छत्तीसगढ़ के छठवां विधानसभा के दूसर सत्र अवईया पांच फरवरी ले सुरू होही जउन एक मार्च तक चलही। ए दउरान बीस बइठका होही अउ सत्र के सुरूआत राज्यपाल के अभिभाषण ले होही।
राज्य सरकार ह काली रतिहा बड़े प्रशासनिक फेरबदल करत अठासी आईएएस अधिकारी मनके तबादला कर देहे। एमा उन्नीस जिला के कलेक्टर घलो सामिल हे। उहें, वरिष्ठ आईपीएस अधिकारी मयंक श्रीवास्तव ल जनसंपर्क विभाग के आयुक्त-सह संचालक बनाय गेहे। उहें, कुछेक संभाग के आयुक्त घलो बदले गेहे। मंत्रालय ले जारी तबादला सूची के मुताबिक अतिरिक्त प्रमुख सचिव सुब्रत साहू ल उंखर अभी के दायित्व के संगेसंग ठाकुर प्यारेलाल सिंह राज्य पंचायत, ग्रामीण विकास संस्थान के महानिदेसक के अतिरिक्त प्रभार सौंपे गेहे। अतिरिक्त मुख्य सचिव रेणु पिल्लई ल प्रशासन अकादमी के महानिदेसक के अतिरिक्त प्रभार ले मुक्त कर दे गेहे। अइसने अतिरिक्त मुख्य सचिव मनोज कुमार पिंगुआ ल उंखर वर्तमान दायित्व के संग वन विभाग के प्रभार दे गेहे। ओमन व्यावसायिक परीक्षा मंडल के दायित्व घलो संभालही।
ए प्रशासनिक फेरबदल म रईपुर, दुर्ग, राजनांदगांव, धमतरी, दंतेवाड़ा, कोंडागांव, बालोद, गरियाबंद, कांकेर अउ कोरबा जिला के कलेक्टर मनके तबादला करे गेहे। एखर संगेसंग मनेन्द्रगढ़-चिरमिरी-भरतपुर, सारंगढ़-बिलाईगढ़, नारायणपुर, बीजापुर, सरगुजा, सूरजपुर, बेमेतरा, खैरागढ़-छुईखदान-गंडई अउ जांजगीर-चांपा जिला के कलेक्टर बदले गेहे। रईपुर म डॉक्टर सर्वेश्वर भूरे के जघा गौरव सिंह ल कलेक्टर बनाय गेहे। उहें, ऋचा प्रकाश चौधरी ल दुर्ग अउ संजय अग्रवाल ल राजनांदगांव के कलेक्टर बनाय गेहे।
ए फेरबदल म गोविंद राम चुरेंद्र दूसर घांव सरगुजा संभाग के आयुक्त बनाय गीन। अइसने शिखा राजपूत ल बिलासपुर के अउ सत्यनारायण राठौर ल दुर्ग के संभाग आयुक्त बनाय गेहे।
बृजमोहन अग्रवाल-समीक्षा
प्रदेस के धर्मस्व अउ धार्मिक न्यास मंत्री बृजमोहन अग्रवाल ह किहीन हे कि एसो राजिम कुंभ मेला लगाय जाही। एखर बर मंदिर के चारों कोति परिक्रमा पथ बनाय जाही। अपन विभाग के समीक्षा बइठका म किहीन हे कि पूरातात्विक जघा सिरपुर ल विश्व विरासत के सूची म सामिल करे बर परयास करे जाही। उहें, मैनपाट चैतुरगढ़ जइसन पहाड़ वाले क्षेत्र म सिमला अउ मनाली असन माल रोड बनही। ओमन स्कूल शिक्षा विभाग के समीक्षा बइठका म किहीन कि अवईया सत्र ले नवमीं कक्षा के जम्मों पढ़ईया लइका मन ल सायकल दे जाही। उहें, बारहवीं तक पढ़ईया लइका मनल निःसुल्क किताब मिलही। ओमन किहीन कि मुख्यमंत्री ज्ञान प्रोत्साहन योजना म अनुसूचित जाति-जनजाति के मेघावी विद्यार्थी मन ल मेरिट म आय म पंद्रह हजार के जघा पच्चीस हजार रूपिया के प्रोत्साहन रासि दे जाही। उहें, प्रतियोगी परीक्षा के तियारी बर बारहवीं पढ़ईया लइका मन ल मुफत म कोंिचंग कराय जाही। संगेसंग स्कूल शिक्षा विभाग म खाली पद म साफगोई तरीका ले भर्ती करे के निरदेस दीन। एखर बर मेरिट के आधार म शिक्षक मन के चयन उंखर जिला के तीर-तखार म ही करे जाही। बइठका म श्री अग्रवाल ह राज्य के सौ ठिन कॉलेज म अंग्रेजी माध्यम के शाखा खोले बर कार्य योजना बनाय बर किहीन।
श्री अग्रवाल ह पर्यटन अउ संस्कृति विभाग के अधिकारी मनले किहीन हे कि राज्य के जम्मों पर्यटन स्थल अउ मेला महोत्सव विकास खातिर बिसेस ध्यान दे जाय। ओमन प्रदेस म पर्यटन ल उद्योग के दर्जा देके। एखर ले जुड़े कारोबार ल बढ़ावा दे के संगेसंग ल रोजगार के नवा अवसर देके बात किहीन। ओमन भाजपा के घोसना पत्र म सामिल संकल्प म प्रदेस के लोगन मन ल अयोध्या म श्री रामलला के दर्सन कराय बर अधिकारी मन ले जरूरी कार्ययोजना बनाय बर किहीन।
उपमुख्यमंत्री-बैठक
प्रदेस के उपमुख्यमंत्री अरूण साव ह किहीन हे कि निर्माण काम म बने गुणवत्ता बनाय रखना पहिली प्राथमिकता होना चाही। उहें, खाली पद म भर्ती बर जल्दीच जरूरी कदम उठाय जाही। अपन प्रभार वाले लोक निर्माण, लोक स्वास्थ्य यांत्रिकीय अउ नगरीय प्रशासन विकास विभाग के बइठका म श्री साव ह किहीन हे कि सबो विभाग के मंजूर होय काम ल तय समय सीमा के भीतरी पूरा करे जाय। एमा अबेर होय म संबंधित अधिकारी के जवाब देही, तय करे जाही। ओमन तीनों विभाग के दक्षता बढ़ाय अउ निगरानी बर काम काज म जरूरी सुधार लाय के निरदेस दीन। श्री साव ह किहीन हे कि निर्माण अउ मरम्मत के काम म नवा तकनीक बउरे जाना चाही।
उपमुख्यमंत्री ह लोक निर्माण विभाग के अधिकारी मनले किहीन हे कि रद्दा मरम्मत के काम एक ले दू महिना के भीतरी पूरा होना चाही। ओमन प्रधानमंत्री ग्रामीण सड़क योजना असन लोक निर्माण विभाग केाति ले बनाय के रद्दा के गुणवत्ता के जांच स्वतंत्र एजेंसी ले कराय बर किहीन। ओमन बतइन कि जलजीवन मिसन म पाईप लाइन बिछाय के काम पूरा होते रद्दा बनाय के काम करे जाय। संगेसंग ओमन नगरीय प्रशासन विभाग कोति ले चलाय जात आने-आने योजना के संबंध म जानकारी लीन।
विजय शर्मा-पुलिस अधिकारी बैठक
उपमुख्यमंत्री अउ गृह मंत्री विजय शर्मा ह किहीन हे कि पुलिस विभाग म भर्ती के काम तय समय-सीमा के भीतरी पूरा करे जाय। नवा रईपुर के पुलिस मुख्यालय म अपन विभाग के समीक्षा बइठका म ओमन किहीन कि प्रदेस म साइबर अपराध ल रोके बर पुलिस के काम म आधुनिक तकनीक के उपयोग जरूरी होगे हे। श्री शर्मा ह पुलिस बल के मनोबल बढ़ाय बर उंखर आवास अउ आने सुविधा म ध्यान देके जरूरत बतइन। विसेस रूप ले नक्सली हिंसा म घायल पुलिस कर्मचारी के कल्याण मनके संबंध म तुरते कदम उठाय बर किहीन।
ृ गृहमंत्री ह किहीन कि पुलिस के काम ले जनता म भरोसा अउ अपराधी मन म डर होना चाही। तभे कानून बेवस्था बने ढंग ले चल सकत हे। बइठका म श्री शर्मा ह नसीला जिनीस के अवैध बिक्री ल रोके बर विसेस प्रकोष्ठ बनाय के सुझाव दीन। संगेसंग नार्कोटिक्स कंट्रोल ब्यूरो संग तालमेल बइठा के जरूरी कार्रवाई के निरदेस दीन।
गणतंत्र दिवस झांकी
ऐसो नई दिल्ली के गणतंत्र दिवस समारोह म राजपथ म निकलईया झांकी म छत्तीसगढ़ के आदिवासी संस्कृति देखाय जाही। बस्तर के मुरिया दरबार के झांकी ल ए समारोह बर चुने गेहे। मुख्यमंत्री विष्णुदेव साय ह किहीन हे कि ए प्रदेस बर गौरव के बात हे कि समारोह ले छत्तीसगढ़ के आदिवासी संस्कृति ल पूरा दुनिया देखहीं।
गणतंत्र दिवस-कैडेट चयन
भिलाई के इंदिरागांधी शासकीय महाविद्यालय म एनसीसी नौसेना के तीन झिन कैडेट ल नई दिल्ली म अवईया गणतंत्र दिवस म होवइया परेड बर चुने गेहे।
महाविद्यालय के प्राचार्य डॉक्टर अल्का मेश्राम ह बतइन कि कैडेट सचिन उपाध्याय के चयन गार्ड ऑफ ऑनर बर होय हे। उहें, अविनाश तिवारी अउ धनराज नायडू ल प्रधानमंत्री के रैली बर चुने गेहे। ए तीनों कैडेट दिल्ली के गणतंत्र दिवस परेड म छत्तीसगढ़ कोति ले सामिल होही।
विकसित भारत संकल्प यात्रा
केंद्र सरकार के आने-आने विकास अउ कल्याणकारी योजना के फायदा लोगन तक पहुंचाय खातिर प्रदेस म विकसित भारत संकल्प यात्रा निकाले जात हे। एमा गांव-गंवई म कतकोन योजना के हितग्राही मन ल जोड़े के काम करे जात हे। इही कड़ी म बस्तर जिला के कांवड़ गांव छिंदावाड़ा, तीरथगढ़, बालीकोंटा, तितिर गांव समेत बारा ठिन गांव म आज संकल्प यात्रा सिविर लगाय गीस। ए दउरान जउन हितग्राही केंद्र के योजना के फायदा नइ लेहे उंखर पंजीयन करे गीस। कारीकरम राजस्व, खाद्य, कृषि, स्वास्थ्य, महिला अउ बाल विकास विभाग समेत आने सरकारी एजेंसी के स्टाल लगाके पात्र हितग्राही मनल योजना के फायदा दे गीस। ए बेरा म स्कूल के लइका मन ह सांस्कृतिक कारीकरम प्रस्तुत करीन।
उहें, धमतरी जिला के जामगांव म लगाय गे सिविर म प्रधानमंत्री किसान सम्मान निधि योजना के लाभार्थी सुंदरलाल ढीमर अउ हरिशचंद्र साहू ह बतइन कि, ए योजना म सम्मान निधि के रकम बेरा म मिलत हे। एखर ले ओमन खेती-बाड़ी ले जुड़े जरूरत ल पूरा करे म आर्थिक मदद होवत हे।
अवईया चौबीस घंटा म सरगुजा संभाग अउ तीर-तखार के क्षेत्र म गरज-चमक संग छूटपुट छींटा बौछार होय के संभावना हरय। मउसम विभाग के मुताबिक ए बखत बंगाल के खाड़ी ले हरियाणा तक एक चक्रीय चक्रवाती घेरा बने हे। जेखर सेति प्रदेस म नमी वाले हवा चलत हे। एखरे प्रभाव ले अवईया एक-दू दिन तक बादल रइही। सरगुजा संभाग म बरसा होय के आसार बनत हे।