एला देखत हुए बिलासपुर जिला कलेक्टर अवनीश शरण अउ जिला पुलिस अधीक्षक संतोष सिंह के निरदेस म आज बिलासागुड़ी परिसर म ट्रक एसोसिएशन के पदाधिकारी मनके बइठका ले गीस। बइठका म अधिकारी मन ह ए स्पष्ट करीन कि केंद्र सरकार के ए नवा कानून ल लेके ए अफवाह फैलाय जावत हे के कानून म संशोधन केवल ट्रक या बस चालक बर हे, जबकि ए नियम सब्बो प्रकार के गाड़ी अउ मोटर सायकल चालक बर घलो लागू होही। ओमन ह स्पष्ट करीन कि दुर्घटना करे के बाद यदि कोई भाग जावत हे, त ए प्रावधान लागू करे जाही। फेर, यदि दुर्घटना के बाद गाड़ी चालक एखर सूचना पुलिस ल दे या घायल ल अस्पताल पहुंचाही त ए प्रावधान लागू नही होही। ओमन ह किहीन कि ए कानून के संशोधन के उद्देस्य दुर्घटना म घायल मनके जान बचाना अउ सड़का हादसा म होवइया मउत के संख्या कम करना हे। ओमन ह गाड़ी चालक मन ले निवेदन करीन कि ओमन सोसल मीडिया म फैलाय जावत अफवाह उपर ध्यान न दे अउ कोनो तरह के बंद या चक्का जाम म हिस्सा न ले।
उहें, हड़ताल के कारण रईपुर, बिलासपुर, दुर्ग, सरगुजा, जगदलपुर के संग आने जिला मन म बस स्टैण्ड ले बस नइ निकलीस उहें, हाइवे उपर सड़क के किनारे ट्रक चालक मन ह अपन गाड़ी खड़ा कर देहे, जेखर चलत सड़क के दूनों तरफ ट्रक के लंबा कतार देखे ल मिलिस। एखर चलत कतकोन पेट्रोल पंप म पेट्रोल अउ डीजल गाड़ी नइ पहुंच सकीस। जेखर ले पेट्रोल पंप म भीड़ बढ़ गीस।
जानबा के मुताबिक देस म हिट एंड रन कानून के तहत सड़क दुर्घटना उपर बस अउ ट्रक चालक बर दस साल के सजा अउ सात लाख रूपिया जुर्माना के प्रावधान करे गेहे।
पीएम-जनमन
प्रधानमंत्री जनजाति आदिवासी न्याय महाअभियान-पीएम जनमन के तहत राज्य म बिसेस पिछड़ी जनजाति ल सिविर के माध्यम ले योजना के लाभ दिलाय के पहल करे गेहे। पोषण चौपाल अउ सिविर के माध्यम ले लोगन मनके घर तक पहुंच के ओमन ल जागरूक करे के परयास करे जात हे। योजना के तहत आने-आने विभाग के अधिकारी अउ प्रशासनिक अमला बिसेस पिछड़ी जनजाति के पंचायत, बसाहट, टोला अउ पारा तक पहुंचके सहज तरीका ले लोगन मनके बीच योजना के प्रचार-प्रसार करत हे।
योजना बर पात्र लोगन के पहिचान करके मिसन मोड म कार्ययोजना बनाके काम करे जात हे। इही कड़ी म महासुमंद विकासखंड के झालखम्हरिया गांव म रहवईया कमार परिवार के घर जाके उंखर जानकारी जुटाय जावत हे। इही नही बिसेस पिछड़ी जनजाति ल वीडियो संदेस के माध्यम ले घलो जागरूक करे जात हे अउ ओमन ल जनमन कार्ड घलो उपलब्ध कराय जात हे।
योजना के तहत आने-आने विभाग के समन्वय ले पेयजल, आवास, सड़क, मोबाइल मेडिकल यूनिट, छात्रावास निर्माण, आंगनबाड़ी केंद्र के माध्यम ले पोषण, वनधन केंद्र के स्थापना अउ आयुष्मान कार्ड बनाय जइसन सुविधा लोगन मन ल दे जावत हे।
अविश्वास प्रस्ताव
जांजगीर-चांपा जिला म पामगढ़ जनपद पंचायत के अध्यक्ष राजकुमार पटेल के खिलाफ लाय गे अविश्वास प्रस्ताव पारित होगे हे। ए अविश्वास प्रस्ताव के पक्ष म सत्रह जनपद सदस्य मन ह मतदान करीन। उहें, तीन सदस्य मन ह प्रस्ताव के विपक्ष म मतदान करीन। काली दू जनवरी के जनपद उपाध्यक्ष के खिलाफ अविश्वास प्रस्ताव उपर मतदान होही।
स्वास्थ्य मंत्री-कार्यभार
स्वास्थ्य अउ परिवार कल्याण मंत्री श्याम बिहारी जायसवाल ह राज्य के सबो शासकीय अस्पताल मन म गुणवत्ता पूर्ण स्वास्थ्य सेवा उपलब्ध कराय के निरदेस देहे। श्री जायसवाल ह अधिकारी मन ले किहीन कि ओमन शासकीय अस्पताल के निरीक्षण करय। ओमन ह नर्सिंग होम एक्ट ल अउ अच्छा तरीका ले लागू करे बर किहीन। स्वास्थ्य मंत्री ह डॉक्टर मनके लिखे बिना दर्द निवारक दवा के बिक्रि उपर घलो सक्ति ले कार्रवाई करे के निरदेस देहे।
स्वास्थ्य अउ परिवार कल्याण मंत्री श्याम बिहारी जायसवाल ह आज नवा रईपुर स्थित मंत्रालय म पूजा-अर्चना के बाद कार्यभार अपनाइन। जेखर बाद स्वास्थ्य मंत्री ह विभागीय गतिविधि के समीक्षा करीन अउ अधिकारी मन ल जरूरी निरदेस दीन। ए बेरा म विभाग के अपर मुख्य सचिव रेणु जी पिल्ले अउ स्वास्थ्य सचिव सिध्दार्थ कोमल परदेसी के संग कतकोन विभागीय अधिकारी मौजूद रिहीन।
उहें, महिला-बाल विकास अउ समाज कल्याण मंत्री लक्ष्मी राजवाड़े ह घलो आज मंत्रालय म काम-काज संभालीन। ए बेरा म विभागीय सचिव भुवनेश यादव अउ संचालक दिव्या मिश्रा के संग कतकोन वरिष्ठ विभागीय अधिकारी अउ जनप्रतिनिधि मौजूद रिहीन।
खाद बीज-जांच
राज्य म खाद-बीज अउ कीटनाशक औषधि के गुणवत्ता के जांच के काम चलत हे अउ अमानक नमूना वाले विक्रेता संस्थान ल कारण बताओ नोटिस जारी करत हे। कृषि विभाग डहार ले चालू रबी सीजन म किसान मन ल देने वाला रसायनिक उर्वरक, बीज अउ कीटनाशक औषधि के गुणवत्ता उपर बिसेस निगरानी रखे जात हे। अधिकारी अपन-अपन इलाका म खाद-बीज विक्रेता संस्थान ले रासायनिक उर्वरक, बीज अउ कीटनाशक औषधि के नमूना लेवत हे। अब तक जांच पड़ताल म बीज के सैंतीस नमूना, रासायनिक उर्वरक के तीन अउ पौध सरंक्षण औषधि के अठ्ठारा नमूना अमानक पाय गेहे। जेमा विक्रय उपर तुरते प्रभाव ले प्रतिबंध लगा दे गेहे।
इही बीच, चालू रबी सीजन म राज्य के किसान मन ल सरकारी समिति अउ निजी क्षेत्र के माध्यम ले प्रमाणिक बीज उपलब्ध कराय जात हे। अब तक किसान मन ल आने-आने रबी फसल के एक लाख तिरसठ हजार कुंटल ले जादा प्रमाणिक बीज दे जा चुके हे, जेन ए बछर के वितरण लक्ष्य के करीब पचास फीसदीय हे।
विकसित भारत संकल्प यात्रा
विकसित भारत के परिकल्पना ल साकार करे अउ आखिरी मनखे तक योजना के लाभ पहुंचाय के उद्देस्य ले छत्तीसगढ़ म घलो विकसित भारत संकल्प यात्रा निकाले जावत हे। ए यात्रा के तहत मोबाइल वैन आज राजनांदगांव जिला के छुरिया विकासखंड स्थित रंगीटोला गांव पहुंचिस। ए मोबाइल वैन के लोगन मन सुवागत करीन। ए मउका म प्रधानमंत्री के संदेस ल पढ़े गीस अउ चलचित्र के माध्यम ले विकसित भारत के उद्देस्य के जानकारी दे गीस। कारीकरम के मुख्य अतिथि सांसद संतोष पांडेय ह किहीन कि विकसित भारत संकल्प यात्रा के माध्यम ले ग्रामीण मन ल केंद्र सरकार के जनकल्याणकारी योजना के जानकारी दे जावत हे अउ ओमन ल लाभ घलो दे जावत हे।
नववर्ष
विश्व के संगेसंग छत्तीसगढ़ म घलो नवा बछर उछाह के संग मनाय जात हे। लोगन मन ह बछर दू हजार चौबीस के सुवागत पूरा जोस अउ खुशी के संग करीन। काली रतिहा बारा बजत ही लोगन मन ह एक-दूसर ल बधाई देके नवा बछर के खुशी मनाइन। नवा बछर के पहिली दिन आज बिहनिया ले मंदिर मन म श्रध्दालु मन के भीड़ देखे जावत हे।
राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेंद्र मोदी, छत्तीसगढ़ के राज्यपाल विश्वभूषण हरिचंदन अउ मुख्यमंत्री विष्णुदेव साय ह नवा बछर म लोगन मन ल सुभकामना दीन।
इही बीच, राज्यपाल विश्वभूषण हरिचंदन ल राजभवन म आने-आने विश्वविद्यालय मनके कुलपति मन ह नवा बछर के सुभकामना दीन। इंदिरागांधी कृषि विश्वविद्यालय रईपुर के कुलपति डॉक्टर गिरिश चंदेल, रविशंकर विश्वविद्यालय रईपुर के कुलपति प्रोफेसर सच्चिदानंद शुक्ल अउ महात्मा गांधी उद्यानिकी अउ वानिकी विश्वविद्यालय पाटन के कुलपति डॉक्टर रमाशंकर कुरिल ह राज्यपाल ले भेंट करीन।
दुर्घटना
सक्ती जिला के बारद्वार थाना क्षेत्र म होय सड़क हादसा म उप सरपंच के संग दू लोगन के मउत होगे अउ संगेसंग चार आने लोगन घायल होगे हे। जानबा के मुताबिक एक कार म छै लोगन सवार होके बाराद्वार ले लहूटत रिहीन। इही दौरान तेज रफ्तार कार अनियंत्रित होके धनेलीभाठा गांव म एक मकान के दिवाल ले टकरा गीस।