राष्ट्रीय युवा दिवस म राखे गे कार्यक्रम म प्रधानमंत्री ह युवा मनके आदर्श स्वामी विवेकानंद के उल्लेख करत कीहिन कि स्वामी जी ह ब्रिटिश शासन के दौरान देश म एक नया उर्जा संचारित करीन। ओमन श्री अरविंदो के घलो सुरता करीन अउ कीहिन कि स्वामी विवेकानंद अउ श्री अरविंदो ह उद्घोष करे रीहिन कि देश के भविष्य देश के युवा मन उपर निर्भर हे।
बताइन कि युवा मनके आदर्श स्वामी विवेकानंद के जयंती म पांच दिन के महोत्सव के आयोजन करे गेहे। ए महोत्सव के थीम हे- मेरा भारत, विकसित भारत दू हजार सैंतालिस-युवाओं द्वारा युवाओं के लिए। प्रधानमंत्री ह युवा महोत्सव के शुभकामना दीन। ओमन कीहिन कि मोर सबले जादा भरोसा युवा मन उपर हे। ओमन कहिन कि माई भारत के स्थापना के पचहत्तर दिन बाद एक करोड़ युवा एमा जुड़ गेहे।
श्री मोदी ह कहिन कि हमर सरकार ह दस साल म युवा मन ल नवा दिशा देहे । ओमन कीहिन कि युवा योग के ब्रैण्ड एम्बेसडर बन गेहे।
एति प्रधानमंत्री के संबोधन ल छत्तीसगढ़ के जम्मों जिला मुख्यालय अउ नगरीय निकाय मन म सीधा प्रसारण करे गीस। रायपुर के शहीद स्मारक भवन म प्रधानमंत्री के लाईव उद्बोधन के आयोजन करे गीस। ए मौका म संस्कृति मंत्री बृजमोहन अग्रवाल अउ सांसद सुनील सोनी ह स्वामी विवेकानंद के फोटो उपर माला चढ़ाके युवा महोत्सव के शुभारंभ करीन। ए मौका म युवा मन प्रधानमंत्री के संबोधन के सीधा प्रसारण सुनीन।
अइसने राजधानी रायपुर के कोटा स्थ्ति विवेकानंद स्टेडियम म घलो युवा दिवस के मौका म प्रधानमंत्री के संबोधन के सीधा प्रसारण के व्यवस्था करे गे रीहिस। इंहा खेल अउ युवा कल्याण मंत्री टंकराम वर्मा ह युवा मन संग संबोधन ल सुनीन।
ए मौका म श्री साव ह कहिन कि भारत देश के प्रतिष्ठा अउ पुराना वैभव ल लहुटाय म स्वामी विवेकानंद जी के महत्वपूर्ण योगदान हरय। स्वामी जी ह जाति, पंथ अउ संकीर्ण विचार मनले उपर उठके देशप्रेम अउ राष्ट्रीय एकता उपर जोर दीन। एखर ले प्रभावित होके लाखों युवा मन अपन प्राण के आहूति देके देश ल गुलामी के जंजीर ले आजाद कराइन। कार्यक्रम के दौरान विवेकानंद उद्यान म भारतमाता के आरती करे गीस। जेखर बाद उप मुख्यमंत्री ह राष्ट्र स्वाभिमान यात्रा ल रवाना करीन। ए मौका म ओमन स्वामी विवेकानंद के जीवन म आधारित उठो, जागो क्विज प्रतियोगिता के पोस्टर के विमोचन घलो करीन।
प्रधानमंत्री नरेंद्र मोदी ह ए महीना के बाईस तारीख के अयोध्या धाम म श्री रामलला के प्राण प्रतिष्ठा ले पहिली ग्यारा दिन के विशेष अनुष्ठान शुरू करीन हे। श्री मोदी ह अपन सोशल मीडिया पोस्ट म एक ऑडियो संदेश साझा करत कीहिन कि प्राण प्रतिष्ठा ले पहिली पूरा राष्ट्र श्रीराम भक्ति के अद्भुत माहौल म डूबे हे। ए क्षण ल ईश्वर के आशीर्वाद बतावत प्रधानमंत्री ह कहिन कि ओमन भाव-विभोर हवय। ओमन कहिन कि जीवन म पहिली घांव अइसन अनुभूति होवत हे। ओमन खुशी जतावत कीहिन कि अपन विशेष अनुष्ठान के शुरूआत नासिक धाम पंचवटी ले करत हे। जिहां श्रीराम ह अपन समय बिताय रीहिन।
केंद्रीय ग्रामीण विकास अउ पंचायती राजमंत्री गिरीराज सिंह काली ले छत्तीसगढ़ के तीन दिन के प्रवास म रीही। अपन प्रवास के पहिली दिन श्री सिंह काली रायपुर अउ कोरबा म ग्रामीण विकास, भूमि संसाधन अउ पंचायती राज अधिकारी मनके बइठका लीहीं। उंहे चौदा जनवरी के केंद्रीय मंत्री कोरबा म राखे गे स्वच्छता अभियान अउ आने आने जगा म आयोजित विकसित भारत संकल्प यात्रा कार्यक्रम म शामिल होहीं ।
अपन प्रवास के आखरी दिन श्री सिंह कोरबा के छुरीकला स्थ्ति एकलव्य आदर्श विद्यालय म राखे गे पीएम जन-मन योजना कार्यक्रम म शामिल होही। ए योजना के शुभारंभ प्रधानमंत्री नरेंद्र मोदी वीडियो कॉन्फ्रेसिंग के माध्यम ले करही।
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत सड़क सुरक्षा माह उपर यातायात पुलिस रायपुर के अतिरिक्त पुलिस अधीक्षक श्री सचिंद्र चौबे ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली तेरह जनवरी के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
प्रदेश म विकसित भारत संकल्प यात्रा के तहत आने आने जगा मन म शिविर लगाके केंद्र सरकार के योजना ले हितग्राही मन ल फायदा देवाय जात हे। इही कड़ी म सारंगढ़-बिलाईगढ़ जिला के बरभाठा, बोरिदा, बरदुला, तिलाईदादर, अउ दानसरा समेत आने आने गांव मन म शिविर के आयोजन करे गीस। ए शिविर मन म आयुष्मान महाअभियान के तहत साढ़े आठ हजार ले जादा लोगन मनके आयुष्मान कार्ड बनाये गीस।
ओति विकसित भारत संकल्प यात्रा के रथ राजनांदगांव जिला के ग्राम दर्री पहुंचीस जिहां मोबाइल वैन के माध्यम ले प्रधानमंत्री नरेंद्र मोदी के संदेश ल सुनाये गीस। उंहे मनखे मन विकसित भारत निर्माण बर सहभागिता निभाय के शपथ लीन। ए दौरान लोगन मन ल केंद्र सरकार के आने आने योजना के जानकारी देके संगेसंग पात्र हितग्राही मन ल लाभान्वित करे गीस।
छत्तीसगढ़ युवा प्रगतिशील किसान संघ डहार ले दुर्ग जिला के ग्राम खपरी म राष्ट्रीय कृषि मेला अउ संगोष्ठी के आयोजन करे गीस। ए मौका म मुख्यमंत्री विष्णुदेव साय ह श्री राम प्राण-प्रतिष्ठा कार्यक्रम बर किसान संघ डहार ले भेजे जात सागभाजी ले भरे दू ठिन ट्रक ल हरा झंडा दिखाके श्रीराम जन्मभूमि अयोध्या बर रवाना करीन। कार्यक्रम म मुख्यमंत्री ह कृषक प्रशिक्षक अउ प्रदेश के उन्नत अउ प्रगतिशील किसान मन ल सम्मानित करीन।
कांकेर जिला के पखांजूर म पाछू दिन होय भाजपा नेता असीम राय के गोली मारके करे गे हत्या के मामला म पुलिस ह कांग्रेसी नेता बप्पा गांगुली अउ पार्षद विकास पाल ल गिरप्तार करे हे। पुलिस के अनुसार ए दूनो भाजपा नेता के हत्या म शामिल रीहिन अउ एक युवक विकास मजूमदार ल हत्या बर सुपारी दे रीहिन। पुलिस ह बताइन कि घटना के बाद ले आरोपी शूटर विकास मजूमदार फरार हे, जेखर तलाश करे जात हे। उंहे मामला के जांच बर आईजी सुंदरराज पी. ह एसआईटी के गठन करे हे, जेमा अठारा अधिकारी मन ल शामिल करे गेहे।
मिले जानकारी के अनुसार भाजपा नेता असीम राय के अगवई म नगर पंचायत अध्यक्ष बप्पा गांगुली के खिलाफ अविश्वास प्रस्ताव लाये गे रीहिस। जेखर उपर पंद्रह जनवरी के मतदान होना रीहिस। फेर ओखर पहिली असीम राय के हत्या करवा दे गीस। बतादन कि मृतक असीम राय पखांजूर नगर पंचायत के पूर्व अध्यक्ष रीहिन।