प्रधानमंत्री नरेंद्र मोदी ह आज उत्तर प्रदेस के अयोध्या म महर्षि वाल्मीकि अंतर्राष्ट्रीय हवाई अड्डा के उदघाटन करीन। ए मउका म आयोजित एक कार्यक्रम म प्रधानमंत्री ह अयोध्या म पंद्रह हजार सात सौ करोड़ रूपिया लागत वाले विकास कार्यक्रम मनके सुभारंभ करीन। श्री मोदी ह वंदे भारत अउ अमृत भारत जइसे बिसेस रेलगाड़ी मन ल घलो रवाना करीन। प्रधानमंत्री ह हवाई अड्डा ले अयोध्या धाम रेलवे स्टेसन तक एक रोड-सो घलो करीन, जेमा हजारो लोगन मन भाग लीन। रोड-सो के दौरान महिला, साधूसंत अउ बुजूर्ग मन पुष्प वर्षा कर श्री मोदी के अभिनंदन करीन।
मुख्यमंत्री-चांवल
उहें, बाईस जनवरी के अयोध्या म राममंदिर उदघाटन अवसर म छत्तीसगढ़ के सुगंधित चावल ले प्रसाद तैयार करे जाही। एखर बर मुख्यमंत्री विष्णुदेव साय ह आज रायपुर स्थित श्री राममंदिर परिसर ले तीन सौ मीट्रिक टन चावल ले भरे ग्यारा ठन ट्रक मन ल हरी झंडी दिखाके के अयोध्या बर रवाना करीन। मुख्यमंत्री विष्णुदेव साय ह राईस मिलर्स एसोसिएसन डहार ले आयोजित सुगंधित चावल अर्पण समारोह म सामिल होइन। ए मउका म ओमन मंत्रिमंडल के दूसर सदस्य मनके संग राममंदिर म पूजा-अर्चना करीन।
एखर अलावा मुख्यमंत्री ह आज प्रदेस राईस मिलर्स एसोसिएसन डहार ले रायपुर के एक ठन निजी होटल म आयोजित अभिनंदन समारोह म घलो सामिल होइन। समारोह ल संबोधित करत हुए मुख्यमंत्री ह उम्मीद जतइन कि राज्य सरकार अउ राईस मिलर्स मन मिल-जुलके प्रदेस के चावल उद्योग ल नवा उचाई म स्थापित करहीं। ओमन किहीन कि छत्तीसगढ़ म धान के उत्पादन लगातार बाढ़त हे, अउ एखर ले चावल उद्योग के क्षेत्र म नवा संभावना मन जन्म लेवत हे। मुख्यमंत्री ह बतइन कि मध्य क्षेत्रीय परिषद के बइठका म छत्तीसगढ़ म कार्गो हब बनाय के मंजूरी दे जा चुके हे। ओमन किहीन कि एखर निर्माण ले प्रदेस म व्यापार व्यवसाय अउ बाढ़ही। ओमन राईस मिलर्स मन ल किहीन कि कस्टम मिलिंग के काम म अउ तेजी लावय।
राज्यपाल-ओड़िशा कार्यक्रम
राज्यपाल विश्वभूषण हरिचंदन ओड़िशा प्रवास के दौरान आज संबलपुर जिला के कुडोपाली म शहीद मन ल श्रध्दांजलि देबर आयोजित कार्यक्रम म सामिल होइन। ओमन कुडोपाली म अंग्रेज मनके विरूध्द लड़ाई म शहीद होवइया संतावन झन स्वतंत्रता संग्राम सेनानी मनके वीरता ल नमन करीन।
ए मउका म राज्यपाल ह किहीन कि कुडोपाली अब एक तीर्थस्थल बन गेहे, अउ अवईया पीढ़ी मन बर ए ह राष्ट्रवादी विचार मनके प्रेरणा केंद्र बनही। ओमन किहीन कि एला राष्ट्रीय स्तर के शहीद स्मारक पीठ बनाय म सहयोग करय अउ नवा इतिहास लिखय।
ए अवसर म शहीद मनके सम्मान म समलेश्वरी माता मंदिर ले कुडोपाली घाटी तक मसाल रैली निकाले गीस, जेमा राज्यपाल घलो सामिल होइन। कार्यक्रम म केंद्रीय शिक्षामंत्री धर्मेन्द्र प्रधान के अलावा दूसर जन प्रतिनिधि अउ सेनानी मनके परिजन मन सामिल होइन।
गौरतलब हे कि पहाड़ी क्षेत्र कुडोपाली म अंग्रेज मन संग स्वतंत्रता संग्राम सेनानी मनके युध्द होय रिहीस, जेमा ओड़िशा के स्वंतत्रता संग्राम सेनानी वीर सुरेंद्र साय के भाई वीर छाबिल साय समेत संतावन झन शहीद होय रिहीन।
कोरोना मरीज
प्रदेस म कोरोना संक्रमण के मामला एक घंव फेर बाढ़त देखे जात हे। राज्य म कोरोना संक्रमित मरीज मन के संख्या बाढ़ के इकतीस होगे हे। इही बीच, भिलाई के कैम्प क्षेत्र म काली कोरोना संक्रमित एक झन बुजुर्ग महिला के मौत होगे। ए महिला ल ईलाज बर अस्पताल म भर्ती कराय गे रिहीस। एखर मौत के बाद जब कोरोना जांच कराय गीस, त रिपोर्ट पॉजिटिव पाय गीस।
मन की बात
प्रधानमंत्री नरेन्द्र मोदी काली इतवार के आकाशवाणी ले ‘‘मन की बात‘‘ कार्यक्रम म देसवासी मनके संग अपन विचार साझा करही। ए कार्यक्रम के प्रसारण आकाशवाणी अउ दूरदर्शन के पूरा नेटवर्क म बिहनिया ग्यारह बजे ले करे जाही। ए कार्यक्रम प्रधानमंत्री कार्यालय, सूचना अउ प्रसारण मंत्रालय अउ डीडी न्यूज के यू-ट्यूब चैनल म घलो उपलब्ध रइही।
विकसित भारत संकल्प यात्रा
छत्तीसगढ़ समेत पूरा देस म सरकार के प्रमुख योजना मन ल आखिरी छोर तक पहुंचाय के प्रयास ल सुनिश्चित करे के उद्देश्य ले विकसित भारत संकल्प यात्रा चलाय जात हे।
इही कड़ी म राजनांदगांव जिला म छुरिया विकासखंड के ग्राम पंचायत भण्डारपुर म विकसित भारत संकल्प यात्रा के तहत आने-आने कार्यक्रम के आयोजन करे गीस। आम लोगन मन ल पोषण आहार के बारे म जानकारी देबर बनायगे ‘‘पोषण मटका‘‘ आकर्षण के केंद्र रिहीस। उहें, सेल्फी जोन म लोगन मन प्रधानमंत्री के कटआउट के संग फोटो खिचवइन। ए मउका म मोबाईल वैन के माध्यम ले लोगन मन ल स्वच्छता सुविधा, वित्तीय सेवा, बिजली कनेक्शन, आवास से लेके दूसर जरूरी सेवा दे गेहे।
उहें, विकसित भारत संकल्प यात्रा के तहत सक्ती जिला म डभरा के ग्राम पंचायत सुखदा म कृषि विभाग डहार ले ड्रोन के माध्यम ले नैनो यूरिया छिड़काव के प्रदर्सन करे गीस। ए मउका म केंद्र सरकार के आने-आने योजना ले ग्रामीण मन ल अवगत कराय गीस। कार्यक्रम म सांसद गुहाराम अजगले मौजूद रिहीन।
मुख्यमंत्री-पीएम जनमन योजना
केंद्र सरकार डहार ले देस के सबले पिछड़ा विशेष जनजाति के समूचित विकास बर चलाय जात प्रधानमंत्री जनमन योजना के जमिनी हकीकत ल जाने बर मुख्यमंत्री विष्णुदेव साय ह रायगढ़ जिला के लैलूंगा विकास खंड स्थित भुईंया पानी गांव के दौरा करीन, जिहां मुख्यमंत्री ह बिरहोर परिवार मन ले अलग-अलग गोठबात कर स्वास्थ्य, शिक्षा, रोजगार समेत मूलभूत सुविधा मनके बारे म चर्चा करीन।
कोंडागांव जिला म प्रधानमंत्री आवास अउ प्रधानमंत्री जनमन योजना के तहत हितग्राही मनके पात्रता परीक्षण बर तीन ले पांच जनवरी तक बिसेस ग्राम सभा के आयोजन करे जाही। जिला कलेक्टर दीपक सोनी ह सबो जनपद पंचायत के मुख्य कार्यपालन अधिकारी मन ल हितग्राही मनके सूची तैयार कर आवास मंजूरी के काम समय-सीमा म पूरा करे के निरदेस देहे।
संस्कृत/ओपन स्कूल परीक्षा
छत्तीसगढ़ संस्कृत विद्यामण्डलम ह उत्तर मध्यमा हायर सेकेण्डरी अउ पूर्व मध्यमा हाई स्कूल परीक्षा के समय सारिणी जारी कर देहे। एखर अनुसार उत्तर मध्यमा म प्रथम वर्ष कक्षा ग्यारहवीं अउ दूसर वर्ष कक्षा बारहवीं के परीक्षा अगामी एक मार्च ले सुरू होके उन्नीस मार्च तक चलही। एखर अलावा पूर्व मध्यमा प्रथम वर्ष कक्षा नवमी अउ द्वितीय वर्ष कक्षा दसवीं के मुख्य परीक्षा अगामी दू मार्च ले इक्कीस मार्च तक आयोजित करे जाही। ए सबो परीक्षा मन निर्धारित तिथि म बिहनिया नौ बजे ले मंझनिया सवा बारा बजे तक चलही। एमा परीक्षार्थी मनके प्रायोगिक परीक्षा नियमित परीक्षार्थी मनके संगही ले जाही। परीक्षा अवधि म शासन डहार ले यदि कोई अवकाश या स्थानीय अवकाश घोषित करे जाही, तभो परीक्षा मन यथावत संपन्न होही।
उहें, छत्तीसगढ़ राज्य ओपन स्कूल डहार ले आयोजित मुख्य अउ अवसर परीक्षा म सम्मिलित होय बर काली इकतीस दिसंबर तक प्रवेश के अंतिम तिथि आय। ए निर्धारित तिथि के बाद एक जनवरी ले पन्द्रह जनवरी तक विलंब सुल्क के संग आवेदन जमा करे जा सकही। प्रवेश बर आवेदन पत्र छत्तीसगढ़ राज्य ओपन स्कूल के वेबसाइट म उपलब्ध हे। ऑनलाइन आवेदन फार्म अउ संलग्न दस्तावेज मनके प्रिंट आउट चयनित अध्ययन केंद्र ले सत्यापन कराना होही।
हॉकी-प्रतियोगिता
जांजगीर म आयोजित जाज्वल्यदेव चैंपियन ट्रॉफी हॉकी प्रतियोगिता संपन्न होगे हे। ए स्पर्धा के फाइनल मुकाबला तीन वर्ग म होइस, जेमा बालक वर्ग म जांजगीर टाइगर, बालिका वर्ग म सेवन सुपर स्टार टीम अउ बालक मिनी वर्ग म खेलो इंडिया सेंटर टीम विजेता रिहीन। ए स्पर्धा चार दिन तक चलिस अउ एमा कई ठन टीम सामिल होइन।