आज दिनभर के खबर ल अपन गुरतुर छत्तीसगढ़ी भाखा म पढ़व

मंत्रिमंडल गठन

मुख्यमंत्री विष्णुदेव साय ह अपन मंत्रिमंडल के विस्तार कर दीन हे। एमा नौ विधायक मन ल शामिल करे गेहे। राज्यपाल विश्वभूषण हरिचंदन ह आज राजभवन म राखे गे कार्यक्रम म ए विधायक मन ल मंत्री पद के शपथ दिलाइन। एमा बृजमोहन अग्रवाल, रामविचार नेताम, केदार कश्यप, दयालदास बघेल, लखनलाल देवांगन, श्याम बिहारी जायसवाल, ओ.पी.चौधरी, लक्ष्मी राजवाड़े अउ टंकराम वर्मा शामिल हरय। मंत्रिमंडल म चार पूर्व मंत्री समेत पांच नवा सदस्य मन ल जगा दे गेहे। मंत्रिमंडल विस्तार के बाद राज्य म बारा मंत्री होगे हे।
राज्य मंत्रिमंडल म अधिकतम तेरह मंत्री हो सकत हे। अइसने मंत्री के एक पद अभी घलो खाली हे। शपथ ग्रहण कार्यक्रम म मुख्यमंत्री विष्णुदेव साय, उप मुख्यमंत्री अरूण साव अउ विजय शर्मा के संघरा विधानसभा अध्यक्ष डॅाक्टर रमनसिंह, पूर्व मुख्यमंत्री भूपेश बघेल, नवनिर्वाचित विधायक, जनप्रतिनिधि अउ वरिष्ठ प्रशासनिक अधिकारी मौजूद रीहिन।
इही बीच मुख्यमंत्री विष्णुदेव साय ले आज मंत्रालय म मंत्रिमंडल के नवा बने सदस्य मन मुलाकात करीन। मुख्यमंत्री ह जम्मों मंत्री मन ल फुल भेंट करके अउ मिठाई खवाके बधाई अउ शुभकामना दीन। ए मौका म उप मुख्यमंत्री अरूण साव अउ विजय शर्मा घलो मौजूद रीहिन।
एखर पहिली राज्यपाल ह पाछू तेरह दिसंबर के मुख्यमंत्री विष्णुदेव साय के संगेसंग उप मुख्यमंत्री के रूप म अरूण साव अउ विजय शर्मा ल पद अउ गोपनीयता के शपथ दिलाय रीहिन।

मुख्यमंत्री-कलेक्टर निर्देश

मुख्यमंत्री विष्णुदेव साय ह राज्य म कानून व्यवस्था बनाय राखे बर जम्मों जिला के कलेक्टर अउ पुलिस अधीक्षक मन ल कड़ा निरदेस दीन हे। आज ओमन वीडियो कॉन्फ्रेंसिंग के माध्यम ले लेगे बइठका म राज्य के कानून व्यवस्था के जानकारी लीन। ए दौरान ओमन किहीन कि प्रदेस म कानून व्यवस्था के राज होनी चाही। ओमन किहीन कि जुआ-सट्टा अउ सराब के अवैध बिक्री के मामला म कड़ा कार्रवाई करे जाय। एखरे संग ओमन राजस्व के प्रकरण मनके समय म निराकरण करे के निरदेस दीन। ओमन किहीन कि राजस्व मामला मनके निराकरण म देरी नइ सहे जाही।

केंद्र राशि

केंद्र ह छत्तीसगढ़ सरकार ल करीबन दू हजार चार सौ छियांसी करोड़ रूपिया के किश्त जारी करे हे। ए रासि केंद्र सरकार डहार ले हालेच म ग्यारा दिसंबर के जारी करे गे किश्त के अतिरिक्त हरय। ए रासि ले राज्य सरकार ल समाज कल्याण अउ अधोसंरचना विकास योजना मनके वित्तीय पोषण म मजबूती मिलही।
मुख्यमंत्री विष्णु देव साय ह केंद्र सरकार डहार ले केंद्रीय कर ले मिले रासि म ले छत्तीसगढ़ कि हिस्सा के रासि राज्य ल हस्तांरित करे उपर प्रधानमंत्री नरेंद्र मोदी अउ केंद्रीय वित्तमंत्री निर्मला सीतारमन बर आभार व्यक्त करीन हे।

उसना चावल अनुमति

केंद्र सरकार ह छत्तीसगढ़ ले सेंट्रल पूल म पंद्रह लाख मीट्रिक टन उसना चांवल ले जाय के अनुमति प्रदान कर देहे। मुख्यमंत्री विष्णुदेव साय ह केंद्र सरकार ले उसना चांवल के उपार्जन के अनुमति मिले म कीहिन कि डबल इंजन के सरकार होय ले राज्य ल ए फायदा मिले हे । ओमन एखर बर प्रधानमंत्री नरेंद्र मोदी अउ केंद्रीय खाद्य मंत्री पीयूष गोयल ल आभार दीन हे।
बतादन कि छत्तीसगढ़ ले उसना चावल उपार्जित करे जाय के अनुमति बहुत दिन ले लंबित रीहिस। ए संबंध म मुख्यमंत्री विष्णुदेव साय ह केंद्रीय खाद्य मंत्री पीयूष गोयल ल इक्कीस दिसंबर के चिट्ठी लिखे रीहिन । ओमन अपन चिट्ठी म सेंट्रल पूल म चावल उपार्जन के कोटा इकसठ लाख मीट्रिक टन ले बढ़ाके चौहत्तर लाख करे अउ राज्य ले उनसठ लाख मीट्रिक टन अरवा चावल  अउ पंद्रह लाख मीट्रिक टन उसना चावल ले जाय के अनुरोध करे रीहिन।

मुख्यमंत्री कृतज्ञता ज्ञापन

मुख्यमंत्री विष्णुदेव साय ह कीहिन कि राज्य सरकार समृद्ध अउ सशक्त छत्तीसगढ़ बनाय बर कटिबद्ध हे । ओमन कीहिन कि एखर बर पूरा निष्ठा ले काम करबो- ये बात मुख्यमंत्री श्री साय काली विधानसभा म राज्यपाल के अभिभाषण म कृतज्ञता ज्ञापन के दौरान कीहिन ।
मुख्यमंत्री ह राज्यपाल डहार ले देगे भाषण बर आभार व्यक्त करत कीहिन कि राज्य के जनता ह छत्तीसगढ़ महतारी के सेवा करे के जउन दायित्व हमला सौपें हे। ओला पूरा निष्ठा ले निभाबो। श्री साय ह कीहिन कि अन्नदाता सुखी भवः के ये वाक्य के संग काम करबो अउ किसान मनके संतुष्टि के पूरा ध्यान रखबो। ए मौका म ओमन पक्ष अउ विपक्ष के सदस्य मनके घलो धन्यवाद करीन। एखरे संग राज्यपाल के अभिभाषण उपर कृतज्ञता प्रस्ताव पारित करे गे।
सत्र के समापन के मौका म विधानसभा अध्यक्ष डॅाक्टर रमनसिंह, मुख्यमंत्री विष्णुदेव साय, अउ नेता प्रतिपक्ष डॅाक्टर चरणदास महंत ह सत्र के सफल संचालन बर जम्मों सदस्य मन बर आभार जताइन। विधानसभा अध्यक्ष डॅाक्टर रमनसिंह ह कार्रवाई पूरा होय के बाद विधानसभा के कार्यवाही अनिश्चितकाल बर स्थगित कर दीन। ओमन कीहिन कि विधानसभा के अवइया सत्र फरवरी महीना के पहिली हप्ता म बुलाय जाय के संभावना हरय।

माओवादी समाचार

बीजापुर जिला म आज सुरक्षा बल अउ माओवादी के बीच होय मुठभेड़ म एक जवान घायल होगे। उंहे मुठभेड़ म दू ले तीन माओवादी मनके घलो घायल होय के खबर हे।
मिले जानकारी के अनुसार जांगला थाना क्षेत्र के ग्राम पोटेनार के जंगल म माओवादी मनके मौजूदगी के सूचना म डीआरजी अउ बस्तर फाईटर के जवान तलाशी अभियान म निकले रीहिन। ए दौरान पोटेनार के जंगल म माओवादी मन सुरक्षा बल उपर फायरिंग शुरू कर दीन। जवान मन कोति ले करे गे जवाबी कार्रवाई म दू ले तीन माओवादी ल गोली लगे के संभावना हरय। उंहे मुठभेड़ के दौरान माओवादी मन डहार ले लगाये गे प्रेशर बम के चपेट म आय ले सुरक्षा बलके एक जवान घायल होगे। घायल जवान ल बीजापुर जिला अस्पताल म भर्ती कराय गेहे, जिहंा ओखर हालत खतरा ले बाहर बताय जात हे ।
उंहे इही जिला म सुरक्षा बल ह माओवादी मन कोति ले लगाये गे पांच किलो वजनी विस्फोटक बरामद करे हे, जेला मउकाच म बम निरोधक दस्ता ह निष्क्रिय कर दीस। मिले जानकारी के अनुसार माओवादी मन ए विस्फोटक सुरक्षा बल मन ल नुकसान पहुंचाय के उद्देश्य ले भैरमगढ़ थाना क्षेत्र के अंतर्गत बेलचर रद्दा उपर लगाये रीहिस।
ओति दंतेवाड़ा जिला के मालेवाही थाना क्षेत्र म माओवादी मन बारसूर-पल्ली रद्दा उपर पेड़ काटके अउ पथरा मढ़ाके अवई जवई बाधित कर देहे। एखर सेती बारसूर-नारायणपुर रद्दा बंद रीहिस।

विश्व स्वास्थ्य संगठन-केारोना

विश्व स्वास्थ्य संगठन ह कोरोना वायरस के बहुरूप जे.एन-वन के तेजी ले फैले के सेती एला वेरिएंट ऑफ इंट्रेस्ट श्रेणी म राखे हे। संगठन ह केहे हे कि कोरोना के ए नवा रूप ले फिलहाल लोगन मन ल कोनो खतरा नइ हे अउ मौजूदा टीका एखर ले सुरक्षा दीही। जे.एन-वन चीन, ब्रिटेन, भारत अउ अमेरिका समेत विश्व के कई ठिन देश म पाय गेहे।