प्रधानमंत्री नरेंद्र मोदी ह आज विकसित भारत दू हजार सैंतालिस-युवाओं की आवाज कार्यक्रम के वर्चुअल शुभारंभ करीन। ये मौका म प्रधानमंत्री ह कहिन कि भारत बर ये सही समय हे जब युवा मन ल विकसित भारत बनाय बर अमृतकाल के प्रयोग जरूर करना चाही।
ओमन कहिन कि भारत के इतिहास म ये वो समय हे जब देश एक बड़े छलांग लगइया हे। प्रधानमंत्री ह युवा मनले एक विकसित भारत बनाय के दिशा म काम करे के आग्रह करीन। श्री मोदी ह देशभर के राजभवन म राखे गे कार्यशाला म विश्वविद्यालय के कुलपति संस्थान प्रमुख अउ संकाय सदस्य मन ल संबोधित करीन। श्री मोदी ह युवा मनले एक विकसित भारत बनाय के लक्ष्य ल हमेशा ध्यान राखे के बात कीहिन।
राजधानी रायपुर के राजभवन म घलो समारोह के आयोजन करे गीस। ये मौका म युवा मन ल विकसित भारत विजन दू हजार सैंतालिस ले जोड़े बर युवाओं की आवाज म एक कार्यशाला राखे गीस। कार्यशाला म विकसित भारत, सशक्त भारतीय, संपन्न अउ टिकाउ अर्थव्यवस्था, सुशासन अउ सुरक्षा अउ विश्व म भारत जइसन विषय म गोठबात करे गीस।
कार्यशाला म बोलत राज्यपाल विश्वभूषण हरिचंदन ह कहिन कि दू हजार सैंतालिस तक भारत ल विकसित बनाय बर मिशन मोड म काम करे के जरूरत हे। ये मिशन म योगदान देवइया युवा मन ल बलाके उंखर विचार ल राष्ट्र निर्माण म शामिल करना महत्ता के बात हरय। ये संबंध म विश्वविद्यालय के शिक्षाविद् मन ल विचार करना चाही।
राज्यपाल ह कहिन कि ये भारत के अमृतकाल हे। पाछू कुछ बछर म समग्र शिक्षा अउ विश्वविद्यालय, आईआईटी, आईआईएम, मेडिकल अउ नर्सिंग कॉलेज, कौशल विकास अउ आने कतकोन योजना अउ नीति ले समाजिक अउ आर्थिक ढंाचा म बढ़वार होय हे। ओमन कीहिन कि एक सौ चौवंालिस करोड़ आबादी के संग भारत उनतीस बछर के औसत आयु के संग सबले युवा देश म एक हवय।
समारोह म आने आने विश्वविद्यालय के विद्वान मन ह विकसित भारत के दू हजार सैंतालिस के परिकल्पना म व्याख्यान दीन।
उच्चतम न्यायालय ह संविधान के अनुच्छेद-370 ल निरस्त करे के केंद्र सरकार के फैसला बरकरार राखे हे। ये अनुच्छेद म पूववर्ती जम्मू कश्मीर राज्य ल विशेष दर्जा देगे रीहिस। केंद्र ह बछर दू हजार उन्नीस म अनुच्छेद-370 ल निरस्त कर दे रीहिस अउ राज्य ल दू भाग म विभाजित करके केंद्र शासित प्रदेश लद्दाख अउ जम्मू कश्मीर बना दे रीहिन।
मुख्य न्यायाधीश डी.वाय. चंद्रचूड़ के अगवई म पांच जज के संविधान पीठ ह केंद्र के फैसला ल चुनौती देवइया याचिका के सुनवाई के बाद ये फैसला सुनइन। सर्वोच्च न्यायालय ह केहे हे कि अनुच्छेद-370 अस्थायी प्रावधान रीहिस, जउन ल कुछ विशेष उद्देश्य ले लाये गे रीहिस। अउ एला निरस्त करे के राष्ट्रपति के आदेश म कोनो किसम के दुर्भावना नइ रीहिस। न्यायालय ह केहे हे कि भारत संघ म शामिल होय के बाद जम्मू कश्मीर संप्रभु राज्य नइ रीहिस। पीठ ह केहे हे कि आने राज्य ले अलग जम्मू कश्मीर के कोनो आंतरिक संप्रभुता नइ रीहिस।
इही बीच प्रधानमंत्री नरेंद्र मोदी ह अनुच्छेद-370 निरस्त करे के संबंध म सर्वोच्च न्यायालय के फैसला ल ऐतिहासिक बताइन हे। सोशल मीडिया पोस्ट म श्री मोदी ह कहिन कि एखर ले जम्मू कश्मीर अउ लद्दाख के जनता बर आशा, प्रगति अउ एकता के घोषणा ल फेर ले बल मिले हे। प्रधानमंत्री ह कहिन कि अदालत ह सूझबूझ ले एकता के वो भावना ल मजबूत करे हे, जउन भारत के जनता ल एक दूसर ले जोड़े अउ संजोये हे।
एति छत्तीसगढ़ के नवनियुक्त मुख्यमंत्री विष्णुदेव साय ह सुप्रीम कोर्ट के फैसला ल ऐतिहासिक बताइन हे। ओमन कीहिन कि ये फैसला भारत के जीत हे।
भारतीय जनता पार्टी विधायक दल के नेता चुने गे पूर्व केंद्रीय मंत्री विष्णुदेव साय के परनदीन तेरा दिसंबर के राज्य के मुख्यमंत्री पद के शपथ लेके संभावना हरय। राज्यपाल विश्वभूषण हरिचंदन पद अउ गोपनीयता के शपथ देवाहीं। राजधानी रायपुर के साइंस कॉलेज मैदान म एखर बर तियारी जोरदरहा होवत हे। ये मौका म प्रधानमंत्री नरेंद्र मोदी, केंद्रीय गृहमंत्री अमित शाह, भाजपा के राष्ट्रीय अध्यक्ष जे.पी. नड्डा समेत आने राज्य के मुख्यमंत्री मनके संगेसंग केंद्रीय मंत्री अउ राष्ट्रीय नेता मनके मौजूद रेहे के संभावना हे।
खबर के मुताबिक श्री साय राज्य के चौथा मुख्यमंत्री होहीं। एखर पहिली अजित जोगी, डॅाक्टर रमनसिंह अउ भूपेश बघेल मुख्यमंत्री रही चुके हे। काली रायपुर म राखे गे भाजपा के नवनिर्वाचित विधायक मनके बइठका म केंद्रीय पर्यवेक्षक अर्जुन मुंडा सर्वानंद सोनोवाल अउ दुष्यंत कुमार गौतम के मौजूदगी म श्री साय ल सर्व सम्मति ले भाजपा विधायक दल के नेता चुने गीस।
प्रदेश के नवनियुक्त मुख्यमंत्री विष्णुदेव साय अउ प्रदेश भाजपा अध्यक्ष अरूण साव ह आज वीडियो कॉन्फ्रेसिंग ले पार्टी के बूथ स्तर के कार्यकर्ता मन संग बइठका करके जीत के बधाई दीन। ये मौका म श्री साय ह पच्चीस हजार ले जादा कार्यकर्ता मन ल उंखर मेहनत खातिर आभार जताइन। संगेसंग रायपुर के साइंस कॉलेज मैदान म होवइया शपथ ग्रहण समारोह म शामिल होय खातिर नेवता दीन।
प्रदेश के नवा बने मुख्यमंत्री विष्णुदेव साय आज बीहनिया राजधानी रायपुर के भगवान श्रीराम मंदिर पहुंचीन अउ उंहा पहुंचके पूजा-पाठ करत छत्तीसगढ़ के चहुंमुखी विकास अउ प्रदेशवासी मनके सुख-समृद्धि के मनौति मानीन। ये मौका म श्री साय ह कहिन कि छत्तीसगढ़ के सबो वर्ग के समुचित विकास अउ प्रदेश विकास के क्षेत्र म देश म अपन महत्ता के जगा बनावय, इही भगवान ले कामना हे ।
इही बीच नवनियुक्त मुख्यमंत्री श्री साय ले आज बीहनिया प्रदेश के मुख्य सचिव अमिताभ जैन अउ पुलिस महानिदेशक अशोक जुनेजा ह राजधानी रायपुर म उंखर अस्थायी निवास पहुना म भेंट करके बधाई अउ शुभकामना दीन।
मध्यप्रदेश म पूर्व उच्च शिक्षा मंत्री अउ भाजपा नेता डॅाक्टर मोहन यादव राज्य के नवा मुख्यमंत्री होंही। आज भोपाल म पार्टी के नवनिर्वाचित विधायक मनके बइठका म मोहन यादव ल विधायक दल के नेता चुने गीस। श्री यादव उज्जैन दक्षिण सीट ले तीन घांव विधायक चुने गेहे।
सुकमा जिला म माओवादी मन कोति ले लगाये गे आईईडी के विस्फोट होय ले दू जवान घायल होगे। घायल जवान मन ल अस्पताल म भर्ती कराय गीस। खबर के मुताबिक जिला के किस्टाराम थाना क्षेत्र के डब्बामरका कैम्प ले जिला पुलिस बल, कोबरा बटालियन अउ सीआरपीएफ के जवान तलाशी अभियान म निकले रीहिन। इही दौरान सलातोंग तीर माओवादी मन ह बम विस्फोट कर दीन। जेखर चपेट म आय ले दू झिन जवान घायल होगे। ये घटना के बाद मौका म पहुंचे अतिरिक्त सुरक्षा बलके टीम ह घटना स्थल के संगेसंग तीर तखार के जंगल म तलाशी अभियान तेज कर देहे।
केंद्रीय युवा कार्य अउ खेल मंत्री अनुराग सिंह ठाकुर ह आज नई दिल्ली म पहले खेलो इंडिया-पैरा गेम्स के औपचारिक उद्घाटन करीन। ये मौका म श्री ठाकुर ह कहिन कि ये आयोजन हमर खेल भावना के सिरिफ एक जश्न नइ हे, भलुक ये एक अइसन रोशनी हे, जउन भारत म सशक्तिकरण लाही। ओमन कहिन कि खेलो इंडिया पैरा गेम्स प्रधानमंत्री के खेलोगे तो खिलोगे दृष्टिकोण ल दोहराही।
आठ दिन के ये आयोजन म सेवा खेल नियंत्रण बोर्ड समेत बत्तीस राज्य अउ केंद्र शासित प्रदेश के एक हजार चार सौ ले जादा खिलाड़ी भाग लीही। ये पैरा एथलिट, निशानेबाजी, तीरंदाजी एथलेटिक्स, फुटबॉल, बैडमिंटन, टेबल टेनिस, भारोत्तोलन, समेत सात ठिन प्रतियोगिता म भाग लीहीं।