केंद्रीय स्वास्थ्य मंत्रालय ह चीन म सांस संबंधी बीमारी ले सुरू होय सार्वजनिक स्वास्थ्य स्थिति ल देखत तइयारी ले जुड़े उपाय के समीक्षा करे के निर्णय लेहे। मंत्रालय ह राज्य अउ केंद्रसासित प्रदेस मनके तुरते जन स्वास्थ्य अउ अस्पताल मन म स्थिति के समीक्षा करे बर कहिन। उत्तरी चीन म लइका मन म सांस ले जुड़े बीमारी के तेजी ले बाढ़े के सूचना मिले हे। मंत्रालय ह कहिन कि सरकार ए स्थिति उपर नजर राखे हे अउ डर्राए के कोनो बात नइ हे। सबों राज्य अउ केंद्रसासित प्रदेस मन ल कोविड ले जुड़े संसोधित निगरानी के निरदेस ल लागू करे बर केहे गेहे। ओमन ल एन्फ्लुएंजा जइसन अउ गंभीर सांस के बीमारी के निगरानी करे बर केहे गेहे। राज्य मन ल लइका अउ किशोर वर्ग म बिसेस ध्यान देबर केहे गेहे।
आयुष्मान आरोग्य मंदिर
केंद्र सरकार ह आयुष्मान भारत हेल्थ एंड वेलनेस के नांव बदल के ‘‘आयुष्मान आरोग्य मंदिर‘‘ कर देहे। एखर टैग लाइन ‘‘आरोग्यम पारामम धनम‘‘ हे। सबो राज्य अउ केंद्रसासित प्रदेस मन म पाती के माध्यम ले दिसा-निरदेस जारी करके एखर वर्तमान नांव ल सही तरीका ले बदले बर केहे गेहे। मंत्रालय ह नांव बदले के काम ल पूरा करे के बाद प्राथमिक स्वास्थ्य केंद्र मनके फोटो घलो अपलोड करे बर केहे हे।
उच्च न्यायालय-संविधान दिवस
संविधान दिवस के मउका म बिलासुपर के उच्च न्यायालय म न्याय पालिका के आगू खड़े चुनौती अउ निराकरण विषय म संगोष्ठी करे गीस। कारीकरम के मुख्य अतिथि छत्तीसगढ़ उच्च न्यायालय के न्यायाधीश नरेंद्र कुमार व्यास अउ विशिष्ट अतिथि न्यायाधीश राकेश कुमार पाण्डेय रहिन। ए मउका म न्यायाधीश मन ह संविधान के उद्देसिका के वाचन करीन। कारीकरम म न्यायधीश श्रीवास ह कहिन कि संविधान के पालन म न्याय बेवस्था ल सरल बनाके जन-जन ल एखर ले जोड़ना न्यायाधीश मनके पहिली कर्तव्य होना चाही। उहें, न्यायाधीश श्री पाण्डेय ह भारतीय संविधान के महत्ता उपर प्रकास डालत कहिन कि ए ह नागरिक मनके हित अउ उंखर मौलिक अधिकार के रक्षा करथे।
मतगणना तैयारी
छत्तीसगढ़ विधानसभा चुनाव बर मतगणना तीन दिसंबर के सबो जिला मुख्यालय मन म कड़ा सुरक्षा बेवस्था के संग होही। एखर बर निर्वाचन आयोग डहार ले सबो तइयारी करे जात हे। ए सिलसिला म राज्य के मुख्य निर्वाचन पदाधिकारी रीना बाबासाहेब कंगाले के निरदेस म राज्य स्तरीय मतगणना प्रसिक्षण के कारीकरम करे गीस। रईपुर संग आने प्रसिक्षण स्थल म होय ए कारीकरम म राष्ट्रीय अउ राज्य स्तरीय मास्टर ट्रेनर्स मन ह घलो सबो जिला म निर्वाचन ले जुड़े अधिकारी अउ कर्मचारी मन ल मतगणना काम बर प्रसिक्षित करीन।
माओवादी-आगजनी
दंतेवाड़ा ले बैलाडीला के बीच बीतें रतिहा माओवादी मन ह भांसी डामर प्लांट संग किरंदुल सड़क निर्माण म लगे चौदह वाहन म आगी लगा दीन। खबर के मुताबिक दुरूग के एक ठिन कंपनी के कर्मचारी दंतेवाड़ा ले बैलाडीला के बीच सड़क सुधार अउ विनिर्माण के काम म लगे रहिन। इही दौरान भांसी के कैंप म करीबन पचास के संख्या म माओवादी पहुंचिन। ओमन ह चार हाईवा, चार पिकअप, ए जेसीबी, एक क्रेन, एक सिफ्टर ट्रक, दू पानी टैंकर, एक मिक्सर वाहन संग चौदह वाहन म आगी लगा दीन। संगेसंग इंहा तैनात गार्ड ल घलो बंधक बना लीन। माओवादी मन ह गार्ड ल कोनो नुकसान नइ पहुंचाय हे। घटना के बाद ईलाका म सर्चिंग बढ़ा दे गेहे।
उहें, नारायणपुर जिला म माओवादी मन ह नारायणपुर ले ओरछा रद्दा म रायनार के तीर पेड़ ल काटके सड़क यातायात ल बाधित करीन। एखर चलत बस मनके अवई-जवई ह नइ हो पाइस। माओवादी मन ह पर्चा फेक के विरोध करीन। इलाका म सुरक्षा बेवस्था बढ़ा दे गेहे।
गुरूनानक जयंती/कार्तिक पुर्णिमा
सिक्ख मनके पहिली गुरू अउ सिक्ख पंथ के संस्थापक गुरूनानक देव जी के जयंती आज छत्तीसगढ़ संग देस भर म उछाह के संग मनाय जात हे। ए मउका म राजधानी रईपुर संग प्रदेस के आने-आने जिला मन म नगर किर्तन निकाले गीस। राष्ट्रपति द्रौपदी मुर्मू, उप राष्ट्रपति जगदीप धनगड़ अउ प्रधानमंत्री नरेंद्र मोदी ह गुरूनानक देव के जयंती के मउका म देस-विदेस म रहईया सबो भारतीय बिसेस रूप ले सिक्ख समुदाय के लोगन ल सुभकामना दीन। उहें, आज कार्तिक पुन्नी घलो हरय। ए मउका म श्रध्दालु मन ह नदी म पवित्र स्नान करके भगवान शिव के अराधना करीन। ए मउका म राजधानी रईपुर संग प्रदेस के आने-आने जघा मन म मेला घलो लगाय जात हे। रईपुर के महादेव घाट स्थित खारून नदी के तट म आज ले तीन दिन तक होवईया पुन्नी मेला के सुरूआत होइस। मुंधरहा ले ही महादेव घाट म श्रध्दालु मन के अवई-जवई सुरू हो गेहे। इंहा के प्राचीन हटकेश्वर शिव मंदिर म घलो श्रध्दालु मनके भीड़ लगे रहिस। खबर के मुताबिक शरद पुर्णिमा ले कार्तिक पुर्णिमा तक एक महिना के पुण्य स्नान करे के परंपरा निभाय जाथे।
मलेरिया मुक्त छत्तीसगढ़ अभियान
बस्तर संभाग म काली अठ्ठाईस नवंबर ले मलेरिया मुक्त छत्तीसगढ़ अभियान के नौवा चरण सुरू होही। ए अभियान अवईया अट्ठारा दिसंबर तक चलही। ए अभियान के दौरान अबूझमाड़ संग आने मलेरिया प्रभावित क्षेत्र मन म डेढ़ लाख ल जादा लोगन के मलेरिया जांच करे जाही। एखर बर सर्वे दल के संघ सुपरवाइजर के घलो ड्यूटी लगाय गेहे। स्वास्थ्य कार्यकर्ता मन डहार ले मलेरिया प्रभावित लोगन मन ल तुरते एंटीमलेरिया के दवाई खवाय जाही। उहें, दवा के दूसरा अउ तीसरा डोज घलो मितानिन के निगरानी म दे जाही। जेखर ले लोगन के पूरा ईलाज हो सकय। ए अभियान ल सफल बनाय बर कुछेक दिन पहिली सर्वे दल मन ल प्रसिक्षण घलो दे गीस। अभियान ल लेके जन-जागरूकता आधारित कारीकरम मनके आयोजन घलो करे गीस। एमा क्षेत्रीय भाषा मन म नुक्कड़ नाटक के माध्यम ले लोगन ल जागरूक करे बर मच्छरदानी के उपयोग अउ घर के दीवार मन म मलेरिया रोगी दवा के छिड़काव करे बर प्रेरित करीन।
रायगढ़-शव बरामद
रायगढ़ सहर के जूट मिल थाना क्षेत्र ले लगे नेतनागर गांव म एक झिन माईलोगिन अउ लइका के शव मिले हे। बताय जात हे कि पैरावट म आगी लगे रहिस अउ आगी ल बुझाय के बाद दू ठिन आधा जले लाश मिलिस संका जताय जात हे कि ए दूनों के हत्या करे के बाद शव ल पैरावट म फेंक के आगी लगाइस। जिला के पुलिस अधीक्षक सदानंद कुमार ह बताइन कि गांव ले कोनो लापता नइ हे। अइसन म ए शव ल कहू अउ ले लाय गे होही। घटना तीर ले टायर के निसान मिले हे। फेर अभी शव के पहिचान नइ होय हे।
हाथी-मौत
मुंगेली जिला के खुड़िया क्षेत्र म करेंट लगे ले एक ठिन हाथी के मउत होगे। वन विभाग ह आशंका जताय हे कि सिकारी मन ह वन्यजीव के सिकार करे बर बिजली के तार बिछाय रिहीन। जेखर चपेट म आय ले हाथी के मउत होय हे। मंुगेली के डीएफओ सत्यदेव शर्मा ह बताइन कि घटना के जांच सुरू होगे हे अउ संका के आधार म मउका ले करीबन छै लोगन ल हिरासत म ले गेहे।
मौसम
राजधानी म अवईया दिसंबर के महिना म जोरदरहा जाड़ पड़े के संभावना हे। उहें, अवईया दू दिन म एक-दू जघा मन म हल्का ले मध्यम बरसा हो सकत हे। मौसम विज्ञानी एच.पी.चन्द्रा ह बताइन कि बंगाल के खाड़ी ले बड़का पैमाना म नमी आवत हे। उहें, मध्यप्रदेस म घलो एक ठिन चक्रवात बने हुए हे। एखर असर राज्य के मौसम उपर घलो पड़े हे अउ तापमान म गिरावट दर्ज करे गेहे। ठंडा हवा के सेति पाछू एक हफ्ता ले सरगुजा संभाग के तापमान म सरलग गिरावट आवत हे। काली अंबिकापुर म ए मौसम म पहिली बार पारा दस डिग्री सेल्सियस ले नीचे पहुंच गीस। मैनपाट अउ बलरामपुर जिला के सामरी पाट ईलाका म घलो जादा जाड़ पड़त हे। राजधानी रईपुर संग तीर-तखार के इलाका मन म आज बिहनिया ले ही बादल छाय रिहीस।