आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री नरेंद्र मोदी काली वीडियो कॉन्फ्रेंसिंग के जरिया ले ‘‘विकसित भारत दू हजार 47: युवाओं की आवाज‘‘ के सुभारंभ करही। ए पहल के उद्देस्य विकसित भारत के दृष्टिकोण खातिर बिचार साझा करे बर युवा मन ल एक मंचदेवय के बेवस्था हवय। श्री मोदी देसभर के राजभवन म राखेगे कार्यसाला मन म विश्वविद्यालय के कुलपति, संस्थान प्रमुख अउ संकाय सदस्य मन ल संबोधित करहीं। विकसित भारत के उद्देस्य देस ल उंखर स्वतंत्रता के सौंव्वा बछर याने दू हजार 47 तक विकसित राष्ट्र बनाना हे, ऐमा आने आने बात के संगे संग आर्थिक वृध्दि, सामाजिक प्रगति, पर्यावरणीय स्थिरता अउ सुशासन समेत बिकास आने आने पहलू सामिल हवय। नई दिल्ली म आज मीडिया ले गोठबात म नीति आयोग के मुख्य कार्यकारी अधिकारी बी.वी.आर. सुब्रमण्यम ह बताइन कि प्रधानमंत्री विकसित भारत के दृष्टिकोण खातिर देस के युवा मनके बिचार जाने खातिर ए अभियान के सुरूआत करही। श्री सुब्रमण्यम ह बतईन कि विद्यार्थी मनके विचार ल विकसित भारत के दृष्टिकोण मन सम्मिलित करे जाही।
इही सिलसिला म छत्तीसगढ़ म घलो काली राजभवन म विकसित भारत दू हजार सैंतालीस आइडियाज पोर्टल के शुभारंभ के मउका म प्रधानमंत्री के वर्चुअल संबोधन के प्रसारण करे जाही। एखर बाद राज्यपाल विश्वभूषण हरिचंदन के अध्यक्षता म एक ठिन कार्यसाला आयोजित करे जाही। ऐमा राज्य के जम्मो सासकीय अउ निजी विश्वविद्यालय के कुलपति मन सामिल होही।

दुर्घटना

जांजगीर-चांपा जिला म आज होइस एक ठिन सड़क हादसा म दूल्हा-दुल्हन समेत 5 झिन बराती मनके मउत होगिस। ए सबो मृतक मन एकेच परिवार के बताय गे हवय। मिले जानबा के मुताबिक एक ठिन कार म दूल्हा-दुल्हन समेत 5 झिन बराती मन सवार होके शिवरीनारायण ले बलौदा डहार ले आवत रिहीन इही दौरान मुलमुला थाना क्षेत्र के पकरिया-झूलन गांव के तीर सामने ले आवत ट्रक ह उंखर कार ल जोरदरहा ठोकर मार दीन। ए टक्कर ले कार म आगी लगे के संगेसंग ओखर परखच्चा घलो उड़ गीस अउ मउकच म कार म बइठीन जम्मों लोगन मनके मउत होगीस। घटना के बाद ट्रक चालक उंहा ले फरार होगीस। पुलिस ह मामला दर्ज कर ट्रक चालक के तलासी सुरू कर दे हवय।

राज्यपाल-विद्यार्थी मुलाकात

‘‘एक भारत-श्रेष्ठ भारत‘‘ अभियान के ‘‘युवा संगम‘‘ कारीकरम के चलत आई.आई.टी. गोवा के पढ़ईया लइका मन ह ए बेरा छत्तीसगढ़ प्रवास म हवय। ए लइका मन ह आज राजभवन म राज्यपाल विश्वभूषण हरिचंदन ले मिलिन। ए मउका म राज्यपाल ह किहीन कि एक भारत-श्रेष्ठ भारत कारीकरम के दूरदर्सी ढांचा के चलत युवा संगम कारीकरम हमर राष्ट्र के आने-आने पहलू मन ल गहराई ले समझे अउ ओमा गरब करे के एक ठिन मउका हवय। छत्तीसगढ़ यात्रा के दौरान पढ़ईया लइका मन ल इंहा के संस्कृति, प्रगति अउ विरासत के आने-आने पहलू मन ल जाने अउ ओला सीखें के मउका मिलही। राज्यपाल ह पढ़ईया लइका मन ले किहीन कि ओमन अइसन काम बूता करय जेखर ले देस गौरान्वित होवय अउ ‘‘एक भारत महान भारत‘‘ के उददेस्य पूरा हो सकय। राज्यपाल ह ए दौरान विद्यार्थी मन ले आने-आने बिषय म चर्चा घलो करीन।
गौरतलब हे कि ‘‘एक भारत श्रेष्ठ भारत‘‘ अभियान म आई.आई.टी. गोवा के विद्यार्थी मन काली ले 5 दिन के छत्तीसगढ़ प्रवास म हवय। ए दौरान एमन छत्तीसगढ़ के पर्यटन स्थल, संस्कृति अउ खानपान के बारे म जानकारी लेवत हवय।

जवान-मौत