छत्तीसगढ़ के छटवां विधानसभा के पहिली सत्र काली ले सुरू होही। इक्कीस दिसंबर तक चलईया ए सत्र म तीन बइठका होही। सत्र के पहिली दिन काली विधानसभा के प्रोटेम स्पीकर रामविचार नेताम नव-निर्वाचित विधायक मन ल शपथ देवाही। संगेसंग नवा विधानसभा अध्यक्ष के चुनाव होही। खबर के मुताबिक राजनांदगांव ले निर्वाचित विधायक अउ पूर्व मुख्यमंत्री डॉक्टर रमन सिंह ह काली सत्रह दिसंबर के विधानसभा अध्यक्ष पद बर अपन नामांकन दाखिल करीन हे, उहें, सत्र के दूसर दिन राज्यपाल विश्वभूषण हरिचंदन के अभिभाषण होही। तीसरइया अउ आखिरी दिन इक्कीस दिसंबर के राज्यपाल के अभिभाषण म प्रस्तुत कृतज्ञता ज्ञापन प्रस्ताव म गोठबात होही। सत्र के बेरा वित्तीय कार्य अउ आने शासकीय काम घलो करे जाही।
मंत्रीमंडल विस्तार
छत्तीसगढ़ म काली मंत्रिमंडल के बढ़वार होय के संभावना हरय। रईपुर के इंडोर स्टेडियम म सपथ ग्रहण समारोह के तियारी सुरू होगे हे, फेर अभी अधिकृत रूप ले एखर पुष्टि नइ हो पाए हे।
एखर पहिली मुख्यमंत्री विष्णुदेव साय ह आज दिल्ली ले रईपुर लहुटे के बाद विमानतल म मीडिया ले गोठबात करत किहीन कि मोदी के गारंटी के हर वादा ल पूरा करे जाही। ओमन किहीन कि मंत्री मंडल के जल्दीच बढ़हार होही। मंत्रिमंडल म नवा अउ जुन्ना चेहरा सामिल होही। मुख्यमंत्री ह बताइन कि मंत्रिमंडल के गठन ल लेके केंद्रीय गृह मंत्री अमित शाह अउ भाजपा के राष्ट्रीय अध्यक्ष जे.पी.नड्डा समेत आने राष्ट्रीय नेता मन ले गोठबात होगे हे।
मुख्यमंत्री-सम्मान समारोह
मुख्यमंत्री विष्णुदेव साय आज रईपुर म राखेगे अनुसूचित जनजाति शासकीय सेवक विकास संघ कोति ले आदिवासी समाज के नव-निर्वाचित विधायक मनके सम्मान समारोह अउ आमसभा म सामिल होइन। ए बेरा म श्री साय ह किहीन कि राज्य म अनुसूचित जनजाति के सर्वांगिण विकास राज्य सरकार के प्राथमिकता हरय। ओमन किहीन कि ‘‘सबके साथ, सबका विकास‘‘ के संकल्प लेके मोदी के गारंटी म छत्तीसगढ़ के जनता ले भाजपा ह जउन वादा करे हे, ओला पूरा करे के जवाबदारी राज्य सरकार के हे।
श्री साय ह किहीन कि भाजपा सरकार ह पहिली केबिनेट म अठ्ठारा लाख हितग्राही मन ल आवास देवाय के फैसला लेहे। ओमन बताइन कि छत्तीसगढ़ म बत्तीस प्रतिसत अनुसूचित जनजाति के आबादी हे। समाज के अपेक्षा रिहीस कि राज्य म आदिवासी मुख्यमंत्री बनय। ए अपेक्षा ल प्रधानमंत्री नरेंद्र मोदी ह पूरा करीन। ओमन किहीन कि प्रधानमंत्री के सेति दुनिया भर म भारत के नांव रोसन होवत हे। आज देस के सर्वोच्च पद राष्ट्रपति के रूप म आदिवासी समाज के द्रौपदी मुर्मू विराजमान हे। मुख्यमंत्री ह किहीन कि छत्तीसगढ़ के अनुसूचित जनजाति के लोगन के सामाजिक, आर्थिक बढ़वार हो सकय ऐला देखत पूर्व प्रधानमंत्री अटल बिहारी बाजपेयी ह छत्तीसगढ़ राज्य के निर्माण करे रिहीन।
कारीकरम म उप मुख्यमंत्री विजय शर्मा, विधायक केदार कश्यप, विक्रम उसेंडी, कवासी लखमा, गोमती साय, नीलकंठ टेकाम समेत आदिवासी समुदाय के आने विधायक मौजूद रहीन।
चुन्नीलाल-इस्तीफा
अकलतरा विधानसभा क्षेत्र के पूर्व कांग्रेस विधायक अउ पार्टी के प्रदेस उपाध्यक्ष चुन्नीलाल साहू ह अपन पद ले इस्तीफा दे दीन। ओमन प्रदेस कांग्रेस अध्यक्ष दीपक बैज ल अपन भेजे इस्तीफा म किहीन कि प्रदेस म होय विधानसभा चुनाव म कांग्रेस के हार के बाद ओेेमन प्रदेस कांग्रेस कमेटी के उपाध्यक्ष पद ले इस्तीफा देके फैसला लीन।
गुरू घासीदास जयंती
समाज ल एकता भाईचारा अउ समरस्ता के संदेस देवइया बाबा गुरूघासी दास के आज जयंती हरय। ए मउका म प्रदेस भर म कतकोन कारीकरम होवत हे। मुख्यमंत्री विष्णुदेव साय आज बिलासपुर के गुरू घासीदास केंद्रीय विश्वविद्यालय बिलासपुर अउ मुंगेली म राखेगे समारोह म सामिल होइन। श्री साय ह विश्वविद्यालय परिसर म बने बाबा गुरू घासीदास के प्रतिमा म फूल माला चढ़ाइन।
उहें, मुंगेली जिला के लालपुर धाम म राखेगे समारोह म मुख्यमंत्री ह किहीन कि ए सौभाग्य के बात हरय कि छत्तीसगढ़ के धरती म गुरू घासीदास बाबा के अवतरण होइस। ओमन किहीन भाजपा सरकार बाबा के बताय उपदेस म चलही।
उहें, छत्तीसगढ़ विधानसभा के सेंट्रल हाल म गुरू घासीदास के चित्र म विधानसभा के सचिव सचिवालय के बड़का अधिकारी मन पुष्पांजलि अर्पित करीन। ऐति राजधानी रईपुर म कतकोन जघा प्रभात फेरी निकाले गीस अउ पंथी नृत्य करे गीस। इही बीच, बलौदाबाजार के गिरौदपुरी म घासीदास के जन्मस्थलीय म तपोभूमि म मेला भराय हे।
विकसित भारत संकल्प यात्रा
प्रदेस के आने-आने जघा म पाछू सोला दिसंबर ले विकसित भारत संकल्प यात्रा सुरू होगे हे। ए यात्रा के दौरान कारीकरम के आयोजन करके मोबाइल वीडियो वैन ले लोगन ल केंद्र सरकार के कतकोन योजना के जानकारी दे जावत हे। एमा आज कोरिया जिला के ग्राम पंचायत उमझर अउ जुनापारा म कारीकरम राखे गीस। ए बेरा म संकल्प यात्रा रथ म लगे एलईडी ले गांव के लोगन ल प्रधानमंत्री के संदेस सुनाय गीस। संगेसंग हितग्राही मन ल केंद्रीय योजना ले फायदा दे गीस। उहें, मउकच म छै झिन के आयुष्मान कार्ड बनाय गीस अउ उज्जवला योजना बर चार झन अर्जी दीन।
ऐति विकसित भारत संकल्प यात्रा म मंुगेली जिला के जरहा गांव म काली सिविर लगाय गीस। जिहां केंद्र सरकार के कतकोन योजना म आधारित प्रदर्सनी लगाय गीस। सिविर म हितग्राही मनले पात्रता मुताबिक फॉम भराय गेहे। पांच सौ ले जादा हितग्राही मन ह अर्जी दीन। उहें, तेईस झन के मउकच म आयुष्मान कार्ड बनाय के काम करे गीस अउ एक हितग्राही ल गैस चूल्हा दे गेहे।
अग्निवीर भर्ती रैली
जांजगीर-चांपा जिला म राखेगे अग्निवीर भर्ती रैली म आने-आने जिला के युवा भाग लेवत हे। भर्ती रैली के चौथइया दिन आज प्रदेस के चौदह ठिन जिला बस्तर, धमतरी, कोरिया, महासमुंद, रईपुर, नारायणपुर, सुकमा, बलौदाबाजार, गरियाबंद, सूरजपुर, बलरामपुर,सारंगढ़-बिलाईगढ़, खैरागढ़-छुईखदान, गंडई अउ मोहला-मानपुर-अंबागढ़ चौकी के करीबन ग्यारा सौ युवक भाग लीन। एमा तीन सौ तिरसठ युवक मन ह दउड़ के पहिली परीक्षा पास करीन। दउड़ परीक्षा म सफल उम्मीदवार मन ल अब शारीरिक परीक्षा, शैक्षणिक दस्तावेज अउ मेडिकल जांच करवाय बर पड़ही। अधिकारी मन किहीन कि निष्पक्ष अउ साफगोई तरीका ले चयन करे जात हे। एखर सेति कोनो भी उम्मीदवार जालसाज मनके झांसा म झन आवय।
लॉ यूनिवर्सिटी दीक्षांत समारोह
हिदायतुल्लाह नेशनल लॉ यूनिवर्सिटी के सातवां दीक्षांत समारोह काली नवा रईपुर म राखे गीस। ए मउका म बी.ए., एलएलबी ऑनर्स के एक सौ पचास अउ एलएलएम के नब्बे झिन विद्यार्थी मन ल डिग्री दे गीस। उहें, चार पीएचडी स्कालर्स मन ल डिग्री दे गीस।
दीक्षांत समारोह म बोलत उच्चतम न्यायालय के न्यायाधीस न्यायमूर्ति अनिरूध्द बोस ह कानूनी शिक्षा के क्षेत्र म होवत नवा बदलाव के संबंध म जानकारी दीन। संगेसंग वृध्दि के क्षेत्र म माईलोगन अउ नोनी मनके बाढ़त सहभागिता म उछाह जताइन।
सिविक एक्शन कार्यक्रम
कोंडागांव जिला के माओवाद प्रभावी गांव जोहबा अउ बनिया म सीआरपीएफ के एक सौ अठ्यासी बटालियन कोति ले सिविक एक्शन कारीकरम राखे गीस। ए मउका म सीआरपीएफ के जवान मन ह स्कूल म पढ़ईया लइका मन ल स्कूल बैग अउ खेलकूद के जिनिस बांटिन। जेमा क्रिकेट बैट, टेनिस बाल, कैरम बोर्ड, सामिल हे। ए बेरा म सीआरपीएफ के कमांडेंट युध्द वीरसिंग ह बताइन कि ए कारीकरम के उद्देस्य लोगन ल सुरक्षा देके संगेसंग खेलकूद ल बढ़ावा देना हे।
प्रदेस म जाड़ सरलग बाढ़त जात हे। मौसम विभाग के मुताबिक उत्तर भारत कोति ले आवत हवा के सेति अवईया दिन म सीतलहरा चले के संभावना हवय।
मौसम वैज्ञानी एच.पी.चन्द्रा ह बताइन कि प्रदेस म पश्चिमी विक्षोभ के प्रभाव कमती होय हे। जेखर ले वातावरण म नमी के मात्रा कमती होवत हे। एमा न्यूनतम तापमान म गिरावट आही। अवईया तीन दिन म पारा दू से तीन डिग्री गिर सकत हे। अवईया चौबीस घंटा म प्रदेस के मौसम सुख्खा रइही।