पूर्व प्रधानमंत्री अटल बिहारी वाजपेयी के जयंती म मुख्यमंत्री विष्णुदेव साय ह आज राज्य के ग्यारा लाख छिहत्तर हजार ले जादा किसान मनके दू बछर के धान के बांचे बोनस रासि तीन हजार सात सौ सोलह करोड़ रूपिया के वितरण करीन। ए मउका म रईपुर जिला के अभनपुर विकासखंड के बेन्द्री गांव म राज्य स्तरीय धान बोनस वितरण समारोह के आयोजन करे गीस।
समारोह ल संबोधित करत हुए मुख्यमंत्री ह किहीन कि ए बछर किसान मन ले इक्कीस कुंटल प्रति एकड़ के हिसाब ले धान के खरीदी करे जावत हे। सरकार किसान मनके पूरा धान खरीदही। श्री साय ह किहीन कि जरूरत पड़े म धान खरीदी के समय सीमा ल बढ़ाय जा सकत हे। ओमन किहीन कि इकतीस सौ रूपिया प्रति कुंटल के दर ले धान खरीदे के वादा घलो पूरा करही। मुख्यमंत्री ह किहीन कि राज्य के भाजपा सरकार हरेक वर्ग ल ध्यान म रखने वाला सरकार हे। मोदी के हर गारंटी पूरा करे जाही। ओमन किहीन कि गरीब भूमिहीन मजदूर मन ल हर बछर दस हजार रूपिया दे जाही। युवा मन बर पारदर्सिता के संग एक लाख सरकारी पदों म भर्ती करे जाही। ओमन किहीन कि महतारी वंदन योजना के तहत शादीसुदा माईलोगन मन ल हर महिना एक हजार रूपिया दे जाही। श्री साय ह दोहराइन कि साढ़े पांच हजार रूपिया मानक बोरा के दर ले तेंदू पत्ता के खरीदी करे जाही। ए मउका म मुख्यमंत्री ह लखपति दीदी योजना के हितग्राही मन ल चेक अउ प्रमाण पत्र के संग किसान मन ल कृषि एटीएम के वितरण करीन। ए दउरान मुख्यमंत्री ह आने-आने विभाग के स्टाल के अवलोकन करीन अउ योजना मनके जानकारी लीन। कारीकरम म उपमुख्यमंत्री विजय शर्मा के संग कतकोन विधायक घलो रिहीन।
इही बीच भाजपा के प्रदेस अध्यक्ष किरण सिंह देव ह किसान मन ल बोनस वितरण, प्रधानमंत्री आवास योजना के स्वीकृति अउ इक्कीस कुंटल प्रति एकड़ के हिसाब ले धान खरीदी करे बर मुख्यमंत्री विष्णुदेव साय ल बधई दीन।
अटल बिहार वाजपेयी जयंती-01
पूर्व प्रधानमंत्री अटल बिहारी वाजपेयी के जयंती आज प्रदेस म सुशासन दिवस के रूप म मनाय जावत हे। ए मउका म आने-आने कारीकरम आयोजित करे जात हे। मुख्यमंत्री विष्णुदेव साय ह आज अटल बिहारी वाजपेयी केंद्रीय विश्वविद्यालय बिलासपुर म आयोजित ‘‘कुल उत्सव-दू हजार तेईस‘‘ कारीकरम म सामिल होइन। ए मउका म मुख्यमंत्री ह किहीन कि प्रदेस म सुशासन लाय बर शैक्षणिक गुणवत्ता जरूरी हे। ओमन ह किहीन कि शिक्षा केंद्र मन म स्टाफ के कमी हे, जेमा सुधार के जरूरत हे। शैक्षणिक संस्थान मन म सब्बों सुविधा उपलब्ध कराय बर सरकार हर संभव प्रयास करही। श्री साय ह किहीन कि राज्य सरकार ‘‘छत्तीसगढ़िया सबले बढ़िया‘‘ के कहावत ल चरितार्थ करही।
ए बेरा म मुख्यमंत्री ह विश्वविद्यालय के पत्रिका ‘‘कन्हार‘‘ के संग आने प्रकासन के विमोचन घलो करीन। संगेसंग मुख्यमंत्री ह धनवंतरी प्राकृतिक चिकित्सा केंद्र, विश्वविद्यालय के रद्दा ज्ञानपथ के संग विश्वविद्यालय परिसर म बनाय गे, सहीद वीर नारायण सिंह व्यायाम शाला के लोकार्पण करीन।
ओति, प्रदेस के नगरीय निकाय मन म निर्वाचित जनप्रतिनिधि अउ आम जनता के मौजूदगी म कारीकरम के आयोजन करे गीस। ए मउका म स्व. वाजपेयी के फोटू उपर माला चढ़ाके निर्वाचित जनप्रतिनिधि अउ आम जनता ह ‘‘सुशासन स्थापित‘‘ करे के संकल्प लीन।
अटल बिहार वाजपेयी जयंती-02
राज्यपाल विश्वभूषण हरिचंदन ह पूर्व प्रधानमंत्री अटल बिहारी वाजपेयी के जयंती म ओमन ल नमन करीन। राज्यपाल अपन निवास म स्वर्गीय वाजपेयी के फेाटू उपर फूल चढ़ाके ओमन ल श्रध्दांजलि दीन।
उहें, सांसद सुनील सोनी अउ विधायक पुरंदर मिश्रा ह राजधानी के अवंती विहार के एटीएम चौक म अटल जी के मूर्मि उपर माला पहिराके ओमन ल नमन करीन। अइसने कैबिनेट मंत्री बृजमोहन अग्रवाल रईपुर के महाराजबंद तरिया तीर आयोजित कारीकरम म सामिल होइन।
वीर बाल दिवस
छत्तीसगढ़ के संग देसभर म काली वीर बाल दिवस मनाय जाही। ए बेरा म सब्बों पंजीकृत बाल देखरेख संस्था म प्रधानमंत्री नरेंद्र मोदी के संदेस के प्रसारण करे जाही। ए दउरान केंद्रीय संस्कृति मंत्रालय डहार ले बनाय गे ऑडियो-विजुअल के स्क्रीनिंग के संग वीर बाल दिवस उपर आधारित डिजीटल प्रदर्सनी लगाय जाही। संगेसंग वीरबाल प्रतियोगिता के विजेता मन ल ईनाम घलो दे जाही।
छत्तीसगढ़ म वीर बाल दिवस के मउका म मुख्यमंत्री विष्णुदेव साय राजधानी के निवास पहुना म साहसी लइका मनके सम्मान करही। उहें, जिला , नगर पालिका, वार्ड, ब्लॉक अउ ग्राम पंचायत स्तर म आने-आने गतिविधि के आयोजन करे जाही। एखर उद्देस्य युवा, किशोर, देसवासी अउ माईलोगन मन म राष्ट्र निर्माण बर योगदान के संग मूल्य ल स्थापित करना हे।
जानबा के मुताबिेक वीर बाल दिवस गुरू गोविंद सिंह के लइका मन के सब ले बड़े बलिदान अउ साहस के सुरता म मनाय जाथे।
विकसित भारत संकल्प यात्रा
विकसित भारत संकल्प यात्रा के तहत प्रदेस के आने-आने जघा मन म कारीकरम के आयोजन करे जात हे। इही कड़ी म आज जांजगीर-चांपा जिला के ग्राम पंचायत कुकदा, रिंगनी अउ बेरला म कारीकरम आयोजित करे गीस। ए मउका म अधिकारी अउ कर्मचारी मन ह ग्रामीण मन ल शासकीय योजना के जानकारी दीन। उहें, भारत ल विकसित देस बनाय के संकल्प दिलाइन। ए बेरा म जिला पंचायत के सीईओ ह उज्ज्वला योजना के तहत हितग्राही मन ल गैस कनेक्सन के वितरण करीन। कारीकरम म आने-आने विभाग डहार ले स्टॉल लगाके ग्रामीण मन ल योजना के जानकारी दे गीस।
माओवादी मुठभेड़
दंतेवाड़ा जिला म काली संझा होय मुठभेड़ म सुरक्षा बल मन ह एक इनामी के संग तीन माओवादी मन ल मार गिराय म सफल होय हे। तीनों माओवादी मन के शव बरामद कर ले गेहे।
जिला के पुलिस अधीक्षक गौरव राय ह घटना के पुष्टि करत हुए बतइन कि जिला मुख्यालय ले डीआरजी अउ बस्तर फाइटर्स के संयुक्त टीम तलासी अभियान बर निकले रिहीन। इही दौरान सुकमा अउ दंतेवाड़ा जिला के सीमा म डब्बाकुन्ना इलाका के जंगल म पहिली ले घात लगाके बइठे माओवादी मन ह सुरक्षा बल उपर फायरिंग सुरू कर दीन। जवान मन ह घलो जवाबी कार्रवाई करीन। आधा घंटा तक चले ए मुठभेड़ के बाद माओवादी मन जंगल डहार भाग गीन। जेखर बाद घटना के तलासी के दौरान सुरक्षा बल मन ह तीन माओवादी मनके शव बरामद करीन। एखरे संग कुछ हथियार घलो बरामद करे गेहे।
क्रिसमस
क्रिसमस के तिहार आज छत्तीसगढ़ के संग पूरा देस म उछाह के संग मनाय जात हे। प्रभु यीशु के जन्म के बेरा म ए तिहार मनाय जाथे। ए बेरा म राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेंद्र मोदी, छत्तीसगढ़ के राज्यपाल विश्वभूषण हरिचंदन अउ मुख्यमंत्री विष्णुदेव साय ह लोगन मन ल बधई दीन। राजधानी रईपुर के संग प्रदेस म घलो क्रिसमस के तिहार धार्मिक उत्साह अउ उल्लास के संग मनाय जात हे। आज राजधानी के बेैरन बाजार अउ जशपुर के चर्च के संग प्रदेस के आने-आने सहर के गिरिजा घर म बिसेस प्रार्थना सभा आयोजित करे गीस, अउ लोगन मन ह एक-दूसर ल क्रिसमस के बधई दीन। ए बेरा म गिरिजा घर ल आकर्षक रूप ले सजाय गेहे।
राष्ट्रीय बाल वैज्ञानिक प्रदर्शनी
महाराष्ट्र के पुणे म काली ले पचासवां राष्ट्रीय बाल वैज्ञानिक प्रदर्सनी सुरू होही। जेन एकतीस दिसंबर तक चलही। ए प्रदर्सनी बर प्रदेस के नौ छात्र के चयन होय हे। एमा नारायणपुर जिला के रामकृष्ण मिसन विवेकानंद विद्यापीठ के कक्षा बारहवीं के छात्र दक्ष गावड़े घलो सामिल हे। जानबा के मुताबिक पाछू दिन होवइया राज्य स्तरीय बाल विज्ञान प्रदर्सनी म अच्छा प्रदर्सन के आधार म ए विद्यार्थी के चयन राष्ट्रीय बाल वैज्ञानिक प्रदर्सनी बर होय हे।