीकी विश्वविद्यालय कोति ले मध्यभारत म बनाय गे पहिली रिमोर्ट पायलट ट्रेनिंग आर्गनाइजेसन अउ ट्रेनिंग प्लेसमेंट सेंटर के लोकार्पण घलो करीन। एखर माध्यम ले हर बछर सौ झन ल रोजगार अउ प्रसिक्षण दे जाही।
तीरंदाजी-प्रतियोगिता
रईपुर के साईंस कॉलेज मैदान म छत्तीसगढ़ प्रदेस आर्चरी एसोसिएसन डहार ले आयोजित चालीसवां एनटीपीसी राष्ट्रीय सब जूनियर तीरंदाजी प्रतियोगिता म भाग लेवईया खिलाड़ी मन ल बिदई दे गीस। ए मउका म शिक्षा मंत्री बृजमोहन अग्रवाल ह किहीन कि ए प्रतियोगिता ले छत्तीसगढ़ ल ए खेल म नवा पहिचान मिले हे। युवा खिलाड़ी मन ल तीरंदाजी के बारीकी सीखे के मउका मिले हे। श्री अग्रवाल ह किहीन कि प्रदेस म खिलाड़ी मनके परसिक्षण अउ सुविधा के ध्यान रखे जाही, जेखर ले ओमन ए खेल म छत्तीसगढ़ के नांव उज्जर कर सकय।
हल्बी/गोण्डी-समाचार बुलेटिन
जिले की चिट्ठी
आकाशवाणी केंद्र रईपुर के प्रादेसिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के जम्मों आकाशवाणी केंद्र एके संग रिले करही। ए बखत के अंक म ‘‘सरगुजा‘‘ जिला के गतिविधि के बारे म जानकारी दे जाही।
मकर संक्रांति
देसभर म आज लोहड़ी के तिहार बड़ उछाह ले मनाय जावत हे। राष्ट्रपति द्रौपदी मुर्मू अउ उप राष्ट्रपति जगदीप धनखड़ ह ए मउका म भारत अउ विदेस म रहईया सब्बो मनखे मन ल सुभकामना दीन हे।
छत्तीसगढ़ के मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह घलो प्रदेसवासी मन ल मकर संक्रांति, पोंगल अउ लोहड़ी तिहार के बधई दीन हे।
गणतंत्र दिवस परेड
गणतंत्र दिवस परेड के मउका म नई दिल्ली के कर्तव्य पथ म छत्तीसगढ़ के झांकी बस्तर के प्राचीन जनसंसद मुरिया दरबार ल प्रदर्सित करे बर नोनी लइका मन के टीम आज दुरूग रेलवे स्टेसन ले नई दिल्ली बर रवाना होइस। एखर ले पहिली मुख्यमंत्री विष्णुदेव साय ह वीडियो कॉल के माध्यम ले टीम संग चर्चा करत हुए ओमन ल सुभकामना दीन।