प्रधानमंत्री नरेंद्र मोदी ह किहीन कि आज देस के कोना-कोना विकसित भारत अउ आत्म निर्भरता के भावना के आत्म विश्वास ले सराबोर हे।
आकाशवाणी म ‘‘मन की बात‘‘ कारीकरम के एक सौ आठवीं कड़ी म ओमन देसवासी मन ले ए भावना ल बछर दू हजार चोबीस म बनाय राखे के अपील करीन। श्री मोदी ह किहीन कि एक सौ चालीस करोड़ भारतीय मनके ताकत के भरोसा ले ही भारत ह ए बछर कतकोन बिसेस उपलब्धि अपन नांव करे हे। एमा बहुप्रतिक्षित नारी सक्ति वंदन विधेयक के पारित होना घलो सामिल हे। श्री मोदी ह फिट इंडिया के सपना ल साकार करे बर स्वास्थ्य नवाचार आधारित स्टार्टअप के बारे म लोगन मन ले अपन बिचार भेजे के आग्रह करीन।
प्रधानमंत्री ह किहीन कि अपन बोली अउ भाखा के महत्व ल देखत उंखर संवर्धन अउ संरक्षण करना हे। भाषा अउ बोली ल कारण बताके कतकोन लइका बीच म पढ़ाई छोड़ देथे। अइसन परेसानी ल दूरिहा करे बर नवा राष्ट्रीय शिक्षा नीति काफी मददगार साबित होही। प्रधानमंत्री ह किहीन कि राष्ट्र प्रथम ले बढ़के कोन्हो मंत्र नइ हे। इही, मंत्र ल चरितार्थ करत हम अपन देस ल विकसित अउ आत्म निर्भर बनाबो। ओमन अयोध्या म बनत राममंदिर ल ऐतिहासिक क्षण बतात देसवासी मन ल नवा बछर के सुभकामना दीन।
‘‘मन की बात‘‘ कारीकरम ल छत्तीसगढ़ के मुख्यमंत्री विष्णुदेव साय, भाजपा प्रदेस अध्यक्ष किरण सिंह देव के संगेसंग कतकोन पदाधिकारी मन प्रदेस भाजपा कार्यालय के संगेसंग अलग-अलग जघा म रेडियो अउ आने-आने संचार माध्यम ले सुनीन।
बैठक-भाजपा
रईपुर स्थित प्रदेस भाजपा कार्यालय म भारतीय जनता पार्टी के जम्मों मोर्चा पदाधिकारी मनके संयुक्त बैठक आयोजित करे गीस। बैठक म आगामी कारीकरम के रूप-रेखा तइयार करे गीस। बइठका म राष्ट्रीय सह संगठन महामंत्री शिवप्रकाश, क्षेत्रीय संगठन महामंत्री अजय जामवाल, मुख्यमंत्री विष्णुदेव साय , प्रदेस अध्यक्ष किरण सिंह देव अउ भाजपा प्रदेस महामंत्री संगठन पवन साय सामिल होइन।
नववर्ष-सुरक्षा व्यवस्था
राजधानी रईपुर के संगेसंग प्रदेसभर म नवा बछर के जस्न मनाय के तइयारी जोरदरहा ढंग ले चलत हे। ए बेरा आने-आने जघा म नवा बछर के कारीकरम आयोजित करे जाही। एला देखत जिला अउ पुलिस प्रशासन डहार ले सुरक्षा के पुख्ता बेवस्था करे जात हे।
रईपुर म आज रतिहा नवा बछर म होवइया आयोजन अउ कानून बेवस्था के संबंध म नगर-निगम के आयुक्त मयंक चतुर्वेदी अउ प्रभारी पुलिस अधीक्षक जीआर ठाकुर ह बइठका लीन। ओमन सहर के बाहरी इलाका अउ जम्मों चौक चौराहा म सुरक्षा के चार चौबंद बेवस्था करे के निरदेस दीन हे। रेस्टोरेंट अउ होटल के तीर-तार म पुलिस सादा वर्दी म तैनात रइही। संगेसंग सीसीटीवी कैमरा ले घलो नजर रखे जाही। यदि कोई हुड़दंग करही या सांति बेवस्था ल बाधा पहुंचाही ओकर उपर तत्काल कार्रवाई करे जाही। नगर-निगम आयुक्त ह बतइन कि जम्मों बार अउ क्लब निर्धारित समय म बंद हो जही। उहें, नशा के हालत म वाहन चलात पकडे़ जाय म गाड़ी जब्ती करे जाही अउ ओमन ल पैदल घर जाना पड़ही।
बतादन कि नवा बछर के बिहनिया जम्मों परमुख मंदिर देवाला अउ पर्यटन स्थान मन म सुरक्षा अउ यातायात व्यवस्थित करे के निरदेस घलो अधिकारी मन डहार ले दे गेहे।
मुख्यमंत्री अलंकरण समारोह
मुख्यमंत्री विष्णुदेव साय ह रईपुर के रोहिणीपुरम स्थित सरस्वती शिक्षण संस्थान म राखे गे मेघावी छात्र अलंकरण समारोह म विद्यार्थी मन ल सम्मानित करीन। ए बेरा म ओमन किहीन कि शिक्षा के अर्थ केवल अक्षर ज्ञान या डिग्री पाना ही नही बल्कि शिक्षा ओ हरे जो विद्यार्थी मन ल ज्ञानवान के संगेसंग चरित्रवान घलो बनाय। श्री साय ह किहीन कि प्रधानमंत्री नरेंद्र मोदी के विकसित भारत निर्माण के लक्ष्य हमर आगू म रखे हे। एमा शिक्षा के बड़का भूमिका हे।
मुख्यमंत्री मुलाकात
राज्य मंत्रिमंडल के सदस्य मन विभाग बंटवारा के बाद काली मुख्यमंत्री विष्णुदेव साय ले भेंट करीन। ए अवसर म मुख्यमंत्री ह मंत्री मन ले मोदी के गारंटी ल पूरा करे बर जोरदरहा ढंग ले जुटे बर किहीन। श्री साय किहीन कि प्रदेस के जनता के भरोसा ल पूरा करे बर राज्य सरकार संकल्पबध्द होके काम करही। ओमन किहीन कि अवईया पांच बरस म प्रधानमंत्री नरेंद्र मोदी के जम्मों गारंटी पूरा करना हे। मोदी के गारंटी समाज के जम्मों वर्ग मन ले संबंधित हे अउ सरकार ल ए सुनिश्चित करना हे कि उंखर गारंटी जमीनी स्तर म क्रियान्वयन बने ले होय।
उहें, रईपुर प्रेस क्लब के प्रतिनिधि मंडल ह राज्य अतिथि गृह पहूना म मुख्यमंत्री ले मुलाकात करीन। प्रतिनिधि मंडल ह श्री साय ल राज्य के मुख्यमंत्री के रूप म पदभार ग्रहण करे के बधई दीन अउ उम्मीद जतइन कि उंखर नेतृत्व म छत्तीसगढ़ विकास के रद्दा म आगू बाढ़य।
ऐति, भारत यात्री मेहुल लखानी ह घलो मुख्यमंत्री ले पहुना म भेंट करीन। मुख्यमंत्री ह श्री मेहुल ल ओखर ए यात्रा बर छत्तीसगढ़वासी मन डहार ले सुभकामना दीन। डोंगरगढ़ निवासी श्री मेहुल, योग यात्रा थीम म भारत, नेपाल अउ भूटान के यात्रा पूरा करके अब पैदल चलत डोंगरगढ़ ले अयोध्या अउ भारत के यात्रा म निकले हे।
विकसित भारत संकल्प यात्रा
केंद्र सरकार के जनकल्याणकारी योजना मन ल आम लोगन तक पहुंचाय के उद्देस्य ले छत्तीसगढ़ के संगेसंग पूरा देस म विकसित भारत संकल्प यात्रा निकाले जात हे। इही कड़ी म राजधानी रईपुर के पंडित सुंदरलाल शर्मा वार्ड के दसहरा मैदान अउ पंडित वामनराव लाखे वार्ड के कुशालपुर स्थित रामजानकी समुदायिक भवन म संकल्प सिविर के आयोजन करे गीस। ए बेरा हितग्राही मन ल स्वनिधि, विश्वकर्मा, आयुष्मान कार्ड, उज्जवला अउ आवास के संगेसंग आने-आने योजना मनके जानकारी दे गीस। उहें, पांच हजार आठ सौ ले जादा हितग्राही मन ल एखर लाभ दे गीस। सिविर म स्कूल शिक्षामंत्री बृजमोहन अग्रवाल, सांसद सुनील सोनी अउ जनप्रतिनिधि अउ नागरिक मन सामिल होइन।
उहें, शहीद बिग्रेडियर उस्मान वार्ड के टिकरापारा के हरदेवलाला मंदिर के तीर आयोजित संकल्प यात्रा सिविर म लगभग ग्यारा सौ पात्र हितग्राही केंद्र सरकार के योजना ले प्रत्यक्ष लाभान्वित होइन अउ विकसित राष्ट्र बनाय के संकल्प लीन।
पुलिस भर्ती प्रशिक्षण
जांजगीर चांपा स्थित पुलिस लाइन म ए बेरा युवा मन ल पुलिस भर्ती बर प्रसिक्षण दे जावत हे। एमा नौजवान मन बढ़चढ़ के हिस्सा लेवत हे। युवा मन ल प्रसिक्षक मन डहार ले भर्ती बर शारीरिक अउ लिखित परीक्षा के तइयारी कराय जात हे। प्रसिक्षक दीपक यादव ह बतइन कि पुलिस भर्ती बर दौड़, गोला फेक, ऊंची कूद अउ लंबी कूद के प्रसिक्षण दे जावत हे। युवा मन के कहना हे कि ए प्रसिक्षण ले ओमन ल पुलिस भर्ती के चयन म लाभ मिलही।
तलवारबाजी चैंपियनशिप
इकतीसवीं जूनियर नेशनल फेंसिंग चैंपियनशिप के आयोजन आज ले रईपुर के लाभांडी स्थित अग्रसेन धाम म करे जावत हे। तीन जनवरी तक चलईया ए प्रतियोगिता म छत्तीसगढ़ समेत देस के छब्बीस राज्य के पांच सौ ले जादा खिलाड़ी मन सामिल होही। ए प्रतियोगिता म एक सौ बीस पदक बर टीम अउ व्यक्तिगत मुकाबला होही।
अउ अब थोरकुन समाचार सार म –
– मुख्यमंत्री विष्णुदेव साय ह रायगढ़ जिला के कापू निवासी प्रतिष्ठित सामजसेवी महादेव प्रसाद शर्मा के निधन उपर शोक जतइन।
– उपमुख्यमंत्री अरूण साव आज मुंगेली जिला के ग्राम लंघुवाटोला अउ फूलवारी-एफ म गुरू घासीदास जयंती कारीकरम म सामिल होइन। ए मउका म ओमन किहीन कि बाबा गुरू घासीदास ह लोगन मन ल हमेशा सत्य अउ सदाचार के रद्दा म चले बर प्रेरित करे हे।
– उपमुख्यमंत्री अरूण साव आज अपन बेमेतरा प्रवास के दौरान कृषि उपज मंडी परिसर म आयोजित साहू समाज के युवक-युवती परिचय सम्मेलन म सामिल होइन।
– राजनांदगांव जिला के डोंगरगढ़ स्थित ग्राम राका म राम जन्मभूमि अयोध्या ले आय अक्षत कलश के संग राम जानकी मंदिर ले कलश यात्रा निकाले गीस। ए दौरान कलश यात्रा के जघा-जघा सुवागत घलो करे गीस।