सत्र के पहिली दिन उन्नीस दिसंबर के नव-निर्वाचित विधायक मन ल सपथ देवाय जाही। इही दिन विधानसभा अध्यक्ष के चुनाव होही। उहें, दूसर दिन बीस दिसंबर के राज्यपाल विश्वभूषण हरिचंदन के अभिभाषण होही। सत्र के अंतिम दिन इक्कीस दिसंबर के राज्यपाल के अभिभाषण उपर प्रस्तुत कृतज्ञता ज्ञापन प्रस्ताव उपर चर्चा होही। सत्र के दौरान वित्तीय काम अउ दूसर शासकीय काम घलो करे जाही।
प्रोटेम स्पीकर-शपथ
इही बीच, राज्यपाल विश्वभूषण हरिचंदन ह आज राजभवन म एक ठन समारोह म विधानसभा के निर्वाचित सदस्य रामविचार नेताम ल विधानसभा के प्रोटेम स्पीकर के सपथ देवाइन। श्री नेताम ह छत्तीसगढ़ी म सपथ लीन।
ए मउका म मुख्यमंत्री विष्णुदेव साय, उपमुख्यमंत्री अरूण साव अउ विजय शर्मा, पूर्व मुख्यमंत्री भूपेश बघेल, डॉक्टर रमन सिंह, नवा चुने गे विधायक मन संघरा बड़े प्रशासनिक अधिकारी मन घलो मौजूद रिहीन। कारीकरम के संचालन छत्तीसगढ़ विधानसभा के दिनेश शर्मा ह करीन।
खबर के मुताबिक रामविचार नेताम ह छटवां घांव विधानसभा बर चुने गेहे। ओमन ह पहिली घाव बछर उन्नीस सौ नब्बे म निर्वाचन क्षेत्र रामानुजगंज ले भाजपा प्रत्यासी के रूप म चुने गे रिहीन। श्री नेताम ह दू हजार तेईस के विधानसभा चुनाव म रामानुजगंज निर्वाचन क्षेत्र ले भाजपा प्रत्यासी के रूप म चुनेगे हवय।
डॉक्टर रमन सिंह विधानसभा नामांकन
छत्तीसगढ़ विधानसभा अध्यक्ष पद बर पूर्व मुख्यमंत्री अउ राजनांदगांव ले निर्वाचित विधायक डॉक्टर रमन सिंह ह आज विधानसभा अध्यक्ष पद बर अपन नामांकन दाखिल करीन। ए मउका म मुख्यमंत्री विष्णुदेव साय, उप मुख्यमंत्री अरूण साव अउ विजय शर्मा, पूर्व मुख्यमंत्री भूपेश बघेल अउ विधायक मन मौजूद रिहीन।
जवान-शहीद
सुकमा जिला म सुरक्षा बल अउ माओवादी मनके बीच होय मुठभेड़ म एक झन उपनिरीक्षक सहीद होगे। उहें, एक झन दूसर जवान घायल होगिस।
मिले जानकारी के अनुसार केंद्रीय रिजर्व पुलिस बल सीआरपीएफ के दल आज बिहनिया थाना जगरगुंडा ले उर्सांगल कोति तलासी अभियान म निकले रिहीस। ए दौरान अचानक घात लगाके बइठे माओवादी मन ह हमला कर दीन। दूनों डहार ले होय गोलीबारी म सीआरपीएफ के उपनिरीक्षक सुधाकर रेड्डी सहीद होगिन। उहें, आरक्षक रामू घायल होगे हवय। घायल जवान ल प्राथमिक उपचार के बाद हैलीकाप्टर के माध्यम ले रईपुर लाय जावत हे। इही बीच सुरक्षा बल डहार ले चलाय गे तलासी अभियान म चार झन संदिग्ध मन ल हिरासत म लेगे हवय।
ऐति बीजापुर जिला म सुरक्षा बल ह इक्कीस ठिन आईईडी बरामद करे हे। बताय जात हे कि सुरक्षा बल के जवान मन रोड ओपनिंग म निकले रिहीन। इही दौरान पलनार-सावनार के बीच सुरक्षा बल ल नुकसान पहुंचाय के उद्देस्य ले माओवादी मन ह दस-बीस मीटर के दूरी म आईडी लगाय रिहीन जेला मउकच म निष्क्रिय कर दे गीस।
मुख्यमंत्री-उच्च स्तरीय बैठक
प्रदेस के मुख्यमंत्री विष्णुदेव साय ह माओवादी मनके खिलाफ चलत अभियान म अउ तेजी लाय के अउ उंखर खिलाफ कड़ा कार्रवाई करे के निरदेस दीन हे। सुकमा जिला म एक झन जवान के सहीद होय के घटना उपर संज्ञान लेवत मुख्यमंत्री ह आज अपन कार्यालय म मुख्य सचिव अमिताभ जैन, पुलिस महानिदेसक अशोक जुनेजा संघरा पुलिस के बड़े अधिकारी मनके बइठका लीन। मुख्यमंत्री ह किहीन कि पुलिस महानिदेसक ह माओवादी मनके खिलाफ चलत अभियान के मॉनिटरिंग ल खुदे करय।
मुख्यमंत्री ह सुकमा जिला म माओवादी घटना के निंदा करत सहीद जवान सुधाकर रेड्डी ल श्रध्दांजलि दीन। संगेसंग सहीद के परिवार वाला मन ल हर संभव मदद देवाय के निरदेस घलो दीन। ओमन किहीन कि हाल म सरकार बदले के बाद ले माओवादी मन ह बौखला गेहे, जेखर सेति ओमन ह अइसन हरकत करत हे। श्री साय ह किहीन कि राज्य सरकार माओवादी समस्या ल केंद्र सरकार के मदद ले पूरा खतम करही।
प्रदेस के उप मुख्यमंत्री अरूण साव ह बिलासपुर के मुंगेली नाका मैदान म काली विकसित भारत संकल्प यात्रा के सुरूआत करीन। श्री साव ह ए मउका म किहीन कि विकसित भारत संकल्प यात्रा कोनो सरकारी कारीकरम नइ हे, ए ह एक ठन जन-अभियान हे। श्री साव ह किहीन कि जिला के हर गांव अउ हर घर तक एखर संदेस जाही। उप मुख्यमंत्री ह बताइन कि ए यात्रा के माध्यम ले लोगन ल केंद्रीय योजना के जानकारी के संग ओखर ले फायदा उठाय के तरीका घलो बताय जाही। श्री साव ह लोगन ल ए अभियान ले जुड़ के एखर फायदा उठाय के आग्रह करीन।
ऐति बेमेतरा जिला म घलो विकसित भारत संकल्प यात्रा के सुरूआत ग्राम पंचायत जेवरी म करे गीस। बेमेतरा विधायक दीपेश साहू अउ कलेक्टर पीएस एल्मा ह प्रचार वाहन ल हरा झंडा देखाके रवाना करीन, जउन ह छब्बीस जनवरी तक जिला के आने-आने गांव म योजना के जानकारी देही। ए मउका म आने-आने विभाग डहार ले जन-कल्याणकारी योजना ले जुड़े स्टाल लगाय गे रिहीस। स्वास्थ्य विभाग के स्टाल म निन्यानवे लोगन के निसुल्क जांज अउ ईलाज करे गीस।
ओति, बीजापुर जिला म मेलसनार, नैमेड़, मुरकीनार अउ मदेड़ म विकसित भारत संकल्प यात्रा के आयोजन करे गीस।
अइसने, कोंडागांव जिला के धनोरा, ग्राम पंचायत मसोरा अउ फरसगांव विकासखंड के ग्राम पंचायत मांझी आठगांव म घलो विकसित भारत संकल्प यात्रा के आयोजन करे गीस। ए दौरान केंद्र सरकार डहार ले चलत योजना के बारे म जानकारी दे गीस।
विकसित भारत संकल्प यात्रा-02
इही बीच, बालोद जिला के ग्राम हरदी अउ दरबारी नवागांव म विकसित भारत संकल्प यात्रा के आयोजन होइस। माईलोगिन मन ह प्रचार वाहन के गांव पहुंचे म ओखर स्वागत करीन।
उहें, बालोद जिला के हरदी गांव म विकसित भारत संकल्प यात्रा कारीकरम म पात्र हितग्राही मन ल प्रधानमंत्री उज्जवला योजना म गैस कनेक्सन बांटे गीस।
ओति, ‘‘विकसित भारत संकल्प यात्रा‘‘ म मुंगेली जिला के ग्राम जरहा गांव के गांधी मैदान म सिविर के आयोजन करे गीस। ए दौरान सरकार के आने-आने योजना उपर प्रदर्सनी लगाय गीस, अउ लोगन ल ए योजना के जानकारी दे गीस। सिविर म पांच सौ ले जादा हितग्राही मन ह आवेदन दीन। उहें, तेईस झन ल मउकच म आयुष्मान कार्ड बनाके दे गीस।
गुरू घासीदास जयंती
काली बाबा गुरूघासीदास के जयंती हे। ए मउका म राज्यपाल विश्वभूषण हरिचंदन ह प्रदेसवासी मन ल अपन बधई अउ सुभकामना दीन हे। राज्यपाल ह किहीन हे कि महान संत बाबा गुरूघासीदास ह सामाजिक, आर्थिक, शोसन, जातिवाद, सामंती मन के अन्याय अउ अत्याचार के खिलाफ आवाज उठाके ‘‘मनखे-मनखे एक समान‘‘ के संदेस दीन। श्री हरिचंदन ह किहीन कि समाज ल एकता के सुत्र म लाने वाला बाबा गुरूघासीदास सांति, सामाजिक समरस्ता के प्रतीक हे। समाज ल नवा दिसा दे म उंखर बड़े योगदान हे। उंखर उपदेस आज घलो प्रासंगिक हे।
अग्निवीर भर्ती रैली
जांजगीर-चांपा जिला म पाछु पन्द्रह दिसंबर ले सुरू होय अग्निवीर भर्ती रैली म युवा मन ह अपन दमखम दिखावत हे। मिले जानकारी के अनुसार आज प्रदेश के कांकेर, दुरूग, राजनांदगांव अउ गौरेला-पेण्ड्रा-मरवाही जिला के तेरह सौ पचास युवा मन ल प्रवेस पत्र जारी करे गे रिहीस। एमा ले एक हजार पचहत्तर उम्मीदवार मन ह अपन उपस्थिति दर्ज करईन अउ तीन सौ सैंतालीस युवा मन ह दउड़ म सफलता हासिल करीन।