विष्णुदेव साय शपथ
छत्तीसगढ़ के नवनियुक्त मुख्यमंत्री विष्णुदेव साय ह आज रायपुर म होय समारोह म पद के शपथ लीन। राजधानी के साइंस कॉलेज मैदान म होय समारोह म राज्यपाल विश्वभूषण हरिचंदन ह श्री साय ल पद अउ गोपनीयता के शपथ दिलाइन। ओमन हिंदी म शपथ ग्रहण करीन।
ए मौका म उप मुख्यमंत्री के रूप म अरूण साव अउ विजय शर्मा ह घलो शपथ ग्रहण करीन। शपथआ ग्रहण समारोह म प्रधानमंत्री नरेंद्र मोदी, केंद्रीय गृहमंत्री अमित शाह, भाजपा के राष्ट्रीय अध्यक्ष जे.पी. नड्डा, केंद्रीय मंत्री नीतिन गडकरी अउ रामदास अठावले के संगेसंग उत्तर प्रदेश के मुख्यमंत्री योगी आदित्यनाथ, असम के मुख्यमंत्री हिमंता बिस्वा सरमा, उत्तराखंड के मुख्यमंत्री पुष्कर सिंह धामी, गोवा के मुख्यमंत्री प्रमोद सावंत, अउ त्रिपुरा के मुख्यमंत्री माणिक साहा, छत्तीसगढ़ के पूर्व मुख्यमंत्री डॅाक्टर रमनसिंह के संगेसंग भाजपा के कतकोन बड़का नेता मन शामिल होइन।
ए कार्यक्रम म भाजपा के जम्मों नवा चुने गे विधायक मन घलो आय रीहिन। ए मौका म पूर्व मुख्यमंत्री भूपेश बघेल अउ पूर्व उप मुख्यमंत्री टीएस सिंहदेव घलो आय रीहिन। कार्यक्रम के संचालन मुख्य सचिव अमिताभ जैन ह करीन। शपथ ग्रहण समारोह म शामिल होय बर प्रदेश के कतकोन जगा ले बड़ संख्या म भाजपा कार्यकर्ता अउ आम लोगन मन आय रीहिन। ए कार्यक्रम ल प्रदेश के जादा ले जादा लोगन मन देख सकय एखर बर राज्य के जम्मों जिला मुख्यालय नगरीय निकाय अउ ग्राम पंचायत मन म एलईडी स्क्रीन लगाके एखर सोझे प्रसारण करे गीस।
साय-श्रद्धांजलि
मुख्यमंत्री विष्णुदेव साय ह आज शपथ ग्रहण के पहिली रायपुर म प्रदेश बर बढ़िया काम करइया दू झिन विभूति ल नमन करीन। मुख्यमंत्री ह अवंती विहार स्थित पूर्व प्रधानमंत्री भारत रत्न अटल बिहारी बाजपेयी के मूर्ति अउ जयस्तंभ चौक म राज्य के पहिली स्वतंत्रता सेनानी शहीद वीर नारायण सिंह के प्रतिमा उपर फूलमाला चढ़ाके ओमन ल श्रद्धासुमन अर्पित करीन।
त उंहे मुख्यमंत्री श्री साय ह आजेच के दिन बछर दू हजार एक म संसद हमला म शहीद होय जवान मन ल घलो श्रद्धंाजलि दीन। ओमन कीहिन कि देश बर अपन जान देवइया अइसन वीर सपूत के सेती आज इंहा के नागरिक मन सुरक्षित हे।
साय-गृहग्राम उत्सव
विष्णुदेव साय के मुख्यमंत्री बने के बाद ओखर जशपुर जिला स्थित गांव बगिया म घलो उछाह के माहौल बने हे। उंखर शपथ ग्रहण के पहिली गांव के लोगन मन ह पटाखा अउ बाजा बजाके पारंपरिक नृत्य करके खुशी मनाइन।
हमर संवाददाता ले मिले जानबा के मुताबिक छोटेडोंगर थाना क्षेत्र के अमदाई खदान के तीर आज बीहनिया माओवादी मन ह सुरक्षा बल मन उपर हमला करे के पहिली विस्फोट करीन अउ फेर गोलीबारी शुरू कर दीन। सुरक्षा बल मन कोति ले घलो जवाबी कार्रवाई करे गीस। ए मुठभेड़ म सीएएफ के नौवीं वाहिनी के एक झिन आरक्षक कमलेश कुमार ह शहीद होगे। शहीद जवान सक्ती जिला के हसौद गांव के रहइया हरय अउ चार साल पहिली ओखर नारायणपुर म पोस्टिंग होय रीहिस। त उंहे एक झिन आरक्षक विनय कुमार ल मामूली चोट आय हे । मुठभेड़ के बाद तीर तखार के जगा म गश्त बढ़ा दे गेहे ।
अग्निवीर भर्ती रैली
जांजगीर के पुलिस लाइन म पंद्रह दिसंबर ले अग्निवीर भर्ती रैली शुरू होही। ए रैली के तैयारी ल लेके जानबा देबर आज जिला कलेक्टर ऋचा प्रकाश चौधरी, पुलिस अधीक्षक विजय अग्रवाल अउ थलसेना के कर्नल नरेंद्र सेमल्टी ह एक ठिन प्रेसवार्ता लीन। एमा ओमन बताइन कि तेईस दिसंबर तक चलइया ए रैली म भाग लेबर हर दिन करीबन एक हजार युवा मन आहीं। ए रैली म सीईई परीक्षा पास कर चुके छै हजार आठ सौ पचहत्तर युवा मन भाग लीहीं। रैली म शामिल होवइया युवा मन बर रेहे के, खायेपीये के अउ गाड़ी के व्यवस्था करे गेहे। अधिकारी मनके मुताबिक ये भर्ती रैली म योग्यता के आधार म ही युवा मनके चयन होही।
पाठ्यक्रम प्रवेश
राज्य शैक्षिक अनुसंधान अउ प्रशिक्षण परिषद ह डीएलएड, बीएड, बीए, बीएड अउ बीएससी बीएड पाठ्यक्रम म प्रवेश बर अंतिम चरण के आबंटन प्रक्रिया के समय सारिणी म संशोधन करे गेहे । एखर मुताबिक दूसर चरण के चौथा सूची के बाद बाकी खाली सीट बर उन्नीस दिसंबर के प्रतीक्षा सूची जारी करे जाना हे। फेर महाविद्यालय मन म बाईस दिसंबर तक प्रवेश सूची ल ऑनलाईन अपडेट करना होही। जेखर बाद ए पाठ्यक्रम मन म प्रवेश बर निशुल्क पंजीयन अवइया चौदा फरवरी ले सोला फरवरी तक करना होही।
प्रतीक्षा सूची बर जउन अभ्यर्थी मनके आईडी एक्टिव हे, ओमन ल निशुल्क अउ अपन विकल्प एक घांव फेर देना होही। कोनो भी एक ठिन महाविद्यालय के विकल्प राखके चौदा ले सोला दिसंबर तक देना होही। त उंहे प्रतीक्षा सूची बर जउन अभयर्थी मनके लॉगईन आईडी एक्टिव नही हे ओमन घलो फेर पंजीयन कर सकथे। ए अभयर्थी मन डहार ले पहिली देगे जम्मों महाविद्यालय मनके विकल्प ल निरस्त कर दे गेहे। ए चरण म जउन अब तक अपन डीएलएड, बीएड, बीएबीएड अउ बीएससी बीएड आबंटन प्रक्रिया म पंजीयन नइ कराय हे अउ आने महाविद्यालय मन म प्रवेश ले लेहे त ओमन शामिल नइ हो सकय।
जशपुर स्वच्छता अभियान
जशपुर जिला के नगरीय अउ गांव गंवतरी वाले क्षेत्र मन म आज स्वच्छ भारत अभियान कार्यक्रम राखे गीस। जेमा ग्राम पंचायत मनके चौक-चौराहा, अटल चौक, तहसील, स्कूल अउ आंगनबाड़ी परिसर के संगेसंग बाजार मन म घलो साफ सफई करके लोगन मन ल सफई के बारे म जागरूक करे के पहल करे गीस। ए अभियान म जनप्रतिनिधि, गणमान्य लोगन के संगेसंग गांव के सरपंच, सचिव, आंगनबाड़ी कार्यकर्ता, महिला स्व सहायता समूह अउ अधिकारी कर्मचारी मन ह अपन भागीदारी निभाइन। जिला कलेक्टर डॅाक्टर रवि मित्तल ह लोगन मनले अपील करीन कि ओमन श्रमदान करके अभियान ल सफल बनावय।
आदिम जाति कल्याण आवासीय अउ आश्रम शैक्षणिक संस्थान समिति के आयुक्त शम्मी आबिदी ह बताइन कि महोत्सव म तीरंदाजी, एथलेटिक्स, योगा,बॉस्केट बॉल, फुटबॉल अउ हॉकी के संगेसंग आने खेल मन ल घलो शामिल करे गेहे । ओमन बताइन कि ए प्रतियोगिता म शामिल होय बर प्रदेश के सात सौ संतानबे खिलाड़ी मनके प्रारंभिक स्तर म चयन करे गेहे । राज्य स्तरीय सलेक्शन ट्रायल बर चयन समिति बनाय गेहे अउ राष्ट्रीय मानक के मुताबिक खिलाड़ी मनके चयन करे जाही।
महादेव सट्टा ऐप-गिरफ्तारी
महादेव ऑनलाइन सट्टा ऐप के मालिक अउ सह संस्थापक रवि उप्पल ल संयुक्त अरब अमीरात ले गिरफ्तार कर ले गेहे। गिरफ्तारी के बाद ओमन ल भारत लाए बर यूएई के अधिकारी मनले संपर्क करे जात हे। ईडी ह पहिलीच ले ए मामला के जांच करत हे अउ एखर पहिली इंटरपोल ह रवि उप्पल के खिलाफ रेड कार्नर नोटिस जारी करे रिहीन। महादेव ऑनलाइन सट्टा ऐप ल रवि उप्पल ह सौरभ चंद्राकर संग सुरू करे रिहीन।
जानबा के मुताबिक करीबन दू महीना पहिली ईडी ह महादेव ऑनलाइन सट्टा ऐप मामला म मुंबई, कोलकाता अउ भोपाल म करीबन उनचालीस ठिन जघा म छापामारी करके करीबन चार सौ सतरा करोड़ रूपिया के संपत्ति जब्त करे रिहीन। त उहें केन्द्र सरकार ह एक महीना पहिली ले महादेव सट्टाबाजी ऐप के संगेसंग गलग ढंग ले चलत अइसन बाईस ठिन ऐप अउ वेबसाइट ल ब्लाक कर दे रिहीन।