भारतीय अंतरिक्ष अनुसंधाान संगठन-इसरो ह आज सफलतापूर्वक आदित्य एल-वन उपग्रह ल अंतिम कक्ष म स्थापित कर देहे। प्रधानमंत्री नरेंद्र मोदी ह भारत के पहलइया सौर उपग्रह आदित्य एल-वन के अपन निर्धारित लक्ष्य म पहुंचे बर बधाई दीन। श्री मोदी ह एक ठन सोशल मीडिया पोस्ट म किहीन कि ए ह वैज्ञानिक मनके अथक समर्पण के प्रतीक आय।
उहें, छत्तीसगढ़ के राज्यपाल विश्वभूषण हरिचंदन ह घलो आदित्य एल-वन के अपन कक्षा म पहुंचे बर वैज्ञानिक अउ देसवासी मन ल बधाई दीन।
मतदाता सूची-प्रकाशन
अवईया लोकसभा चुनाव ल देखत हुए मतदाता सूची म नाम जोड़े-हटाए स्थानांतरण अउ सुधार बर आज प्रदेस के जम्मों मतदान केंद्र मन म मतदाता सूची के प्रारंभिक प्रकासन कर दे गेहे। आम नागरिक अवईया बाईस जनवरी तक दावा आपत्ति प्रस्तुत कर सकथे। एक जनवरी दू हजार चौबीस के अट्ठारा बछर के आयु पूरा करईया युवा मतदाता सूची म नाम जोड़वाय बर प्रारूप छै म आवेदन कर सकही। ए दउरान तेरह अउ चौदह जनवरी के सबो मतदान केंद्र मन म बिसेस सिविर के आयोजन घलो करे जाही। भारत निर्वाचन आयोग डहार ले जारी बिसेस संक्षिप्त पुनरीक्षण कारीकरम के अनुसार मिले दावा आपत्ति मनके निराकरण कर आठ फरवरी के मतदाता सूची के अंतिम प्रकासन करे जाही।
राज्य के मुख्य निर्वाचन पदाधिकारी रीना बाबासाहेब कंगाले ह सबो मान्यता प्राप्त राजनीतिक दल मन के बइठका लेके पुनरीक्षण कारीकरम के संबंध म अवगत कराइन। ओमन बताइन कि मृत या स्थाई रूप ले स्थानांतरित मतदाता मनके नाम विलोपन बर प्रारूप सात म आवेदन प्राप्त करे जाही। उहें, ऋुटिपूर्ण नाम मनके सुधार या संशोधन बर प्रारूप आठ म आवेदन ले जाही। एक जनवरी, के अलावा एक अप्रैल, एक जुलाई अउ एक अक्टूबर दू हजार चौबीस के स्थिति म घलो अट्ठारा बछर के आयु पूरा करइया युवा मतदाता सूची म नाम जोड़वाय बर अग्रिम आवेदन कर सकही।
आवेदन बर आम नागरिक अपन मतदान केंद्र म बूथ लेवल अधिकारी के माध्यम ले निर्धारित फार्म प्राप्त कर सकत हे। उहें, वोटर हेल्पलाइन एैप के माध्यम ले घलो ऑनलाइन आवेदन करे के सुविधा प्रदान करे गेहे। एखर अलावा मतदाता अपन नाम जोड़े या संशोधन बर निर्वाचन आयोग के वेबसाइट के माध्यम ले घलो आवेदन कर सकत हे।
मुख्यमंत्री/मुख्य न्यायाधीश-बैठक
मुख्यमंत्री विष्णुदेव साय, छत्तीसगढ़ उच्च न्यायालय के मुख्य न्यायाधीश रमेश सिन्हा अउ उप मुख्यमंत्री अरूण साव के अधिकारीक बइठका आज नवा रायपुर म होइस। बइठका म उच्च अउ जिला न्यायालय के अधोसंरचना विकास अउ कर्मचारी मनके आने-आने पद के सृजन अउ भर्ती के स्वीकृती ले संबंधित प्रस्ताव मन उपर गोठबात करे गीस। ए दउरान मुख्यमंत्री ह अधिकांश प्रस्ताव मन उपर सकारात्मक रूप ले बिचार करे आश्वासन दीन।
मुख्यमंत्री सचिव-बैठक
मुख्यमंत्री के सचिव पी. दयानंद ह छत्तीसगढ़ स्टेट पॉवर कंपनी के अध्यक्ष के पदभार ग्रहण कर लेहे। पदभार संभाले के बाद श्री दयानंद ह पॉवर कंपनी के उच्च अधिकारी मनके बइठका लेके प्रदेस म विद्युत उत्पादन, ट्रांसमिसन अउ वितरण के स्थिति के जानकारी लीन। ओमन प्रदेस म बिजली के भविष्य म आवश्यकता ले देखत हुए विस्तृत कार्ययोजना बनाय के निरदेस दीन। ओमन सौर ऊर्जा अउ पानी ले विद्युत उत्पादन संबंधित प्रस्ताव घलो तइयार करे बर किहीन।
बइठका म विद्युत वितरण कंपनी के प्रबंध निदेशक मनोज खरे ह बतइन कि प्रदेस म बासठ लाख उपभोक्ता मन ल चौबीस घंटा निर्बाध बिजली आपूर्ति करे जात हे।
प्रधानमंत्री पोषण शक्ति निर्माण योजना
प्रधानमंत्री पोषण सक्ति निर्माण-मध्यान्ह भोजन योजना के तहत, चालू वित्तीय बछर बर, छिहत्तर करोड़ रूपिया ले जादा के रासि तीसरा किस्त सिंगल नोडल एजेंसी के खाता म आबंटित कर दे गेहे। लोकशिक्षण संचालनालय डहार ले प्रदेस के सबो जिला मन ल जारी तीसरईया किस्त म मटेरियल कास्ट, रसोईया मानदेय अउ एम.एम.ई. प्रबंधन के रासि सामिल हे। आबंटित रासि के व्यय पी.एफ.एम.एस. पोर्टल ले करे जाही। रासि खर्च होय के बाद ही अगला किस्त के रासि प्रदान करे जाही।
महादेव सट्टा ऐप-पूरक चालान
प्रवर्तन निदेसालय-ईडी ह महादेव ऑनलाइन सट्टा ऐप मामला म रायपुर के बिसेस न्यायालय म पूरक चालान पेस करे हे। एमा ईडी ह पांच झन ल आरोपी बनाय हे। ए पूरक चालान म प्रदेस के पूर्व मुख्यमंत्री भूपेश बघेल के नाम के घलो जिक्र हे।
सूत्र मन के मुताबिक ईडी ह महादेव ऑनलाइन सट्टा ऐप मामला म बिसेस न्यायालय म पेस करे गे पूरक चालान म, जेन पांच झन आरोपी बनाय गे हे, ओमा शुभम सोनी, अमित कुमार अग्रवाल, रोहित गुलाटी, भीमसिंह अउ असीम दास सामिल हे। बताय गेहे कि ईडी ह ए पूरक चालान पांच करोड़ उनतालीस लाख रूपिया के संग पकड़े गे असीम दास के बयान अउ ओखर बाद होय जांच के आधार म पेस करे हे।
विकसित भारत संकल्प यात्रा
केंद्र सरकार के आने-आने विकास अउ कल्याणकारी योजना मनके लाभ आम लोगन तक पहुंचाय बर प्रदेस म ‘‘विकसित भारत संकल्प यात्रा‘‘ निकाले जात हे। एखर तहत केंद्रीय स्वास्थ्य मंत्रालय के संयुक्त सचिव डॉक्टर मनस्वी कुमार ह जांजगीर-चांपा जिला के ग्राम पंचायत अकलतरी अउ केरा म आयोजित संकल्प सिविर म सामिल होइन। ए दउरान ओमन हितग्राही मन ले मिलके योजना मनके क्रियान्वयन के जानकारी लीन।
उहें, नारायणपुर जिला के ग्राम दुग्गाबेंगाल म ‘‘विकसित भारत संकल्प यात्रा‘‘ पहुंचिस। ए दउरान मेरी कहानी-मेरी जुबानी के तहत आयुष्मान भारत, प्रधानमंत्री किसान सम्मान निधि, किसान क्रेडिट कार्ड अउ मिसन इंद्रधनुष के लाभार्थी मन ह अपन अनुभव साझा करीन। कारीकरम म आने-आने विभाग के स्टॉल लगाके योजना मनके जानकारी दे गीस, अउ लोगन मन ले आवेदन ले गीस।
अइसने, ‘‘विकसित भारत संकल्प यात्रा‘‘ के दउरान लगाय गे, सिविर मन म हितग्राही मन अपन खुसी ल बयां करीन। धमतरी जिला के ग्राम पंचायत कांटाकुर्रीडीह म आयोजित सिविर म पहुंचइयां, जरहाखार गांव के फुलेश्वरी देवदास ह बताइन कि प्रधानमंत्री आवास योजना के तहत पक्का मकान बने ले उंखर घर बनाय के सपना पूरा होगे हे। एखर बर ओमन प्रधानमंत्री नरेंद्र मोदी ल आभार व्यक्त करत हुए किहीन कि अब उंखर परिवार पक्का मकान म राहत हे।
जिले की चिट्ठी
प्रादेसिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म ‘‘बालोद‘‘ जिला के गतिविधि के बारे म जानकारी दे जाही।
हल्बी/गोण्डी-समाचार बुलेटिन
काली ईतवार के ‘‘हल्बी अउ गोण्डी‘‘ म समाचार बुलेटिन प्रसारित करे जाही। ए दूनों बुलेटिन ल आकाशवाणी केंद्र जगदलपुर ले प्रसारित करे जाही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे ले प्रसारित करे जाही।
राष्ट्रीय सब जूनियर प्रतियोगिता
रायपुर के साईंस कॉलेज मैदान म छत्तीसगढ़ प्रदेस आर्चरी एसोसिएशन डहार ले चालीसवां एनटीपीसी राष्ट्रीय सब जूनियर प्रतियोगिता आयोजित करे जात हे। शिक्षामंत्री बृजमोहन अग्रवाल ह ए प्रतियोगिता के उद्घाटन करीन। ए अवसर म ओमन किहीन कि राज्य म खेल मन ल बढ़ावा देबर सरकार प्रतिबध्द हे। श्री अग्रवाल ह किहीन हे कि खिलाड़ी मन के प्रशिक्षण अउ सुविधा मनके बिसेस ध्यान रखे जाही। ए प्रतियोगिता म छत्तीसगढ़ समेत देस के अलग-अलग राज्य ले लगभग एक हजार खिलाड़ी मन भाग लेवत हे।