कैबिनेट बैठक-01
छत्तीसगढ़ के मुख्यमंत्री विष्णुदेव साय डहार ले काली पद के सपथ लेके बाद आज होय मंत्रिमंडल के पहिली बइठका म प्रदेस के अट्ठारह लाख गरीब परिवार मन ल प्रधानमंत्री ग्रामीण आवास योजना म मकान दे जाय बर स्वीकृति प्रदान करे गीस। बइठका म उप मुख्यमंत्री अरूण साव अउ विजय शर्मा घलो सामिल होइन।
बइठका के बाद पत्रकार मन ले गोठबात करत मुख्यमंत्री ह बतईन कि विधानसभा चुनाव के दउरान भाजपा के संकल्प पत्र म प्रधानमंत्री ग्रामीण आवास योजना के हितग्राही मन ल मकान देवाय के बात प्रमुखता ले केहे गे रिहीस। एखर सेती कैबिनेट के पहिलीच बइठका म एला मंजूरी दे दे गीस। ओमन बतईन कि एखर बर जरूरी धनराशि के मंजूरी दे दे गे हवय। श्री साय ह किहीन कि संकल्प पत्र म किसान मन ल दू बछर के धान खरीदी के बकाया बोनस के भुगतान के वादा घलो करे गे रिहीस। ए बोनस ल अवइया पच्चीस दिसंबर के पूर्व प्रधानमंत्री अटल बिहारी वाजपेयी के जयंती के मउका म किसान मन ल दे जाही।
एक ठिन सवाल के जवाब म मुख्यमंत्री ह किहीन कि प्रदेस म धर्मांतरण ल रोके बर कड़ा कदम उठाय जाही। उहें, माओवादी समस्या के समाधान बर घलो जरूरी पहल करे जाही। एक ठिन दूसर सवार के जुवाब म ओमन किहीन कि भ्रष्टाचार के सबो मामला के जांच कराय जाही। संगेसंग एमा दोसी मनके खिलाफ कड़ा कार्रवाई घलो करे जाही।
आदिवासी क्षेत्र म बड़ संख्या म जीत मिले म मुख्यमंत्री ह प्रदेस के जनता ल धन्यवाद देवत किहीन कि केन्द्र अउ राज्य म भाजपा के सरकार होय के सेती अब आदिवासी क्षेत्र के विकास बर बिसेस रूप ले ध्यान दे जाही।
कैबिनेट बैठक-02
श्री साय ह आरोप लगईन कि राज्य के पाछु कांग्रेस सरकार के कमजोर वित्तीय प्रबंधन के सेती आर्थिक स्थिति कमजोर होगे हवय। एखर बावजूद अब केन्द्र अउ राज्य म डबल इंजन के सरकार होय के सेती भाजपा के संकल्प पत्र म करे गे सबो वादा ल निश्चित रूप ले पूरा करे जाही।
कांग्रेस-पूर्व विधायक निष्कासन
प्रदेस कांग्रेस कमेटी ह पार्टी के दू झन पूर्व विधायक- बृहस्पत सिंह अउ विनय जायसवाल ल छह बछर बर निष्कासित कर देहे। प्रदेस कांग्रेस अध्यक्ष दीपक बैज ह ए दूनों पूर्व विधायक ल उंखर बयान बर कारण बताओ नोटिस जारी करत जवाब मांगे रिहीन। इंखर जवाब ले संतुष्ट नइ होय म पार्टी ह इंखर खिलाफ निष्कासन के कार्रवाई करे हे।
महंत रामसुंदर दास-इस्तीफा
प्रदेस म हाल म होय विधानसभा चुनाव म रईपुर दक्षिण ले कांग्रेस के प्रत्यासी रेहे महंत रामसुंदर दास ह पार्टी के प्राथमिक सदस्यता ले त्याग पत्र दे देहे। ओमन ह प्रदेस कांग्रेस अध्यक्ष दीपक बैज ल लिखे चिट्ठी म अपन हार के जिम्मेदारी लेवत पार्टी के प्राथमिक सदस्यता ले त्याग पत्र दे जाय के बात कहिन हे।
खबर के मुताबिक महंत रामसुंदर दास ए बखत के विधानसभा चुनाव म भाजपा उम्मीदवार बृजमोहन अग्रवाल ले करीबन अड़सठ हजार वोट के अंतर ले हार गे रिहीन। ओमन ह रईपुर के ऐतिहासिक दूधाधारी मठ अउ शिवरीनारायण मठ के प्रमुख हे। महंत रामसुंदर दास कांग्रेस के टिकट म बछर दू हजार तीन म पामगढ़ ले अउ दू हजार आठ म जैजेपुर विधानसभा सीट ले विधायक चुने गे रिहीन।
आईईडी विस्फोट-जवान शहीद
कांकेर जिला के सड़क टोला गांव म तलाशी अभियान के दउरान सीमा सुरक्षा बल बीएसएफ के प्रधान आरक्षक अखिलेश राय ह माओवादी मन डहार ले करे गे बारूदी विस्फोट म सहीद होगे हवय। मिले जानकारी के अनुसार परतापुर थाना ले आज बिहनिया बीएसएफ अउ जिला पुलिस बल के संयुक्त दल तलाशी अभियान म गे रिहीस हे। तभे सड़कटोला गांव ले आगू मंदिरटेकरी तीर माओवादी मन डहार ले करे गे बारूदी विस्फोट म बीएसएफ के प्रधान आरक्षक घायल होगीस। ओला पंखाजूर के स्वास्थ्य केन्द्र म भर्ती कराय गे रिहीस, जिहां इलाज के दउरान उंखर मउत होगे। सहीद प्रधान आरक्षक उत्तरप्रदेश के गाजीपुर के रहइया रिहीन।
इही बीच, नारायणपुर जिला म काली होय माओवादी मन डहार ले करे गे बारूदी विस्फोट म सहीद जवान कमलेश साहू ल मुख्यमंत्री विष्णुदेव साय ह श्रद्धांजलि दीन हे। अपन सोक संदेस म श्री साय ह किहीन कि कमलेश साहू ह साहस के परिचय देवत वीरगति ल प्राप्त होय हे।
शहीद जवान ल श्रद्धांजलि देवत उप मुख्यमंत्री विजय शर्मा ह आज सक्ती जिला के हसौद गांव म सहीद जवान के परिवार वाला मन ले भेंट करके ओमन ल सांत्वना दीन। ए मउका म जैजेपुर के विधायक बालेश्वर साहू अउ चन्द्रपुर के विधायक रामकुमार यादव के अलावा भाजपा के एक झिन दूसर विधायक केदार कश्यप घलो मौजूद रिहीन।
अग्निवीर भर्ती रैली
जांजगीर के खोखराभाठा के पुलिस लाइन म अग्निवीर भर्ती रैली म सारीरिक दक्षता परीक्षा काली ले सुरू होही। पाछु दिन म होय ऑनलाइन परीक्षा ल पास करइया प्रदेस के छह हजार आठ सौ पचहत्तर झन उम्मीदवार मन ह ए भर्ती रैली म भाग लीहीं। एमन सबो झन ल पहिचान अउ सैक्षणिक प्रमाण पत्र संघरा दूसर जरूरी कागज अपन संघरा लाय बर केहे गे हवय। ए भर्ती रैली तेईस दिसंबर तक चलही।
ए भर्ती रैली म प्रदेस के सबो जिला के अभ्यर्थी मन ल मउका दे जाही। राजनांदगांव जिला के अभ्यर्थी मन सत्रह अउ अट्ठारह दिसंबर के सारीरिक दक्षता परीक्षा म सामिल होही। राजनांदगांव जिला के अभ्यर्भी मन बर जिला प्रशासन डहार ले बिसेस प्रसिक्षण के आयोजन करे गे हवय। एमा मोहड़ गांव के खेल मैदान म जिला के पूर्व सैनिक देवेन्द्र देवांगन, ओमप्रकाश साहू अउ भागीरथी साहू डहार ले साठ ले जादा युवा मन ल निःशुल्क प्रशिक्षण दे जावत हे।
सौम्या चौरसिया-याचिका खारिज
प्रदेस के पाछु सरकार म मुख्यमंत्री सचिवालय म उप सचिव के पद म काम करइया राज्य प्रशासनिक सेवा के अधिकारी सौम्या चौरसिया के जमानत याचिका सर्वोच्च न्यायालय ह खारिज कर देहे। न्यायमूर्ति बेला एम. त्रिवेदी अउ न्यायमूर्ति अनिरूद्ध बोस के युगल पीठ ह सौम्या चौरसिया के जमानत याचिका ल खारिज करत उंखर उपर एक लाख रूपिया के जुर्माना घलो लगाय हे।
खबर के मुताबिक कोयला घोटाला म कार्रवाई के दउरान प्रवर्तन निदेशालय-ईडी ह ओमन ल पाछु बछर दू दिसंबर के गिरफ्तार करे रिहीस। एखर पहिली, उच्च न्यायालय अउ रईपुर के बिसेस अदालत ले घलो उंखर जमानत याचिका खारिज होय हवय। ए मामला म प्रदेस के आईएएस अधिकारी समीर बिश्नोई, रानू साहू संघरा दूसर चार झिन आरोपी मन घलो ए बेरा जेल म हवय।
इही बीच, कोयला घोटाला के सिलसिला म जेल म बंद निलंबित आईएएस अधिकारी रानू साहू के जमानत याचिका म सुनवाई टल गे हवय। छत्तीसगढ़ उच्च न्यायालय म आज ए मामला म सुनवाई होना रिहीस, जउन ह अब आठ जनवरी के होही।
लखपति कृषक पुरस्कार
भारतीय कृषि अनुंसधान परिषद डहार ले जांजगीर-चांपा जिला के बारगांव निवासी किसान कुंवर सिंह मधुकर ल नई दिल्ली म लखपति कृषक पुरस्कार ले सम्मानित करे गे हवय। जांजगीर के कृषि विज्ञान केन्द्र के वैज्ञानिक डॉक्टर राजीव दीक्षित ह बतईन कि कुंवर सिंह मधुकर पाछु तीन बछर ले करीबन सोलह एकड़ रकबा म साग-भाजी के खेती करत हे। एमा ओमन ह आधुनिक तकनीक के संग नवा उपक्रम के प्रयोग करत हे।
ट्रेन परिचालन
पश्चिम रेलवे रतलाम मंडल के बरलई-मांगलिया रेलखंड म दोहरा लाइन बिछाय के सेती दक्षिण पूर्व मध्य रेलवे म अवइया रेलगाड़ी के अवई-जवई चौदह ले तीस दिसंबर तक प्रभावित रइही। रेलवे के अनुसार बिलासपुर-इंदौर नर्मदा एक्सप्रेस उज्जैन स्टेसन म सिरा जही। ए ट्रेन के उज्जैन ले इंदौर के बीच अवई-जवई रद्द रइही। ए ट्रेन ल उज्जैन ले ही बिलासपुर बर वापस चलाय जाही।
ओपीएस-जानकारी
पुराना पेंशन योजना-ओपीएस अउ कार्मिक संपदा के जानकारी पोर्टल म अपलोड करे जाय के बारे म पेंशन अउ भविष्य निधि संचालनालय ह उनतीस दिसंबर के समय-सीमा घोसित करे हे। वरिष्ठ जिला कोषालय अधिकारी ह बतईन कि ए प्रक्रिया के पूरा जानकारी बर रईपुर के जिला कोषालय दफ्तर ले संपर्क करे जा सकत हे।