मुख्यमंत्री विष्णुदेव साय ह आज सूरजपुर जिला के जमदेई गांव म राखे गे अखिल भारतीय बिंझिया समाज के महा-सम्मेलन म सामिल होइन। ए दउरान ओमन ह सत्ताईस करोड़ बहत्तर लाख रूपिया के आने-आने विकास काम के लोकार्पण करीन। संगेसंग हितग्राही मन ल राहत सामग्री घलो बांटीन। ए मउका म विधानसभा अध्यक्ष डॉक्टर रमन सिंह घलो मौजूद रिहीन।
प्रधानमंत्री पोषण शक्ति निर्माण योजना
प्रधानमंत्री पोषण शक्ति निर्माण-मध्यान्ह भोजन योजना म चालू वित्तीय बछर बर प्रदेस के सबो जिला ल छिहत्तर करोड़ रूपिया ले जादा के रासि तृतीय किश्त सिंगल नोडल एजेंसी के खाता म दे गे हवय। लोक शिक्षण संचालनालय डहार ले जारी तीसरा किश्त म मटेरियल कास्ट/रसोईया मानदेय अउ एम.एम.ई. प्रबंधन के रासि सामिल हे। आवंटित रासि के खरचा पी.एफ.एम.एस. पोर्टल ले करे जाही। रासि खरचा होय के बाद ही अवइया किश्त के रासि दे जाही।
स्वास्थ्य मंत्री-अंबिकापुर
स्वास्थ्य मंत्री श्यामबिहारी जायसवाल ह सरगुजा दउरा म जिला चिकित्सालय अउ मेडिकल कॉलेज के दउरा करके उहां मरीज मन ल मिलइया स्वास्थ्य सेवा के जायजा लीन। ए दउरान ओमन ह ओपीडी पंजीयन काउंटर, आईसीयू, ट्रॉमा सेंटर संघरा आने-आने विभाग के घलो निरीक्षण करीन। श्री जायसवाल ह मेडिकल कॉलेज के विद्यार्थी मन ले भेंट करीन अउ उंखर पढ़ई के बिसय म गोठबात करीन।
स्वास्थ्य मंत्री ह उहां प्रबंधन के बइठका घलोक लीन अउ अधिकारी मन ल अस्पताल म साफ-सफाई, सौचालय म जरूरी सुधार, पानी के बेवस्था के संगेसंग गैर जरूरी सामान ल अस्पताल परिसर ले हटाय के निरदेस दीन। ओमन ह ड्रोन के माध्यम ले दवई के आपूर्ति के पायलट प्रोजेक्ट बर सरगुजा के चयन म प्रधानमंत्री नरेन्द्र मोदी के आभार व्यक्त करीन। ओमन ह डॉक्टर अउ नर्स मन ले किहीन कि अस्पताल अवइया मरीज मन ले बने व्यवहार रखे जाय। श्री जायसवाल ह किहीन कि आपात ड्यूटी म काम करइया डॉक्टर अउ नर्स मन ह अपन जिम्मेदारी ल बने ढंग ले निभावय, जेखर ले मरीज मन ल कोनों प्रकार के असुविधा झन होवय।
बइठका म मेडिकल कॉलेज के डीन डॉक्टर रमणेश मूर्ति ह जिला म मिलत चिकित्सा सुविधा, संसाधन के उपलब्धता, कोविड प्रबंधन के तैयारी अउ मानव संसाधन के जानकारी दीन।
विकसित भारत संकल्प यात्रा
केन्द्र सरकार के आने-आने विकास अउ कल्याणकारी योजना के लाभ आम लोगन तक पहुंचाय बर प्रदेस म विकसित भारत संकल्प यात्रा के आयोजन करे जावत हे। एमा रायगढ़ के कृषि महाविद्यालय म आइडियाज फ्राम यूथ फॉर विकसित भारत दो हजार सैंतालीस के बिसय म दू दिवसीय सेमिनार के आयोजन करे गीस। एमा महाविद्यालय के विद्यार्थी मन संघरा सिक्षक अउ कर्मचारी मन ह घलो विकसित भारत के निर्माण म अपन सहभागिता निभाय के सपथ लीन। कार्यक्रम म मुख्य वक्ता डॉक्टर गंगाराम राठिया ह मृदा स्वास्थ्य के कृषि म उपयोगिता के माध्यम उपर चर्चा करीन। ए दउरान विद्यार्थी मन ह रंगोली, वाद-विवाद, भासन, क्विज अउ निबंध प्रतियोगिता म भाग लीन।
उहें, रईपुर जिला के ग्राम पंचायत सलौनी म विकसित भारत संकल्प यात्रा के तहत राखे गे सिविर म विधायक इन्द्रकुमार साहू सामिल होइन। सिविर म कृषि, स्वास्थ्य, पशु चिकित्सा, श्रम, महिला अउ बाल विकास विभाग संघरा आने-आने विभाग के स्टॉल लगाय गीस। सिविर म प्रधानमंत्री विश्वकर्मा योजना, उज्जवला योजना, आवास योजना, गरीब कल्याण अन्न योजना, मातृत्व वंदन योजना, किसान सम्मान निधि अउ आयुष्मान कार्ड संघरा दूसर योजना के जानकारी ग्रामीण मन ल दे गीस।
अइसने, जांजगीर-चांपा जिला के गुड़रूकला अउ गुंजिया बोड़ गांव म राखे गे सिविर म किसान मन ल ड्रोन स्पेयर के माध्यम ले नैनो यूरिया के छिड़काव करे के तकनीक बताय गीस। वरिष्ठ कृषि विकास अधिकारी मन डहार ले किसान मन ल नैनो यूरिया के उपयोग अउ ओखर ले होवइया फायदा के जानकारी दे गीस।
राउंड टेबल कॉन्फ्रेंस
राष्ट्रीय सांख्यिकी कार्यालय के क्षेत्रीय कार्यालय रईपुर डहार ले आज राजधानी के सिविल लाइन्स के सर्किट हाउस म राउंट टेबल कॉन्फ्रेंस के आयोजन करे गीस। कार्यक्रम के अध्यक्षता राष्ट्रीय सांख्यिकी कार्यालय के उप महानिदेशक रोशन लाल साहू ह करीन। ए मउका म श्री साहू ह किहीन कि सांख्यिकी संग्रहण अधिनियम दू हजार आठ अउ ओखर अंतर्गत बनाय गे नियम दू हजार ग्यारह के अनुसार राष्ट्रीय सांख्यिकी डहार ले हर बछर वार्षिक उद्योग सर्वेक्षण चलाय जाथे। एमा औद्योगिक इकाई के संदर्भ अवधि म पूंजी, टर्नओव्हर, मूल्यवर्धन, ईधन अउ कच्चा माल के संग इनपुट-आउटपुट ले जुड़े जरूरी आंकड़ा इकठ्ठा करे जाथे। एखर अलावा रोजगार, कार्य दिवस के संख्या अउ सामाजिक सुरक्षा, लाभ ले जुड़े आंकड़ा घलो सकेले जाथे। ओमन बईन कि प्राप्त आंकड़ा के उपयोग राष्ट्रीय आय के अनुमान अउ सकल घरेलू उत्पाद के आंकलन बर करे जाथे। श्री साहू हा कॉन्फ्रेंस म मौजूद औद्योगिक इकाई के प्रतिनिधि मन ले सबो जानकारी ल भरके वेबपोर्टल म डारे के आह्वान करीन।
बसवराजू एस.-मुख्यमंत्री सचिव
भारतीय प्रशासनिक सेवा के अधिकारी बसवराजू एस. ल मुख्यमंत्री विष्णुदेव साय के सचिव नियुक्त करे गेहे। बसवराजू ल खाद्य, नागरिक आपूर्ति अउ उपभोक्ता संरक्षण विभाग तथा नगरीय प्रशासन अउ विकास विभाग के अतिरिक्त प्रभार घलो सौंपे गे हवय। ओमन ह दू हजार सात बैच के अधिकारी हे। ओमन ल बछर दू हजार अट्ठारह म रईपुर जिला के कलेक्टर बनाय गे रिहीस।
अवइया चौबीस घंटा के दउरान कबीरधाम अउ ओखर ले लगे जिला म एक-दू जघा म हल्का बरसा होय के संभावना हे। मौसम विभाग के अनुसार एक ठन चक्रीय चक्रवाती घेरा हरियाणा अउ ओखर तीर-तखार म बने हे। एखर असर ले प्रदेस के कुछेक जघा म बरसा हो सकत हे। मौसम विभाग के परन दिन ग्यारह जनवरी ले प्रदेस के न्यूनतम तापमान म तेजी ले गिरावट होय के संभावना जताय हे।
अउ अब थोरकुन समाचार सार म –
– राजधानी रईपुर म काली राज्य मंत्रिमंडल के बइठका होही, जेमा कतकोन बड़े फैसला होय के संभावना हे।
– जांजगीर-चांपा जिला के खरौद के स्कूल म स्वामी विवेकानंद जयंती के मउका म बारह जनवरी के वरिष्ठ पत्रकार कुंजबिहारी साहू के सुरता म ‘‘प्रतिभा सम्मान समारोह‘‘ के आयोजन करे जाही।
– रायगढ़ जिला के छातामुड़ा चउक तीर होय सड़क दुर्घटना म फटफटी म बइठे एक झिन युवक के मउत होगे अउ एक झिन दूसर युवक घायल होगे।
– दुरूग जिला म नंदिनी रद्दा तीर आज बिहनिया एक ठन ट्रेलर ह सड़क ले लगे बाउंड्री वॉल ले टकरा गीस। ए हादसा म चालक के मउकाच म मउत होगे।
– इही जिला के आने-आने थाना क्षेत्र म गांजा तस्करी के मामला म पुलिस ह आठ झन आरोपी मन ल गिरफ्तार करे हे। उंखर मन तीर ले उन्नीस किलोग्राम गांजा अउ गांजा के पौधा जब्त करे गेहे। जब्त गांजा के कीमत करीब अठहत्तर हजार रूपिया बताय गे हवय।
– दुरूग जिला के सुपेला पुलिस ह नसीला टेबलेट बेचे के आरोप म एक झिन मनखे ल गिरफ्तार करे हे। पुलिस के अनुसार आरोपी ह गाड़ीच म नसीला दवई बेचत रिहीस।