रईपुर स्थित भाजपा मुख्यालय म अनुसूचित जनजाति मोर्चा के प्रदेस कार्य समिति के बइठका होइस। जेमा मुख्यमंत्री विष्णुदेव साय ह किहीन कि जउन जघा म भाजपा ह विजय नइ पाय हे। उहां, घलो लोकसभा के सीट जीतना हवय। उहें, मोर्चा के अध्यक्ष महेश गागड़ा ह किहीन कि आदिवासी मनके सच्चा हितैसी भाजपा हरय अउ हमन ल बूथ स्तर म भाजपा ल मजबूत बनाना हे। भाजपा के प्रदेस अध्यक्ष किरण सिंह देव ह किहीन कि कांग्रेस मुक्त छत्तीसगढ़ बनाय बर लोगन तक पहुंचना हे।
मुख्यमंत्री-सम्मेलन
मुख्यमंत्री विष्णुदेव साय आज राजधानी रईपुर म सतनामी समाज के युवक-युवती परिचय सम्मेलन म सामिल होइन। सतनामी उत्थान अउ जागृति समिति डहार ले राखे गे ए कारीकरम म बोलत मुख्यमंत्री ह किहीन कि बिहाव के लइक उमर वाले जवान नोनी-बाबू मनके सामाजिक परिचय सम्मेलन ह समाज बर प्रेरणादायक हे। उहें, अइसन आयोजन ले समय अउ धन दूनों के बचत होथे।
सम्मेलन म सतनामी समाज के गुरू बालदास साहब ह अपन बेटा के बिहाव कराके समाज बर एक ठिन आदर्स प्रस्तुत करीन हे। ए कारीकरम म विधायक गुरू खुशवंत साहब पूर्व सांसद भूषणलाल जांगड़े अउ गोविंद राम मिरी समेत समाज के गणमान्य नागरिक उपस्थित रिहीन।
पॉवर लिफ्टिंग-स्वर्ण
फेडरेसन कप राष्ट्रीय पॉवर लिफ्टिंग प्रतियोगिता म छत्तीसगढ़ के चार झिन खिलाड़ी मन मेडल जीतके कीर्तिमान बनाय हे। ए खिलाड़ी मनके चयन हांगकांग म मई महिना म होवईया एसियन पॉवर लिफ्टिंग प्रतियोगिता बर करे गेहे। ए खिलाड़ी मन एक ठिन गोल्ड, दू ठिन सिल्वर अउ सात ठिन ब्रांज मेडल जीते हवय। सत्ताईस ले उनतीस दिसंबर तक इंदौर म राष्ट्रीय पॉवर लिफ्टिंग प्रतियोगिता राखेगे रिहीस।
बृजमोहन अग्रवाल-कबड्डी प्रतियोगिता
शिक्षा मंत्री बृजमोहन अग्रवाल महासमुंद जिला के बागबाहरा म राखेगे अखिल भारतीय कबड्डी प्रतियोगिता म सामिल होइन। ए दउरान ओमन खिलाड़ी मनके हौसला घलो बढ़ाईन। श्री अग्रवाल ह किहीन कि छत्तीसगढ़ ल खेल म राष्ट्रीय अउ अंतर्राष्ट्रीय स्तर म चिन्हारी देवाय के हर संभव परयास करे जाही। एखर बर जरूरी ट्रेनिंग अउ अधोसंरचना के बेवस्था करे जाही। ए मउका म श्री अग्रवाल ह माता खल्लारी मेला आयोजित करे बर हर बछर दस लाख रूपिया रासि देके घलो घोसना करीन।
विकसित भारत संकल्प यात्रा
केंद्र सरकार के कई ठिन कल्याणकारी योजना केे लाभ लोगन मन तक पहुंचाय बर प्रदेस म विकसित भारत संकल्प यात्रा निकाले जात हे। एखर चलत रईपुर नगर-निगम के कई ठिन जोन म संकल्प सिविर लगाय जात हे। जिहां बड़ भारी संख्या म हितग्राही मन पहुंचत हे। ओमन प्रधानमंत्री उज्ज्वला योजना, आयुष्मान योजना, स्वनिधि अउ विश्वकर्मा योजना के संगे अब्बड़ अकन योजना बारे म जानबा लेवत हे। एखर मन तीर ले मउका म उपस्थित कर्मचारी मन आवेदन घलो लेवत हे। जेखर ले एमन ल योजना के तुरते लाभ मिल सकत हे।
उहें, सरगुजा जिला के छिंदकालो अउ नवापारा खुर्द म विकसित भारत संकल्प यात्रा के चलत राखेगे सिविर म सीतापुर विधायक, रामकुमार टोप्पो सामिल होइन। ओमन लोगन मन ल स्वच्छता के सपथ देवाइन। संकल्प यात्रा सरगुजा जिला के दस ठिन ले जादा ग्राम पंचायत म पहुंचिस, जिहां कलेक्टर विलास भोसकर संदीपन लोगन मन ल योजना मनके लाभ लेबर किहीन।
इही, तरह राजनांदगांव जिला म विकसित भारत संकल्प यात्रा के मोबाइल वैन डोंगरगांव के केसला पहुंचिस। जिहंा, कलेक्टर संजय अग्रवाल सिविर म सामिल होइन। ओमन किहीन कि ग्रामवासी मन जादा ले जादा आयुष्मान कार्ड बनवा के स्वास्थ्य योजना के लाभ लेवय। इही, तरह प्रधामंत्री किसान सम्मान निधि, किसान क्रेडिट कार्ड योजना के फायदा लेबर घलो किहीन।
उहें, संकल्प यात्रा ह राजनांदगांव नगर-निगम सीमा क्षेत्र म तेरा ले सोला जनवरी तक कई ठिन वार्ड म निकलही। एखर ले केंद्र सरकार के योजना मनके प्रचार-प्रसार करे जाही।
उप मुख्यमंत्री-घायल मुलाकात
उप मुख्यमंत्री अउ गृह मंत्री विजय शर्मा काली रईपुर के एक ठिन निजी अस्पताल पहुंचके, नारायणपुर अंतागढ़ क्षेत्र म होय बस दुर्घटना म घायल जवान मन ले मुलाकात करीन। ए दउरान श्री शर्मा ह जवान मन ले उंखर हाल-चाल जान के डॉक्टर मन ल उंखर मनके उचित ईलाज करे बर किहीन। ए जवान मन ल बने ईलाज खातिर नारायणपुर ले रईपुर हेलीकाप्टर म लाय गेहे।
प्रधानमंत्री किसान सम्मान निधि
प्रदेस के किसान मन ल प्रधानमंत्री सम्मान निधि योजना के लाभ देवाय बर बिसेस अभियान चलाय जात हे। बीते छै दिसंबर ले सुरू होय ए बिसेस अभियान पंद्रह जनवरी तक चलही। एखर चलत योजना के व्यापक प्रचार-प्रसार के संगे पात्र किसान मनके चिन्हारी बिसेस ग्रामसभा के माध्यम ले करे जात हे। उहें, पीएम किसान मोबाइल ऐप के मदद ले किसान मनके सत्यापन ई-केवाईसी, लैण्ड रिकार्ड सीडिंग अउ बैंक डिटेल के सत्यापन करके पोर्टल म दर्ज करे जात हे।
एक राष्ट्र, एक चुनाव
एक राष्ट्र, एक चुनाव ए बिसय म पूर्व राष्ट्रपति रामनाथ कोविंद के पगरइती म बनाय गे समिति ह लोगन मन ले सुझाव मांगे हे। देस म ए संग चुनाव कराय बर वर्तमान कानूनी प्रसासनिक ढांचा म सुधार खातिर पंद्रह जनवरी तक ले सुझाव पठोय जा सकत हे। पाछू बछर सितंबर म बने ए समिति के दू ठिन बइठका होय हवय। समिति ह ए बिसय उपर विचार विमर्स बर हाले म सात ठिन राष्ट्रीय दल तैंतीस ठिन क्षेत्रीय दल अउ सात ठिन गैर-मान्यता पाय दल मन ल चिट्ठी घलो लिखे रिहीस।
सड़क सुरक्षा माह
प्रदेस म पंद्रह जनवरी ले पंद्रह फरवरी तक सड़क सुरक्षा माह मनाय जाही। ए दउरान स्कूल अउ आने संस्थान मन म सड़क सुरक्षा बारे म जन-जागरूकता बर कई ठिन कारीकरम राखे जाही। मुख्य सचिव अमिताभ जैन के पगरइती म काली राज्य सड़क सुरक्षा परिसद के बइठका होइस। जेमा, रोड एक्सीडेंट ल रोके के उपाय बारे म मुख्य सचिव ह जरूरी निरदेस दीन। बइठका म सचिव परिवहन एस. प्रकाश समेत विभागीय अधिकारी मौजूद रिहीन।
दुर्घटना
रायगढ़ जिला म होय दू ठिन आने-आने रोड एक्सीडेंट म चार झिन मनखे के मउत होगे। उहें, तीन झिन आने मनखे घायल होगे हवय।
मिले जानकारी मुताबिक जुटमिल थाना जघा के मिड़मिड़ा गांव तीर दू ठिन फरफटी के आमने-सामने टक्कर होय ले ए हादसा म एक झिन नोनी पिला समेत तीन झिन मनखे मउत होगे। उहें, मृतक के पत्नी समेत तीन झिन मनखे के हालत गंभीर बने हवय। इही, जिला के चक्रधर नगर म होय एक ठिन आने एक्सीडेंट म ऑटो रिक्सा के पल्टी खाय ले ओमा बइठे सवारी के मउत होगे।
मुख्यमंत्री विष्णुदेव साय अउ वित्तमंत्री ओ.पी. चौधरी ह मउत होय चार झन मनखे के मउत होय उपर अपन गहरा दुख जताइन हे। उहें, मृतक मनके परिवार वाले मन बर अपन संवेदना प्रकट करीन हे। संगे लोगन मन ले ट्रैफिक नियम ल पालन करे बर घलो किहीन हे।
ओति, कोरबा जिला के गांव लामपहाड़ तीर एक ठिन तेज रफ्तार गाड़ी ह फरफटी सवार दू झिन नाबालिक ल अपन चपेट म ले लीस। जेमा ले एक झिन के मउत होगे हे। उहें, दूसर नाबालिक घायल हे। इही, जिला के सिविल लाइन थाना क्षेत्र के इंडस्ट्रियल एरिया के केमिकल फैक्ट्री म ऊचाई ले गिर ले एक झिन कमिया के मउत होगे हे।