मुख्यमंत्री-निर्देश
मुख्यमंत्री विष्णुदेव साय ह राज्य के किसान मन ल दे गे धान बोनस के रासि के आहरण म सहकारी बैंक के प्रबंधक डहार ले टाल-मटोल करे जाय के सिकायत मिले म नाराजगी जताय हे। मुख्यमंत्री ह अपेक्स बैंक के वरिष्ठ अधिकारी संग सबो सहकारी बैंक के प्रबंधक ल किसान मनके मांग के आधार म उंखर खाता ले राशि के आहरण सुनिश्चित करे के निरदेस देहे। श्री साय ह कहिन कि किसान मन ल अपेक्स बैंक खाता ले राशि निकाले म कोनों भी तरह के परेसानी नइ होना चाही। मुख्यमंत्री के निरदेस के बाद कलेक्टर मन ह घलो अपन-अपन जिला म ए बेवस्था उपर निगरानी राखत अउ रासि दे म आनाकानी करइया बैंकर्स के खिलाफ कार्रवाई सुरू कर देहे।
इही बीच, बिलासपुर जिला के करगी रोड सहकारी बैंक के प्रबंधक डहार ले धान बोनस के रासि निकाले के बाद किसान मन ले कमीशन मांगे जाय के सिकायत के सुरूवाती जांच सही पाय गीस अउ एखर बाद उहां के प्रभारी शाखा प्रबंधक ल निलंबित कर दे गेहे।
प्रधानमंत्री जनमन योजना
प्रदेस म विशेष पिछड़ा जनजाति समूह के लोगन ल लाभ देवाय बर प्रधानमंत्री जन-मन योजना म प्राथमिकता ले काम करे जात हे। इही कड़ी म जनजाति बहुल कोरबा जिला के छातासराई, माखुरपानी, पतरापाली, गढ़उपरोड़ा, देवपहरी जइसन कतकोन गांव म सिविर लगाय गीस। ए सिविर म आधार, आयुष्मान, रासन कार्ड अउ जन-धन खाता संग सरकार के आने योजना मन ले लोगन ल लाभान्वित करे गीस। संगेसंग उंखर स्वास्थ्य जांच घलो करे गीस।
स्वास्थ्य मंत्री-समीक्षा
स्वास्थ्य मंत्री श्याम बिहारी जायसवाल ह काली रईपुर के डॉक्टर भीमराव अंबेडकर स्मृति चिकित्सालय के दउरा करीन। ओमन ह इहां एंडवांस कॉर्डिएक इंस्टीट्यूट, क्षेत्रीय कैंसर संस्थान अउ नेत्र रोग विभाग के व्यवस्था मनके जानकारी लीन। ए मउका म ओमन मरीज मन ले घलो गोठबात करीन। एखर बाद स्वास्थ्य मंत्री ह वरिष्ठ अधिकारी मनके बइठका लेके अवइया एक बछर के भीतर अस्पताल के सबो कमी ल दूरिहाय के निरदेस दीन। ओमन कहिन कि अस्पताल म विशेषज्ञ, डॉक्टर अउ आने कर्मचारी के कमी ल दूर करे के संग नवा मेडिकल उपकरण, मशीन संग दवाई के व्यवस्था घलो सुनिश्चित करे जाय।
खेल मंत्री-समीक्षा
खेल मंत्री टंकराम वर्मा ह प्रदेस के खेल अकादमी ल साधन संपन्न अउ खेल प्रशिक्षण ढांचा ल मजबूत बनाय के निरदेस देहे। रईपुर म आज विभागीय अधिकारी मन ले भेंट के दउरान खेल मंत्री ह विभागीय गतिविधि के विस्तार ले जानकारी लीन। ओमन खेल प्रशिक्षण गतिविधि ल आधुनिक अउ गुणवत्तापूर्ण बनाय के जरूरत बतईन। श्री वर्मा ह अधिकारी मन ले किहीन कि सबो जिला म लइका मनके खेले बर सुघ्घर खेल मैदान उपलब्ध कराय बर खेल मैदान मन ल विकसित करे के कार्यवाही करे जाय।
माओवादी-मुठभेड़
बीजापुर जिला म काली संझा पुलिस अउ माओवादी मनके बीच मुठभेड़ होइस। ए दउरान क्रॉस फायरिंग म छह महीना के लइका के मउत होगे। उहें, लइका के मां अउ डीआरजी के दू जवान घलो घायल होगे हे।
जिला के अतिरिक्त पुलिस अधीक्षक विभव बनकर ह बतईन कि गंगालूर थाना क्षेत्र के मुतवंडी के जंगल म ए मुठभेड़ होइस। घायल मनके उपचार जिला अस्पताल म चलत हे। पीड़ित परिवार के सहायता बर पुलिस के जवान घटनास्थल पहुंचीन अउ उंखर मदद करीन। पुलिस ह दावा करे हे कि ए मुठभेड़ म भैरमगढ़ एरिया कमेटी के सचिव अउ उंखर आने साथी घायल होय हे।
इही बीच, राज्य सरकार डहार ले ए मुठभेड़ के बाद क्रॉस फायरिंग म जेन लइका के मउत होय हे, उंखर आश्रित परिजन बर सात लाख रूपिया के सहायता रासि मंजूर करे गेहे। खबर के मुताबिक माओवाद पीड़ित मनखे के सुरक्षा अउ पुनर्वास बर संशोधित कार्ययोजना आदेस स्वीकृत करे गे रिहीस। एखर तहत अनुसंसा के बाद ए सहायता राशि दे गीस।
उप मुख्यमंत्री-घायल जवान मुलाकात
बस्तर इलाका म पाछु महीना आईईडी विस्फोट म घायल जवान मन ले मिले बर उप मुख्यमंत्री विजय शर्मा आज रईपुर के एक ठिन निजी अस्पताल पहुंचीन अउ उंखर हालचाल जानीन। ए दउरान उप मुख्यमंत्री ह घायल जवान मन ले कहिन कि कोन्हों परकार के सहायता के जरूरत होय म ओमन ह उंखर ले संपर्क कर सकथे। श्री शर्मा ह घायल जवान मनके अच्छा इलाज ल लेके डॉक्टर मन ले चर्चा करीन।
खबर के मुताबिक नवंबर-दिसंबर महीना म आईईडी विस्फोट म छत्तीसगढ़ पुलिस के चार जवान घायल होगे रिहीस, जेखर इलाज रईपुर के निजी अस्पताल म चलत हे।
गणतंत्र दिवस समारोह
कोरोना संक्रमण के आसंका ल देखत राजधानी रईपुर संग प्रदेस के आने-आने स्थान मन म ए बछर छब्बीस जनवरी के गणतंत्र दिवस समारोह के दउरान विशेष सावधानी बरते के निरदेस दे गेहे। ए संबंध म सामान्य प्रशासन विभाग ह जम्मों विभाग, संभाग आयुक्त, कलेक्टर अउ मुख्य कार्यपालन अधिकारी मन ल पाती लिखे हे। ए समारोह म मास्क पहिनना, सामाजिक दूरी जइसन नियम के कड़ाई ले पालन करे के निरदेस दे गेहे। पाती म स्पष्ट करे गेहे कि सिरिफ जिला मुख्यालय ल छोड़के आने कोन्हों भी जगह म परेड नइ होही।
बिलासपुर-हत्या
बिलासपुर जिला म मस्तुरी थाना क्षेत्र के हिर्री गांव म बीते रतिहा एक झिन मनखे ह अपन पत्नी संग तीन लइका के गला घोट के हत्या कर दीस। मृतक म आरोपी के दू बेटी अउ एक बेटा सामिल हे। लइका मनके उमर दू ले पांच बछर के बीच हवय। घटना के बाद आरोपी ह पुलिस थाना पहुंच के खुदे आत्मसमर्पण कर दीस। बताय जात हे कि पत्नी के संग कोन्हों बात ल लेके होय विवाद के बाद आरोपी ह ए घटना ल अंजाम दीस।
धान खरीदी
राज्य म किसान मन ले समर्थन मूल्य म धान खरीदी चलत हे। अब तक किसान मन ले करीबन सड़सठ लाख मीटरिक टन धान के खरीदी करे जा चुके हे, जेखर बदला म किसान मन ल पन्द्रह हजार करोड़ रूपिया ले जादा के रासि के भुगतान करे गेहे। मार्कफेड के प्रबंध संचालक इफ्फत आरा अउ महाप्रबंधक दिलीप जायसवाल ह बतईन कि राज्य सासन डहार ले प्रति एकड़ इक्कीस क्विंटल धान खरीदी के आदेस जारी करे गेहे। एखर लाभ पहिली ले धान बेच चुके किसान मन ल घलो मिलही।
राष्ट्रीय सेवा योजना-शिविर
राष्ट्रीय सेवा योजना इकाई डहार ले मुंगेली जिला के लिहा गांव म आज ले सात दिवसीय बिसेस सिविर के आयोजन करे जात हे। डॉक्टर ज्वाला प्रसाद मिश्र शासकीय विज्ञान महाविद्यालय म आयोजित ए सिविर आठ जनवरी तक चलही। ए सिविर के उद्देश्य समाजसेवा के माध्यम ले विद्यार्थी के व्यक्तित्व के विकास करना हे। सिविर के दउरान आने-आने बिसय म व्याख्यान, परिचर्चा, भासन, वाद-विवाद, सांस्कृतिक कारीकरम, नुक्कड़ नाटक जइसन कारीकरम होही।
राज्य स्तरीय प्रशिक्षण
राष्ट्रीय सांख्यिकीय कार्यालय के क्षेत्रीय कार्यालय रईपुर डहार ले ‘‘समय उपयोग सर्वेक्षण‘‘ म आज ले दू दिवसीय राज्य स्तरीय आतंरिक प्रशिक्षण कारीकरम के आयोजन करे जात हे। ए प्रसिक्षण कारीकरम म दुरूग, बिलासपुर, अंबिकापुर अउ रईपुर स्थित सबो क्षेत्रीय संग उपक्षेत्रीय कार्यालय के अधिकारी अउ करमचारी सामिल होवत हे। कारीकरम के सुभारंभ क्षेत्रीय कार्यालय रईपुर के उप महानिदेशक रोशनलाल साहू ह करीन। ए मउका म ओमन कहिन कि समय उपयोग सर्वेक्षण के उद्देश्य देस के वैतनिक अउ अवैतनिक गतिविधि म पुरूष अउ महिला के भागीदारी के आंकलन करना हे।