मुख्य निर्वाचन पदाधिकारी रीना बाबा साहेब कंगाले ह आज राजभवन म राज्यपाल विश्वभूषण हरिचंदन ले भेंट करके ओमन ल छत्तीसगढ़ राज्य के छठवां विधानसभा के गठन के अधिसूचना के संग नवा चुने गे अभयर्थी मनके सूची ल सौंपीन।
ए मौका म भारत निर्वाचन आयोग के प्रधान सचिव एस.बी. जोशी, मुख्य निर्वाचन पदाधिकारी कार्यालय के संयुक्त मुख्य निर्वाचन पदाधिकारी नीलेश महादेव क्षीरसागर, राज्यपाल के सचिव अमृत कुमार खलखो, भारत निर्वाचन आयोग के अवर सचिव रितेश सिंह, सेक्शन अधिकारी देवेश सिंह अउ जूनियर असिस्टेंट अनीश ह मौजूद रीहिन।
केंद्र किसान
केंद्र सरकार ह किहीन कि किसान आंदोलन के बाद उंखर मन के मांग मन उपर बिचार करे खातिर बनाय गे समिति के सिफारिस ह अभी तक नइ आय हे, अउ न्यूनतम समर्थन कीमत ल कानूनी अधिकार के दर्जा देके मामला म सिरिफ सरकार ह कोई फैसला ले सकत हे। लोकसभा म केंद्रीय कृषि अउ किसान कल्याण मंत्री नरेंद्र सिंह तोमर ह बताइन कि सरकार ह स्वामीनाथन समिति के रिपोर्ट के सिफारिस के आधार म देस के किसान मन ल न्यूनतम समर्थन कीमत म पइसा देवत हे।
केन्द्र बीमा योजना
केंद्रीय वित्त राज्यमंत्री भागवत कराड ह राज्य सभा म बताइन कि पाछू तीन बछर म कुल अट्ठारा करोड़ पचास लाख लाभार्थी मन ल प्रधानमंत्री जीवन ज्योति बीमा योजना अउ प्रधानमंत्री सुरक्षा बीमा योजना बर चिन्हांकित करे गेहे। ओमन बताइन कि ए दूनो ठन बीमा योजना ल गरीब अउ वंचित मनखे मन बर करे जाही।
रमन सिंह-मुलाकात
भारतीय जनता पार्टी के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह कार्यकर्ता मन ले किहीन कि राजनांदगांव के जीत ह प्रदेस म नवा संदेस देहे। ओमन किहीन कि लोगन मन ह प्रधानमंत्री नरेंद्र मोदी के गारंटी म विस्वास करीन। डॉक्टर सिंह आज अपन निवास म राजनांदगांव जिला ले आय कार्यकर्ता मन संग भेंट करीन। ओमन यहू किहीन कि जम्मों कार्यकर्ता मन ह अवईया लोकसभा चुनई के तियारी म लग जाय। ओमन किहीन कि राज्य म मंत्री मंडल बनाय के बाद केबिनेट के पहिलीच बइठका म मोदी गारंटी योजना म गोठबात करे जाही।
सशस्त्र सेना झंडा दिवस
सशस्त्र सेना झंडा दिवस ल परनदीन मनाये जाही। ए संबंध म राज्य सैनिक बोर्ड अउ संचालक सैनिक कल्याण के सचिव ब्रिगेडियर विवेक शर्मा ह जम्मों नागरिक मनले शहीद सैनिक के विधवा माइलोगिन, भूतपूर्व सैनिक, सेना म सेवारत सैनिक अउ उंखर आश्रित मनके पुर्नवास के संगेसंग कल्याणकारी योजना मन बर जादा ले जादा दान देके अपील करे हे।
राजनांदगांव जिला के सेवानिवृत्त सैनिक कल्याण अधिकारी ग्रुप कैप्टन ब्रिजेश कुमार शर्मा ह बताइन कि ए मौका म शहीद होय जवान के परिवार वाले अउ जरूरतमंद भूतपूर्व सैनिक मनके मदद करे खातिर झंडा ल बांटके धनराशि इकट्ठा करे जाथे अउ ए राशि ल विशेष निधि राज्य सैनिक बोर्ड के कोष म जमा करे जाथे। झंडा के कीमत तय नही हे, एला कोनो भी मनखे मन ह अपन स्वेच्छा ले लेके राशि दान कर सकत हे।
खबर के मुताबिक देश के रक्षा करत भारतीय सशस्त्र सेना के शहीद होय जवान मनके सुरता म हरएक बछर सात दिसंबर के दिन सशस्त्र सेना झंडा दिवस मनाये जाथे।
राज्यपाल पुलिस अधिकारी मुलाकात
राज्यपाल विश्वभूषण हरिचंदन ले आज राजभवन म भारतीय पुलिस सेवा के चार झिन परीविक्षाधीन अधिकारी मन ह सौजन्य भेंट करीन। रायपुर के चंदखुरी म नेताजी सुषाष चंद्र बोस राज्य पुलिस अकादमी के निदेशक रतनलाल डांगी के अगवई म भारतीय पुलिस सेवा के बछर दू हजार बाईस बैच के परीविक्षाधीन अधिकारी मन ह राज्यपाल ले भेंट करीन।
एमा आकाश श्रीश्रीमाल, अजय कुमार, अक्षय प्रमोद सागरा अउ विमल कुमार पाठक शामिल रीहिन। राज्यपाल ह ए जम्मों झिन पुलिस अधिकारी मन बर बढ़िया भविष्य के शुभकामना दीन। ए दौरान ओमन कीहिन कि पुलिस अधिकारी मन ह अपन काम ल सुघ्घर ढंग ले करके समाज अउ देश के सेवा करंय।
माओवादी गतिविधि/स्मारक ध्वस्त
महाराष्ट्र ले लगे छत्तीसगढ़ के अंदरूनी माओवाद प्रभावित गांव मन म सुरक्षा बल के टीम ह गश्त अभियान ल तेज कर देहे। मोहला-मानपुर-अंबागढ़ चौकी जिला के गांव मन म पुलिस टीम के संगेसंग आईटीबीपी, सीएएफ अउ डीआरजी के फोर्स ह लगातार सर्चिंग करत हे।
खबर के मुताबिक महाराष्ट्र के सीमा ले लगे मोहला-मानपुर के कोनो कोनो जगा मन म माओवादी गतिविधि के सूचना मिले म ए कार्रवाई करे जात हे। मोहला-मानपुर ेके संगेसंग राजनांदगांव जिला के माओवाद प्रभावित क्षेत्र बाघनदी, बोरतलाव, बकरकट्टा क्षेत्र मन म घलो सर्चिंग ल तेज कर देहे।
ओति सुकमा जिला के बगड़ेगुड़ा, गांव म डीआरजी बस्तर फाईटर अउ सीआपीएफ के जवान मन ह माओवादी मन डहार ले बनाय गे स्मारक ल ध्वस्त कर दीन। मिले जानकारी के मुताबिक पुलिस अधीक्षक किरण चौहान के अगवई म ये कार्रवाई करे गीस।
गांजा-बरामद
बलराम जिला के रघुनाथ नगर पुलिस के टीम ह कमालपुर गांव के तीर एक ठन गाड़ी ले तीन सौ सत्तर किलो गांजा बरामद करीन हे। पुलिस के मुताबिक गांजा के कीमत ल करीबन छिहत्तर लाख रूपिया बताय जात हे। खबर के मुताबिक आरोपी मन ह ए गाड़ी ले गांजा के तस्करी करत रिहीन। सूचना मिलतेच पुलिस के टीम ह कार्रवाही सुरू करीन। त आरोपी मन ह गाड़ी ल रस्ता म छोड़ के भाग गे। पुलिस ह आरोपी मन के खोजबीन करत हे।
कृषि विश्व विद्यालय मड़ई महोत्सव
रईपुर के इन्दिरा गांधी कृषि विश्व विद्यालय म काली छै दिसंबर ले उनतीसवां अंतर महाविद्यालयीन युवा महोत्सव मड़ई दू हजार तेइस के कारीकरम करे जाही। चार दिन तक चलईया ए महोत्सव म विश्व विद्यालय के अंतर्गत चलाय जात सरकारी अउ प्राइवेट महाविद्यालय मनके एक हजार ले जादा पढ़ईया लइका मन ह सामिल होही। सुभारंभ कारीकरम के मुख्य अतिथि पंडित रविशंकर विश्व विद्यालय के कुलपति प्रोफेसर सच्चिदानंद शुक्ला ल बनाय गेहे। कारीकरम के अगुवई इंदिरा गांधी कृषि विश्व विद्यालय के कुलपति डॉक्टर गिरिश चंदेल ह करही।
मौसम
चक्रवाती तूफान मिचौंग के असर ह छत्तीसगढ़ म घलो देखे जात हे। मौसम विभाग ले मिले खबर के मुताबिक चक्रवाती तूफान मिचौंग ह मध्य बंगाल के खाड़ी अउ दक्षिण तट आंध्रप्रदेश के उपर म हवय, जउन ह उत्तर कोति बारा किलोमीटर प्रति घंटा ेरप्तार ले आगू बढ़त हे। जेखर असर ले प्रदेस म अवईया चौबीस घंटा के दौरान कई जघा म बरसा हो सकत हे। मौसम विभाग ले मिले खबर के मुताबिक राज्य के कोनो-कोनो जघा भारी बरसा होय के संभावना हे। राजधानी रायपुर के संगेसंग राज्य के दक्षिण अउ मध्य छत्तीसगढ़ म आज बीहनियाच ले पानी गिरत हे । जेखर सेती तापमान म गिरावट आगे हे।
मौसम विभाग के मुताबिक अवइया चौबीस घंटा के दौरान प्रदेश के कोनो-कोनो जगा म बरसा हो सकत हे । उंहे प्रदेश म बेमौसम बरसा होय के सेती किसान मनके परेसानी बाढ़ गेहे। बरसा ले फसल ल नुकसान होय के संभावना हे ।
संक्षिप्त समाचार
– आदिमजाति अउ अनुसूचित जाति विकास विभाग डहार ले पोस्ट मैट्रिक छात्रवृत्ति के पात्रता रखइया विद्यार्थी मन ल तीस दिसंबर तक ऑनलाईन आवेदन मंगाय हे ।
– जांजगीर-चांपा जिला के नरियरा गांव के मनखे मन ह रद्दा म पानी भरे के सेती चक्का जाम करीन। बाद म लोक निर्माण विभाग के टीम ह पाइप लगाके पानी ल निकालिन तेखर बाद चक्का जाम खतम करे गीस।
अउ
– रायपुर जिला विधिक सेवा प्राधिकरण डहार ले जारी आने आने संविदा पद बर कौशल परीक्षा ल नौ दिसंबर के करे जाही।