उपमुख्यमंत्री विजय शर्मा ह प्रदेस के सबो लोकसभा क्षेत्र म आईआईटी के जइसे छत्तीसगढ़ इंस्टिट्यूट ऑफ टेक्नॉलाजी सुरू करे बर जरूरी कार्रवाही करे के निरदेस दीन हे। श्री शर्मा ह काली मंत्रालय म तकनीकि शिक्षा अउ रोजगार विभाग के समीक्षा बइठका लीन। ओमन ह लोकसभा चुनाव ल देखत हुए व्यवसायिक परीक्षा मंडल कोति ले आयोजित होय वाले परीक्षा ल, निर्वाचन ले पहिली कराय बर किहीन हे। ओमन ह अधिकारी मन ल परीक्षा के पेपर झन लीक होवय अउ भर्ती परीक्षा म पूरा पारदर्सिता रहय, एखर बर सक्त निरदेस दीन हे। श्री शर्मा ह प्रदेस के जवान लइका मन ल जादा ले जादा रोजगार ले जुड़े बर अग्निवीर मनके भर्ती के कोटा बढ़ाय बर आर्मी हेडक्वाटर ले अनुरोध पत्र भेजे बर किहीन हे। ओमन ह किहीन हे कि आईटीआई म उद्योग के जरूरत ल ध्यान म राखत हुए नवा ट्रेड के सुरूआत करे जाय। जेकर ले युवा मन ल असानी से रोजगार मिल सकय।
उहें, उपमुख्यमंत्री ह किहीन हे कि एसएमएस भेजे के बेवस्था सुनिश्चित करे जाय। अइसने रोजगार कार्यालय म बेरोजगार उम्मीदवार मनके डाटा ल ठीक तरीका ले व्यवस्थित रखे जाय के बात घलो किहीन हे।
त उहें दूसर कोति बइठका म ओमन ह अधिकारी मन ल केला के पत्ता ले दोना पत्तल बनाय अउ केला के तना के रेसा ले झोला अउ कपड़ा बनाय बर एक ठिन प्रसिक्षण कोर्स अउ एखर एक यूनिट के स्थापना करे बर जल्दी प्रस्ताव ल तइयार करे बर केहे हे।
कृषि/आदिम जाति मंत्री-समीक्षा
कृषि मंत्री रामविचार नेताम ह किहीन हे कि कृषि विभाग के जमीन म अतिक्रमण करइया मनके खिलाफ कड़ा कार्रवाई करे जाही। ओमन ह नवा रईपुर म वरिष्ठ अधिकारी मनके बइठका लेके विभाग के काम-काज के समीक्षा करीन। ओमन ह अधिकारी मनले प्राथमिकता के तौर म केंद्रीय अउ राज्य म चलईया योजना ल सही तरीका ले लागू करे बर किहीन। श्री नेताम ह बतइन कि किसान मन ल गुणवत्तापूर्ण खाद उपलब्ध कराय बर सरगुजा म घलो फर्टीलाइजर लैब के स्थापना करे जाही। ओमन ह अधिकारी मन ल प्रदेस के सबो विकासखंड म नर्सरी बनाय बर निरदेस दीन हे।
एखर अलावा श्री नेताम ह आदिम जाति, अनुसूचित जाति, पिछड़ा वर्ग अउ अल्पसंख्यक विभाग के काम के घलो समीक्षा करीन। ओमन ह अधिकारी मन ले किहीन हे कि ए वर्ग ले सामाजिक, आर्थिक अउ सांस्कृतिक विकास बर संवेदनशीलता के संग काम करे जाही। ओमन ह प्रतियोगी परीक्षा के तइयारी करत युवा मन बर दिल्ली म यूथ हॉस्टल के सीट के संख्या बढाय अउ एक नवा हॉस्टल बनाय के बारे म कार्य योजना बनाय बर किहीन हे, त उहें, श्री नेताम ह सिविल सेवा प्रतियोगी परीक्षा बर घलो केंद्र खोले के निरदेस दीन। ओमन ह राज्य के संरक्षित जनजाति- बैगा, कमार, बिरहोर, पहाड़ी कोरवा, पंडो अउ अबूझमाड़ के विभाग बर ठोस कार्य योजना बनाय के निरदेस दीन हे।
स्वास्थ्य मंत्रालय दिशा-निर्देश
केंद्रीय स्वास्थ्य मंत्रालय ह मरीज मन ल गहन चिकित्सा ईकाई-आईसीयू म रखे जाय बर अस्पताल मन ल दिसा-निरदेस जारी करीन। एखर अनुसार अस्पताल म गंभीर रूप ले बीमार मरीज मन ल उंखर या फेर ओकर घरवाला मन कोति ले मना करे म गहन चिकित्सा ईकाई म नइ भेज सकही। आईसीयू म प्रवेस अउ उंहा ले वापस भेजे जाय के संबंध म दिसा निरदेस म आगू स्पष्ट करे गेहे कि कोनो मरीज के अगर अंग काम करना बंद कर देहे अउ आर्गन सपोर्ट के जरूरत पड़ही या फेर स्थिति बिगड़े म ही आईसीयू म भेजे जाना चाही। ए जम्मों दिसा निरदेस ल चौबीस झिन प्रतिष्ठित चिकित्सक मन ह तइयार करे हे, जेमा दुबई अउ कनाडा के विशेषज्ञ मन घलो सामिल हे।
ट्रक हड़ताल समाप्त
देसभर म ट्रक चालक मनके हड़ताल खतम होगे हे। ए मन ल सरकार कोति ले आस्वासन मिले हे कि नवा कानून लागू करे ले पहिली उंखर संग गोठ करे जाही। केंद्रीय गृह मंत्रालय ह भारतीय न्याय संहिता के चलत हिट एंड रन मामला के नवा प्रावधान ले संबंधित चिंता उपर चर्चा करे बर ऑल इंडिया मोटर ट्रांसपोर्ट कांग्रेस के संग नई दिल्ली म काली रात एक ठिन बइठका करीन। कारीकरम के अध्यक्षता करे के बाद केंद्रीय गृह सचिव अजय कुमार भल्ला ह किहीन हे कि हाले म पारित करे गे भारतीय न्याय संहिता के चलत हिट एंड रन मामला के नवा प्रावधान ल अभी तक लागू नइ करे हे।
रामलला प्राण प्रतिष्ठा शुष्क-दिवस
अयोध्या के श्रीराम मंदिर म श्री रामलला के प्राण प्रतिष्ठा के मउका म बाईस जनवरी के प्रदेस म शुष्क दिवस रइही। मुख्यमंत्री विष्णुदेव साय ह ए घोषणा करत हुए आबकारी विभाग ल एखर परिपालन के बारे म निरदेस दीन। जारी करे आदेस के अनुसार बाईस जनवरी के राज्य के सबो सराब दुकान ल बंद राखे जाही। बार, होटल, रेस्टोरेंट अउ क्लब म घलो सराब बेचे अउ परोसे म रोक रइही।
उहें, अयोध्या म श्री रामलला के प्राण प्रतिष्ठा के मउका म बनइया भोग बर छत्तीसगढ़ के किसनहा मन कोति ले सब्जी भेजे जाही। ओमन ह किहीन हे कि एखर ले पहिली पाछू तीस दिसंबर के राईस मिलर्स मनके सहयोग ले श्री रामलला के भोग बर छत्तीसगढ़ ले तीन सौ मीट्रिक टन सुगंधित चंउर अयोध्या भेजे जा चुके हे।
विकसित भारत संकल्प यात्रा
केंद्र सरकार के कतकोन योजना के हरेक मनखे तक फायदा पहुंचाय बर प्रदेस म विकसित भारत संकल्प यात्रा निकाले जात हे। इही कड़ी म राजनांदगांव जिला के ग्राम पंचायत महरूमखुर्द म मोबाइल वैन ले कृषि गतिविधि, ड्रोन डेमोंस्ट्रेशन अउ मिट्टी स्वास्थ्य कार्ड डेमोंस्ट्रेशन के प्रदर्सन करे गीस। ए बेरा म लोगन मन ल फोटू के माध्यम ले विकसित भारत कारीकरम के जानकारी दे गीस।
उहें, कोंडागांव जिला के बड़े कनेरा गांव म संकल्प यात्रा कारीकरम म विधायक लता उसेंडी ह सामिल होइन। ओमन ह ग्रामीण मन ल विकसित भारत के निर्माण म अपन सहभागिता देके शपथ घलो दिलाइन।
मुख्यमंत्री-मलखंभ खिलाड़ी मुलाकात
मुख्यमंत्री विष्णुदेव साय ले काली रईपुर म नारायणपुर के अबूझमाड़ मलखंभ अकादमी के खिलाड़ी लइका मन ह भेंट करीन। ए बेरा म लइका मन ह मुख्यमंत्री ल बताइन कि पाछू अक्टूबर महिना म होय ‘‘इंडिया गॉट टैलेंट‘‘ म देसभर के दू सौ टीम ल पछार के उंखर टीम ह जीतें हे। मुख्यमंत्री ह वनांचल के ए लइका मन के उत्साह बढ़ात हुए किहीन कि मलखंभ जइसे कठिन विधा म अच्छा प्रदर्सन करके छत्तीसगढ़ के नाम देस अउ दुनिया भर म रौशन करे हे।
जानबा के अनुसार अबूझमाड़ मलखंभ अकादमी नारायणपुर के हाईस्कूल खेल मैदान म चलथे। इहां, गरीब आदिवासी लइका मन मलखंभ खेल के प्रसिक्षण लेथे ए लइका मन ह अभी तक कतकोन प्रतियोगिता म भाग लेके चार सौ ले जादा मैडल जीत चुके हे।
मंत्रिमंडल-निर्णय
राज्य मंत्रिमंडल के होय बइठका म आज छत्तीसगढ़ लोक सेवा आयोग डहार ले आयोजित राज्य सेवा परीक्षा दू हजार इक्कीस ल लेके मिले गड़बड़ी के सिकायत ल देखत ए मामला के जांच केंद्रीय अन्वेसन ब्यूरो-सीबीआई ले कराय के निर्णय ले गेहे। मुख्यमंत्री विष्णुदेव साय के अध्यक्षता म आज मंत्रालय म मंत्रि परिसद के बइठका होइस। बाद म उप मुख्यमंत्री अरूण साव ह बतईन कि ए बछर किसान मन ले समर्थन मूल्य म प्रति एकड़ अधिकतम इक्कीस क्विंटल धान खरीदे जाही। उहें, अंत्योदय अउ प्राथमिकता रासन कार्डधारी मन ल अवइया पांच बछर तक निःशुल्क चाउर दे जाही।
अउ अब थोरकुन समाचार सार म –
– भारत के पहिली महिला शिक्षिका अउ समाज सुधारक सावित्री बाई फुले के आज जयंती हरय। ए मउका म मुख्यमंत्री विष्णुदेव साय ह ओमन ल नमन करीन।
– रईपुर जिला अउ स्वरोजगार मार्गदर्सन केंद्र डहार ले स्थानीय शिक्षित बेरोजगार युवा मन ल नौकरी देबर रईपुर के पुराना मुख्यालय के रोजगार कार्यालय म नौ जनवरी के जॉब फेयर आयोजित करे जाही।
अउ
– सक्ति जिला के मिरौनी गांव म महानदी म अवैध रूप म रेत के उत्खनन करके परिवहन करईया पोकलेन मशीन अउ पांच ठिन ट्रैक्टर ल खनिज विभाग के टीम ह जब्त करे हे।