केंद्र सरकार ह प्रधानमंत्री किसान सम्मान निधि योजना म पारदर्शिता लाये बर किसान मनके आधार पहिचान ले संबंद्ध ई-के.वाय.सी. शुरू करे हे। लोकसभा म केंद्रीय कृषि अउ किसान कल्याण राज्यमंत्री शोभा करंदलाजे ह बताइन कि किसान सम्मान निधि योजना के फायदा लेबर कतकोन फर्जी आवेदन मिले हे।
ओमन ह कहिन कि ए योजना म पारदर्शिता सुनिश्चत करे बर ई-के.वाय.सी. शुरू करे गेहे। एखर प्रक्रिया बहुत सरल हे। एला एक ठिन मोबाईल ऐप ले घलो पूरा करे जा सकत हे। पी.एम. किसान योजना के चलत हर बछर छै हजार रूपिया किसान मनके बैंक खाता म डाले जाथे।
सांसद इस्तीफा
भारतीय जनता पार्टी के राष्ट्रीय अध्यक्ष जे.पी. नड्डा के निर्देश म छत्तीसगढ़ ले सासंद अरूण साव अउ गोमती साय ह अपन इस्तीफा दे देहे। दूनो सांसद मन ह लोकसभा अध्यक्ष ओम बिरला ल सहयोग देबर धन्यवाद देत अपन इस्तीफा ओमन ल देहे। सांसद पद ले इस्तीफा देले पहिली श्री साव अउ श्रीमती साय ह नई दिल्ली म प्रधानमंत्री मोदी ले भेंट करीन।
जानबा के अनुसार छत्तीसगढ़ समेत मध्यप्रदेश अउ राजस्थान विधानसभा चुनई म जीत के बाद भाजपा सांसद मन ल पार्टी कोति ले इस्तीफा देबर बोले गेहे। एखर बाद ले तीनो राज्य के सांसद मन अपन पद ले इस्तीफा देवत हे।
रमनसिंह अधिकारी सलाह
भारतीय जनता पार्टी के राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह ह राज्य के अधिकारी मन ल आगाह करे हे कि ओमन ह पाछू के तारीख दिखाके जरूरी फाइल ल मंजूर करत हे, जउन कि गलत हे। डॅाक्टर सिंह ह ट्वीट करके कहिन हे कि सबो अधिकारी मन प्रशासनिक व्यवस्था के हिस्सा हे अउ जब तक प्रदेश म नवा सरकार के गठन नइ होही, तब तक अइसे काम बुता ले बचना चाही।
मीडिया ले गोठबात करत डॅाक्टर सिंह ह ए घलो कहे हे कि नवा सरकार के गठन के बाद महादेव सट्टा ऐप अउ भ्रष्टाचार ले जुड़े मामला म ईडी के कार्रवाई म अउ तेजी आही। ओमन कहिन कि अइसन मामला ल तुरते निपटाय के कोसिस होही। डॅाक्टर सिंह ह कहिन कि भाजपा ह चुनई घोषणा पत्र म करे गे अपन सबो वादा ल पूरा करही।
राजनंादगांव सांसद डाक संभाग मंाग
राजनंादगंाव के सांसद संतोष पांडे ह आज लोकसभा म राजनंादगांव ल डाक विभाग के संभाग बनाय के मंाग करे हे। ओमन ह कहिन कि राजनंादगंाव म डाक विभाग के उप संभाग हवय अउ एखर संभागीय कार्यालय भिलाई म हवय। एखरे सेती राजनंादगंाव जिला के संगेसंग एखर करा दूसर जिला के लोगन मन ल घलो डाक विभाग ले संबंधित काम बुता बर भिलाई जाय बर पड़थे। ओमन बताइन कि राजनांदगांव संसदीय क्षेत्र म जिला के संख्या दू ले बाढ़के चार होगे हे। जेमा ले एक जिला ह पूरा आदिवासी बहुल जिला हे। एमा ले सबो जिला राजनंादगंाव करा हे। फेर भिलाई के संभाग कार्यालय ह ए जिला ले लगभग एक सौ बीस किलोमीटर दूरिहा हे। जेखर सेती लोगन मन ल अवई जवई म परसानी होथे। सांसद ह कहिन कि उप संभाग ल जोड़के राजनंादगंाव ल पूर्ण संभाग के दर्जा दे जाय।
मुख्य सचिव निर्देश
राज्य के मुख्य सचिव अमिताभ जैन ह भू पंजीयन विभाग म रजिस्ट्री करे वाले झारखंड के एक ठिन आई.टी. कंपनी ल दुबारा एक्सटेंशन नइ देके निर्देश दीन । ए कंपनी ह राज्य म काम करे के अपन पांच बछर के बेरा ल दू बछर पहिली ही पूरा कर ले रीहिस। फेर कंपनी ल सरलग एक्सटेंशन दे जात रीहिस। ए मामला के जानकारी मिलतेच मुख्य सचिव ह अधिकारी मनके एक बइठका बुलाइन अउ ए कंपनी ल फेर काम म नइ रखे के निर्देश दीन।
भीमराव अंबेडकर-महापरिनिर्वाण दिवस
देश ह आज भारत रत्न डॅाक्टर भीमराव अंबेडकर ल उंखर अड़सठवंा महापरिनिर्वाण दिवस म श्रद्धंाजलि देवत हे। आज बीहनिया राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेंद्र मोदी, लोकसभा अध्यक्ष ओम बिड़ला समेत कतकेान केंद्रीय मंत्री अउ सांसद मन ह संसद भवन परिसर म डॅाक्टर अंबेडकर के मूर्ति म फूल चढ़ाइन।
उंहे छत्तीसगढ़ के राज्यपाल विश्वभूषण हरिचंदन ह घलो राजभवन म डॅाक्टर अंबेडकर के फोटो म हार पहिनाके ओमन ल श्रद्धंाजलि दीन। राज्यपाल ह कहिन कि डॅाक्टर अंबेडकर ह समाज के वंचित अउ कमजोर तबका के सशक्तिकरण म महत्वपूर्ण भूमिका निभाय हे।
रायपुर म प्रदेश कंाग्रेस कार्यालय राजीव भवन म घलो डॅाक्टर अंबेडकर के पुण्यतिथि म ओमन ल श्रद्धंाजलि दे गीस। ए बेरा म प्रदेश कंाग्रेस अध्यक्ष दीपक बैज समेत आने पदाधिकारी अउ कार्यकर्ता मौजूद रीहिन।
एखर अलावा दक्षिण पूर्व मध्य रेलवे के रायपुर मंडल कोति ले डॅाक्टर अंबेडकर के महापरिनिर्वाण दिवस म एक ठिन कार्यक्रम आयोजित करके ओमन ल श्रद्धांजलि दे गीस। ए मौका म मंडल रेल प्रबंधक संजीव कुमार समेत रेलवे के आने वरिष्ठ अधिकारी अउ कर्मचारी मन मौजूद रीहिन।
सशस्त्र सेना झंडा दिवस
सशस्त्र सेना झंडा दिवस काली सात दिसंबर के मनाये जाही। ए संबंध म राज्य सैनिक बोर्ड अउ संचालक सैनिक कल्याण के सचिव ब्रिगेडियर विवेक शर्मा ह जम्मों नागरिक मनले शहीद सैनिक के विधवा माइलोगिन, भूतपूर्व सैनिक, सेना म सेवारत सैनिक अउ उंखर आश्रित मनके पुर्नवास के संगेसंग कल्याणकारी योजना मन बर जादा ले जादा दान देके अपील करे हे। दान करे गे पूरा राशि आयकर ले मुक्त होही। दान राशि सैनिक कल्याण कार्यालय के बैंक खाता, चेक, आरटीजीएस, या ड्राफ्ट दे जा सकत हे।
सीपीआर प्रशिक्षण कार्यक्रम
केंद्रीय स्वास्थ्य मंत्रालय अउ आयुर्विज्ञान म राष्ट्रीय परीक्षा बोर्ड ह आज सीपीआर म एक ठिन राष्ट्रव्यापी जन जागरूकता अउ प्रशिक्षण कार्यक्रम के आयोजन करीस। नई दिल्ली म आयोजित प्रशिक्षण कार्यक्रम म केंद्रीय स्वास्थ्य मंत्री डॅाक्टर मनसुख मांडविया ह हिस्सा लीन।
इही बीच रायपुर एम्स कोति ले घलो लेागन मन ल हृदयघात के प्रति जागरूक करे बर प्रशिक्षण दे जात हे। एखर चलत एक बछर म पचास हजार ले जादा मनखे मन ल दिल के दौरा पड़े के स्थिति म मदद बर रोगी के छाती दबाय अउ कृत्रिम रूप ले सांस देके प्रणाली-सीपीआर के प्रशिक्षण दे जात हे।
अतिक्रमण कार्रवाई
राजधानी रायपुर म दूसर दिन घलो नगर निगम ह अतिक्रमण अभियान हटाय के अभियान चलाइन। आज रिंग रोड करा बकरा मार्केट के पाछू आधा रद्दा म बनाय गे बारा ठिन पक्का दुकान ल तोड़े गीस।
बताये जात हे कि करीबन तीन बछर पहिली ए रद्दा के आधा हिस्सा म कब्जा करके दुकान बनाय गे रीहिस। अइसने अंबेडकर अस्पताल के बाहिर अवैध रूप ले लगाये गे गुमटी अउ स्टॉल ल घलो हटाय गेहे। ए दुकान मनके सेती ए रद्दा म अवई जवई म परसानी होत रीहिस अउ सरलग जाम के स्थिति बनत रीहिस।
बीजापुर जिला म सरलग होत बारिस अउ ठंड के सेती जनजीवन प्रभावित होय हे । उंहे खेत म लगे फसल ल घलो पानी ह नुकसान पहुंचाय हे। खरीदी केंद्र म घलो खुला म रखे धान के बोरा भीगे के खबर मिले हे।
जगदलपुर के शहरी अउ ग्रामीण अंचल म बारिश होय के संगेसंग करीबन बीस किलोमीटर प्रति घंटा के रप्तार ले हवा चलत हे। तापमान म सात डिग्री सेल्सियस ले जादा के गिरावट देखे गेहे। जादातर जगा म शीतलहर के स्थिति बने हे। उंहे राजधानी रायपुर समेत तीरतार के जगा म घलो जोरदरहा ठंड पड़त हे। मोसम विभाग ह रायपुर समेत मध्य अउ दक्षिण क्षेत्र म कोल्ड डे घोषित कर देहे। अवइया दू दिन तक मौसम के अइसने रहे के संभावना हे।
मौसम विभाग के मुताबिक एक अवदाब ह दक्षिण छत्तीसगढ़ के उपर हवय। संगेसंग एक उपरी हवा के चक्रवात घलो बने हुए हे। जेखर सेती प्रदेश म अवइया चौबीस घंटा के भीतरी कतकोन जगा म बरसा हो सकत हे।