बिलासपुर रेल मंडल के जांजगीर-नैला अउ पेंड्रारोड स्टेशन म प्रधानमंत्री जन औषधि केंद्र के स्थापना करे जाही। एखर तहत स्टॉल के आबंटन बर ई-नीलामी के प्रक्रिया शुरू कर दे गेहे। रेलवे ले मिले जानकारी के अनुसार ए स्टेशन मन म प्रधानमंत्री भारतीय जनऔषधि केंद्र स्थापित करे के उद्देश्य जम्मों झन ल सस्ता कीमत म गुणवत्तापूर्ण जनऔषधि उत्पाद देवाना हे। एखर तहत पायलेट प्रोजेक्ट बर पचास स्टेशन मनके पहिचान करे गेहे। जेमा दक्षिण पूर्व मध्य रेलवे के बिलासपुर मंडल के जांजगीर-नैला अउ पेण्ड्रोरोड स्टेशन घलो शामिल हरय।
ओमन कहिन कि भारत म अइसने सप्लाई चेन विकसित करना हे ताकि हमन दूसर देश मन उपर कम से कम निर्भर रहन। प्रधानमंत्री ह कहिन कि हमन ल पुराना मानसिकता ले घलो बाहिर आना हे, कि कोनो जगा कोई चीज कम कीमत म उपलब्ध हे, त ओला उंहा ले आयात कर लेवंय।
रायपुर कलेक्टर डॅाक्टर सर्वेश्वर नरेंद्र भूरे ह कलेक्टोरेट परिसर स्थित कलेक्टर सभाकक्ष म जिला जल अउ स्वच्छता मिशन के बइठका लीन। कलेकटर ह कहिन कि जल जीवन मिशन के लक्ष्य हितग्राही मन ल स्वच्छ पेयजल पहुंचाना हे। एखरे संग ओमन कहिन कि कार्य के गुणवत्ता ल ध्यान म रखत कनेक्शन देके बाद पेयजल के पूर्ति सुनिश्चित करंय।
कलेक्टर ह बताइन कि ए जिला म एक लाख नब्बे हजार घरेलू नल कनेक्शन स्वीकृत करे गेहे। एमा ले एक लाख चौसंठ हजार ले जादा घरेलू कनेक्शन दे गेहे। उंहे करीब छब्बीस हजार कनेक्शन बांचे हे, जेला फरवरी के आखरी तक पूरा करे के निर्देश दीन। एखरे संग ओमन कीहिन कि घरेलू कनेक्शन देबर सड़क मन ल कांटे गेहे अउ ओखर बने ढंग ले मरम्मत करे जाय।
ए दिन म प्रशासन कोति ले अवैध कब्जा हटाय के कार्रवाई करे जात हे। राजधानी रायपुर म अतिक्रमण हटाय के कार्रवाई लगातार तीसरा दिन भी चालू रीहिस। जिला प्रशासन अउ नगर निगम के टीम ह आज बीहनिया कालीबाड़ी चौक म लगभग दस साल पुराना अवैध कब्जा ल हटाय के कार्रवाई करीस। ए दौरान निगम के अमला ह शासकीय वन आवासीय परिसर ले लगे लगभग साढ़े चार सौ वर्गफीट जमीन ल पुराना अवैध कब्जा ले मुक्त कराइस। ए जमीन उपर चार ठिन पक्का दुकान बनाय गे रीहिस।
नगर निगम जोन क्रमांक तीन के आयुक्त राकेश शर्मा ह बताइन कि ए अवैध अतिक्रमण ल हटाय बर कब्जाधारी ल दू हजार सतरा म घलो नोटिस जारी करे गे रीहिस। कब्जाधारी ह साढ़े चार सौ वर्गफीट जमीन ल अपन स्वामित्व के जमीन बताके कब्जा हटाय ले मना करे रीहिस।
प्रदेस म उपभोक्ता मामला के सुनवाई अब ई-हियरिंग के माध्यम ले करे जाही। राज्य उपभोक्ता विवाद प्रतितोषण आयोग के अध्यक्ष न्यायमूर्ति गौतम चौरड़िया ह रायपुर म राखे गे पत्रकार वार्ता म बताइन कि कोनो भी उपभोक्ता ऑनलाईन या आवेदन देके अपन मामला के सुनवाई बर अपील कर सकत हे। ओमन बताइन कि लोगन मन ल जल्दी न्याय देके उद्देश्य ले ए व्यवस्था करे जात हे ।
श्री चौरड़िया ह बताइन कि इक्कीस अक्टूबर दू हजार बाईस ले अब तक राज्य उपभोक्ता आयोग म चार सौ पैंतीस मामला दर्ज करे गेहे। ओमन बताइन कि इक्कीस अक्टूबर दू हजार बाईस ले आज तक सात सौ पंचानबे मामला म ले छै सौ चार के निराकरण हो चुके हे। उंहे एक सौ इंक्यानबे मामला लंबित हवय। एखर एवज म अब तक लगभग एक करोड़ तेईस लाख निन्यानबे हजार रूपिया के राशि उपभोक्ता मन ल दे जा चुके हे ।
न्यायमूर्ति श्री चौरड़िया बताइन कि प्रदेश के जिला उपभोक्ता आयोग म सोला मध्यस्थ नियुक्त करे गेहे। जेमा मामला के सुनवाई करे जात हे। ओमन बताइन कि उपभोक्ता मन ल हेल्प डेस्क के सुविधा घलो उपलब्ध कराय गेहे। एमा शिकायत अउ सुझाव दे जा सकत हे।
मिचौंग तूफान के असर अभी घलो प्रदेस म बने हे। राजधानी रईपुर म आज बीहनिया कुछ देर बर धूप निकले रीहिस, फेर अधिकांश बेरा बादल छाये रीहिस, उंहे मौसम ठंडा रीहिस।
मौसम विभाग के अनुसार काली ले प्रदेश म बादल छटे के आसार हे ओखर बाद ठंड अउ बाढ़ सकत हे। इही बीच जाड़ ल देखत बलरामपुर जिला म स्कूल के संचालन समय म बदलाव करे गेहे। कलेक्टर रिमिजियुस एक्का ह ए संबंध म आदेश जारी कर देहे। जारी आदेश के अनुसार दू पाली म संचालित होवइया कक्षा मन प्रथम पाली म बीहनिया नौ बजे ले मंझनियंा साढ़े बारा बजे तक संचालित होही।उंहे दूसरइया पाली म संचालित होवइया कक्षा मंझनियंा बारा बजके पैंतालिस मिनट ले चार बजके पंद्रह मिनट तक संचालित करे जाही। अइसने एक पाली म संचालित कक्षा मन बीहनिया नौ बजके पैंतालिस मिनट बजे ले मंझनिया चार बजे तक लगाय जाही। ए आदेश अवया पंद्रह जनवरी तक प्रभावशील रीही।
ओति मिचौंग के तूफान के असर बीजापुर जिला के बीजापुर अउ भोपालपट्नम विकासखंड म धान के फसल ल नुकसान पहुंचे हे। ए संबंध म कलेक्टर ह बताइन कि बीजापुर जिला म बाईस मिलिमीटर बरसा होय हे। ओमन फसल नुकसान के पटवारी करा निरीक्षण करवाके मुआवजा दे जाय के बात कीहिन हे।