संसद के बजट सत्र इकतीस जनवरी ले सुरू होही, जउन ह नौ फरवरी तक चलही। केन्द्रीय वित्त मंत्री निर्मला सीतारमण ह एक फरवरी के अंतरिम बजट पेस करही। सत्र के सुरूआत संसद के दूनों सदन म राष्ट्रपति द्रौपदी मुर्मू के अभिभाषण ले होही।
स्वच्छता सर्वेक्षण
राष्ट्रीय स्वच्छता सर्वेक्षण म छत्तीसगढ़ ल देस के सबले साफ-सुथरा राज्य म तीसरइया पुरस्कार मिले हे। ए स्वच्छता सर्वेक्षण म सहर ल खुला म सौचमुक्त बनाय के संगेसंग जल प्रबंधन अउ ठोस कचरा के प्रबंधन ल मुख्य घटक के रूप म ले गे रिहीस। केन्द्रीय आवास अउ सहरी कार्य मंत्रालय डहार ले राखे गे स्वच्छता सर्वेक्षण म छत्तीसगढ़ ल महाराष्ट्र अउ मध्यप्रदेस के बाद देस के तीसर सबले स्वच्छ राज्य के रूप म चुने गेहे। प्रदेस के ए उपलब्धि बर राष्ट्रपति द्रौपदी मुर्मू ह आज नई दिल्ली म राखे गे समारोह म छत्तीसगढ़ ल ए पुरस्कार दीन। मुख्यमंत्री विष्णुदेव साय अउ उप मुख्यमंत्री अरूण साव ह ए पुरस्कार लीन। स्वच्छता सर्वेक्षण म सुघ्घर प्रदर्सन करइया राज्य के पांच ठिन नगरीय निकाय – रईपुर, महासमुंद, कुम्हारी, आरंग अउ पाटन ल घलो स्वच्छ नगर के रूप म पुरस्कार दे गीस।
राज्यपाल-स्काउट गाईड
भारत स्काउट्-गाईड के छत्तीसगढ़ इकाई डहार ले रईपुर म राज्य स्तरीय अलंकरण समारोह के आयोजन करे गीस। राजभवन म राखे गे ए समारोह म राज्यपाल विश्वभूषण हरिचंदन ह प्रदेस के सुघ्घर स्काउट अउ गाईड कैडेट मनके संगेसंग रोवर अउ रेंजर मन ल पुरस्कार ले सम्मानित करीन। ए मउका म राज्यपाल ह स्काउट-गाईड के कैडेट मन ले किहीन कि ओमन देस अउ समाज के निर्माण म पूरा समर्पण के संग काम करय। ओमन किहीन कि प्रधानमंत्री डहार ले सुरू करे गे ‘‘युवा आवाज विकसित भारत‘‘ अभियान म स्काउट-गाईड कैडेट के अहम भूमिका हे।
समारोह ल स्कूल सिक्षा मंत्री अउ छत्तीसगढ़ स्काउट गाइड के अध्यक्ष बृजमोहन अग्रवाल अउ भारत स्काउट-गाईड के राष्ट्रीय उपाध्यक्ष सत्यनारायण शर्मा ह घलो संबोधित करीन।
रामलला प्राण-प्रतिष्ठा-कार्यक्रम
अयोध्या म बाईस जनवरी के होवइया श्री रामलला के प्राण-प्रतिष्ठा के दिन छत्तीसगढ़ के मंदिर मन म घलो बिसेस पूजापाठ अउ गंगा आरती के कारीकरम राखे जाही। ए बारे म संस्कृति मंत्री बृजमोहन अग्रवाल ह राजिम के राजीवलोचन मंदिर परिसर म उज्जैन अउ बनारस के तर्ज म बिसेस गलियारा बनाय के निरदेस दीन हे। एखर तहत सूरजपुर, चन्द्रपुर, डोंगरगढ़, रतनपुर अउ दंतेवाड़ा के शक्तिपीठ मन ल चारोंधाम के मंदिर असन सजाय जाही। उहें, प्रदेस के सबो सरकारी भवन मन म सुघ्घर ढंग बिजली के रोशनी ले सजाय जाही। संस्कृति मंत्री ह श्री रामलला दर्शन योजना के तहत प्रदेसवासी मन ल अयोध्या ले जाय बर अधिकारी मन ल पूरा कार्ययोजना बनाय बर किहीन।
स्कूल/कॉलेज-अवकाश
अयोध्या म श्री रामलला के प्राण-प्रतिष्ठा के मउका म बाईस जनवरी के प्रदेस के जम्मों स्कूल-कॉलेज मन म छुट्टी घोसित करे गेहे। स्कूल अउ उच्च शिक्षा मंत्री बृजमोहन अग्रवाल ह ए जानकारी देवत कहिन कि बाईस जनवरी ह पूरा दुनिया बर ऐतिहासिक दिन रइही।
पीएम जनमन शिविर
प्रधानमंत्री जन-मन योजना के तहत मुंगेली जिला के खुड़िया म राखे गे सिविर म उप मुख्यमंत्री अरूण साव ह बीस बैगा आदिवासी युवा मन ल अतिथि शिक्षक के नियुक्ति पत्र दीन। ओमन आने-आने योजना के हितग्राही मन चेक अउ सामान घलो बांटीन। ए मउका म ओमन किहीन कि आने-आने योजना के छूटे हितग्राही मन ल लाभ देवाय बर राज्य सरकार ह गांव अउ गरीब के घर तक पहुंचे के कोसिस करत हे।
उप मुख्यमंत्री ह विकसित भारत संकल्प यात्रा के तहत प्रचार वाहन म चलत प्रधानमंत्री के संदेस अउ चलचित्र के अवलोकन करीन। ए मउका म श्री साव ह सुदूर वन क्षेत्र के बैगा आदिवासी मन ल बढ़िया स्वास्थ्य सुविधा देवाय बर तीन ठिन एम्बुलेंस गाड़ी ल झंडा दिखाके रवाना करीन।
विधानसभा अध्यक्ष-समीक्षा
विधानसभा अध्यक्ष डॉक्टर रमन सिंह ह राजनांदगांव म अपन विधानसभा क्षेत्र के तहत अवइया विकास काम के समीक्षा करीन। जिला कलेक्टोरेट म होय ए बइठका म डॉक्टर सिंह ह राजनांदगांव जिला के सहरी अउ ग्रामीण क्षेत्र म पेयजल के समस्या ल दूरिहा करे बर कार्ययोजना बनाय बर किहीन। विधानसभा अध्यक्ष ह राजनांदगांव सहर म रईपुर जइसन नालांदा परिसर बनाय जाय के प्रस्ताव तैयार करे के निरदेस दीन। संगेसंग राजनांदगांव मेडिकल कॉलेज म आने-आने रोग के इलाज ले जुड़े उपकरण बर घलो प्रस्ताव बनाय बर किहीन।
बइठका म कलेक्टर संजय अग्रवाल ह बतईन कि अवइया वित्त बछर म राजनांदगांव ले रईपुर विमानतल तक एसी सिटी बस सेवा सुरू करे के प्रस्ताव हे। एखर संगेसंग युवती अउ माईलोगिन मनके आर्थिक मजबूती बर प्रसिक्षण केन्द्र घलो सुरू करे जाही।
विजय शर्मा-समीक्षा
प्रदेस म स्व-सहायता समूह ले जुड़े माईलोगिन मन ल स्व-रोजगार ले जोड़े बर राष्ट्रीय ग्रामीण आजीविका मिशन के तहत बिसेस अभियान चलाय जाही। उप मुख्यमंत्री अउ पंचायत अउ ग्रामीण विकास मंत्री विजय शर्मा ह ए बारे म अधिकारी मन ल जरूरी निरदेस दीन। विभागीय समीक्षा बइठका म ओमन प्रधानमंत्री जन-मन योजना के तहत बिसेस पिछड़ी जनजाति बर मंजूर होय मकान बनाय के काम ल समय-सीमा के भीतर पूरा कराय उपर जोर दीन। उप मुख्यमंत्री ह किहीन कि ग्रामीण क्षेत्र म स्व-सहायता समूह के माईलोगिन मन ल स्थानीय स्तर म स्वरोजगार के नवा-नवा उद्यम के जानकारी दे जाय।
विकसित भारत संकल्प यात्रा
प्रदेस के कतकोन जघा म विकसित भारत संकल्प यात्रा सिविर के आयोजन करे जात हे। इही कड़ी म कोंडागांव जिला के ठाकुरपारा, अड़ेगा, झाकरी अउ गोहड़ा समेत बारह ग्राम पंचायत म संकल्प यात्रा सिविर म गांव वाले मन ल आने-आने योजना के जानकारी दे गीस। ए मउका म जिला के कृषि अधिकारी मन डहार ले ड्रोन के माध्यम ले खेत म नैनो यूरिया के छिड़ाकाव के प्रदर्सन घलो करे गीस।
उहें, बिलासपुर जिला के पचपेड़ी, धूर्वाकारी, सरगंवा अउ मुड़पार-खो म संकल्प यात्रा के तहत सिविर लगाय गीस। ए मउका म हितग्राही मन ल केन्द्र के आने-आने योजना के फायदा देवाय गीस।
ओति, बलरामपुर-रामानुजगंज जिला के बलंगी अउ जोगियानी गांव म राखे गे संकल्प सिविर म क्षेत्रीय विधायक शकुंतला पोर्तें सामिल होइन। ओमन गांव वाले मन ले केन्द्र सरकार के योजना के जादा ले जादा संख्या म लाभ लेके अपील करीन।
ऐति, राजनांदगांव जिला के पनेका गांव म संकल्प यात्रा सिविर म गांव वाले मन ह विकसित भारत निर्माण के सपथ लीन। ए मउका म जिला के खुला म सौचमुक्त घोसित गांव मन ल ओडीएफ प्लस होय म अभिनंदन पत्र दे गीस।
सचिन पायलट-रायपुर
प्रदेस कांग्रेस प्रभारी सचिन पायलट ह किहीन हे कि कांग्रेस के पूर्व राष्ट्रीय अध्यक्ष राहुल गांधी डहार ले मणिपुर ले सुरू करइया ‘‘भारत जोड़ो न्याय यात्रा‘‘ म प्रदेस कांग्रेस के बड़का नेता अउ पदाधिकारी मन घलो सामिल होही। ओमन किहीन कि ए यात्रा देस के वंचित समुदाय ल उंखर अधिकार के न्याय देवाय बर सुरू करे जावत हे। ओमन बतईन कि ए यात्रा पांच ले छह दिन छत्तीसगढ़ के आने-आने स्थान ले गुजरही। ए दउरान प्रदेस के प्रमुख मुद्दा मन ल जनता तक पहुंचाय के कोसिस करे जाही।
एखर पहिली, ओमन रईपुर के राजीव भवन म पार्टी पदाधिकारी के बइठका घलो लीन। बइठका म नेता प्रतिपक्ष डॉक्टर चरणदास महंत अउ प्रदेस कांग्रेस अध्यक्ष दीपक बैज समेत आने-आने बड़का नेता मन मौजूद रिहीन।
सड़क सुरक्षा माह
अवइया पन्द्रह जनवरी ले प्रदेस म सड़क सुरक्षा माह के आयोजन करे जाही। ए दउरान लोगन मन ल सड़क सुरक्षा के गंभीरता अउ चुनौती के बारे म जागरूक करे जाही। सड़क सुरक्षा माह के दउरान लोगन मन ल यातायात नियम के जानकारी दे बर प्रदेस के जम्मों जिला म प्रसिक्षण सिविर, कार्यशाला, सेमिनार अउ नेत्र जांच सिविर समेत आने-आने कारीकरम राखे जाही। उहें, पढ़ईया लइका मन ल यातायात नियम के प्रति जागरूक करे बर नारा-लेखन, निबंध, चित्रकला अउ प्रश्नोत्तरी जइसन कारीकरम घलो होही। गांव मन म लोगन मन ल ट्रैफिक नियम के जानकारी दे बर सुरक्षा मितान मनके माध्यम ले ग्राम चौपाल के आयोजन करे जाही।
अब अब पेस हे मौसम के हाल….
प्रदेस म एक घांव फेर जाड़ बाढ़ही। मौसम विभाग के मुताबिक प्रदेस म आज ले उत्तरी हवा चलत हे। एखर सेती न्यूनतम तापमान म तीन ले चार डिग्री सेल्सियस के कमी आय के आसार हवय। उहें, अधिकतम तापमान म घलो एक ले दू डिग्री सेल्सियस के गिरावट हो सकत हे।