मुख्यमंत्री-प्रधानमंत्री मुलाकात
छत्तीसगढ़ के मुख्यमंत्री विष्णुदेव साय ह आज नई दिल्ली म प्रधानमंत्री नरेंद्र मोदी ले भेंट करीन। ए दउरान ओमन प्रधानमंत्री ले छत्तीसगढ़ के विकास अउ जनहित ले जुड़े मुद्दा उपर गोठबात करीन। मुख्यमंत्री ह प्रधानमंत्री ल मोदी के गांरटी उपर छत्तीसगगढ़ सरकार डहार लेगे तुरते फैसला अउ पहल करे के जानकारी दीन। मुख्यमंत्री ह प्रधानमंत्री ल बतइन हे कि सरकार बनतेच पहिली कैबिनेट बइठका म अट्ठारा लाख ले जादा परिवार मन ल प्रधानमंत्री आवास मंजूरी करे गेहे। उहें, राज्य के किसान मनले करे गे वादा के मुताबिक राज्य सरकार ह पाछू एक नवंबर ले इक्कीस कुंटल प्रति एकड़ धान इकतीस सौ रूपिया के दर ले खरीदे के फइसला लेहे।
मुख्यमंत्री ह बतइन कि पूर्व प्रधानमंत्री अटल बिहारी वाजपेयी के जन्मदिन सुशासन दिवस म अवईया पच्चीस दिसंबर के प्रदेस के तेरह लाख ले जादा किसान मन ल दू बछर के बांचे धान के बोनस रासि करीबन तीन हजार सात सौ सोलह करोड़ रूपिया के भुगतान करे जाही। केंद्र सरकार डहार छत्तीसगढ़ ल दू हजार चार सौ पचासी करोड़ रूपिया के रासि जारी करे अउ केंद्रीय पूल म पंद्रह लाख मीट्रिक टन उसना चउर लेके मंजूरी दे म मुख्यमंत्री ह प्रधानमंत्री के आभार जताइन।
प्रधानमंत्री ले भेंट के दउरान प्रदेस के उपमुख्यमंत्री अरूण साव अउ विजय शर्मा घलो मौजूद रिहीन।
उहें, मुख्यमंत्री विष्णुदेव साय ह आज नई दिल्ली म उपराष्ट्रपति जगदीप धनखड़ अउ केंद्रीय गृहमंत्री अमित शाह, केंद्रीय वित्त मंत्री निर्मला सीतारमन, ले सौजन्य भेंट करीन। ए दउरान राज्य के उपमुख्यमंत्री अरूण साव अउ विजय शर्मा घलो मौजूद रिहीन।
पीएम-विकसित भारत संकल्प यात्रा
प्रधानमंत्री नरेंद्र मोदी ह विकसित भारत संकल्प यात्रा कारीकरम के तहत बने एक करोड़ ले जादा आयुष्मान कार्ड मन उपर खुशी व्यक्त करीन हे। प्रधानमंत्री ह सोशल मीडिया पोस्ट म किहीन कि ए उपलब्धि काफी बड़ उत्साह बढ़ाने वाला हे। ओमन किहीन कि विकसित भारत संकल्प यात्रा के उद्देस्य देसभर के गरीब मन तक जन कल्याणकारी योजना मन के फायदा पहुंचाना आय।
मुख्य सचिव-बैठक
मुख्य सचिव अमिताभ जैन ह आज रईपुर के चिप्स कार्यालय म राज्य सरकार के घोषणा पत्र के क्रियान्वयन अउ परिपालन बर समयबध्द कार्ययोजना तइयार करे बर आने-आने विभाग मनके सचिव के बइठका लीन। बइठका म घोषणा पत्र म करे गे घोषणा मन ल पूरा करे बर सौ दिन म करे जाने वाला काम मन के संबंध म विचार-विमर्स करे गीस। मुख्य सचिव ह अधिकारी मन ल निरदेस करे हे कि, ओमन राज्य शासन के सौ दिन के भीतर करे जा सकने वाला काम ल निर्धारित करके ओला समय-सीमा म पूरा करय। वीडियो कॉन्फ्रेंसिंग के माध्यम ले आयोजित बइठका म मुख्य सचिव ह बजट अउ नॉन बजट के काम ल अपडेट कर तुरते कार्रवाही करे के निरदेस घलो अधिकारी मन ल दीन।
पुलिस भर्ती-विज्ञापन
पुलिस मुख्यालय डहार छत्तीसगढ़ सशस्त्र बल म आरक्षक, सहायक प्लाटून कमांडर, प्रधान आरक्षक समेत एक सौ तैंतीस खाली पद म सीधी भर्ती मन बर विज्ञापन जारी करे गेहे। ए पद मन उपर भर्ती बर ऑनलाइन आवेदन के प्रक्रिया अवईया एक जनवरी ले सुरू होही। पंद्रह फरवरी तक आवेदन करे जा सकही।
सुशासन दिवस
पूर्व प्रधानमंत्री अटल बिहारी वाजपेयी के जयंती पच्चीस दिसंबर के ‘सुशासन दिवस‘ के रूप म मनाय जाही। ए मउका म राज्य के किसान मन ल खरीफ विपणन बछर दू हजार चौदा-पंद्रह अउ दू हजार पंद्रह-सोलह के बांचे धान के बोनस के रासि करीबन तीन हजार सात सौ सोलह करोड़ रूपिया के भुगतान करे जाही।
सुशासन दिवस के मउका म निर्वाचित जनप्रतिनिधि अउ आम जनता के मौजूदगी म नगरीय निकाय मन म स्थापित अटल चौक म बिहनिया दस बजे ले कारीकरम होही। संगेसंग स्वर्गीय वाजपेयी के फोटू म माला पहिरा के निर्वाचित जनप्रतिनिधि अउ आम जनता डहार ‘सुशासन स्थापित‘ करे के संकलप घलो ले जाही। इही दिन ले नगरीय निकाय मन म एक हफ्ता के स्वच्छता अभियान सुरू होही। सुशासन दिवस म मउका म प्रदेस के सबो नगरीय निकाय म अटल संध्या के आयोजन करे जाही। एखर तहत कवि सम्मेलन, कविता पाठ, अटल विचार संगोष्ठी, निबंध स्पर्धा अउ अटल जी के जीवन, व्यक्तित्व तथा कृतित्व उपर केंद्रित प्रदर्सनी आयोजित करे जाही।
विकसित भारत संकल्प यात्रा
विकसित भारत संकल्प यात्रा के तहत प्रदेस के आने-आने जघा मन म कारीकरम के आयोजन करे जावत हे। इही कड़ी म बालोद जिला के ग्राम पंचायत मन म आयोजित सिविर म ग्रामीण मन ल प्रधानमंत्री आवास, प्रधानमंत्री सुरक्षा बीमा, किसान सम्मान निधि समेत केंद्र सरकार के आने-आने जनकल्याणकारी योजना मन के जानकारी दे जावत हे। ए सिविर म अब तक छह हजार ले जादा हितग्राही मन के आयुष्मान कार्ड बांटे गेहे। उहें, करीबन सौ हितग्राही मन ल उज्जवला योजना के तहत नवा गैस कनेक्शन दे गेहे।
इही बीच, कोरिया जिला के चरचा-कॉलरी निवासी अनिल कुमार कुशवाहा ह बताइन कि प्रधानमंत्री उज्जवला योजना के तहत गैस सिलेंडर मिले ले खाना बनाय के काम आसान हो गेहे। संगेसंग धुंआ ले घलो मुक्ति मिले हे।
इही, जिला के सोनहत निवासी रामधन सिंह ह बताइन हे कि स्वच्छ भारत अभियान के तहत शौचालय के निर्माण होय ले गांव के वातावरण ह साफ-सुथरा हेागे हे। संगेसंग शौचालय के उपयोग ल लेके लोगन मन म जागरूकता घलो आय हे।
वीर बाल दिवस
छत्तीसगढ़ समेत देसभर म अवईया छब्बीस दिसंबर के ‘‘वीर बाल दिवस‘‘ मनाय जाही। ए मउका म जम्मांे पंजीकृत बाल देखरेख संस्था मन म प्रधानमंत्री नरेंद्र मोदी के संदेस के प्रसारण करे जाही। ए मउका म केंद्रीय संस्कृति मंत्रालय डहार ले बनाय गे ऑडियो-विजुअल के स्क्रीनिंग के संगेच वीर बाल दिवस उपर आधारित डिजिटल प्रदर्सनी लगाय जाही। ए दउरान वीर बाल प्रतियोगिता के विजेता मन ल पुरस्कृत घलो करे जाही।
छत्तीगढ़ म घलो वीर बाल दिवस मनाय के तियारी जोरसोर ले चलत हे। एखर बर जम्मों कलेक्टर मन ल महिला अउ बाल विकास विभाग डहार ले विस्तृत दिसा-निरदेस जारी करे गेहे। वीर बाल दिवस म जिला, नगर पालिका, वार्ड, ब्लॉक अउ ग्राम पंचायत स्तर म आने-आने गतिविधि के आयोजन करे जाही। खबर के मुताबिक वीर बाल दिवस गुरू गोविंद सिंह के पुत्र के बलिदान अउ साहस के स्मृति म मनाय जाथे।
माओवादी मुठभेड़
सुकमा जिला म आज होय मुठभेड़ म सुरक्षा बल मन ह तीन ले चार माओवादी मन घायल होय के दावा करे हे। मिले खबर के मुताबिक डीआरजी अउ सीआरपीएफ के समलात टीम सर्चिंग म निकले रिहीन। इही दउरान माओवादी मन ह गोलीबारी सुरू कर दीस। जवान डहार ले करे गे जवाबी कार्रवाई के बाद माओवादी मन ह जंगल के फायदा उठाके भगागे। सुरक्षा बल ह घटनास्थल म मिले खून के धब्बा ले दावा करे हे कि ए मुठभेड़ म तीन ले चार माओवादी मन ल गोली लगे हे। घटना के बाद इलाका म सर्चिंग अभियान तेज कर दे गेहे।
उहें, बीजापुर जिला के गंगालूर थाना क्षेत्र म डूमरी पालनार के जंगल म माओवादी मन डहार बनाय गे करीबन तीस फीट ऊंचा स्मारक ल डीआरजी अउ महिला कमांडो के समलात टीम ह ध्वस्त कर दे गेहे।
इही बीच, दंतेवाड़ा जिला म जगरगुंडा थाना क्षेत्र के पलारगुट्टा-बेंनपल्ली के जंगल म सुरक्षा बल ह छह माओवादी मन ल गिरफ्तार करे हे। पकड़े गे माओवादी मन के पहिचान डी.ए.के.एम.एस. संगठन के सदस्य के रूप म करे गेहे।
जिले की चिट्ठी
प्रादेसिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म ‘‘कांकेर‘‘ जिला के गतिविधि के बारे म जानकारी दे जाही।
हल्बी/गोण्डी-समाचार बुलेटिन
सुनईया मन ल बतादन काली ईतवार के ‘‘हल्बी अउ गोण्डी‘‘ म समाचार बुलेटिन प्रसारित करे जाही। ए दूनों बुलेटिन ल आकाशवाणी केंद्र जगदलपुर ले प्रसारित करे जाही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे ले प्रसारित करे जाही।