प्रधानमंत्री नरेन्द्र मोदी ह किहीन हे कि भारतीय जनता पार्टी, सुशासन के दृष्टिकोण ले देस के सबले लोकप्रिय पार्टी हे। ओमन ह हाल के विधानसभा चुनाव म सत्तारूढ़ दल के जीत ले जुड़े आंकड़ा के हवाला दीन। नई दिल्ली म आज भाजपा संसदीय दल ह विधानसभा चुनाव म पार्टी के सानदार जीत बर प्रधानमंत्री के अभिनंदन करीन। संसदीय दल के बइठका म श्री मोदी ह किहीन कि कांग्रेस ह अभी तक विधानसभा चुनाव म कुल मिलाके चालीस घांव दुबारा जनादेश के परयास करीस, फेर सिरिफ सात बार ओला मउका मिलीस।
दूसर कोति, भारतीय जनता पार्टी फेर जनादेश पाय के उनचालीस परयास म बाईस घांव सत्ता म आय हे। श्री मोदी ह किहीन कि भारतीय जनता पार्टी ह छत्तीसगढ़, राजस्थान अउ मध्यप्रदेस के संगेच मिजोरम अउ तेलंगाना म घलो अपन शक्ति बढ़ाय हे।
बइठका के बाद संसदीय कार्यमंत्री प्रहलाद जोशी ह प्रधानमंत्री के हवाला ले किहीन कि विधानसभा चुनाव म भारतीय जनता पार्टी के जीत ह पार्टी के सबो कार्यकर्ता मनके कड़ा मेहनत के नतीजा हे। श्री जोशी ह बतईन कि प्रधानमंत्री ह सबो भाजपा सांसद अउ मंत्री मन ले बारह दिसंबर ले पच्चीस जनवरी तक विकास भारत संकल्प यात्रा म भागीदारी करे बर किहीन हे।
सशस्त्र सेना झंडा दिवस
आज सशस्त्र सेना झंडा दिवस हे। ए दिन ल सशस्त्र बल म सहीद अउ सैनिक मनके सम्मान बर हर बछर सात दिसंबर के मनाय जाथे। झंडा दिवस के उद्देश्य सैनिक मन डहार ले देस बर करे गे निःस्वार्थ योगदान बर आभार व्यक्त करना हे। रक्षा मंत्री राजनाथ सिंह ह लोगन ले सशस्त्र बल झंडा दिवस कोष म दिल खोल के योगदान करे के अपील करीन हे अउ किहीन कि ओमन ह वीर नारी, पूर्व सैनिक अउ उंखर परिवार के कल्याण ल निश्चित करे बर सरकार के प्रयास म सामिल होवय।
ऐति, छत्तीसगढ़ म घलो सशस्त्र सेना झंडा दिवस के मउका म कतकोन कारीकरम करे जावत हे। इही कड़ी म राजभवन म राखे गे समारोह म राज्यपाल विश्वभूषण हरिचंदन सहीद सैनिक मन ल पुष्पांजलि अर्पित करके उंखर सम्मान म मौन घलो राखीन। सैनिक कल्याण बोर्ड के अधिकारी अनुराग तिवारी ह राज्यपाल ल सशस्त्र सेना झंडा दिवस के प्रतीक बैज लगाके उंखर अभिनंदन करीन। ए मउका म राज्यपाल ह किहीन कि सशस्त्र बल के जवान मन ह बहादुरी के साथ देश के सुरक्षा म अपन भूमिका निभईन हे। ओमन किहीन कि झंडा दिवस उंखर मन बर कृतज्ञता जताय के पर्व हे। राज्यपाल ह ए बात म खुसी जतईन कि झंडा दिवस निधि ले सत्ताईस ठन कल्याणकारी योजना चलाय जावत हे। ओमन ह ए बात म घलो संतोष जतईन कि राज्य सरकार ह भूतपूर्व सैनिक मन बर आने-आने नौकरी म दस ले बीस प्रतिसत आरक्षण के प्रावधान करे हे। राज्यपाल ह राज्य सैनिक कल्याण बोर्ड ल दू लाख रूपिया के सहयोग रासि घलो दीन।
ए मउका म राज्यपाल ह सहीद जवान मनके परिवार वाले मन ल अउ अलंकरण विजेता मनके संगेच झंडा दिवस के मउका म बिसेस योगदान देवइया दानदाता मनके घलो सम्मान करीन। ओमन ह सैनिक कल्याण मंडल के वेबसाइड फ्लेम के घलो सुरूवात करीन।
अग्निवीर भर्ती रैली
अग्निवीर थल सेना भर्ती रैली के आयोजन पन्द्रह ले तेईस दिसंबर तक जांजगीर के खोखराभांठा स्थित पुलिस लाइन म करे जाही। ए भर्ती रैली म प्रदेसभर के युवा भाग ले सकही। ए रैली बर तैयारी जोरसोर ले चलत हे। सेना के सहायक भर्ती अधिकारी सतीश कुमार बी. अउ अपर कलेक्टर एस.पी. वैद्य ह पुलिस लाइन परिसर म तैयारी के जायजा लीन। दूनों अधिकारी मन ह सुरक्षा व्यवस्था, पेयजल अउ आवास व्यवस्था के संगेसंग इंटरनेट, सीसीटीवी अउ चिकित्सा व्यवस्था के संबंध म जानकारी लीन।
ए भर्ती रैली ल लेके महासमुंद जिला म स्थानीय युवा मन बर बिसेस प्रसिक्षण सिविर के आयोजन नौ ले सोलह दिसंबर तक करे जाही। जिला प्रसासन अउ महासमुंद के पूर्व सैनिक सेवा संघ डहार ले जिला के युवा मन ल जादा ले जादा संख्या म सफलता दिलाय के उद्देश्य ले ए प्रसिक्षण आयोजित करे जावत हे। एखर बर इच्छुक अभ्यर्थी काली आठ दिसंबर तक पंजीयन करवा सकत हे।
ट्रेन परिचालन
दक्षिण मध्य रेलवे के सिकंदराबाद रेलमंडल म काजीपेट ले कोंडापल्ली अउ विजयवाड़ा रेल मंडल म अवइया विजयवाड़ा ले गोधरा के बीच तीसरा रेललाइन के काम के सेती कुछेक ट्रेन के अवई-जवई बाधित रइही। ए काम तीन दिसंबर ले सुरू होगे हवय, जउन ह उन्नीस दिसंबर तक चलही, तेखर सेती विशाखापट्टनम-नई दिल्ली एक्सप्रेस ल विजयनगरम्-टिटलागढ़-रायपुर अउ नागपुर के रस्ता ले चलाय जाही। उहें, विशाखापट्टनम-गांधी धाम एक्सप्रेस, पुरी-ओखा एक्सप्रेस अउ विशाखापट्टनम-निजामुद्दीन एक्सप्रेस घलो इही बदले रद्दा ले चलही। एखर अलावा बिलासपुर-चेन्नई सेंट्रल एक्सप्रेस ल बिलासपुर-विजयनगरम-विजयवाड़ा रद्दा ले चलाय जाही। ए सबो साप्ताहिक गाड़ी मन ह अप अउ डाउन दूनों कोति ले बदले रद्दा म ही चलही।
अंतर महाविद्यालयीन युवा महोत्सव
रईपुर के इंदिरा गांधी कृषि विश्वविद्यालय म ए बखत अंतर महाविद्यालयीन युवा महोत्सव चलत हे। काली ए महोत्सव के सुरूवात सांस्कृतिक सोभा यात्रा ले होइस। उद्घाटन समारोह म पंडित रविशंकर शुक्ल विश्वविद्यालय के कुलपति प्रोफेसर सच्चिदानंद शुक्ला मुख्य अतिथि के रूप म सामिल होइन। ए मउका म प्रोफेसर शुक्ला ह कहिन कि संस्कृति के संरक्षण म युवा महोत्सव जइसन आयोजन के बड़े भूमिका होथे। उहें, कारीकरम के अध्यक्षता करत विश्वविद्यालय के कुलपति डॉक्टर गिरीश चंदेल ह कहिन कि कृषि विश्वविद्यालय म युवा महोत्सव पाछु अट्ठाईस बछर ले होवत हे। ओमन बतईन कि ओमन ह खुद इहां विद्यार्थी के रूप म युवा महोत्सव म सामिल होय रिहीन। डॉक्टर चंदेल ह बतईन कि ए विश्वविद्यालय के विद्यार्थी मन ह राष्ट्रीय स्तर म होवइया कारीकरम म कतकोन स्वर्ण पदक हासिल करे हे।
ए महोत्सव म सबो कृषि महाविद्यालय के विद्यार्थी मन ह अपन-अपने क्षेत्र के लोक संस्कृति, तीज-तिहार के संगेच स्थानीय रीति-रिवाज अउ पर्यटन स्थल ल देखावत झांकी घलो प्रस्तुत करीन। पारंपरिक वेशभूषा म सजे ए सांस्कृतिक दल के कलाकार मन ह अपन झांकी म पर्यावरण संरक्षण, जल संरक्षण, नारी सशक्तिकरण अउ सुपोषण जइसन जरूरी बिसय म संदेस घलोक दीन। ए चार दिवसीय युवा महोत्सव म कृषि महाविद्यालय के एक हजार ले जादा विद्यार्थी मन सामिल होवत हे। ए महोत्सव म विद्यार्थी मन बर आने-आने प्रकार के पच्चीस ठन प्रतियोगिता होवत हे।
किसान सम्मान
दंतेवाड़ा जिला के प्रगतिशील किसान शैलेष कुमार अटामी ल कृषि अनुसंधन परिषद डहार ले लखपति किसान पुरस्कार ले सम्मानित करे गेहे। काली नई दिल्ली म राखे गे समारोह म ओमन ल ए सम्मान दे गीस।
खबर के मुताबिक दंतेवाड़ा के कृषि विज्ञान केन्द्र डहार ले जिला के लखपति किसान के रूप म उंखर उपलब्धि के ब्यौरा नई दिल्ली के भारतीय कृषि अनुसंधान परिषद ल भेजे गे रिहीस। शैलेष अटामी दंतेवाड़ा जिला के कासोली गांव म पच्चीस एकड़ के रकबा म धान, मूंग, सूरजमुखी, अमरूद, केला अउ नारियल के अलावा कतकोन साग-भाजी के खेती करथे। एखरे संग ओमन ह पशुपालन, मुर्गीपालन, बकरीपालन अउ मछलीपालन के काम घलो करथे। शैलेष अटामी के पिता बोसाराम अटामी ह पाछु कई बछर ले कृषि विज्ञान केन्द्र ले जुड़े हे। ओमन ल घलो भारतीय कृषि अनुसंधान परिषद डहार ले पौधा के विविधता के क्षेत्र म बिसेस कार्य बर किसान संरक्षण पुरस्कार ले सम्मानित करे गे हवय।
अउ अब पेस हे मौसम के हाल…
मिचौंग तूफान के असर अभी घलो प्रदेस म बने हे। एखर असर ले राजधानी रईपुर संघरा प्रदेस के आने-आने जघा म हल्का ले मध्यम बरसा होवत हे। उहें, कुछेक इलाका म तेज बरसा होय के समाचार घलोक हे।
मौसम विभाग के अनुसार ए बेरा दक्षिण छत्तीसगढ़ अउ विदर्भ के उपर एक ठन चक्रीय चक्रवाती घेरा बने हे, जेखर परभाव ले अवइया चौबीस घंटा म प्रदेस के आने-आने जघा म हल्का ले मध्यम बरसा हो सकत हे। पाछु दू दिन के बरसा के सेती प्रदेस के न्यूनतम तापमान म तीन ले चार डिग्री सेल्सियस के गिरावट होय के संभावना हे। मौसम वैज्ञानिक के अनुसार काली ले प्रदेस म बादल छठे के आसार हे, एखर बाद जाड़ अउ बड़ सकत हे।