राज्य सरकार ह किसान मन ले समर्थन मूल्य म प्रति एकड़ इक्कीस कि्ंवटल धान खरीदी करे के आदेस जारी कर देहे। खाद्य अउ नागरिक आपूर्ति विभाग ह स्पष्ट करे हे कि प्रति एकड़ इक्कीस कुंटल के दर ले धान खरीदी के लाभ ओ किसान मन ल घलो दे जाही, जउन मन ए आदेस के पहिली अपन धान बेच डरे हे।
मुख्यमंत्री विष्णुदेव साय ह कहिन हे कि छत्तीसगढ़ सरकार जनता ले करे जम्मों वादा ल पूरा करही। ओमन किहीन कि राज्य के किसान मन ले इकतीस सौ रूपिया प्रति कुंटल के दर ले धान खरीदी करे जाही। प्रदेस म ए बछर करीबन एक सौ तीस लाख मीटरिक टन धान खरीदी के लक्ष्य हे। समर्थन मूल्य म धान खरीदी के एवज म किसान मन ल करीबन चालीस हजार करोड़ रूपिया के भुगतान करे जाही।
खबर के मुताबिक राज्य म अब तक किसान मन ले समर्थन मूल्य म पन्द्रह कुंटल धान के खरीदी करे जावत रिहीस, जेला सरकार ह बढ़ाके इक्कीस क्विंटल कर देहे। उहें, इकतीस सौ रूपिया प्रति कुंटल के दर ले खरीदी होय म किसान मन ल प्रति एकड़ करीबन साढ़े तेईस हजार रूपिया के उपरहा लाभ मिलही।
मुख्यमंत्री ह किहीन कि पच्चीस दिसंबर के देस के पूर्व प्रधानमंत्री अटल बिहारी वाजपेयी के जयंती के मउका म भाजपा के पूर्ववर्ती सरकार के कार्यकाल के आखिरी दू बछर के धान खरीदी के बांचे बोनस रासि के रूप म करीबन तीन हजार सात सौ सोलह करोड़ रूपिया के भुगतान करे जाही।
विस-अनुपूरक बजट
छत्तीसगढ़ के छठवां विधानसभा के पहिली सत्र के आखिरी दिन आज करीबन तेरह हजार करोड़ रूपिया के अनूपूरक बजट पारित होगे। एमा राज्य के करीबन अट्ठारह लाख ग्रामीण परिवार मन ल प्रधानमंत्री आवास योजना के तहत पक्का मकान दे बर करीबन तीन हजार आठ सौ करोड़ रूपिया के प्रावधान करे गेहे। एखर संगेसंग किसान मन ल भाजपा के पूर्ववर्ती सरकार के आखिरी दू बछर म करे गे धान खरीदी के बकाया बोनस के भुगतान बर घलो करीबन अड़तीस सौ करोड़ रूपिया के प्रावधान करे गेहे।
मुख्यमंत्री विष्णुदेव साय ह काली ए अनुपूरक बजट सदन म पेस करे रिहीस। एमा सत्तापक्ष अउ विपक्ष के सदस्य मन ह चर्चा म भाग लीन। चर्चा के जवाब देवत मुख्यमंत्री ह कहिन कि प्रदेस के जनता मन ह मोदी के गारंटी यानी भाजपा के संकल्प यात्रा के प्रति अपन भरोसा जताय हे अउ ओमन ल छत्तीसगढ़ महतारी के सेवा के अवसर दीन हे। श्री साय ह कहिन कि माईलोगिन मन ल सशक्त बनाय अउ ओमन ल आर्थिक संबल दे बर महतारी वंदन योजना के प्रावधान करे गेहे। एखर बर अनुपूरक बजट म करीबन बारह सौ करोड़ रूपिया आवंटित करे के प्रस्ताव करे गेहे। ओमन बतईन कि राज्य सरकार ह हर घर नल ले जल पहुंचाय के दिसा म घलो काम सुरू कर देहे। ए योजना के तहत केन्द्र ले मिलइया कुल रासि ले एक हजार दू सौ तीस करोड़ रूपिया के खरचा राज्य सरकार ह वहन करही। ओमन बतईन कि अनुपूरक बजट म कृषक जीवन ज्योति योजना अउ केन्द्रीय स्वास्थ्य योजना बर घलो बिसेस प्रावधान करे गेहे।
किरणदेव-भाजपा प्रदेश अध्यक्ष
जगदलपुर विधानसभा क्षेत्र ले नव-निर्वाचित विधायक किरणदेव ल भारतीय जनता पार्टी के नवा प्रदेस अध्यक्ष बनाय गेहे। पार्टी के राष्ट्रीय महासचिव अरूण सिंह ह बतईन कि भाजपा के राष्ट्रीय अध्यक्ष जगतप्रकाश नड्डा के निरदेस म किरणदेव के नियुक्ति तुरते परभाव ले लागू होगे हे।
खबर के मुताबिक जगदलपुर के सामान्य सीट ले पहिली घांव विधायक चुने गे किरणदेव एखर पहिली जगदलपुर नगर निगम के महापौर रहिन हे। इकसठ बछर के किरणदेव ह बीएससी उपाधि प्राप्त करे संग कानून की पढ़ाई घलो करे हे। ओमन अधिवक्ता होय के संगेसंग खेती-किसानी काम म घलो सक्रिय हवय।
लोकसभा चुनाव-आयोग पत्र
चुनाव आयोग ह अवइया लोकसभा चुनाव के तैयारी सुरू कर देहे। लोकसभा चुनाव के संगेसंग चार ठिन राज्य म विधानसभा चुनाव घलो होही। आयोग ह देस के जम्मों राज्य मनके मुख्य सचिव अउ मुख्य निर्वाचन पदाधिकारी मन ल भेजे चिट्ठी म प्रशासनिक व्यवस्था ल सुचारू रूप ले संचालन करे के संगेसंग मतदाता सूची के संबंध म दिसा-निरदेस जारी करे हे। अधिकारी मन बतईन कि दू जनवरी ले मतदाता सूची के पुनरीक्षण के काम सुरू हो जही।
परीक्षा पे चर्चा
पढ़ईया लइका मन ल परीक्षा के तनाव ले दूरिहा राखे के उद्देश्य ले प्रधानमंत्री के कारीकरम ‘‘परीक्षा पे चर्चा‘‘ के सातवां चरण के आयोजन जनवरी महीना के अखिरी हफ्ता म प्रस्तावित हे। स्कूल शिक्षा विभाग के अधिकारी अउ जिला मिशन समन्वयक मन ले केहे गेहे कि परीक्षा पे चर्चा कारीकरम म जादा ले जादा विद्यार्थी, सिक्षक अउ परिवार वाले मनके भागीदारी सुनिश्चित करे बर जम्मों स्कूल मन ल सूचित करे जाय। ए कारीकरम बर नामांकन के प्रक्रिया सुरू होगे हे। एमा छठवीं ले बारहवीं कक्षा के विद्यार्थी के संगेसंग ए कक्षा के सिक्षक अउ लइका के माता-पिता मन घलो वस्तुनिष्ठ प्रश्न के उत्तर देके अपन नामांकन करा सकत हे।
माओवादी समाचार
बीजापुर जिला के सोमनपल्ली गांव म आज माओवादी मन ह मोबाइल टॉवर म आगी लगा दीन। ए घटना के बाद माओवादी मन ह तारलागु़ड़ा अउ भैरमगढ़ इलाका म बैनर-पोस्टर घलो फेंकीन। भैरमगढ़ के थाना प्रभारी रविशंकर साहू ह बतईन कि माओवादी मन ह टॉवर के बेटरी बॉक्स म आगी लगइन, जेखर ले तीर-तखार के क्षेत्र म मोबाइल सेवा प्रभावित होय हे।
उहें, काली संझा माओवादी मन ह बीजापुर-जगदलपुर रद्दा म पेड़ काटके रद्दा ल बंद करे के कोसिस घलो करीन। फेर, कुछेक देर बाद सुरक्षा बल के जवान मन ह पेड़ ल हटाके अवई-जवई ल सुरू कर दीन।
इही बीच, सुकमा जिला के नागाराम इलाका म काली माओवादी मनके संग होय मुठभेड़ के दउरान सुरक्षा बल के जवान मन ह घटनास्थल ले दू ठिन रायफल के संगेसंग माओवादी मनके सामान बरामद करे हे। जिला के पुलिस अधीक्षक किरण चव्हाण ह बतईन कि तलाशी अभियान के दउरान डीआरजी अउ कोबरा बटालियन के जवान मन ह माओवादी मनके सिविर ल घलो ध्वस्त कर दीन।
नागरिक संपर्क कार्यक्रम
कोंडागांव जिला के खालेमुरवेंड गांव म केन्द्रीय रिजर्व पुलिस बल-सीआरपीएफ डहार ले नागरिक संपर्क कार्यक्रम के आयोजन करे गीस। ए मउका म सीआरपीएफ के कमांडेट राकेश चौधरी ह स्थानीय स्कूल के विद्यार्थी मन ल खेल सामान, स्कूल बैग अउ टी-शर्ट बांटीन। उहें, माहुर बेड़ा गांव के यंग स्टार क्लब ल क्रिकेट के सामान अउ खेल उपकरण दीन। श्री चौधरी ह किहीन कि स्थानीय परिवार अउ उंखर लइका मनके संग संपर्क बढ़ाना ए कारीकरम के मुख्य उद्देश्य हरय। ओमन किहीन कि स्थानीय लइका मन ल खेल के प्रति जागरूक करे के संगेसंग ओमन मन ल स्वास्थ्य के प्रति घलो सचेत करे जा सकत हे।
बैडमिंटन चैंपियनशिप
गुवाहाटी म चलत पच्यासीवां सीनियर राष्ट्रीय बैडमिंटन चैंपियनशिप म भारतीय रेलवे के महिला टीम ह कांस्य पदक हासिल करे हे। ए जीत म दक्षिण पूर्व मध्य रेलवे के दीक्षा चौधरी अउ के. प्रीती ह सुघ्घर प्रदर्सन करीन। ए दूनों खिलाड़ी रईपुर रेलमंडल म काम करत हे।
पंडित सुंदरलाल शर्मा-जयंती
स्वतंत्रता संग्राम सेनानी अउ वरिष्ठ साहित्यकार पंडित सुंदरलाल शर्मा के आज जयंती आय। ए मउका म प्रदेस म कतकोन कारीकरम होवत हे। इही कड़ी म मुख्यमंत्री विष्णुदेव साय ह रईपुर म वरिष्ठ इतिहासकार आचार्य रामेन्द्रनाथ मिश्र डहार ले संपादित श्री कृष्ण जन्मस्थान समाचार पत्र पुस्तक के विमोचन करीन। ए मउका म मुख्यमंत्री ह कहिन कि ए पुस्तक के माध्यम ले युवा मन ह पंडित सुंदरलाल शर्मा के संघर्ष अउ योगदान ल जान सकही।
अउ अब पेस हे मौसम के हाल….
प्रदेस म अवइया एक ले दू दिन के दउरान जाड़ म कमी आय के संभावना हे। मौसम विभाग के मुताबिक पश्चिमी विक्षोभ के सेती ए बेरा प्रदेस म बंगाल के खाड़ी ले नमी आवत हे। संगेसंग हवा के दिसा म घलो बदलाव के संभावना हे। ए दउरान उत्तरी हवा के मंद पड़े ले न्यूनतन तापमान म दू ले तीन डिग्री सेल्सियस के बढ़ोतरी हो सकत हे। उहें, प्रदेस के कुछेक हिस्सा म बादल छाय रेहे के संभावना हे।